Yeh zabt choot gaya to tumhari yaad aayi

Yeh zabt choot gaya to 

Tumhari yaad aayi 

Main thak kay toot gaya to 

Tumhari yaad aayi

Tumharay baad na tha koi mera

Dil kay siwa

Yeh dil bhi rooth gaya to 

Tumhari yaad aayi

Chain mil jaye ga dil ko yaqeen rehta hai

Chain mil jaye ga dil ko yaqeen rehta hai

Raah guzar dard ki hai khushiyon ka safar rehta hai 

Wehshatein aati hain her roz hi milnay mujh se

Dard ki lehron pe jeevan ka guzar rehta hai 

Aks aik meri nigahon main basa muddat se

Is liye aankh se sawan bhi rawan rehta hai 

Phool khiltay thay dar-o-dewar pe chahat kay kabhi 

Zard paton se dhaka ab to samaan rehta hai 

Ronaqein rooth gayein meray makaan ki kaisay 

Wehshaton main yeh makeen aur makaan rehta hai 

Kaisay beetay hain yeh shab-o-roz mujhay yaad nahin 

Karb main waqat ka ehsaas kahan rehta hai 

Aik muddat se nahin dekha sanwar ka khud ko 

Toot kar bikhrein to phir hosh kahan rehta hai 

Waqat ki tez hawaon ne tabbah mujh ko kiya 

Meray chehray pe her ik aks nihaan rehta hai 

Duniya walon se gila kon karay kis kay liye 

Khouf main dooba hua ab to makaan rehta hai 

Kitna nadaan hai sar-e-raah kiyon baitha hai "Naseem"

Dair tak saath yahan kon rehta hai 

Kahin se tera sath le ayon

Kahin se tera saath le ayon 

Wasal ki chand raat le ayon 

Baith jaaon kisi do'rahay  par 

Maang kay tera haath le ayon 

Kitni sadiyon kay baad bolon main 

LAb pe ik teri hi baat le ayon 

Apni aankhon ki band galiyon se 

Aanso'on ki baraat le ayon 

Itni pooja karon keh main ik din 

Apni zaat main teri zaat le ayon

Jab neend se ankhain bojhal hoon

Jab neend se aankhein bojhal ho 

Aur apnay aankh se ojhal hon 

Phir neend bhala kab aati hai 

JAb dil main basnay walay bhi 

Aur saath main hansnay walay bhi 

Door kahin woh bastay hon 

Kisi aur kay saath woh hanstay hon 

Phir neend bhala kab aati hai 

JAb gham ki raat andheri ho 

Aur us main yaad bhiteri ho 

Na dil main koi ujaala ho 

Phir naand bhala kab aati hai

Naye dino ke naye safar main dihaan rakhna

Naye dino ke naye safar main dihaan rakhna

Khamosh chup chaap

Kuch na kehti in sa'aton ne

Sonp dalay naye taqazay rafaqaton ke

Dehaan rakhna

Keh apnay hissay ke sab taqazay nibahay hain

Sath chaltay hyue safar main

Her aik dagar par chahaton ke gulaab likhna

Warq warq aitamaad jis main

Harf harf main ho jaan nisari

Nai kushiyan , naye manazar

Nai misalaein , naye hawalay

Bas aik aisi hi mohabbaton ki kitaab likhna

Naye dino ke naye safar main.....

Chir-chirri raat , baat phoolon ki

Chir-chirri raat , baat phoolon ki 

Raat hai ya baraat phoolon ki 

Phool kay haar , phool kay gajray 

Shaam phoolon ki , raat phoolon ki 

Aap ka saath , saath phoolon ka 

Aap ki baat , baat phoolon ki 

Phool khiltay rahain gay duniya main 

Roz niklay gi baat phoolon ki 

NAzrein milti hain , jaam miltay hain 

Mil rahi hai hayat phoolon ki 

Yeh mehakti hai ghazal "Makhdoom"

