Imran's Poetry: 04/17/16

Apr 17, 2016

Hai faghaan-e-lala-o-gul mast nazaron kay saath

Bujh rahi hai tishnagi pholon ki angaron kay saath

Aye ga shayed aziz-e-misar biknay kay liye

Aaj khud Yousaf ki dekha hai khari'daron kay saath

Her qadam par zindagi ki aabru khatray main hai

Zulmaton kay qaaflay dekhay hain meh'paron kay saath

Muflison par hans rahi hain azmatein iblees ki

Aur Khuda ki rehmatein mansoob zar'daron kay saath

Sar-e-bar'hana Aabida kam'khawab-o-resham kay baghair

Naachti hai Aasma Sikon ki jhankaron kay saath

Naghma-e-bul'bul nahin to nala-e-dil hi sahi

Miltay jultay hain biyaban bhi chaman zaron kay saath

Gham kay mujrim khushi kay mujrim hain

Log ab zindagi kay mujrim hain

Aur koi gunnah yaad nahin

Sajda-e-be'khudi kay mujrim hain

Istaghasa hai raah-o-manzil ka

Rah'zan , rehbari kay mujrim hain

Meh'kaday main yeh shor kaisa hai?

Bada'kash bandagi kay mujrim hain

Dushmani aap ki inayat hai

Hum faqat dosti kay mujrim hain

Hum faqeeron ki suraton pe na ja

Khidmat-e-aadmi kay mujrim hain

Kuch ghazalan-e-aagahi Saghar

Naghma-o-shairy kay mujrim hain

Chandani shab hai sitaron ki rida'ein si lo

Eid aayi hai baharon ki rida'ein si lo

Chasham-e-saqi se kaho tishna umeedon kay liye

Tum bhi kuch bada gusaron ki rida'ein si lo

Her baras sozan-e-taqdeer chala karti hai

Ab kuch to seena fagaron ki rida'ein si lo

Log kehtay hain taqadus kay sabu tootein gay

Jhoomti raah'guzaron ki rida'ein si lo

Qulzam khuld se Saghar ki sada aati hai

Apnay be'taab kinaron ki rida'ein si lo

Teri nazar kay isharon se khel sakta hoon

Jiger faroz shararon se khel sakta hoon

Tumharay daman-e-rangeen ka aasra le kar

Chaman kay mast nazaron se khel sakta hoon

Kisi kay ehad-e-mohabbat ki yaad baqi hai

Baray haseen saharon se khel sakta hoon

Maqam-e-hosh-o-khird intiqam-e-wehshat hai

Junoon ki rah'guzaron se khel sakta hoon

Mujhay khizan kay bagoolay salam kartay hain

Haya farosh chinaron se khel sakta hoon

Sharab-o-shair kay dariya main doob kar saghar

Saroor-o-kaif kay dharon se khel sakta hoon

Sham-e-khizan ki gum sum boli

Jeewan lamhay zehar ki goli

Meray aansu aur sitaray

Khail rahay hain aankh macholi

Do pholon ki khatar tarsein

Aaj baharon kay hum'joli

Chand ka saya chatt par utra

Hum'saye ne khirki kholi

Tor diya dam dewano ne

Umar junoon ki poori holi

Phool bhi hai , kaanta bhi hai

Mann maila hai ' surat bholi

Lambi hai taqdeer ki dori

Kis ne maapi , kis ne toli

Apni duniya rain basera

Apni doulat khali jholi

Jism ka zindaan rozan rozan

Jab jee chaha sui chubho li

Meray shairon ka maj'mooha

Mast kharamon ki toli

Khaak-e-dar-e-meh'khana hum ne

Saqi ! paimano main gholi

Pattay bhi ashjaar kay naghmay

Saye hain dewaar ki boli

Cheent gham-e-asiyan ki "Saghar"

