Mukamal do hi dano par yeh tasbeeh-e-mohabbat hai

Mukamal do hi dano par yeh tasbeeh-e-mohabbat hai 

Jo aaye teersra dana to doori toot jati hai 

Mo'iyan waqat hota hai mohabbat ki nimazon ka 

Ada jin ki nikal jaye qaza bhi choot jaati hai 

Mohabbat ki nimazon main imaamat aik ko sompein 

Issay taknay , ussay taknay se niyat toot jaati hai 

Mohabbat dil ka sajda hai jo hai toheed pe qa'im 

Nazar kay shirk walon se mohabbat rooth jaati hai 

Butt-e-mehboob pana hai to phir Allah se mango 

Keh pooja butt ki karnay main to qismat phoot jaati hai

 

Jab le kar naam mera pukara us ne sar-e-mehfil

Jab le kar naam mera pukara us ne sar-e-mehfil 

Ban ban kar kai log meray hum'naam niklay

Raat abhi tanhai ki pehli dehleez pe hai

Raat abhi tanhai ki pehli dehleez pe hai

Aur meri janab apnay hath barhati hai

Soch rahi hoon

In ko tham'on

Zeena zeena snat'on ke teh khanon main utron

Ya apnay kamray main tehron

Chaand meri khirki pe dastak deta hai

yeh jhuki jhuki ankhain yeh ruka ruka lehja

Yeh Jhuki jhuki ankhain 

Yeh ruka ruka lehja

Lab pe bar bar a ke

Toot'ta hua fiqra

Gard main ati palkai'ein

Dhoop se tapa chahra

Sar jukahye aya hai

Ik umar ka bhoola

Dil hazar kehta hai

Hath thaam lo us ka

Choom lo yeh paisahani

Lotanay na doon tanha

Koi dil se kehta hai 

Saray haraf jhootay hain

Aadhi raat ko yeh duniya walay jab khawabon main kho jatay hain

Aadhi raat ko yeh duniya walay jab khawabon main kho jatay hain 

Aisay main mohabbat kay rogi yaadon kay chragh jalatay hain 

Kartay hain mohabbat sab hi magar , her dil ko sila kab milta hai 

Aati hain baharein gulshan main , her phool magar kab khilta hai 

Tu ranjha na tha main heer na thi hum apna pyar nibha na sakay 

Youn pyar kay khawab bhout dekhaye tabeer magar hum paa na sakay 

Main ne to bhout chaha lakin tu rakh na saka wadon ka bharram 

Ab reh reh kay yaad aata hai jo tu ne kiya is dil pe sitam

Parda jo hatta don chehray se tujhay log kahein gay har'jaai 

Majboor hoon main dil kay haathon , manzor nahin teri ruswai 

Socha hai keh ab apnay honton par main chup ki mohar laga loon gi 

Main teri sulagti yaadon se ab is dil ko behlaa loon gi

Woh baat kiyon karein jis ki khabar hi na ho

Woh baat kiyon karein jis ki khabar hi na ho 

Woh dua kaisay karein jis ka asar hi na ho 

Kaisay keh doon tumhein kag jaye meri umar

Kya pata aglay pal meri umar hi na ho

Kitnay mousam aaye aur phir chalay gaye

Teri yaad ka mousam 

Kitnay mousam aaye aur

Phir chalay gaye

Garam thapairay lu kay hon ya 

Baarish ho 

Pat jharr ya phir 

Mousam-e-gul 

Hijrat hi nahin karta 

Teri yaad ka mousam ...!

Main bhi aam si larki hoon

Main bhi aam si larki hoon 

Tum ne mujhay koi sangi mujasama hi samjha 

Keh jis par koi baat , koi dukh 

Koi takleef asar nahin karti 

Meray dosto

Dhoop ki chubhan mujhay bhi hoti hai 

Kisi ka sakhat lehja mujhay bhi mehsoos hota hai 

Baton kay teer mujhay bhi lagtay hain 

Kisi mazboot baazu ka hisaar mujhay bhi chahiye 

Aik Aaitbaar mujhay bhi chahiye 

Aik ghar , aik dareechay ki khwaish mujhay bhi hai 

Main koi sangi mujasama nahin hoon 

Bhout aam si larki hoon 

Kaash ! tum ne mujhay kabhi "Khaas" na samjha hota

Tash'khees baja hai keh mujhay ishq hua hai

Tash'khees baja hai keh mujhay ishq hua hai 

Nuskhay main likho un se mulaqaat musal'sal

Husan ko la'jawaab hona tha

Husan ko la'jawab hona tha 

Shouq ko kamyaab hona tha 

Hijar main kaif-e-iztraab na pooch 

Khoon-e-dil ko sharab hona tha 

Teray jalwon main ghir gaya aa kar 

Zaray ko aftaab hona tha 

Kuch tumhari nigah kaafir thi 

Kuch mujhay bhi kharaab hona tha 

Raat taaron ka tootna bhi "Majaaz"

