Abhi ik mor aaya hai abhi manzil nahin aayi

"Abhi ik mor aaya hai "

Abhi ik mor aaya hai 

Abhi manzil nahin aayi 

Abhi apnay diye se

Aur kitnay hi diye mujh ko jalanay hain 

Abhi to is safar main 

Aur kitnay mor aanay hain 

Abhi main taza dam hoon 

Abhi seenay main jalta woh diya 

Waisay hi roshan hai 

Abhi zulmat kaday main 

Apnay hissay ki sham'mein mujh ko jalani hain 

Keh youn bhi roshni taqseem karnay kay safar main 

Manzalon ki qaid kya ho gi 

Puranay sathiyon ko chornay ka 

Gham to hai dil main !

Keh jin kay saath chalnay se 

Safar ne apni sari mushkalein khud hi sameti thein 

Naye raston pe un ki yaad meri hamsafar ho gi

Puranay sathiyon ko chornay ka gham to hai dil main 

Magar mujh ko abhi to 

Roshni taqseem karni hai 

Abhi to mor aaya hai 

Abhi manzil nahin aayi

Aaj tak main nahin samjha teri duniya kya hai

Aaj tak main nahin samjha teri duniya kya hai 

Ae khuda tu hi bata de yeh tamasha kya hai 

Yeh suna hai lakeeron ki zubaan hoti hai 

Bol deti hain keh is haath main likha kya hai 

Aaj tak main nahin samjha teri be'chaini ko 

Ae meray dil ! yeh bata de teri mansha kya hai 

Bandagi aur ibadat main yeh dil jhukta hai !

Jis main yeh dil na jhukay , bol woh sajda kya hai 

Tu ne sab kuch hi mera cheen liya hai mujh se !

Zindagi ! aur bata tera taqaza kya hai

Khud ko tujh pe waar deta hoon

Khud ko tujh pe waar deta hoon 

Tera sadqa utaar deta hoon 

Jaisay kuch bhi nahin hai karnay ko 

Waqat aisay guzaar deta hoon 

Tum sitaron ko tor sakti ho 

Main tumhein Aaitabaar deta hoon 

Dukh musal'sal , in main khushiyon ko 

Chand lamhay udhaar deta hoon

Ajeeb si be'basi hai yeh

Be'basi

Ajeeb si be'basi hai yeh 

Tumhein keh bhi nahin sakta 

"Mujhay tum se mohabbat hai 

Kis qadar be'basi thi lehjay main

Be'basi

Kis qadar be'basi thi lehjay main 

Tu ne jab mujh se kaha tha ik din 

"Main tumhein sochti kiyon rehti hoon"

Mujhay likhnay ki khawaish hai magar likha nahin jata

Mujhay likhnay ki khawaish hai 

Magar likha nahin jata 

Meray alfaaz dil ki Aahini dewar se sar phortay hain 

Aur inhein izhaar ka 

Rasta nahin milta 

Meri aankhein !

Jinhein dil main chuppay jazbaat ko ashkon ki boli main 

Bata denay pe qudrat thi 

Woh ab kuch bhi nahin kehti

Meray yeh lab !

Meray jazbaat ko !

Alfaaz ki poshaak detay thay 

Woh lab sil se gaye hain 

Meri yeh ungliyan !

Jo aarhi tirchi chand lakeeron se

Meray jazbaat ko izhaar ka rasta dikhaati thein 

Woh ab kuch bhi nahin likhtein 

Meri aankhein , yeh lab , yeh ungliyan 

Mujh se yeh kehtay hain 

Keh ab jazbaat ko izhaar ka rasta nahin dena 

Keh yeh munh zor hotay hain 

Faqat rastay kay milnay se !

Inhein manzal talak janay ki hajat hi nahin rehti 

Nayi raahein banatay hain 

Naye raston pe jatay hain 

Magar phir wapsi kay sab nishaan yeh bhool jatay hain  

Inhein rasta nahin dena 

Inhein tum dil main rehnay do 

Inhein rasta nahin dena 

Wagarna khoon rula'ein gay 

Mujhay likhnay ki khawaish hai 

Magar likha nahin jata !

 

 

Tumhein dil se bulanay ki shaori kosh'shishein kar kay

Tumhein dil se bulanay ki 

Shaori kosh'shishein  kar kay 

Tumhein na yaad karnay ki 

Zaroori kosh'shishein  kar kay 

Main khud hi thak gaya hoon ab

Adhoori kosh'shishein  kar kay

Jeewan kay andheron main

Jeewan kay andheron main 

Jeewan kay andheron main 

Teri pareet tera intizaar 

Andheray main hai deep 

Isi deep ki lo main dekhon 

Teri yaad ki sundar surat 

Aik yaad se kai yaadein 

Jaisay jalay deep se deep 

Aaj bhi waisa hi mousam hai

Bichartay waqat ik khayal

Aaj bhi waisa hi mousam hai 

Aaj bhi waisay hi badal hain 

Aaj bhi waisay hi baarish hai 

Jab hum pehli baar milay thay 

Yaad hai hum ne yeh socha tha!

