Bazam-e-dil main shor-o-ghul hai barpa
Youn hi ghabra gaye keh tanha hain hum
Apr 23, 2016
Dard kay geet main sada thi nirali
Dard kay geet main sada thi nirali
Aah-o-pukaar ne ik dhoom macha di
Raqs main itnay thay mashghool keh bas
Khaak main hum ne phir khaak mila di
Main kitna hoon zaroori kis kis kay liye
Main kitna hoon zaroori kis kis kay liye
Taqseem jab khud ko kiya main , main na raha
Meri khud faraibi ne mujhay loota hai
Meri khud faraibi ne mujhay loota hai
Aaina bar-aks bhi to toota hai
Aankhein udas hon to nazaray ko kya karein
Aankhein udas hon to nazaray ko kya karein
Jab dil hi bujh gaya to saharay ko kya karein
Kuch bhi ojhal nahin hai teri nazron se
Kuch bhi ojhal nahin hai teri nazron se
Jitnay bhi milay hain dukh woh milay hain apno se
Jitnay bhi jatan thay sab hi kar kay dekh liye
Jitnay bhi jatan thay sab hi kar kay dekh liye
Hai agar jannat kahin , to woh khayalon main
Na junoon main tha na fanoon main tha
Na junoon main tha na fanoon main tha
Woh sakoon jo teri aaghosh main tha
Main to aaj bhi nafrat ko mohabbat main badalti hoon
Main to aaj bhi nafrat ko mohabbat main badalti hoon
Gar ibadat nahin yeh to phir kya main karti hoon ?
Tareekiyon main khud ko aisay bhi dekha hai hum ne
Tareekiyon main khud ko aisay bhi dekha hai hum ne
Keh be'chragh thay hum aur samnay tha Aaina
Kisi ka aasra lena , hamein acha nahin lagta
Kisi ka aasra lena , hamein acha nahin lagta
Gulon ka daal se girna , hamein acha nahin lagta
Hamein acha woh lagta hai keh jis ki malkiyat yeh ahin
Yeh baali , churiyan , kang'gana , hamein acha nahin lagta
Yeh kya keh be'sabab phirtay raho saahil pe shamon ko
Kisi se ulfatein karna , hamein acha nahin lagta
Hamein aksar teri nadaniyon se khouf aata hai
Tera logon se youn milna , hamein acha nahin lagta
Tumharay narm-o-nazuk se badan ko chu kay kiyon guzray
Hawa ka is tarah chalna , hamein acha nahin lagta
Hamaray saath rehna hai to hans kar seekh lo jeena
Meray humdam ! tera rona , , hamein acha nahin lagta
Agarcha hai bari na'yaab shay yeh khush mizaji bhi
Magar her baat par hansna , hamein acha nahin lagta
Faqat hasrat bharri is zindagi ka faida kya hai ?
Kabhi bhi phool ka khilna , hamein acha nahin lagta
Meri is kayfiyat ko jo bhi chaho naam de dalo
Magar tum se juda rehna , hamein acha nahin lagta
Meray ashaar main hotay hain teray husan kay jalway
Sar-e-mehfil ghazal kehna , hamein acha nahin lagta
Tumhari yaad hi aksar hamein majboor karti hai
Wagarna shairy karna , hamein acha nahin lagta
Tanao main jab aa jayein to dhaagay toot jatay hain
Tanao main jab aa jayein to dhaagay toot jatay hain
Zara si baat par daireena rishtay toot jatay hain
Tumhein is baat pe hairat keh toota hai hamara dil
Muqabil jab keh hon pathar to sheeshay toot jatay hain
Guzartay waqat se cheezein purani ho hi jati hain
Dilon pe mail parti hai to jazbay toot jatay hain
Hazaron khwaishein tarteeb paati hain khayalon main
Magar jab aankh khulti hai to sapnay toot jatay hain
Umad aatay hain jhariyon main hazaron dukh zamanay kay
Guzar kar umar kay hissay se chehray toot jatay hain
Na'janay kiyon tumhari yaad aati hai mujhay us dam
Meray aangan main jab bailon kay pattay toot jatay hain
Dukhon main to nikal aatay hain aankhon se Zaheer aansu
Khushi kay mousamon main bhi kinaray toot jatay hain
Phir kabhi logon ki baton main nahin aaye ga woh
Phir kabhi logon ki baton main nahin aaye ga woh
Dekh lena mujh se mil kar theek ho jaye ga woh
Meray us kay darmiyan koi bara jhagra nahin
Lakin us ko tool de ga khoob phailaye ga woh
Choti choti ranjishon ko bhool jana chahiye
Janay is niktay ko aakhir kab samjh paye ga woh
US ki khatir main to si duniya se kat kay reh gayi
Woh zamana saaz hai acha to kehlaye ga woh
Sulha to kar lay ga aa kay mujh se lakin is kay baad
Jab milay ga bas yahi ehsaan jatlaye ga woh
Main bhi kuch aisi gayi guzri nahin keh do ussay
Aankh utha kar bhi na ab dekhon gi pachtaye ga woh
Dekho Shabnam yeh ghazal us tak bhi ponchay gi zaroor