Jaisay sehra main raat phoolon ki

Kabhi soch ko hi sula diya kabhi josh apna barha diya

Kabhi soch ko hi sula diya kabhi josh apna barha diya 

Teray naam likhye thay khat kabhi unhein rafta rafta jala diya 

Rahay ranj-o-gham kay aseer hum roshni kay dasay huye 

Isi khouf main ae jaan-e-jaan chragh-e-dil hi bujha diya 

Meray dil ki bhatki si hasratein kuch baghi'yana wehshatein 

Teri justago-e-shouq main unhein dasht-e-dil main daba diya 

Abhi raat pichlay pehar sanam hua maajra yeh ajeeb sa

Teray dil kay karb-o-junoon ne mujhay wehshaton se mila diya 

Hai sitam zareefi ajeeb si teray dil main hoon main tera nahin 

Yeh muqaddaron main likha hua jis ne hum ko rula diya 

Hai mohabbaton main qaraar-e-dil yeh faraib-e-jaan si baat hai 

Teri tar nigah ko dekh kar main ne khwaishon ko daba diya 

Meri aarzoo meri justagoo teray dil main rang-o-chaman bharon 

MAin ne apni khushiyon ki raakh main teray gham ko pal main jala diya 

Shab-e-hijar ho ya wisaal ho ya mohabbaton ka zahoor ho 

Main ne dil ki galiyon se her nishaan us justagoo ka mitta diya 

Tera humsafar hoon main hum-nasheen yeh tujh se ehad naseem hai 

MAin ne dharkano ko saaz dil apna gaa kay suna diya

Manzalon ki justago main rastay kat'tay rahay

Manzilon ki justagoo main raastay kat'tay rahay
Aabla-pa be'khatar hum khaar pe chaltay rahay

Waqat ki be'reham lehron ne ujaara hai hamein
Aur hum nadaan kitnay khud se hi lartay rahay

Zindagi ne her qadam par de diye kitnay sabaq
Girtay partay rotay gaatay her sabaq parhtay rahya

Be'hissi kay dour main be'hiss hua insaan kiyon
Apni sochon ko liye hum dar-badar phirtay rahay

Zindagi nehmat-e-Khuda hai zindagi chahti hai kya
In sawalon ko yahan sab dar guzar kartay rahya

Zindagi ne kis qadar toofan bar'pa kar diye
Aur putlay khaak kay kaisay yahan akray rahay

Maal-o-doulat ki chamak ne kaisay andha kar diya
Be'waja laashay bhi dekho her jaga girtay rahya

Rishtay naatay ho gaye nazuk yahan insaan kay
Aik ghar main rehnay walay bhi yahan lartay rahay

Meri baaton main nahin kuch khaas sab kuch Aam hai
Hum bhi janay kiyon yahan her baat ko likhtay rahay

Dekhye hain toofan tu ne aaj tak kitnay "Naseem"
Saahilon par aa kar toofan bas yahan martay rahay

Dil kay ehsaas ko likhtay hi mitta detay hain

Dil kay ehsaas ko likhtay hi mitta detay hain 

Hum to hanstay hain , yeh halaat rula detay hain 

Kitnay nadaan hain duniya main hijaabon kay makeen 

Apnay hi majnoo ko sooli pe charha detay hain 

Haye be'dardi tujhay mujh se shikayat kya hai 

Hum to zakhmon ko bhi seenay se laga letay hain 

Dil kay ehsaas ko likhtay hi mitta detay hain 

Hum to hanstay hain , yeh halaat rula detay hain

Roshni karti hai jo jal kay siyaah raaton main 

Ubhray suraj to shamma woh bhi bujha detay hain 

Ik dua maangi thi harf-e-dua yaad nahin 

Ab to bas apnay hi qaatil ko dua detay hain

Dil kay ehsaas ko likhtay hi mitta detay hain 

Hum to hanstay hain , yeh halaat rula detay hain

Apnay rishtay hain jo jeenay nahin detay hum ko 

Un ki baaton main chupay tanz jala detay hain 

Zinda insaan ki qadar nahin aaj "Naseem"

Qabar pe pyar se phoolon ko saja detay hain 

Dil kay ehsaas ko likhtay hi mitta detay hain 

Hum to hanstay hain , yeh halaat rula detay hain

 