Hum ko miltay dekh kay mousam 

Itna khush hai , itna khush keh 

Us ki aankhein bheeg gayi hain 

Aaj magar hum jaan gaye hain 

Mousam us din kiyon roya tha 

 

Mujhay moh'jazon par yaqeen to nahin tha

Moh'jaza

Mujhay moh'jazon par yaqeen to nahin tha 

Magar phir bhi aankhon main sapnay sajaye 

Teri raah'guzar se

Main din main kai baar youn hi guzarta 

Keh shayed kabhi aam'na sam'na ho 

Tu bas ik lamhay ko to mujh ko dekhay 

Main is aik lamhay main jeewan bita loon

Main sodagar sapnay le kar aaya hoon

Main sodagar sapnay le kar aaya hoon 

Khawab nagar se tohfay le kar aaya hoon 

Dekho meri in aankhon main 

Kaisay kaisay khawab sajay hain 

Kuch khushbu se mehak rahay hain 

Kuch ashkon se bheeg rahay hain 

Kuch ne thak kar mond lein aankhein 

Aur kuch ab tak jaag rahay hain 

Kuch pe mera naam likha hai 

Kuch waisay be'naam paray hain 

Kuch ko main ne aap sajaya 

Aur kuch khud hi aan sajay hain 

Kuch ne paa li hain tabeerein 

Aur kuch rasta dekh rahay hain 

Ohday , surkh , haray aur neelay 

Her ik rang kay khawab paray hain 

Dekho meri aankhon main 

Kaisay kaisay khawab sajay hain 

Khawab nagar se kitnay sapnay 

Main sodagar le aaya hoon 

Aao dekho , sastay damon 

Her ik rang kay khawab khareedo 

Apni bujhti aankhein de kar 

Roshan mehkay khawab khareedo 

Jaisay jaisay dil kehta hai 

Waisay waisay khawab khareedo 

Khawabon ki is dheeri main se 

Achay achay sapnay chun lo 

Kuch pal apni khatar bun lo 

Khawab nagar ka yeh sodagar 

Saray sapnay de jaye ga 

Bujhti aankhein le jaye ga 

Maan ki mamta , chaon ghaneri , thathein marti rehmat

Maan ki mamta , chaon ghaneri , thathein marti rehmat 

Maan ik hasti jis kay paon talay jannat hai 

Maan ki dua se tal ajye her ik bala-e-jaan 

Haath dua ko uth jayein to mitt jaye her wehshat 

Duniya bhar ki khushiyon sebhar jaye is ka daman 

Jis ne dil se ki ho apni pyari maan ki khidmat 

Maan zinda to qadam qadam par is ki dua'ein saath 

Is kay dam se ghar kay konay konay main ik barkat 

Baad khuda kay hasti yeh woh jo thehri Rehman

Insani rishton main sab se barh kar maan ki azmat 

Maan ka saya rahay salamat mujh pe ae "Atif"

Roz nazar yeh dekhnay chahye maan ki pyari surat

Tumhari hansi kay gulabon main dekha , wohi ik chehra

Tumhari hansi kay gulabon main dekha , wohi ik chehra

Sawalon main dekha , jawabon main dekha , wohi ik chehra

Wohi aarzoo thi keh pani pe rakh kay qadam main chalon gi 

Wohi justagoo thi keh main urr saki to ga'gan choo sakon gi 

Kahon kya keh kitnay hijabon main dekha wohi ik chehra 

Wohi shokiyan jin se lipti hui zindagi muskuraye 

Wohi khan'khanata sa lehja keh dil main mohabbat jagaye 

Mujhay youn laga jaisay khawabon main dekha , wohi ik chehra

Wohi khawab zaron ki baatein , wohi chand taron kay qissay 

Wohi titliyon , jugno'on ki katha , aabsharon kay qissay 

Inhi baarishon main sahabon main dekha , wohi ik chehra

Tumhari nigahon main likhi udasi ki tehreer dekhi 

Dhanak muskurahat se lipti wohi gham ki tasveer dekhi 

Judai kay kitnay azabon main dekha , wohi ik chehra

Tumhari hansi kay gulabon main dekha , wohi ik chehra

Sawalon main dekha jawabon main dekha , wohi ik chehra

Khushi ko baant'nay walo, meray hum'rah chaltay ho

Khushi ko baant'nay walo 

Meray hum'rah chaltay ho 

Main hansta hoon to hanstay ho 

Sabhi ko yeh bata'tay ho 

Keh tum mujh ko samajhtay ho 

Khushi kay sab zamanay to 

Ikhatay hum ne dekhay hain 

Magar gahm ki siyah raatein 

Jo mujh ko ghair leti hain 

Main tum ko dhoondta hoon tab 

Keh shayed roshni ban kar 

Siyah raaton ko tum din main 

Badalnay ko chalay aao 

Magar aisa nahin hota 

Siyah raaton kay jungle se

Churanay tum nahin aatay 

Tumhein itna hi kehna hai 

Main hansta hoon to hanstay ho 

Kabhi rota hua dekho 

To meray ashk bhi poonjho 

Khushi ko baant'nay walo !

Kabhi gham baant'nay aao