Her dharkan heejani thi her khamoshi toofani thi

Her dharkan heejani thi her khamoshi toofani thi 

Phir bhi mohabat sirf musal'sal milnay ki asaani thi 

Jis din us se baat hui thi us din bhi be'kaif tha 

Jis din us ka khat aaya hai us din bhi veerani thi 

Jab us ne mujh se yeh kaha tha ishq rafaqat hi to nahin 

Tab main ne her shakhs ki surat mushkil se pehchani thi 

Jis din woh milnay aayi hai us din ki ru'daad yeh hai 

Us ka bala'oz narangi tha us ki saari dhaani thi 

Uljhan si honay lagti thi mujh ko aksar aur woh youn 

Mera mizaaj-e-ishq tha shaheri us ki wafa deh'kaani thi 

Ab to us kay baray main tum jo chaho woh keh dalo 

Woh angraai meray kamray tak to bari roohani thi 

Naam pe hum qurbaan thay us kay lakin phir yeh tor hua 

Us ko daikh kay ruk jana bhi sab se bari qurnabi thi 

Mujh se bichar kar bhi larki kitni khush rehti hai 

Us larki ne mujh se bichar kar mar janay ki thaani thi 

Ishq ki halat kuch bhi nahin thi baat barhanay ka fun ka 

Lamhay la'faani thehray thay qatron ki tughyani thi 

Jis ko khud main ne bhi apni rooh ka irfan samjha tha 

Woh to shayed meray piyasay honton ki shaitani thi 

Tha dar'baar-e-kalaan bhi us ka nobat khana us ka tha 

Thi meray dil ki raani , amroo ki raani thi 

Mehak se apni gul-e-taza mast rehta hai

Mehak se apni gul-e-taza mast rehta hai 

Woh rang-e-rukh hai keh khud ghaaza mast rehta hai 

Nigah se kabhi guzra nahin woh mast andaaz 

Magar khayal se , andaza mast rehta hai 

Kahan se hai rasad-e-nasha , us ki khilwat main 

Keh rang-e-mast ka andaza mast rehta hai 

Yahan kabhi koi aaya nahin magar sar-e-shaam 

Bas ik gumaan se darwaza mast rehta hai 

Mujhay khayal ki masti main kis ka andaza 

Khuda nahin jo baandaza mast rehta hai 

Kab pata yaar ko hum apna likha kartay hain

Kab pata yaar ko hum apna likha kartay hain 

Janay hum khud main keh na khud main raha kartay hain 

Ab to tum shaher kay Adaab samjh lo jaani 

Jo mila hi nahin kartay woh mila kartay hain 

Lamhay lamhay main jeeo jaan agar jeena hai 

Yehni hum hirs-e-baqa ko bhi fanaa kartay hain 

Main jo kuch bhi nahin karta hoon yeh hai mera sawal 

Aur sab log jo kartay hain woh kya kartay hain 

Ab yeh hai halat-e-ehwaal keh ik yaad se hum 

Shaam hoti hai to bas rooth liya kartay hain 

Jis ko barbaad kiya us kay fida kaaron ne 

Hum ab is shaher ki ru-daad suna kartay hain 

Jin ko mufti se kadurat ho na saqi se gila 

Wohi khush waqat meri jaan rihaa kartay hain 

Ik pehna-e-abas hai jissay aalam kahein 

Ho koi us ka Khuda hum to dua kartay hain 

Aaish-e-umeed hi se khatra hai

Aaish-e-umeed hi se khatra hai 

Dil ko ab dil wohi se khatra hai 

Hai kuch aisa keh us ki jalwat main 

Hamein apni kami se khatra hai 

Jis ki aaghosh ka hoon dewana 

Us ki aaghosh se hi khatra hai 

Yaad ki dhoop to hai roz ki baat 

Haan mujhay chandni se khatra hai 

Hai ajab kuch maamla dar'paish 

Aqal ko aagahi se khatra hai 

Shaher ghadaar jaan lay kay tujhay 

Aik amroohi sa khatra hai 

Hai ajab tor halat-e-giriya 

Keh masa ko nami se khatra hai 

Aasmano main hai Khuda tanha 

Aur her aadmi se khatra hai 

Main kahoon kis tarah yeh baat us se 

Tujh ko jaanam mujh hi se khatra hai 

Aaj bhi Aye kinar-e-baan mujhay 

Teri ik sanwli se khatra hai 

In labon ka lahoo na pee jaon 

Apni tishna labi se khatra hai 

Jon hi to hai , Jon kay dar pay 

Mir ko Mir hi se khatra hai 

Ab nahin koi baat khatray ki 

In sabhi ko sabhi se khatra hai 

Dil jo dewana nahin aakhir ko dewana bhi tha