Hum nazuk nazuk dil wale bas aisay hi to hotay hain

Hum nazuk nazuk dil walay 

Bas aisay hi to hotay hain 

Kabhi hanstay hain kabhi rotay hain 

Kabhi dil main khawab pirotay hain 

Kabhi mehfil mehfil phirtay hain 

Kabhi zaat main tanha hotay hain 

KAbhi chup ki mohar sajatay hain 

Kabhi geet labon pe laatay hain 

Kabhi sab ka dil behlaatay hain 

Kabhi khud hi tanha hotay hain 

Kabhi shab bhar jaagtay rehtay hain 

Kabhi lambi taan kay sotay hain 

Hum nazuk nazuk dil walay 

Bas aisay hi to hotay hain

Be'wafa ki be'wafaei bhulae nahin jati

Be'wafa ki be'wafaei bhulae nahin jati

Zubaan se yeh kahani sunaai nahin jaati 

Bhar aati hai kabhi kabhi pathraai hui aankhein 

Dil main jo lagi hai aag bujhaai nahin jaati 

Apno ne lagaye hain zakhm aisay 

Apnay haathon se marham lagaai nahin jaati 

Bikhray hain jab se meray khawaab sohanay 

Pyar ki shamma hum se jalaei nahin jaati

Laakh jatan kar kay dekh liye hum ne "Anjum"

Us zaalim se ab dosti nibhaei nahin jaati

Woh jo ik khwaab si raat thi

Woh jo ik khawab si raat thi 

Meray bakhat main ...

Youn hi ik pal main guzar gayi 

Woh guzar gayi to pata chala ....

Wohi ik kaam ki cheez thi 

Meri zindgaani ki rikhat main !!

Baatein kartay huye hont achanak ruk jatay aur

Baatein kartay huye hont achanak ruk jatay aur

Aankhein us kay peechay peechay chal parti thein 

Dhiyaan ka rasta kho jaata tha 

Mehfil main jis simat woh jaati 

Kamray ka woh hissa jaisay yak-dam roshan ho jaata tha 

Jadu'gar thein aankhein us ki

Palkein thein ik raaz

Rooh main jhil mill kar deti thi

Aisi thi awaaz

 

 

tarapti raton main siske'yan jab tumhain sataein to yaad karna

tarapti raton main siske'yan jab tumhain sataein to yaad karna 

Agar kabhi raaston main kaantay tumharay ayein to yaad karna 

Qasam hai hum ko tumhari sajna mout ko bhi shakist dain gay 

Tumharay dil ko tumharay apnay agar dukhaein to yaad karna 

Hamein khabar hai keh is jahan main kisi ka apna kahan hau hai 

Sohanay sapnay agar toot jayein to yaad karna 

Mohabbaton main hijar lamhay azaab hotay hain hum se poocho 

Agar kabhi bhoolay bhatkay tum par azab ayein to yaad karna 

Bicharna aasaan nahin hai sajna raat din hai is main rona 

Tumharay rastay kay phool poday muskuraein to yaad karna 

Meri ghazlein agar parho tum ya geet meray suno kahin par 

Tumhari aankhon main aansoo aa kar tumhein rulaein to yaad karna 

Yaad-e-maazi to dost sab ki bho sata'ti hai zindagi bhar 

Purani baatein , purani yaadein dil jalaein to yaad karna 

Ghamon ki shiddat kay imtihaan main karb kitnay chuppay huye hain 

Agar kabhi aks kuch puranay tumhein bulaein to yaad karna 

Barastay badil chamakti bijli udaas shamein hijar raatein 

Yeh sab hain kitnay azaab lamhay loat ayein to yaad karna 

"Naseem" subha main gulon ko choona muskurana tumhari aadat hai 

Yeh phool poday tumhari khaatir muskuraein to yaad karna

Aik lafz mohabbat hai issay kar kay dekho tum

Aik lafz mohabbat hai issay kar kay dekho tum 

Barbaad na ho jayo to mera naam badal dena 

Aik lafz muqaddar hai is se lar kay dekho tum 

Haar na jaao to mera naam badal dena 

Aik lafz wafa hai jo duniya main nahin milti

Kahin se gar mil jaye to mera naam badal dena 

Aik lafz aansoo hai issay dil main chuppa kar dekho tum 

Aankhon se na beh jaye to mera naam badal dena

Aik lafz judai hai issay seh kar dekho tum 

toot kar na bikar jaao  to mera naam badal dena

Woh shakhs keh main jis se mohabbat nahin karta

Woh shakhs keh main jis se mohabbat nahin karta 

Hansta hai mujhay dekh kay , nafrat nahin karta 

Ghar walon ko ghaflat pe sabhi koos rahay hain 

Choron ko magar koi malaamat nahin karta 

Detay hain ujalay meray sajdon ki gawahi 

Main chuph kay andheron main ibaadat nahin karta

Bhoola nahin aaj bhi Aadaab-e-jawani 

MAin aaj bhi auron ko naseehat nahin karta 

Duniya main "Qateel" us sa munafiq nahin koi 

Jo zulam to sehta hai baghawat nahin karta

Bhout si be'sabab batein faqat tamheed hoti hain

Bhout si be'sabab baatein 

Faqat tamheed hoti hain 

Main aksar tum se kehta hoon

Sunao aur kaisi ho ?