Phir na kurhna baith kar jab aur itraye ga woh
Mera dil mujh se kehta hai tumhein mujh se mohabbat hai
Mera dil mujh se kehta hai
Tumhein mujh se mohabbat hai
Gumaan ki teh'rah shab ki chehra dasti main
Falak ki chadron main raakh hoti maah-o-anjum ki
Hazeen mehfil main ab bhi ik sitara jag'magata hai
Samandar main safar karti hawa ki kashtiyon ko raah dikhata hai
Jazeeron kay kinaron par kisi tootay gharonday main
Koi jazba hawaon ki sadaon se ubharta hai
Fizaon main bikharta hai , to aisay main
Yaqeen kay rang main dooba hua her aik manzir jaag uth'ta hai
Hawa'ein us haseen jazbay ko , chandan se meray maathay pe
Aa kay sibat karti hain
Mohabbat ka pakheru phir se lehan-e-jaan'fiza main gun'gunata hai
Jissay hum ne kabhi ik saath dekha tha wohi mah'taab
Meri rooh ki veeran aankhon kay jharokhon main chamakta hai
To roshan zindagi kay khawab farda kay naye ghar ki
Khuli chatt par achanak muskuratay hain
Meray dil ki zameeno main khilay phoolon kay saaiye main
Tumhari yaad ka her pal mehakta hai
Meray tan pe koi sawan tumharay pyar ki surat
Bhout khul kar barasta hai
Mera dil phir meri ta'eed karta hai
Tumhein mujh se mohabbat hai
Badan main jaan ki surat
Kisi emaan ki surat
Tumhein mujh se mohabbat hai
Aik pal chain se soya bhi nahin ja sakta
Aik pal chain se soya bhi nahin ja sakta
Kya karin toot kay roya bhi nahin ja sakta
Khawab ashkon ki tarah aankh se jhartay bhi nahin
Bojh aisa hai keh dhoya bhi nahin ja sakta
Ishq woh daagh keh lagta nahin her daman par
Aur lag jaye to dhoya bhi nahin ja sakta
Aisay moti bhi koi moti hain Ae deeda-e-tar
Jin ko dhagay main piroya bhi nahin ja sakta
Kya qayamat hai keh saahil bhi muqadar main nahin
Aur safeenay ko daboya bhi nahin ja sakta
Aiklamha jissay panay main zamanay beetay
Khona chaha hai to khoya bhi nahin ja sakta
Aankh tar thi to samandar meri aaghosh main tha
Ab to daman ko bighoya bhi nahin ja sakta
Ashk jam jatay hain pathrai hui aankhon main
Gham ziyada ho to roya bhi nahin ja sakta
Woh to yeh kehiye gharri tujh se juda honay ki thi
Woh to yeh kehiye gharri tujh se juda honay ki thi
Warna yeh saa'at jo thi meray Khuda honay ki thi
Tujh ko yeh zid keh main teri aankhon se dekhta
Aur mujhay khawaish teray lab se ada honay ki thi
Meri beenai khas-o-khashaak mousam lay urray
Jisam-o-jaan main to sakat , tujh se riha honay ki thi
Aik chup rehnay kay sab ilzaam mujh par hi na thay
Khamoshi par bhi to tohmat lab-e-kusha honay ki thi
Khilwat-e-jaan main agar aana hai to dastak na day
Mujh se woh bhi kab hui hai jo khata honay ki thi
Main khud apni aag hi main jal bujha to yeh khula
Shart jalnay ki nahin thi keemiya honay ki thi
Roothnay walay ko aakhir kon samjhata Saleem
Yeh bhi koi umar ab is kay khafa honay ki thi
Ussay kehna kabhi milnay chala aaye
Ussay kehna
Kabhi milnay chala aaye
Hamaray paon main jo raasta tha
Raastay main pairr thay
Pairon par jitni tahiron ki toliyan
Hum se mila karti thein
Ab woh urtay urtay thak gayi hain
Woh ghanni shakhein jo hum pe saya karti thein
Woh sab murjha gayi hain
Tum ussay kehan
Kabhi milnay chala aaye
Labon pe lafz hain
Lafzon main koi daastan , aissa, kahani
Jo ussay aksar sunatay thay
Kissay ja kar sunaein gay
Bataein agy
Keh hum mehraab-e-aabru main sitaray taanknay walay
Dar-e-lab , bosa-e-izhaar ki dastak se aksar kholnay walay
Kabhi bikhri hui zulfon main hum
Mehraat kay gajray bana kar bandhnay walay
Chragh aur aainay kay darmiyan
Kab se sar-e-saahil kharray mojon ko taktay hain
Ussay kehna
Ussay hum yaad kartay hain
Ussay kehna
Hum aa kar khud ussay miltay
Magar maqtal badaltay mousamon kay khoon main rangeen hain
Aur hum
Qataar andar qataar aisay bhout se mousamon kay darmiyan
Tanha kharray hain
Janay kab apna bulawa ho
Keh hum main aaj bhi
Ik umar ki wa'raftagi aur wehshaton ka raqs jari hai
Woh baazi jo bisat-e-jaan pe kheli thi
Abhi hum ne jeeti hai na haari hai
Ussay kehna kabhi milnay chala aaye
Keh ab ki baar shayed
Apni baari hai
Subscribe to:
Comments (Atom)