Dil jo dewana nahin aakhir ko dewana bhi tha 

Bhoolnay par us ko jab aaya to pehchana bhi tha 

Jaaniye kis shouq main rishtay bichar kar reh gaye 

Kaam to koi nahin tha par hamein jaana bhi tha 

Ajnabi sa aik mousam aik be'mousam si shaam 

Jab ussay aana nahin tha jab ussay aana bhi tha 

Jaaniye kiyon dil ki wehshat darmiyan main aa gayi 

Bas youn hi hum ko behakna bhi tha beh'kaana bhi tha 

Ik mehakta sa woh lamha tha keh jaisay aik khayal 

Ik zamanay tak ussi lamhay ko tarpana bhi tha 

Chalo baad-e-bahaari jaa rahi hai

Chalo baad-e-bahaari jaa rahi hai 

Piya jee ki sawari jaa rahi hai 

Shumaal-e-jawidaan-e-sabz jaan se 

Tamana ki amaari jaa rahi hai 

Faghan ae dushmani daar-e-dil-o-jaan 

Meri haalat sudhaari jaa rahi hai 

Jo in rozon mera gham hai woh yeh hai 

Keh gham se burd'bari jaa rahi hai 

Hai seenay main ajab ik hashar bar'pa

Keh dil se be'qaraari jaa rahi hai 

Main peh'ham haar kar yeh sochta hoon 

Woh kya shay hai jo haari jaa rahi hai 

Dil us kay ru-ba-ru hai aur gum sum 

Koi arzi guzari jaa rahi hai 

Woh syed bacha ho aur shaikh kay saath 
Miyan izzat hamari jaa rahi hai 

Hai bar'pa her gali main shor-e-naghma
Meri fariyaad maari jaa rahi hai 

Woh ya'daab ho rahi hai dil se rukhsat
Miyan piyaron ki piyari jaa rahi hai 

Bhout bad'haal hain basti yeh teray log 
to phir tu kiyon sanwari jaa rahi hai 

Teri marham nigahi ae maseeha !
Kharaash-e-dil pe waari jaa rahi hai 

Kharabay main ajab tha shor bar'pa
Dilon se intizari jaa rahi hai 

Nahin nibahi khushi se ghami ko chor diya

Nahin nibahi khushi se ghami ko chor diya 

Tumharay baad bhi main ne kai ko chor diya 

Hon jo bhi jaan ki jaan woh gumaan hotay hain 

Sab hi thay jaan ki jaan aur sab ko chor diya

Shaoor aik shaoor-e-faraib hai so to hai 

Gharz keh aagahi , na aagahi ko chor diya 

Khayal-o-khawab ki andeshgi kay sukh jhailay 

Khayal-o-khawab ki andeshgi ko chor diya 

Ajab halat hamari ho gayi hai

Ajab halat hamari ho gayi hai

Yeh duniya ab tumhari ho gayi hai

Sukhan mera udaasi hai sar-e-shaam

Jo khamoshi pe taari ho gayi hai

Bhout hi khush hai dil apnay kiye par

Zamanay bhar main khawari ho gayi hai

Woh nazuk lab hai ab janay hi wala

Meri awaaz bhaari ho gayi hai

Dil ab duniya pe lanat kar keh is ki

Bhout khidmat guzaari ho gayi hai

Yaqeen mazoor hai ab aur gumaan bhi

Bari be'rozgari ho gayi hai

Woh ik baad-e-shumaali rang jo thi

Shameem us ki sawari ho gayi hai

Meray paas aa kay khanjar ghomp de tu

Bhout neza guzari ho gayi hai 

Ik dil hai jo her lamha jalanay kay liye hai

Ik dil hai jo her lamha jalanay kay liye hai 

Jo kuch hai yahan aag laganay kay liye hai 

Ik baat hi kehni hai mujhya tujh se , bas ik baat 

Is shaher main to sirf ganwanay kay liye hai 

Her shakhs meri zaat se janay kay liye tha 

Tu bhi to meri zaat se janay kay liye hai 

Bu'dash jo hai woh aik tamasha hai gumaan ka 

Hai jo bhi haqeeqat woh fasanay kay liye hai 

Han'sanay se kabhi khush nahin hota hai mera dil 

Yahan mujh ko hansana bhi rulanay kay liye hai 

Qaatil ko meray mujh se nahin hai koi pur'khaash

Qaatil to mera rang jamanay kay liye hai 

Zaat apni gawah ki jaye

Zaat apni gawah ki jaye 

Band aankhon nigah ki jaye 

Hum to bas apni chah main hain magan 

Kuch to us ki bhi chah ki jaye 

Aik naatak hai zindagi jis main 

Aah ki jaye , wah ki jaye 

Dil ! hai is main tera bhala keh teri 

Mumlikat be'sipah ki jaye 

Malka jo bhi apnay dil ki na ho 

Jon ! woh be'kal'lah ki jaye