Imran's Poetry: 05/22/16

May 22, 2016

Jatay ho to le jao yaadein meray dil se

In shamon ka kya rishta ujri hui mehfil se

Is baar safar se hum kis shan se lotay hain

Maan baap ne pehchana hum ko bari mushkil se

Suraj se bacha'ein gay badal kay jazeeray kya

Tum ne bhi zameen maangi behtay huye saahil se

Anjaan si raahon main , main isi liye phirta hoon

Awaz hamein de ga shayed koi manzil se

Dil phoolon ki basti hai aur phool bhi yaadon kay

Ik raat yahin thehro , jao na abhi dil se

Zindan kay andheray bhi tareek nahin hotay

Kirnein si chamakti hain , naghmaat-e-sala'sal se

Acha tumharay shaher ka dastoor ho gaya

Jis ko galay laga liya , woh door ho gaya

Kaghaz main dab kay mar gaye keeray kitab kay

Dewana be'parhay likhay mashoor ho gaya

Mohalon main hum ne kitnay sitaray saja diye

Lakin zameen se chand bhout door ho gaya

Tanhaiyon ne tor di hum dono ki anaa

Aaina baat karnay pe majboor ho gaya

Wadi se kehna us ki kahani sunaye

Jo baadshah ishq main mazdoor ho gaya

Subha wisal pooch rahi hai ajab sawal

Woh paas aa gaya keh bhout door ho gaya

Kuch phal zaroor ayein gay roti kay pay'ra main

Jis din mera mutalba manzoor ho gaya

Wehshi ussay kaho jissay wehshat ghazal se hai

Insan ki la'zawal mohabbat ghazal se hai

Hum apni sari chahatein qurban kar chukay

Ab kya bataein kitni mohabbat ghazal se hai

Lafzon kay mail jol se kya qurbatein barhein

Lehjon main narm narm sharafat , ghazal se hai

Izhaar kay naye naye asloob de diye

Tehreer-o-guftagoo main nafasat ghazal se hai

Yeh sadagi , yeh naghmagi , dil ki zuban main

Wabasta fikar-o-fun ki ziyarat ghazal se hai

Shairon main sufiyon ki tareeqat ka noor hai

Urdu zuban main itni taharat ghazal se hai

Allah ne nawaz diya hai to khush raho

Tum kya samjh rahay ho yeh shohrat ghazal se hai

Tootay huye sitaar kay sab taar kas gaye

Baarish hui keh dard kay naghmay baras gaye

Kaisi siyah raat thi dehleez par kharri

Woh muskura diye to ujaalay baras gaye

Shadabiyon kay dour ka anjam yeh hua

Ab kay to boond boond ko dariya taras gaye

A khaak urr rahi hai gulabon kay shaher main

Woh lu hai ab kay keh pathar jhulas gaye

Ghar se khaloos kya gaya sab kuch chala gaya

Baton main ras nahin raha , hathon kay jas gaye

Kuch rashak mehar-o-maah yahan aaye thay kabhi

Koi to kuch bataye kahan ja kay bas gaye

Ta'laab be'chamak hain , jahan machliyan na hon

Akhbar be'maza hai , agar surkiyan na hon

Main poochta hoon meri gali main woh aaye kiyon

Jis dakiyea (Postman) kay paas teri chithiyan na hon

Hum ko baray khaloss se mar jana chahiye

Jab zindagi main thori bhi dushwariyan na hon

Is aag ko Khuda meri jhugi se door rakh

Jis aag main mehakti hui rotiyan na hon

Aansu bhout eham hain , in aankhon kay wastay

Woh aasman nahin hai , jahan badliyan na hon

Larkay hain apnay baap ki jageer kay raqeeb

Woh ghar bhi koi ghar hai jahan larkiyan na hon

Agar yeh intizam hai saqi

Phir hamara salam hai saqi

Aaj to izn-e-aam hai

Raat rindon kay naam hai saqi

Meray sagar main raat utri hai

Chand taron ka jaam hai baqi

Aik aaye ga , aik jaye ga

Meh'kaday ka nizam hai saqi

Jaam tootay surahiyan tootein

Yeh bhi ik qatal-e-aam hai saqi

Teray hathon se pee raha hoon sharab

Meh'kada meray naam hai saqi

Gaon mitt jayein gay , shaher jal jaye ga

Zindagi tera chehra badal jaye ga

