Mohabbat
Pehlay ik kompal si phooti
Phir ik poda sa lehraya
Phir ik phool wahan muskaya
Ab woh khushbu
Meray lahu main
Aik tan'awar pairr ki surat main rehti hai
Apr 22, 2016
Rasam-e-duniya jaan kar hargiz na yarana karo
Rasam-e-duniya jaan kar hargiz na yarana karo
Dosti kay baab main dil ka kaha mana karo
Aik dheema sa tabasum rasam hi si ban gaya
Dosto ! apnay paraye ko to pehchana karo
Roshni ka qehat hai par fikar-e-farda kis liye
Khoon ki tanveer se roshan siyah khana karo
Choti moti baat ho to jins-e-gham detay rahao
Jurm ho sangeen to khushiyon ka jurmana karo
Rasam-e- shabiri dawam-e-zeest hai Rashak
Zeest karni hai agar to sar'faro'shana karo
Pathar kay khuda , pathar kay sanam ! pathar kay hi insan paye hain
Pathar kay khuda , pathar kay sanam ! pathar kay hi insan paye hain
Tum shaher-e-mohabbat kehtay ho hum jaan bacha kar aaye hain
Butt-khana samjhtay ho jis ko poocho na wahan kya halat hai
Hum log wahin se lotay hain bas shukar karo loat aaye hain
Hum soch rahay hain muddat se ab umar guzarein bhi to kahan
Sehra main khushi kay phool nahin shehron main ghamon kay saaiye hain
Honton pe tabasum halka sa aankhon main nami si Ae Faakir
Hum ehal-e-mohabbat par aksar aisay bhi zamanay aaye hain
Bhout asan hai khud ko mitana
Bhout asan hai khud ko mitana
Bhout mushkil magar tujh ko bhulana
Bicharna par gaya miltay hi hum ko
Hamara hai bas itna sa fasana
Hadein sabar-o-raza ki tor dalein
Chalak hi jaye ga apna paymana
Guzar ho us ki mehfil se kabhi to
Ussay ghazlein meri ja kay sunana
Bichar kar mujh se woh to khush hai lakin
Mera kya haal hai us ko batana
Agar tum ko youn hi hum yaad ayein
Tumharay muntazir hain loat aana
Kya kron ab koi bhi acha nahin lagta mujhay
Kya kron ab koi bhi acha nahin lagta mujhay
Tu bhi pehlay ki tarah apna nahin lagta mujhay
Ab teri baatein meray dil main utar'ti hi nahin
Tu wohi hai par tera lehja nahin lagta mujhay
Tu , to ab adhay badan se saath chalta hai meray
Teray shano pe tera chehra nahin lagta mujhay
Tu kabhi taqseem karta tha hawaein chaar su
Ab teray bhi paas ik jhonka nahin lagta mujhay
Ab lifafay se teri khushbu nahin aati mujhay
Khat bhi teray haath ka likha nahin lagta mujhay
Shabnami raat sohani hai mujhay phone karo
Shabnami raat sohani hai mujhay phone karo
Ik ghazal tum ko suna'ni hai mujhay phone karo
Phir naya khawab dikhana hai sehar honay tak
Phir nayi shamma jalani hai mujhay phone karo
Da'imi wasal ka ehsaas dilana hai tumhein
Raat chup chaap bitani hai mujhay phone karo
Tez baarish hai , hawaein sard mousam hai
Her taraf pani hi pani hai mujhay phone karo
Main bhi behkay huye jazbat ki zad main hoon abhi
Tum pe bhi dour-e-jawani hai mujhay phone karo
Na main barbaad hoon na abhi ruswa tum
Na'mukamal yeh kahani hai mujhay phone karo
Tum se mil kar hi main bichron koi laazim to nahin
Phir bhi ik rasam nibhani hai mujhay phone karo
Teri chahat kisi mousam main bhi to kam nahin hoti
Teri chahat kisi mousam main bhi to kam nahin hoti
Diye ki lo hawa main to kabhi madham nahin hoti
Teray shanay pe sar rakhna nahin hai ab meray bas main
Magar dil se meray kiyon kar yeh khawaish kam nahin hoti
Jo hanstay hon yeh hansti hai jo rotay hon nahin roti
Kisi kay gham main yeh duniya shareek-e-gham nahin hoti
Dilon main laakh toofan hon na aankhon se ayan karna
Keh yeh jageer saanjhi to meray hum'dam nahin hoti
Kisi ko raaz mat dena tum apni zindgani main
Keh yeh duniya kisi ki bhi kabhi mehram nahin hoti
Poet : Dilshad Ahmed Faraz
Woh hum main youn samaein , hum un main youn samaein
Woh hum main youn samaein , hum un main youn samaein
Woh hum ko bhool jayein , hum un ko bhool jayein
Jati hain aasman tak furqat ki shab duaein
Aagay mera muqadar , woh ayein ya na ayein
Kiyon us wafa paraston par jaan na dain jafaein
Kha kha kay dil pe chotein jo muskura'ey jayein
Raatein hain khoob waqif Ae bad'zan mohabbat
Main ne tarap tarap kar di hain tujhay duaein
Angraiyan na lay youn oso kay uthnay walay
In mast ankhriyon kay saghar chalak na jayein
Subscribe to:
Comments (Atom)
