Main qabil-e-nafrat hoon to chor de mujh ko Wasi

Main qabil-e-nafrat hoon to chor de mujh ko Wasi 

Tu mujh se youn dikhaway ki mohabbat na kiya kar 

Kisi ki aankh kay aansu mujhay ronay nahin detay

Kisi ki aankh kay aansu 

mujhay ronay nahin detay 

Kisi kay bheegtay lehjay 

Mujhay khonay nahin detay 

Kisi kay reshmi gaysu

Mujhay sonay nahin detay 

Mujhay her pal sata'tay hain 

Mujhay her dam jagaatay hain 

Kabhi jo oongh jaaon to 

Kisi dam bhool jaon to 

Kisi ki narm si aahat 

Kabhi anjaan lagti hai 

Kabhi paighaam lagti hai 

Bhala sa naam lagti hai 

Kabhi ronay nahin deti 

Kabhi sonay nahin deti 

Magar yeh sach meri jaana !

Tujhay main ne nahin jaana 

Magar aansu jo behtay hain 

Jinhein hum aam sehtay hain 

Bhout takleef detay hain 

Kabhi tootein jo nazron se

Kabhi chootein jo palkon se

Bhout hasaas lagtay hain 

Kisi ki aas lagtay hain 

Magar jab gir hi jayein to 

Zameen main mitt hi ho jayein to 

Kisi ko kuch nahin hota 

Magar phir kuch nahin rehta 

Magar jab ho kabhi aisa

Kisi ki aankh kay aansu 

Meri jab aankh main aayein 

To phir main 

Main nahin rehta 

Mera phir dil yeh kehta hai 

Kisi seepi main band ho kar 

Banu moti ki surat main

Dhalon matti ki surat main 

Kisi ki aankh ka aansu 

Bahay jab aankh se meri 

Laga de aag hasti main 

Rahoon phir kiyon uss basti main 

Jissay sab log kehtay hain 

"Mohabbat Lok: kehtay hain 

Koi jo aankh pur'nam hai 

Koi jo zulf barham hai 

Yeh sab meri wajah se hai 

Yeh jo aansu chalaktay hain

Meray dil main dehaktay hain 

Ussi dam hum behaktay hain 

Magar yeh sarhadein jaana

Hamaray beech main hayel

Karein kaisay unhein qayel 

Jo hum ko rog detay hain 

Milan ko jog detay hain 

Yeh aansu kab hamaray hain 

Yeh aansu log detay hain 

Yeh aansu log detay hain .....!!

Chandni raat kay haathon pe sawar utri hai

Chandni raat kay haathon pe sawar utri hai 

Koi khushbu meri dehleez kay paar utri hai 

Is main kuch rang bhi hain , khawab bhi , meh'kaar bhi hai 

Jhil'milaati hui khawaish bhi hai , inkaar bhi hai 

Issi khushbu main kai dard bhi , afsanay bhi 

Issi khushbu ne banaye kai dewane bhi 

Meray aanchal pe umeedon ki qataar utri hai 

Koi khushbu , meri dehleez kay paar utri hai 

Issi khushbu se kisi yaad kay dar khultay hain 

Meray pairon se jo liptay to safar khultay hain 

Yeh hi khushbu jo mujhay ghar se utha laayi thi

Ab kisi tor palat kar nahin janay deti 

Meri dehleez bulaati hai mujhay , loat aayo !!

