Imran's Poetry: 03/04/15

Mar 4, 2015

Ek jurm hua hai hum se ek yaar bana baithay hain

Ek jurm hua hai hum se

Ek yaar bana baithay hain

Kuch apna sa uss ko samjh kar

Sab raaz bata baithay hain

Phir us kay pyaar ki raah main

Dil-o-jaan ganwa baithay hain

Woh yaad bhout aatay hain

Jo hum ko bhula baithay hain

Kis jurm ki mili hai saza Ya'Rab

Hum un se juda ho baithay hain

Mohabbat cheez aisi hai

KAbhi hoti hai apno se

Kabhi hoti hai sapno se

Kabhi anjaan raahon se

Kabhi gum'naam naamon se

Mohabbat cheez aisi hai

Kabhi hoti hai phoolon se

Kabhi bachpan kay jhoolon se

Kabhi be'ikhtiyari main

KAbhi pakkay Usoolon se

Mohabbat ik mohabbat hai

Mohabbat ik sadaqat hai

Mohabbat ik ibaadat hai

Mohabbat cheez hai aisi

Dukhon main roll deti hai

Dard anmol deti hai

Zehar bhi ghol deti hai

Mohabbat cheez hai aisi

Woh jo mehav thay sar-e-aaina , pas-e-Aaina bhi to dekhtay

Woh jo mehav thay sar-e-aaina

Pas-e-Aaina bhi to dekhtay

KAbhi roshni se woh

Tairagi ko chupa hua bhi to dekhtay

Sar-e-aab jo raha tishna lab

To yeh zabat-e-gham ki hai intiha

Meray haal par thay jo nukta cheen

Mera hosla bhi to dekhtay

Woh utar gaye thay jo paar khud

Mujhay beech lehron main chor kar

Tha jo un main itna hi hosla

Mujhay doobta bhi to dekhtay

Jinhain mujh se hai yehh gila keh

Main raha be'niyaaz-e-khaloos-o-rabt

Meray gird rasm-o-riwaaj ka

Kabhi da'ira bhi to dekhtay

Be'chain youn kisi ki mohabbat main hum rahay

Jaisay keh lamha lamha qayamat main hum rahay

Aansoo kisi ki yaad main behtay chalay gaye

Yehni tamaam raat ibaadat main hum rahay

Dekha ussay to rukh se nigahein na hatt sakein

Kitni hi dair varta-e-hairat main hum rahay

Hum sada dil thay is ko mohabbat samjh liya

Halan keh bas faraib-e-mohabbat main hum rahay

"Mohsin" Kisi ne pyaar se poocha tha ik sawal

Phir sari umar is ki wazahat main hum rahay

Zawiya jitna nigahon ka sanwar jaata hai

Tera rukhsaar bhi utna hi nikhar jaata hai

Aisay lamhaat bhi aatay hain raah-e-ulfat main

Ya wafa haath se jaati hai ya to sar jaata hai

Main teray gham main bhala Ashak bahaa'on kab tak

Aankh to Aankh hai dariya bhi utar jaata hai

Hasti-e-gul hai faqat chand ada'on pe moheet

Phool sharmaata hai , hansta hai bikhar jaata hai

Qurbat-e-yaar se "Mohsin " ko baqaa milti hai

Zarf parwanay ka choota hai keh mar jaata hai

Main tujh se kisi roz mangwaon teri tasveer

Ya khud kisi kaghaz pe banaon teri tasveer

TAnhai kay lamhaat main baatein karon us se

Choomon kabhi seenay se lagaon teri tasveer

Dekha karon parhnay kay bahanay main

Apni kitabon main chupaon teri tasveer

TAktay huye so jaaon kabhi seenay pe rakh kay

Be'taabi se baanhon main dabaon teri tasveer

Rakhon ussay duniya ki nigahon se bacha kay

Aankhon kay jharokon main sajaon teri tasveer

Teri ghaflaton ko khabar kahan meray haal-e-dil pe nazar karay

Tu jaffa ki had main na aa saka hum wafa ki had se guzar gaye

Tasveer teri dil mera behlaa na sakay gi

YEh teri tarah mujh se sharmaa na sakay gi

Main baat karon ga yeh khamosh rahay gi

Seenay se laga loon ga to yeh kuch na kahay gi

Uljhi hui raaton ko yeh suljhaa na sakay gi

YEh Aankhein hain tehri hui chanchal woh nigahein

YEh haath hain sehmay huye aur mast woh baanhein

Parchaai to insaan kay kaam aa na sakay gi

In honton ko khayal main kuch dy na sakon ga

Is zulf ko main haath main bhi lay na sakon ga

Aaram woh kya dy gi jo tarppa na sakay gi

TAsveer teri dil mera behlaa na sakay gi

Na wal'walay woh rahay aur na woh zamana raha

Samaa hayaat ka lakin sadaa sohaana raha

Ghazal haraam hui , husn pe lagay pehray

Mera mizaaj magar phir bhi shairaana raha

Khuda bhi maan liya , bandagi bhi ki us ki

Taaluq us se magar apna gaayebana raha

Likha huwa tha meri maazi jis kay tinkon par

Meri uraan main hayal woh Aashiyaana raha

Paron kay dhair lagay hain wahan wahan ab bhi

Jahan jahan kisi panchi ka Aashiyaana raha

Kahin kahin koi raahat , kahin kahin koi zakham

