Imran's Poetry: 03/19/16

Mar 19, 2016

Khwaishein tujh ko khawab de dain gi

Mustaqil ik azaab de dain gi

Kaantay chuntay phiro gay barson tak

Yeh rutein to gulaab de dain gi

Kuch na mango mohabbaton se keh yeh

Phir naya ik saraab de dain gi

Kaato mehnat se saa'atein apni

Yeh tumhein ik nisaab de dain gi

"Saad" uljha na kar sawalon main

Warna sochein jawab de dain gi

Tum na pehchan paao gay mujh ko

Shaher tha is khandar kay neechay bhi

Ik udasi si mujh pe chaai hai

Her anaa tootnay ko aayi hai

Shor andar kay baantna hai mujhay

Dil pe dewaar si uthaai hai

Apnay dushman banay rahay hain hum

Us se youn dosti nibhaai hai

Ab kahani banaye gi duniya

Baat khud hum ne hi barhaai hai

Apni basti ko pyar dena hai

Qarz yeh bhi utaar dena hai

Itna asaan nahin hasool-e-haq

Khud ko baatil qaraar dena hai

Heel-o-hujat nahin mohabbat main

Paas jo bhi hai waar dena hai

Kis tawaqo pe hum larein khud se

Paas jo bhi hai haar dena hai

"Saad" yeh zindagi samjh aayi

Apni khwaish ko maar dena hai

Shaher-e-dil kay jo isharay tootay

Khawab ik jhatkay main saaray tootay

Is dafa ik naya saahil tha

Moj aayi to kinaray tootay

Kaisay toofan ne bachaya hum ko

Jab keh sab apnay saharay tootay

Apni azmat ki nishan kis ko milay

Apnay dil kay to meenaray tootay

Ik taaluq tha yaqeenan koi

Chand dooba to sitaray tootay

Dil samandar mera qatal thehra

Main keh ujra hua saahil thehra

Aik aansoo main simat aaya hoon

Zindagi ! main tera haasil thehra

Ik hawas'naak muh'ema hoon main

Mujh ko samjho keh main jaahil thehra

Tum hi manzir ko badal kar dekho

Main hoon nadim keh main kaahil thehra

Kya haqeeqat hai keh aankhon main meray

Her tasawur tera baatil thehra

Main musal'sal azab sehta hoon

Kiyon teri dastaras main rehta hoon

Main teh-e-chasham hoon kahin shayed

Ashak ban kar tabhi to behta hoon

Koi sunta nahin hai baat meri

Kya khabar hai keh kya main kehta hoon

Meri tameer bhi ajab hai "Saad"

Roz banta hoon roz dhalta hoon

"Saad" marna hai aik din mujh ko

Is tamana pe zinda rehta hoon

Saad jee bhar kay tum hanso ab kay

Aaj ban kay adu khulay apnay

Khoon rawan hai meri wareedon main

Dard kay qaaflay nahin ruktay

Zor parta hai jab tabiyat par

Shair ban kar utartay hain sapnay

Moj dar moj rait geeli hui

Ab yahan paaon apna kaisay paray

Kuch to be'chainiyan hain "Saad" apni

Kuch hain gardaab paaon kay halqay

Us ne mujh ko nazar andaz kiya

Aik darr apni taraf baaz kiya

Itni jaldi na fasana banta

Hum ne her baat ko kiyon raaz kiya

Itni hairat main woh sochay kaisay

Hum ne kiya kuch pas-e-parwaz kiya

Baans ka tukra tha shayed dil bhi

Hum ne chaida to ussay saaz kiya

"Saad" aisi bhi kya daad mili

Us ne shairon pe meray naaz kiya

Us ne pehlay mujhay dewar kiya

Aur phir khud hi ussay paar kiya

Us ko dekhon to na dekha jaye

Mujh ko is khouf ne beemar kiya

Main keh khamosh raha mehfil main

Bas youn hi ishq ka izhaar kiya

Qatal honay ki thi khwaish mujh main

Teri aankhon ko jo talwar kiya

Mil gaya main ussay Aasani se

Main ne khud kaam ko dushwaar kiya

Apna zikar kya karein us ka dain hawala kya

Kho diya so kho diya ab koi azala kya

Apna apna dard hai , apni apni zindagi

Mout kuch nahin to phir zehar ka piyala kya

Waqat gar milay to phir sochna hai baith kar

Behar-e-zindagi se bhi hum ne hai nikala kya

Soch aur jazbay main aik jung rehti hai

Dil se aagay kuch nahin zehan se hai bala kya

"Saad" woh mila to kya aur juda hau to kya

Pyar main yeh hota hai is main hai nirala kya

Chasham-e-baran ka asar hai keh nahin

Ae sadaf tujh main gehar hai keh nahin

Poochta phirta hai saya mera

Raah main koi shajar hai keh nahin

Gum hua shaher meri aankhon main

Fard ko is ki khabar hai keh nahin

Jheel aankhon main kanwal tairata hai

Us pe titli ki nazar hai keh nahin

Ik bhanwaray ki hai oqaat hi kya

Phir bhi woh gul ka samar hai keh nahin

"Saad" tashkeek teri apni jaga

Kuch na kuch is se muffar hai keh nahin

Kaash mazi bhi haal ho jaye

Jism-o-jaan ka wisaal ho jaye

Baat jajti nahin meray munh se

Tu karay to kamal ho jaye

Hai amanat yeh zindagi apni

Apni kuch dekh bhaal ho jaye

Khouf khaao us aik lamhay se

Jis main aankh ik sawal ho jaye

Chand ki chandni hamari hai

Jalta suraj jo dhaal ho jaye

Ae khuda bandagi ka irfan de

Dil main paida malaal ho ajye

"Saad" kaisa yeh waqat aaya hai

Khatam ik pal main saal ho jaye

Kon kehta hai keh tu meri safaai de de

Bas mujhay apnay taaluq se rihaai de de

Waqat ki sohbada bazi se dara mat mujh ko

Tu dua kar kay mujhay dard-e-risaai de de

Bas isi saa'at-e-lazzat kay liye jeeta hoon

Sang tootay to sada mujh ko sunaai de de

Zindagi kya hai keh khud se nahin milnay deti

Mout kya hai keh hamein khud se judaai de de

Aik achaai behar tor buri hai mujh main

Apnay hissay ki mujhay duniya buraai de de

"Saad" is dil main kabhi jhaank kay dekho to sahi

Aain mumkin hai tumhein chaand dikhaai de de

Bas yahi ik tasawur hai bachanay wala

Phir uthaey ga hamein duniya bana'nay wala

Yeh andheron ka safar janay kahan le jaye

Kitna majboor hai is simat ko janay wala

Khul gayi aankh kisi ki to khulla us par

Pakra jata hai yahan baat chupanay wala

Lamha lamha bhi guzaro to guzar jati hai

Waqat aisay hi guzar jata hai aanay wala

"Saad" gehraai samandar ki koi kya janay

Kab utar'ta hai yahan kashti chalanay wala

"Saad" yeh shaher bhi mehroom hua aankhon se

Koi milta hi nahin ashk bahanay wala