Yeh hi khushbu mujhay wapis nahin janay deti 

Ranj aur dard main doobi yeh bahar utri hai 

Koi khushbu meri dehleez kay paar utri hai 

Khamoshi raat ki daikhta hoon aur tujhay sochta hoon

Khamoshi raat ki daikhta hoon aur tujhay sochta hoon 

Mad'hosh aksar ho jata hoon aur tujhay sochta hoon 

Hosh walon main jata hoon to ulajhti hai tabiyat 

So be'hosh para rehta hoon aur tujhay sochta hoon 

Tu mann main meray aa jaa main tujh main samaa jaon 

Adhooray khawab sajota hoon aur tujhay sochta hoon 

Jama'nay lagti hai jab lahu mera furqat ki hawaein 

To shaal qurbat ki oorhta hoon aur tujhay sochta hoon 

Mujh se woh aksar kehti thi

Kasak 

Mujh se woh aksar kehti thi 

Meri bas itni khawaish hai 

Kuch aisi pehchani jaon 

Aap kay naam se jani jaon 

Dewar pe larza hai to dar kaamp raha hai

Dewar pe larza hai to dar kaamp raha hai 

Bichray ho to ujra hua ghar kaamp raha hai 

Tum aankh ki putli main chuppay sach ko bhi dekho 

Mujrim to nahin hai woh agar kaamp raha hai 

Veeran hai is darja teray baad mera dil 

Is shaher main aatay huye darr kaamp raha hai 

Ik main keh judai ne mujhya kar diya saakat 

Ik tu hai keh sadmay se udher kaamp raha hai 

Aangan ko palat jaon na main chor kay us ko 

Sehra main mera khawab-e-safar kaamp raha hai 

Ya to meri beenai pe hai khouf musalat 

Ya nehar kay paani main shajar kaamp raha hai 

Bujhnay nahin doon ga main kabhi hijar kay sadmay 

Dil main teri yaadon ka sharar kaamp raha hai

Pa'barhana aur meray charon taraf tanhaiyan

Pa'barhana aur meray charon taraf tanhaiyan 

Chun raha hoon teri yadon ki sulagti kirchiyan 

Kya kahein tark-e-taluq ka irada to nahin 

Yaad jo karnay lagay ho tum purani talkhiyan 

Aah ! woh mousam woh heelay aur kinara nehar ka 

Yaad aati hain mujhay campus ki sari khushiyan 

Kya kisi wehshat zada mousam ka tum ko khouf hai 

Kis liye khamosh ho kholo na dil ki khirkiyan 

Main ussay shohrat kay baam-o-dar pe ponchanay kay baad 

Apnay daman main chupa lay jaon ga ruswaiyan 

Apni barbadi ka main jaa kar kissay ilzaam doon 

Apnay hathon se daboein main ne apni kashtiyan 

Jeet to jata hoon phir bhi dukh sa rehta hai mujhay 

Kab talak us se main khelon ga shakista baziyan 

Boliyan lagti hain ab bhi khushbu'on ki shaher main 

Aaj bhi bazar main bikti hain nazuk titliyan 

Leejiye is dil ka phir mah-e-moharram aa gaya 

Matamon ka shor hai aur chal rahi hain barchiyan 

Yaad hai mujh ko december main judai ki woh raat 

Chand ki kirnein lahu main ban gayein chingariyan 

Hijar kay saahil pe kis kay muntazir baithay ho tum 

Is samandar se bhala kab lot'ti hain kashtiyan 

Phir kaseela zaiqa mousam ka is dil ko laga 

Phir se aankhon main utar ayein purani talkhiyan 

Kon janay kis se badla lay raha hoon main Wasi 

Aik muddat se ragon main paal kar veeraniyan

Kaisa maftooh sa manzar hai kai sadiyon se

Kaisa maftooh sa manzar hai kai sadiyon se 

Meray qadmon pe mera sar hai kai sadiyon se 

Khouf rehta hai na sailaab kahin lay jaye 

Meri palkon pe tera ghar hai kai sadiyon se 