Suni ! sardi bhout hau na 

Nahin mousam to acha hai .....!

Cgalo acha main chalta hoon ....

Dobara phone kar lon ga 

Yeh sari be'sabab baatein 

Faqat tamheed hoti hain 

Aur is tamheed main jana 

Guzar jatay hain saray pal 

Guzar jatay hain jab lamhay 

To phir main sochta hoon keh 

Zara si baat hi to thi 

Tumhein jaldi se keh deta 

Mujhay tum se mohabbat hai .....

Bhout ziada mohabbat hai .....

Jab seena gham se bojhal ho aur kisi ki yaad aati ho

Jab seena gham se bojhal ho aur kisi ki yaad aati ho 

Tab kamray main band ho jana aur chupkay chupkay ro lena 

Jab aankhein bhari ho jayein aur yaad main meri bhar ayein 

Phir khud ko dhoka mat dena aur chupkay chupkay ro lena 

Jab palkein karb se mondi hon aur sab samjhein tum soti ho 

Tab chehray pe takiya rakh lena aur chupkay chupkay ro lena

Yeh duniya zalim duniya hai , yeh baat bhout pehlaaye gi 

Tum sab kay samnay chup rehna aur chupkay chupkay ro lena 

Jab baarish chehra dho daalay aur ashk bhi boondain lagtay hon 

Woh lamha hargiz mat khona aur chupkay chupkay ro lena

Yeh hum tasleem kartay hain tumhein fursat nahin milti

Yeh hum tasleem kartay hain 

Tumhein fursat nahin milti 

Hamaray wastay tum ko 

Koi saa'at nahin milti 

Hamari soch kay mehwar 

Kabhi ik pal to socho tum 

Tumhein hum yaad kartay hain 

Aur itna yaad kartay hain 

Keh khud ko bhool jatay hain

Janaa tum ne apnay khat main tehray tehray lafzon main

Janaa tum ne apnay khat main 

Tehray tehray lafzon main 

Kuch likha kuch chor diya 

Youn lagta hai lafzon ko 

Tum ne mahni kay dar pe

Laa kar wapis mor diya 

Aur phir

Alfaaz kahan kuch keh paatay hain 

Yeh adraak ki sakhat zameen par 

Ik sarhad pe ruk jatay hain 

MAin alfaaz nahin parhti 

MAin to bas woh parhti hoon 

Jo satron kay beech likha hai

Mohabbat ki haseen rahon pe bikhar jata hoon

Mohabbat ki haseen raahon pe

Mohabbat ki haseen raahon pe 

Bikhar jaata hoon 

Sar-e-shaam 

Is tarah jaisay 

Zahid , khizaan kay mousam main 

Sookhay pattay bikharnay lagtay hain 

Main lafzon main kuch bhi izhaar nahin karti

Main lafzon main kuch bhi izhaar nahin karti 

Is ka matlab yeh nahin keh main tujh se pyar nahin karti 

Chahti hoon main tujhay aaj bhi magar 

Teri soch main apna waqat be'kaar nahin karti 

Tamasha na ban jaye mohabbat meri 

Is liye apnay dard ko namu'daar nahin karti 

Jo kuch mila hai is main khush hoon main 

Teray liye Khuda se takraar nahin karti 

Par kuch to baat hai teri fitrat main zaalim

Warna main tujhay chahnay ki khatta baar baar na karti

Woh kehti hai , keh khushiyon main bhi tum to ronay lagtay ho

Mohabbat chup nahin rehti 

Woh kehti hai , keh khushiyon main bhi tum to ronay lagtay ho 

Main kehta hoon , meri aankhon ko sawan acha lagta hai 

Woh boli , tum bhi farhat zindagi se rooth jaao gay 

Main bola , haan shayed mout mujh se maan jaye gi 

Woh boli , tum khushi kay geet ko mayoos kartay ho 

Main bola , kya karon in mukhtasir geeton ka mousam hai 

Woh boli , tum to farhat khud hi khud se haar jatay ho 

Main bola , kya karon kamzor hoon aur be'sahara hoon 

Woh boli , kya yeh sab kuch itafaqan hai tumhara gham 