Bais'e'iztraab hona tha

Us ne kaha main janti hoon

Us ne kaha main jaanti hoon 

Us ne kaha 

Mujhay pata hai 

Tumhari aankhein abar alood hain 

Main tumhein aur rulaon gi 

Tum khouf zada insaan ho 

Main tumhein aur daraon gi 

Tum zakhmi ho 

Main tumhein aur zakham lagaon gi 

Us ne kaha 

Mujh se jo  jo kuch ho saka main karon gi 

Kiyon keh main jaanti hoon 

Tum mujh se mohabbat kartay ho

Salam likhta hai shair tumharay husan ke naam

Salam likhta hai shair tumharay husan ke naam

Bikhar gaya jo kabhi rang-e-peh'rahan sar-e-baam 

Nikhar gayi hai kabhi subha , dopehar , kabhi shaam 

Kahin jo qamat-e-zeba pe saj gayi hain qaba 

Chaman main sar-o-sanobar sanwar gaye hain tamaam 

BAni bisaat-e-ghazal jab dabo liye dil ne 

Tumharay saya-e-rukhsaar-o-lab main sagar-o-jaam 

Salam likhta hai shair tumharay husan ke naam

Tumharay haath pe hai tabish-e-hina jab tak 

Jahan main baqi hai dildari-e-uroos-e-sukhan 

Tumhara husan jawan hai to meharban hai falak

Tumhara dam hai to dam'saaz hai hawa-e-watan 

Agarcha tang hain auqaat , sakhat hain alaam 

Tumhari yaad se sheerein hai talkhi-e-ayaam 

Salam likhta hai shair tumharay husan ke naam

Sakoot-e-shaam jab khamosh kar jaye zamanay ko

Sakoot-e-shaam jab khamosh kar jaye zamanay ko 

Sitaray ayein jis dam noor ki chadar bichanay ko 

Naseem-e-jaan fiza chalti ho duniya ko sulanay ko 

ba alfaaz deegar , aa jaye neend zamanay ko 

To tum yeh jaan lena , koi tum ko yaad karta hai

Phir kisi yaad ne hai raat bhar jagaya mujh ko

Phir kisi yaad ne hai raat bhar jagaya mujh ko 

Kya saza di hai mohabbat ne khudaya mujh ko 

Din ko araam hai na raat ko chain kabhi 

Janay kis khaak se hai qudrat ne banaya mujh ko 

Dukh to yeh hai keh zamanay main milay ghair sabhi 

Jo mila hai woh mila ban kay praya mujh ko 

Jab koi bhi na raha kaandha meray ronay ko 

Ghar ki dewaron ne seenay se lagaya mujh ko 

Ab to umeed-e-wafa tum se nahin hai koi 

Phir chiraghon ki tarah kis ne jalaya mujh ko

Yaad bhout tum ayo gay tanhai main rulao gay

Yaad bhout tum ayo ge

Tanhai main rula'o ge

Wasal ke lamhaat ka

Ab zikar kiya biyaan kiya

Hijar ka hai dard yeh

Judai main ankh ashk'baar

Bichar ke tum se kiya jiye

Bas khud pe hum hansa kiye

Kati patang ki tarah

Yahan ura de wahan gira de

Manzil faraib de gi

Hum raah ki dhool main rahay

Pashemaan huye kiya tum kabhi

Tanha mujhay youn chor ke

Jamal ban kar meri aankh main samatay ho

Mujhay tum yaad aatay ho 

Jamal ban kar meri aankh main samatay ho 

Khayal ban kar meray dil ko gud'gudatay ho 

Kamal ban kar meri zindagi banatay ho 

Wisal ban kar meray hoslay barhatay ho 

Sawal abn kay khayalon main sata'tay ho 

Zawal ban kar pyar ki intiha samjhatay ho 

Khuda gawah hai mujhay tum yaad aatay ho

Tujh se naraz nahin zindagi hairaan hoon main

Tujh se naraz nahin zindagi hairaan hoon main 

Teray masoom sawalon se parishaan hoon main 

Jeenay kay liye socha hi na tha dard sambhalnay hon gay 

Muskura'on to muskuranay kay qarz utarnay hon gay 

Muskuraon kabhi to lagta hai 

Jaisay honton pe qarz rakha hai 

Tujh se naraz nahin zindagi hairaan hoon main 

Aaj agar bhar ayi hain , boondain baras jayein gi 

Kal kya pata in kay liye aankhein taras jayein gi 

Janay kahan gum hua kahan khoya 

Aik aansoo chupaa kay rakha tha 

Tujh se naraz nahin zindagi hairaan hoon main 

Zindagi teray gham ne hamein rishtay naye samjhaye

Milay jo hamein dhoop main milay chaaon kay thanday saaye 

Tujh se naraz nahin zindagi hairaan hoon main 

Tanhai ik saza hai yeh aaj main ne jana

Tanhai ik saza hai 

Yeh aaj main ne jana

Dard be'intiha hai 

Yeh aaj main en jana 

