Woh to yeh kehiye gharri tujh se juda honay ki thi

Woh to yeh kehiye gharri tujh se juda honay ki thi 

Warna yeh saa'at jo thi meray Khuda honay ki thi 

Tujh ko yeh zid keh main teri aankhon se dekhta 

Aur mujhay khawaish teray lab se ada honay ki thi 

Meri beenai khas-o-khashaak mousam lay urray 

Jisam-o-jaan main to sakat , tujh se riha honay ki thi 

Aik chup rehnay kay sab ilzaam mujh par hi na thay 

Khamoshi par bhi to tohmat lab-e-kusha honay ki thi 

Khilwat-e-jaan main agar aana hai to dastak na day 

Mujh se woh bhi kab hui hai jo khata honay ki thi 

Main khud apni aag hi main jal bujha to yeh khula 

Shart jalnay ki nahin thi keemiya honay ki thi 

Roothnay walay ko aakhir kon samjhata Saleem 

Yeh bhi koi umar ab is kay khafa honay ki thi

Ussay kehna kabhi milnay chala aaye

Ussay kehna 

Kabhi milnay chala aaye 

Hamaray paon main jo raasta tha 

Raastay main pairr thay 

Pairon par jitni tahiron ki toliyan 

Hum se mila karti thein 

Ab woh urtay urtay thak gayi hain 

Woh ghanni shakhein jo hum pe saya karti thein 

Woh sab murjha gayi hain 

Tum ussay kehan 

Kabhi milnay chala aaye 

Labon pe lafz hain 

Lafzon main koi daastan , aissa, kahani 

Jo ussay aksar sunatay thay 

Kissay ja kar sunaein gay 

Bataein agy 

Keh hum mehraab-e-aabru main sitaray taanknay walay 

Dar-e-lab , bosa-e-izhaar ki dastak se aksar kholnay walay 

Kabhi bikhri hui zulfon main hum 

Mehraat kay gajray bana kar bandhnay walay 

Chragh aur aainay kay darmiyan 

Kab se sar-e-saahil kharray mojon ko taktay hain 

Ussay kehna 

Ussay hum yaad kartay hain 

Ussay kehna 

Hum aa kar khud ussay miltay 

Magar maqtal badaltay mousamon kay khoon main rangeen hain 

Aur hum 

Qataar andar qataar aisay bhout se mousamon kay darmiyan 

Tanha kharray hain 

Janay kab apna bulawa ho 

Keh hum main aaj bhi 

Ik umar ki wa'raftagi aur wehshaton ka raqs jari hai 

Woh baazi jo bisat-e-jaan pe kheli thi 

Abhi hum ne jeeti hai na haari hai 

Ussay kehna kabhi milnay chala aaye 

Keh ab ki baar shayed 

Apni baari hai

 

Mujhay khaber thi mere baad woh bikhar jaata

Mujhay khaber thi mere baad woh bikhar jaata

So us ko kis kay bharosay pe chor kar jaata 

Woh koi nasha nahin tha keh toot'ta mujh ko 

Woh saniha bhi nahin tha keh jo guzar jaata 

Ruka hua tha mera saans mere seenay main 

Ussay galay na lagata to ghut kay mar jaata

Shakista ho gaya pindaar-e-aaina . warna 

Yaqeen kar main tere ishq se mukar jaata 

Na janay kitnay mohazon pe jung thi meri 

Bas aik wada nibhanay main apnay ghar jaata 

Phir jee uthay hain jis se woh imkaan tum nahin

Phir jee uthay hain jis se woh imkaan tum nahin 

Ab jo bhi kar raha hai yeh ehsaan , tum nahin 

Mujh main badal raha hai jo ik aalam-e-khyal 

Us lamha-e-junoon kay nighibaan tum nahin 

Bujhtay huye chragh ki lo jis ne tez ki 

Woh aur hi hawa hai meri jaan , tum nahin 

Phir youn hua keh jaisay girah khul gayi koi 

Mushkil to bas yahi thi keh asaan tum nahin 

Tum ne sunni nahin hai sada-e-shakist-e-dil 

Hum jhailtay rahay hain yeh nuksaan , tum nahin 

Yeh aalam-e-zahoor hai hijrat zada "Saleem"

Hum bhi dukhi hain sirf parishaan tum nahin