Abar barsa na hawa taiz chali hai ab keh
Kitni veeran teri yaadon ki gali hai ab keh
Subh ki dhoop utar aayi hai meray baalon main
Shab dhali hai keh meri umar dhali hai ab keh
Kya kahoon kitnay bahano se bhulaya hai ussay
Yeh qayamat barri mushkil se tali hai ab keh
Sehan-e-gulshan ki hawa hai keh fiza ki dastak
Kitni sehmi hui ik ik kali hai ab keh
Ya meri aankh kay kashkol main aansoo chamka
Ya andehray main koi shama jali hai ab keh
Kis ko fursat hai dhuwaan dekhnay jaye Mohsin
Jhonpari bhi shaher se kuch door jali hai ab keh