Us kay pani main bhi pehlay sa woh thehrao nahin 

Tu bhi be'chain samandar hai kai sadiyon se 

Ashk aankhon main sulagtay huye so jatay hain 

Yeh meri aankh jo banjar hai kai sadiyon se 

Kon kehta hai mulaqat meri aaj ki hai 

Tu meri rooh kay andar hai kai sadiyon se 

Yeh mujhay saans bhi khul kar nahin lenay deta 

Meri sheh'rag pe jo khanjar hai kai sadiyon se 

Ae meri maan main her aik dhoop se larr sakta hoon 

Meray sar pe teri chadar hai kai sadiyon se 

Main ne jis kay liye her shakhs ko naraz kiya 

Rooth jaye na yeh hi dar hai kai sadiyon se 

Us ki aadat hai jarrein kaat'tay rehnay ki Wasi 

Jo meri zaat ka mehwar hai kai sadiyon se

Main us kay hisar se niklon to aur kuch sochon

Main us kay hisar se niklon to aur kuch sochon 

Tumharay pyar se niklon to aur kuch sochon 

Teri gali kay ilawa bhi aur qariyeh hain 

Jo is diyaar se niklon to aur kuch sochon 

Tumharay hijar ki sadiyan tumharay wasal kay din 

Main is shumar se niklon to aur kuch sochon 

Racha hua hai tera ishq meri poron main 

Main is khumar se niklon to aur kuch sochon 

Yeh mera jism keh maatam sara-e-hasrat hai 

Main is mizar se niklon to aur kuch sochon 

Yeh mujh main kon meray raat din sambhalta hai 

Is ikhtiyar se niklon to aur kuch sochon 

Tumharay jism ki khushbu ne kar diya mashoor 

Is aabshaar se niklon to aur kuch sochon 

Yeh be'qarari meri rooh ka ujaala hai 

Main is qaraar se niklon to aur kuch sochon 

Janay kiyon 15 ka tanha aur udasi pehnay chand

Zid

Janay kiyon 15  ka tanha 

Aur udasi pehnay chand 

Mujh ko acha lagta hai 

Shayed youn 14 to ab meri zid hai 

Kiyon keh 14 ka khush chand 

Us ko acha lagta tha 

Us ne yeh meri mohabbat ko naya mor diya

Us ne yeh meri mohabbat ko naya mor diya 

Aaj meray liye balon ko khula chor diya

Tum se meri baat hui thi

Wapsi ka noha 

Tum se meri baat hui thi 

Tum ne mujh ko samjhaya tha 

Apni zaat se baahir niklo 

Ghar ko loto 

Ghar ko dekho 

Aur bhi log tumharay dam se zinda hain 

Tum main apni sari khushiyan 

Dekh rahay hain 

Soch liya hai 

Dekh liya hai 

Loat aaya hoon 

Lakin meray andar koi toot gaya hai 

Abhi to ishq main aisa bhi haal hona hai

Abhi to ishq main aisa bhi haal hona hai 

Keh ashk rokna tum se mohaal hona hai 

Her aik lab pe hain meri wafa kay afsanay 

Teray sitam ko abhi la'zawal hona hai 

Baja kay khaar hain lakin bahar ki rut main 

Yeh teh hai ab kay hamein bhi nihaal hona hai 

Tumhein khabar hi nahin tum to loat jao gay 

Tumharay hijar main lamha bhi saal hona hai 

Hamari rooh pe jab bhi azaab utrein gay 

Tumhari yaad ko is dil ki dhaal hona hai 

Kabhi tu roye ga woh bhi kisi ki baanhon main 

Kabhi to us ki hansi ko zawal hona hai 

Milein gi hum ko bhi apnay naseeb ki khushiyan 

Bas intizaar hai kab yeh kamaal hona hai 

Her ik shakhs chalay ga hamari raahon par 

Mohabbaton main hamein woh misal hona hai 

Zamana jis kay kham-o-page main ulajh jaye 

Hamari zaat ko aisa sawal hona hai 

Wasi yaqeen hai mujh ko woh loat aaye ga 

Ussay bhi apnay kiye ka malaal hona hai 

Ae dil'kash larkiyo tum kabhi kisi se