Hum ghareebon ki is bheer main tum kahan

Yeh kalaf waar karta masal jaye ga

Aag par raqs karnay main yakta hai tu

Barf par paon tera phisal jaye ga

Main isi fikar main raat soya nahin

Chand taron ko suraj nigal jaye ga

Ab usi din likhon ga dukhon ki ghazal

Jab mera haath aahan main dhal jaye ga

Kuch likh marsiya , masnavi ya ghazal

Koi kaghaz ho pani main gal jaye ga

Main agar muskura kay inhein dekh loon

Qaatlon ka irada badal jaye ga

Her janam main usi ki chahat thay

Hum kisi aur ki amanat thay

Us ki aankhon main jhil'milati hui

Hum ghazal ki koi alamat thay

Teri chadar main tan samait liya

Hum kahan kay daraz qamat thay

Jaisay jungle main aag lag jaye

Hum kabhi itnay khoobsurat thay

Paas reh kar bhi door door rahay

Hum naye dour ki mohabbat thay

Is khushi main mujhay khayal aaya

Gham kay din kitnay khoobsurat thay

Din main in jugnu'on se kya lena

Yeh diye raat ki zaroorat thay

Teer hai aur na talwar insaan hai

Pyar kar , pyar hi pyar insaan hai

Jo mohabbat se lay usi kay liye

Jaan denay ko tayar insaan hai

Ik ghar kitnay hison main taqseem hai

Apni raahon ki dewaar insaan hai

Yeh zameen aasmano ko chooti hui

Aur majboor , la'chaar insaan hai

Apni zanjeer main khud hi jakra hua

Aap apna giraftaar insaan hai

Tum bhi bazar ho , hum bhi bazar hain

Aaj apna kharidaar insaan hai

Dushmano se bara apna dushman bana

Apni gardan pe talwaar insaan hai

Dosron kay diyon ko bujhata hua

Roshni ka talab'gaar insaan hai

Zamana kuch nahin badla , mohabbat ab bhi baqi hai

Mohabbat zindagi kay baagh main phoolon ki tehni hai

Mohabbat kay iraday moh'jazon se kam nahin hotay

Samandar paar karnay kay liye kaghaz ki kashti hai

Kabhi socha Khuda kay samnay ik roz jana hai

Tera mazhab ghazal hai aur ghazal main butt parasti hai

Kabhi bolo to shehron kay makaan bhi baat kartay hain

Tumharay zehan main to sirf qasbay ki haweli hai

Agar beti ki shadi ho to phir koi nahin dushman

Meri basti ki yeh mukhlis kahawat ab bhi sacchi hai

Teray suraj nikalnay se mera mousam nahin badla

Wohi gehri udasi thi , wohi gehri udasi hai

Meri aankhon main teray pyar ka aansu aaye

Koi khushbu main lagaon , teri khushbu aaye

Waqat-e-rukhsat kahin taaray kahin jugnoo aaye

Haar pehna'nay mujhay phool se bazu aaye

Main ne din raat Khuda se yeh dua maangi thi

Koi aahat na ho dar par meray jab tu aaye

In dino aap ka aalam bhi ajab aalam hai

Teer khaya hua jaisay koi aahu aaye

Us ki baatein keh gul-o-lala pe shabnam barsay

Sab ko apna'nay ka us shokh ko jadu aaye

Us ne chu kar mujhay pathar se phir insan kiya

Mud'daton baad meri aankhon main aansu aaye

Taaron ki chilmano se koi jhaankta bhi ho

Is kainaat main koi muntazir naya bhi ho

Itni siyah raat main kis ko sadaein doon

Aisa chragh de jo kabhi bolta bhi ho

Main kis tarah yeh maan loon fasal-e-bahar

Ik phool to khilay koi patta har'ra bhi ho

Woh meray saath chal sakay is dhoop chaon main

Mehboob khush mizaaj ho , gham aashna bhi ho

Duniya badal gayi hai abhi aur badlay gi

Kaisay kahon keh aankh main sharm-o-haya bhi ho

Woh chand to nahin hai magar chand ki tarah

In pathron ki Oat se ab jhaankta bhi ho

Seenay main khanjar ki nok chubhoti hain

Kuch yaadein bhi kitni zaalim hoti hain

Bachpan main yeh baat mujhay maloom na thi

Main jab hansta hoon , yeh aankhein roti hain