Meray naseeb ka manzar wohi puraana raha

Qateel tark-e-maraasim woh kar gaya phir bhi

Salook us ka meray saath dostaana raha

Kabhi un ka naam leina kabhi un ki baat karna

Kabhi un ka naam leina

Kabhi un ki baat karna

Mera zouq un ki chahat

Mera shouq un pe marna

Kabhi chaltay chaltay thamna

Aur thaam kay baith jana

Kabhi lar'khara kay girna

Aur gir kay phir sambhalna

Kabhi raat raat rona

Kabhi din charhay sisakna

KAbhi dariya dariya rehna

Kabhi dekhnay ko tarasna

Raha ishq se hamesha

Koi wasta hai apna

Yahi zindagi hai apni

Yahi raasta hai apna

So jaa kay abhi chand sar-e-baam nahin hai

YEh raaz-e-mohabbat abhi ilzaam nahin hai

Es Aashiq-e-nadaan ki khabar kuch to laya kar

Mana keh teray dil main mera naam nahin hai

Woh shakhs bhi kiya shakhs tha khushboo ki tarah tha

Khusboo bhi woh jo shaher main ab aam nahin hai

Madhosh hotay jaatay ho Aankhon ki nami par

YEh aankh kay moti hain koi jaam nahin hai

YEh pyaar ki ghazlain yeh mohabbat bharri baatein

Tumhain aur koi kaam nahin hai

Tanhai ki raat kat hi jaye gi itnay bhi hum majboor nahin

Dohraa kar teri baaton ko kabhi hans lain gay kabhi ro lain gay

Andheri raat kay lamhay tamaam honay tak

Tujhay hi sochta hoon subha se shaam honay tak

MAin aisa jism hoon jis ki rooh bhi tu hai

Adhoori raat hoon main teray naam honay tak

Teri awaz sun na loon to dil nahin lagta

Tarapta rehta hoon tujh se hum'kalaam honay tak

Teri nazar ki qeemat pe bik raha hai koi

Ussay khareed lay tu mehangay daam honay tak

Ishq ki aag jo seenay main laga baithay hain

Sulagti rehti hain yeh neendein haraam honay tak

Kaash woh sirf mera ho , mera dil us ka basera ho

Chahaye to chahat meri , mangay to mohabbat meri

Woh chand ki chandani ho to chand sirf mera ho

Woh din ki roshni ho to suraj sirf mera ho

Woh phoolon ki khushboo ho to ehsaas sirf mera ho

Woh raat ka ujaala ho to chragh sirf mera ho

Woh ishq aur mohabbat ho to dil sirf mera ho

Woh paani ka cheenta ho to dariya sirf mera ho

Woh qismat ki lakeer ho to haath sirf mera ho

Hum bhi moujood thay taqdeer kay darwazay par

Log doulat pe giray hum ne tujhay maang liya

Bas yehi Mera Asasa hai

Kuch waday qasmein , yaadein thein

Kuch qeh'qahay thay , fariyadain thein

Kuch aansoo thay jo bahaye thay

Kuch dhokay thay , jo khaye thay

Kuch lehjon ki parchaiyan thein

Kuch dil ko rog lagaye thay

Ab paas hamaray kuch bhi nahin

Ab aas kay maaray kuch bhi nahin

Bas yaadon ki zanjeerain hain

Kuch rog utri tasveerain hain

Kuch lafz miti tehreerain hain

Ek dil ko deed ka payasa hai

Bas yehi Mera Asasa hai

Bharri bahaar main ab kay ajeeb phool khilay

Na apnay zakham hi mehkay , na dil kay chaak silay

Kahan tak koi dhoonday musafiron ka suraagh

Bicharnay walon ko kya hai , milay milay , na milay

Ajeeb qehat ka mousam tha ab kay basti main

Kiye hain baanjh zameeno se baarishon ne gilay

YEh haadisa sar-e-saahil rula gaya mujh ko

Bhanwar main doobnay walon kay haath bhi na hilay

Sinaan ki nok, kabhi shaakh-e-daar par "Mohsin"

Sukhan waron ko milay hain mushaq'qaton kay silay

Sard rawiyya, uljha lehja , khoyi aankhein , thanday haath

Be'rang chehra , bad'ikhlaaqi , dekho tum bin kya hoon main

Teray bina chaand bhi aisay lagta hai mujhay Sagar

Koi zakham ho jaisay Aasmaan kay seenay main

Ishq bhi barri na'muraad cheez hai

Ussi se hota hai jo kisi aur ka hota hai

Shiddat-e-tishnagi main bhi ghairat-e-meh'kashi rahi

Uss ne jo phair li nazar hum ne bhi jaam rakh diya

Boseeda puranay kisi samaan main rakh dy

Ya phir kisi tootay huye guldaan main rakh dy

Chahat kay chraghon ko to jalna hai jalain gay

Tu in ko utha kar bhalay toofan main rakh dy

Qadmon main teray maslay huye phool nahin hain

Chahat ki chitta hai kisi sham'shaan main rakh dy

Saansain na chuka paai hoon qeemat jo wafa ki

Ab jism ki matti ko bhi tawaan main rakh dy

Mohsin teray jazbaat yahan kon sunay ga

Be'rabat khayalaat ko deewan main rakh dy