Main jo rehta hoon din bhar hajoom main 

Kitna tanha hoon 

Yeh aaj main ne jana 

Raat ki tareeki main 

Aasman ko takta hoon 

Dekhta hoon yeh kya main 

Chand bhi akela hai 

Main bhi bhout akela hoon

Chasham-e-saqi se talab kar ke gulabi doray

Chashm-e-saqi se talab kar kay gulabi doray 

Dil kay zakhmon ko kahin baith kay see leta hoon 

Sagar-oi-mai to bari cheez hai , ik neh'mat hai 

Ashk bhi aankh main bhar ayein to pee leta hoon

Aur kiya chahatay ho maqaam apna

Aur kya chahtay ho maqaam apna 

Keh to diya zindagi ho tum

Aj bhi ho jo ibrahim ka emaan paida

Aaj bhi ho jo Ibrahim (a.s) ka emaan paida 

Aag kar sakti hai andaz-e-gulistan paida

Suna hai us ko mohabbat duaein deti hai

Suna hai us ko mohabbat duaein deti hai 

Jo dil pe chot to khaye magar gila na karay 

Shiddat-e-dard main Ayi na kami koi bhi jana

Shiddat-e-dard main Ayi na kami koi bhi jana 

Dard phir dard raha , ulta likha ya seedha

Koi chupkay chupkay kehta hai

Koi chupkay chupkay kehta hai 

Koi geet likho meri aankhon par 

Koi shair kaho meray lafzon par 

In khushboo jaisi baaton par 

Chup chaap main sunta rehta hoon 

Phir in jheel si gehri aankhon par 

Aik taza ghazal likh deta hoon 

In phool jaisi baaton par 

Aik shair naya keh deta hoon 

YEh geet ghazal yeh shair meray 

Sab us kay pyar ka dar panhai

Sab us kay roop ka dar'shan hai

Sab us ki aankh ka kajal hai 

Bas itna yaad hai keh mujhay ishq hua tha

Bas itna yaad hai keh mujhay ishq hua tha 

Phir kya hua us ki mujhay khabar nahin

Bhout kuch yaad aata hai tumharay yaad aanay se

Kabhi yaadain , kabhi baatain , kabhi beeti mulaqaatain 

Bhout kuch yaad aata hai tumharay yaad aanay se 

Paas aa zara dil ki baat bataon tujh ko

Paas aa zara dil ki baat bataon tujh ko 

Kaisay dharakta hai dil awaz sunaon tujh ko 

Aa kay tu dekh lay dil pe likha hai naam tera 

Agar kehta hai tu dil cheer kay dikhaon tujh ko 

Jitna jalaya hai tu ne pyar main mujh ko 

Dil to karta hai main bhi jalaon tujh ko 

Ajnabi hota tu aisay kar bhi leta shayed 

Magar tum to apnay ho kaisay sataon tujh ko

Meray rag-o-py main sama gaya woh shakas

Meray rag-o-py main sama gaya woh shakas

Meri zindagi main cha gaya woh shaks

Meray dil se dil mila gaya woh shaks

Mujhay kush naseeb bana gaya woh shaks

Mujhay de gaya apni her kushi

Meri ankhon se neend chura gaya woh shaks

Janay kiya baat thi us main aisi

Muhay mohabbat karna sikha gaya woh shaks

dashat-o-darya se guzarna ho keh ghar main rehna

Dasht-o-dariya se guzarna ho keh ghar main rehna 

Ab to her haal main hai hum ko safar main rehna 

Dil ko her pal kisi jadu kay asar main rehna 

Khud se niklay to kisi aur kay dar main rehna

Shaher-e-gham dekh teri aab-o-hawa khushk na ho 

Raas aata hai ussay deeda-e-tar main rehna 

Faisalay saray ussi kay hain hamari ba'bat 

Ikhtayar apna bas itna keh khabar main rehna 

Toot'na youn to muqaddar hai magar kuch lamhay 

Phool ki tarah muyassar ho sajar main rehna 

Tahir jaan kay guzarnay se bara saniha hai 

Shouq-e-parwaz ka tootay huye par main rehna

Ik khwaab hai, is khwaab ko khona bhi nahin hai

Ik khwaab hai, is khwaab ko khona bhi nahin hai

Tabeer ke dhagay main perona bhi nahin hai

Lipta hua hai dil se kisi raaz ki surat

Ik shakas keh jis ko mera hona bhi nahin hai

Rakhna hai sar-e-chasham issay sakat-o-jamad

Pani main abhi chaand bighona bhi nahin hai

Her chand teray naqsh-e-kafa-e-pa main hai lakin

Yeh dil kisi bachay ka khilona bhi nahin hai

Wabasta hai mujh se keh tu hai bhi keh nahin hai

Jab main nahin tujh main , Tera hona bhi nahin hai

Jis shakas ki khatar tera yeh haal hai khawar

Us shakas ne teray mar janay pe rona bhi nahin hai