Dil main aa kar tum mat gin'nanay lagna

Meray andar kai qabrein soti hain

Mera haal Khuda hi behtar janay hai

Mujh pe din hanstay hain , raatein roti hain

Jitnay taaray aasman par sab teray

Bol samandar tujh main kitnay moti hain

Tum chatt par jab bhi zulfein bikhratay ho

Baal baal main raatein Oas paroti hain

Sab ko main tera inaam samjhta hoon

Raahon main jo bhi takleefein hoti hain

Tha Mir jin ko shair ka azaar mar gaye

Ghalib tumharay saray taraf'daar mar gaye

Jazbon ki woh sadaqatein marhoom ho gayein

Ehsaas kay naye naye izhaar mar gaye

Tashbeeh-o-ista'ara-o-maz-o-kinaya kya

Paikar taraash shair kay fun'kaar mar gaye

Saqi teri sharab bara kaam kar gayi

Kuch raastay main , kuch pas-e-dewar mar gaye

Taqdees dil ki asiyan nigari kahan gayi

Shayed ghazal kay saray gunah'gaar mar gaye

Shairon main ab jihaad hai , roza nimaz hai

Urdu ghazal main tanay thay kufaar mar gaye

Akhbaar ho rahi hai ghazal ki zuban ab

Apnay shaheed 8 , udher 4 mar gaye

Misron ko hum ne nara-e-takbeer kar diya

Geeton kay pukhta kaar gulu'kaar mar gaye

Asloob takhat itna garajdaar ho gaya

Mehdi hassan kay hashiya bar'daar mar gaye

Tanqeedi istalahon kay mushtaq sheh'sawar

Ghoron pe dor'ray aaye sardaar mar gaye

Naaz-o-ada se machliyan ab hain ghazal sara

Tehmad pakar kay sahib-e-dastaar mar gaye

Ya'Rab talism-e-hosh raha hai mushaira

Jin ko nahin bulaya , woh gham khawar mar gaye

Shaher-e-dil , dhoond rahi hain galiyan

Zulf ki chaal chali hain galiyan

Band darwaze , majlid novel

Daastano se bhari hain galiyan

Kamray , darwaze , dareechay khamosh

Chilmanein taak rahi hain galiyan

" Kaali mohrein " se bhara khat paa kar

Siskiyan bharti rahi hain galiyan

Aik lamhay ko thehr janay do

Mujh ko pehchan rahi hain galiyan

Raat shabnam giri kuch had se siwa

Ya bhout roti rahi hain galiyan

Kon aata hai yahan kis kay liye

Sab ko pehchan gayi hain galiyan

Meray hathon ki lakeeron ki tarah

Aasman par bhi bichhi hain galiyan

Behtay aansu teray daman ki taraf

Shaher ki simt chali hain galiyan

In main mil jayein bhoolay bichray

Dil main aisi bhi kai hain galiyan

"Badr" taarekh kay safhon main nahin

Meri aankhon main basi hain galiyan

Jo apnay dukh sukh baant sakay hum us ko aurat kehtay hain

Warna her achi surat ko pathar ki moorat kehtay hain

Yeh raam janam bhoomi ka lahu , yeh baab'ri masjid ki laashein

Tum in ko mazhab kehtay ho , hum wehshi siyasat kehtay hain

Is mulak main hindu , muslim , sikh sab pagal hotay jatay hain

Mula , pandit , neta , is ko Allah ki rehmat kehtay hain

Duniya kay ujlay kurtay se hum ne to jutay poonjh liye

Woh shair hain jo ruswai ko apni shohrat kehtay hain

Azaad kar de apna giriftaar main hi hoon

Sar pe latak rahi hai jo talwar main hi hoon

Hindustan ka sacha wafa'daar main hi hoon

Qabron se pooch asal zameen'daar main hi hoon

Dariya kay saath woh to samandar main beh gaya

Matti main mil kay matti ka haq'daar main hi hoon

Apni ghazal se kis ka kaleja nikaal loon

Naghmon ki dhaar , shair ki talwar main hi hoon

Is 20 sadi main thay faiz-o-firaq bhi

Is 20 sadi ka ada'kaar main hi hoon

Apnay siwa kisi se mohabbat nahin mujhay

Ghalib bhout shareef thay makaar main hi hoon

Kya wasta ghazal ko puranay arooz se

Andhay mujhay ta'toal keh fun'kaar main hi hoon