Hum ne sharab-e-naab main dho li

Sehan-e-kaaba bhi yahi hai to sanam khanay bhi

Dil ki duniya main gulistan bhi hain veeranay bhi

Log kehtay hain ajara hai teray jalwon par

Itnay arzan to nahin teray dewanay bhi

Aatish-e-ishq main pathar bhi pighal jatay hain

Mujram-e-soz-e-wafa shamma bhi , parwanay bhi

Kuch fasano main haqeeqat ki jhalak hoti hai

Kuch haqeeqat se bana letay hain afsanay bhi

Meray ashaar hain tasveer-e-tamana Saghar

In aagosh main hain dard kay afsanay bhi

Ae dewaro kuch to bolo jhooti chup kay bandhan kholo

Ae dewaro kuch to bolo

Jhooti chup kay bandhan kholo

Shayed koi qulzam niklay

Sehraon ki jaib ta'tolo

Un ka wada subha ka tara

Yeh chingari mann main chubho lo

Is shab ki majrooh sehar tak

Jaltay rehna dil kay pha'pholo

Raat ka punchi kehta jaye

Din charh aaya aankhein kholo

Ravi ki lehron pe naacho

Ae punjab kay tapo , dholo

Phool khilein barsaat main jaisay

Aaj zara hans hans kar ro lo

Saqi ! pani may ban jaye

Saghar kay ashaar ko gholo

Gham-e-hasti ki zanjeeron se insan ko kahan fursat

Yeh duniya hai yahan her lamha taqdeer zaalim hai

Meray afsana-e-be'naam ki tehreer zaalim hai

Gham-e-hasti ki zanjeeron se insan ko kahan fursat

Kabhi halaat zaalim hain , kabhi tadbeer zaalim hai

Musawer ka qalam rangeeniyon main doob kar ubhra

Tasawur muskura kay keh gaya tasveer zaalim hai

Chragh-e-aarzu ko ik sahara de hi jati hai

Yahan dhaltay huye suraj ki tanveer zaalim hai

Palat kar zindagi ko zakham-e-taza de gayi aksar

Hamaray naala-o-shaywan ki her taseer zaalim hai

Chubho kar nashtar baith jatay hain kahin "Saghar"

Shawahid keh rahay hain yeh falak be'peer zaalim hai

Moj-dar-moj kinaron ko saza milti hai

Koi doobay to saharon ko saza milti hai

Meh'kaday se jo nikalta hai koi be'nasha

Chasham-e-saqi kay isharon ko saza milti hai

Aap ki zulf-e-parishan ka tasawur toba !

Nikhat-o-noor kay dhaaron ko saza milti hai

Jab woh danton main dabatay hain gulabi aanchal

Kitnay pur kaif nazaron ko saza milti hai

Meray paymanay main dhal jata hai pholon ka shabaab

Meray "Saghar" main baharon ko saza milti hai

Nazar nazar be'qaraar si hai , nafs nafs pur'israar sa hai

Main jaanta hoon keh tum na aayo gay , phir bhi kuch intizar sa hai

Meray azizo ! meray rafeeqo ! koi nayi dastaan chero !

Gham-e-zamana ki baat choro ! yeh gham to ab saaz'gaar sa hai

Wohi fasurda sa rang-e-mehfil , wohi tera aik aam jalwa

Meri nigahon pe baar sa tha , meri nigahon pe baar sa hai

Kabhi to ayo ! kabhi to baitho , kabhi to dekho , kabhi to poocho !

Tumhari basti main hum faqeeron ka haal kiyon so'gawar sa hai

Chalo keh jashn-e-bahar dekhein , chalo keh zarf-e-bahar jaanchein

Chaman chaman roshni hui hai , kali kali pe nikhar sa hai

Yeh zulf bar'dosh kon aaya , yeh kis ki aahat se gul khilay hain

Mehak rahi hai fiza-e-hasti , tamaam aalam bahar sa hai

Bad'nami-e-hayat se ranjoor ho gaye

Ae yaar ! teri baat se ranjoor ho gaye

Yazdan kay hadsaat pe hum ne kiya yaqeen

Apni shakist-e-zaat se ranjoor ho gaye

Murjhaa kay reh gayi gham-e-dushnaam ki bahar

Fasal-e-takalufaat se ranjoor ho gaye

Her rah'guzar pe choor hain insaniyat kay paon

Sheeshay ki kainaat se ranjoor ho gaye

Apno ne zindagi main ha'rasan kiya mujhay

Ghairon kay iltafaat se ranjoor ho gaye

"Saghar" sakoon de gi dil ki kasak hamein

Aksar khushi ki baat se ranjoor ho gaye