Main bola , yeh bhi mumkin hai yeh san ehtraaman ho

Khuli ankhon main sapna jhank'ta hai

Khuli aankon main sapna jhaankta hai 

Woh soya hai keh kuch kuch jaagta hai 

Teri chahat kay bheegay junglon main 

Meri tan mor ban kay naachta hai 

Mujhay her kaifiyat main kiyon na samjhay 

Woh meray sab hawalay jaanta hai 

Main us ki das'taras main hoon magar woh 

Mujhay meri raza se maangta hai 

Kisi kay dhiyaan main dooba hua dil 

Bahanay se mujhay bhi taalta hai 

Sarak ko chor kar chalna paray ga 

Keh meray ghar ka kaccha rasta hai

Misal-e-barg main khud ko urana chahti hoon

Misal-e-barg main khud ko urana chahti hoon

Hawa-e-tund pe maskan bana'na chahti hoon 

Woh jin ki aankhon main hota hai zindagi main malaal 

Usi qabeelay se khud ko milaana chahti hoon 

Jahan kay band hain , sadiyon se mujh pe darwaze 

Main ik baar usi ghar main jaana chahti hoon 

Sitam sha'aar ki chokhat pe adal ki zanjeer

Bara'ey daad rasi ab hilana chahti hoon 

Na'janay kaisay guzaron gi hijar ki saa'at 

Gharri ko tor kay sab bhool jaana chahti hoon 

Musafaton ko mili Manzil-e-talab "Naina"

Wafa ki raah main apna thikaana chahti hoon

Tumhein jana ijazat hai keh in tareek raahon par

Tumhein jana ijazat hai 

keh in tareek raahon par 

Thakan si khud main paao to 

Andehron se kabhi dil dol jaye 

Thak si jaao to 

Meray jaltay huye lamhon 

Meray kang'gaal haathon se chura kay apnay haath ko 

Fiza ki nagh'magi se tum nit naye geeton ko chun lena 

Haseen palkon ki nokon par naye kuch khawab bun lena 

Koi gar pooch lay mera to us se zikar nahin dena 

Meray jeewan ki jalti do'pehar se be'gharz ho kar 

Tum apni chandni raaton main jugno paalti rehna 

Meri tanhaiyon ki wehshaton ki fikar mat karna 

Tumhain ijazat hai 

Meray sab khat jala dena 

Meray tohfon ko dariya main bahana ya daba dena 

Meri her yaad ko dil se kurchana aur mitta dena

Tumhein bilkul ijazat hai 

Magar bas itni guzarish hai 

Agar aisa na ho jana 

To acha hai

Aankhon se is liye meri laali nahin jaati

Aankhon se is liye meri laali nahin jaati 

Yaadon se koi raat jo khali nahin jaati 

Ab umar na mousam na woh raastay keh woh paltay 

Is dil ki magar khaam khayali nahin jaati 

Maangay to agar , jaan bhi tujhay hans kay de don 

Teri to koi baat taali nahin jaati 

Aaye koi aa kay yeh dard sambhalay 

Hum se to yeh jageer sambhali nahin jaati 

Maloom hamein bhi hain teray bhout se qissay 

Her baat hum se teri uchaali nahin jaati 

Hum'raah teray phool khilaati thi jo dil main 

Ab shaam wohi dard se khaali nahin jaati 

Hum jaan jayein tab hi baat banay gi 

Tum se to koi raah nikaali nahin jaati

Jis karwat letay thay hum tum

Jis karwat letay thay hum tum 

Chand tumhari paishaani ko choom raha tha 

Dekho jana'n , , , 

Chand wahan se hijrat kar kay 

Pairon tak aa poncha hai 

So jaao ,,,,,,!

Baqi baatein kal kar lain gay 

Mera kya hai 

Lakin chand ko sona ho ga

Dil main afsos aankhon main nami si rehti hai

Dil main afsos aankhon main nami si rehti hai 

Zindagi main shayed koi kami si rehti hai 

Mujh se rooth jatay hain aksar apnay "Wasi"

Shayed meray khaloos main kami si rehti hai