Janay kaisay sambhaal kar rakhay
Sab iraday sambhaal kar rakhay
Kuch naye rang hain mohabbat kay
Kuch puranay sambhaal kar rakhay
Mousam-e-ishq teri baarish main
Khatt jo bheegay sambhaal kar rakhay
Jin ki khushbu udaas karti thi
Woh bhi gajray sambhaal kar rakhay
Tujh se milnay kay aur bicharnay kay
Saray khad'shay sambhaal kar rakhay
Jab hawa ka mizaaj barham tha
Hum ne pattay sambhaal kar rakhay
Aarzu kay haseen pinjray main
Kuch prinday sambhaal kar rakhay
Hum ne dil ki kitaab main teray
Saray waday sambhaal kar rakhay
Teray dukh kay tamaam hi mousam
Ae zamanay sambhaal kar rakhay
Meray khawabon ko raakh kar dala
Aur apnay sambhaal kar rakhay
No comments:
Post a Comment