Woh Aaish kar raha hai bhout kaafron kay saath

Mola ki rehmaton ka talab'gaar main hi hoon

ab 100 karoor log sambhalein gay raaj paat

Urdu ghazal ka aakhri dar'baar main hi hoon

Ik Mir tha so aaj bhi kaghaz main qaid hai

Hindi ghazal ka doosra otaar main hi hoon

Kalma parhaya phir issay hindi bana diya

Mulak sukhan ka paak gunah'gaar main hi hoon

Chola badal kay phir main satta main ayon ga

Jo girnay wali hai wohi sarkar main hi hoon

Main lartay lartay toot gaya apnay aap se

Rawan ka roop , raam ka otaar main hi hoon

Meri zameen nayi hai , mera aasman hai aur

Subha adab hoon , shaam ka akhbaar main hi hoon

Apna qaseeda bhejon ga apnay hazoor main

Suraj hoon apni dhoop ka darbaar main hi hoon

Kisi ki yaad main palkein zara bigho letay

Udaas raat ki tanhaiyon main ro letay

Dukhon ka bojh akelay nahin sambhalta hai

Kahin woh milta to us se lipat kar ro letay

Agar safar main hamara bhi hum'safar hota

Bari khushi se in hi pathron pe so letay

Tumhari raah main shakhon pe phool sookh gaye

Kabhi hawa ki tarah is taraf bhi ho letay

Yeh kya keh roz wohi chandni ka bistar ho

Kabhi to dhoop ki chadar bicha kay so letay

Yeh khal'la hai arsh-e-bareen nahin , kahan paon rakhon zameen nahin

Teray dar pe sajday ka shouq hai , jo yahan nahin to kahin nahin

Kisi butt trash ne shaher main mujhay aaj kitna badal diya

Mera chehra mera nahin raha , yeh jabeen bhi meri jabeen nahin

Hai zaroor is main bhi maslihat , woh jo hans kay poochay hai khairiyat

Keh mohabbaton main gharz na ho , nahin aisa pyar kahin nahin

Wahin dard-o-gham ka gulab hai , jahan koi khana khrab hai

Jissay jhuk kay chand na choom lay , woh mohabbaton ki zameen nahin

Teri zulf zulf sajaon kya , tujhay khawab khawab dikhaon kya

Main safar se loat kay ayon , mujhay khud bhi is ka yaqeen nahin

Paas reh kar juda si lagti hai

Zindagi be'wafa si lagti hai

Main tumharay baghair bhi jee loon

Yeh dua , bad'dua si lagti hai

Naam us ka likha hai aankhon par

Aansu'on ki khata si lagti hai

Woh abhi is taraf se guzra hai

Yeh zameen aasman si lagti hai

Pyar karna bhi jurm hai shayed

Aaj duniya khafa si lagti hai

Sun li jo khuda ne woh dua tum to nahin ho

Darwaze pe dastak ki sada tum to nahin ho

Simti hui sharmai hui raat ki rani

Soyi hui kaliyon ki haya tum to nahin ho

Mehsoos kiya tum ko to geeli hui palkein

Bheegay huye mousam ki ada tum to nahin ho

In ajnabi rahon main nahin koi bhi mera

Kis ne mujhay youn apna kaha , tum to nahin ho

Jab raat ki tanhai dil ban kay dharakti hai

Yaadon kay dareechon main chilman si sarakti hai

Lo'baan main chingari jaisay koi rakh jaye

Youn yaad teri shab bhar seenay main sulagti hai

Youn pyar nahin chupta , palkon kay jhukanay se

Aankhon kay lifafon main tehreer chamakti hai

Khush'rang prindon kay loat aanay kay din aaye

Bichray huye miltay hain jab baraf pighalti hai

Shohrat ki bulandi bhi pal bhar ka tamasha hai

Jis daal pe baithay ho , woh toot bhi sakti hai

Is dar ka dar'baan bana de Ya'Allah

Mujh ko bhi sultan bana de Ya'Allah

In aankhon se teray naam ki baarish ho

Pathar hoon insan bana de Ya'Allah

Sehma dil , tooti kashti , charhta dariya

Her mushkil aasan bana de Ya'Allah

Main jab bhi chahon jhaank kay tujhay dekh sakon

Dil ko roshan'daan bana de Ya'Allah

Mera bacha sada kaghaz jaisa hai

Ik harf-e-emaan bana de Ya'Allah