Ae dil'kash larkiyo . . . .! Tum 

Kabhi kisi se bhi dukh na kehna 

In aanchlon se 

Khanakti rangeen churiyon se 

Badan ki apni hi khushbu'on se 

Palak kay uthnay , palak jhapaknay 

Ki sa'aton se 

Chatton kay kono main chup kay baithi 

Woh shokh-o-shang aur naaz parwar si chandni se 

Diyon ki lu se

Ya un kutab se keh jin main phoolon kay titliyon kay haseen dukh hon 

Palang pe salwaton bharri saaf chadron se

Gudaaz takiyon se jin main zulfon ki khushbu'ein raqs kar rahi hon 

Tum aaino aur jugnu'on se 

Saheliyon aur doston se 

Kabhi bhi masoom larkiyo . . . tum ...!

Woh dukh na kehna 

Siyah raaton main jis ko apni 

Udaas aankhon se 

Apnay hi dil ki dharkano se 

Chupa chupa kar bikhar rahi thein 

Kabhi bhi dekho woh dukh na kehna

Kabhi bhi ae larkiyo . . . . !

Wa'garna .........

Aadha chand aur poora dukh

Aadha chand aur poora dukh 

Jab se tum bichray ho tab se

Aadha chand agar dekhon to 

Meri aankhein bhar aati hain 

Falak pe chand kay haalay bhi sog kartay hain

Falak pe chand kay haalay bhi sog kartay hain 

Jo tu nahin to ujaalay bhi sog kartay hain 

Tumharay haath ki churi bhi bain karti hai 

Hamaray hont kay talay bhi sog kartay hain 

Nagar nagar main woh bikhray hain zulam kay manzar 

Hamari rooh kay chaalay bhi sog kartay hain 

Ussay kaho keh sitam main woh kuch kami kar de 

Keh zulam tornay walay bhi sog kartay hain 

Tum apnay dukh pe akelay nahin ho afsurda 

Tumharay chahnay walay bhi sog kartay hain 

 

Yeh kab kaha tha nizaron se khouf aata hai

Yeh kab kaha tha nizaron se khouf aata hai 

Mujhay to chand sitaron se khouf aata hai 

Main dushmano kay kisi waar se nahin darta 

Mujhay tp apnay hi yaaron se khouf aata hai 

Khizan ka jabar to seenay pe rok letay hain 

Hamein udas baharon se khouf aata hai 

Milay hain dosto be'sakhiyon  se gham itnay 

Meray badan ko saharon se khouf aata hai 

Main iltafaat ki khandaq se door rehta hoon 

Taluqaat ki gharon se khouf aata hai 

Mujhay her kaam se pehlay

Mujhay her kaam se pehlay 

Mujhay her kaam se pehlay 

Sehar se shaam se pehlay 

yehi ik kaam karna hai 

Tumhara naam lena hai 

Tum hi ko yaad karna hai 

Keh jab bhi dard peena hai 

Keh jab bhi zakham seena hai 

Gham-e-duniya se ghabra kar 

Mujhay jab jaam lena hai 

Tumhara naam lena hai 

Tum hi ko yaad karna hai 

Tumhari yaad hai dil main 

Keh ik siyaad hai dil main 

Koi bar'baad hai dil main 

Ussay abaad karna hai 

Tumhara naam lena hai 

Tum hi ko yaad karna hai 

Main janta hoon keh ab chatton par

Diya jalana 

Main janta hoon keh ab chatton par 

Diye jalanay ki rasam baqi nahin rahi hai 

Magar tumhein meri yaad aaye 

To yaad rakho ......!

Tum apni aankhon se

Aansu'on kay chamaktay moti na girnay dena 

Bas itna karna 

Keh apni chatt par 

Meri mohabbat ki nazam gaa kar 

Meri rafaqat ko yaad kar kay 

Diya jalana 

Tum apni chatt par kisi bhi konay main baith kar 

Ik diya jalana . . . . !

Kehtay ho keh bichray koi muddat nahin guzri

Kehtay ho keh bichray koi muddat nahin guzri 

Lagta hai kabhi tum ne calendar nahin dekha