Meri raaton ki raahat din ka itmanaan ly jana
Tumharay kaam aa jaye ga , yeh samaan ly jana
Tumharay baad kiya rakhna anaa se wasta koi ?
Tum apnay saath mera umar bhar ka maan lay jana
Shakista kay kuch raizay paray hain farash par , chun lo
Agar tum jor saktay ho to yeh guldaan ly jana
Udhar almaariyon main chand aowraaq parishaan hain
Mere yeh baaqi'maanda khwaab meri jaan ly jana
Tumhain aisay to khaali haath rukhsat kar nahin saktay
Puraani dosti hai is ki kuch pehchaan lay jana
Iraada kar liya hai tum main gar sach much bicharnay ka
To phir apnay yeh saaray wada-o-paimaan lay jana
Agar thori bhout hai shairy se un ko dil'chaspi
To un kay samnay tum mera yeh diwaan lay jana
No comments:
Post a Comment