Mohabbat jurm ho jaye

" Mohabbat jurm ho jaye "

Ussay kehna ... !

Jo sacha hai 

To phir woh is judai ki 

Wazahat kiyon nahin karta 

Ussay kehna .... !

Keh us se be'itnai ki wajha likhay 

Kahin aisa na ho keh phir 

Zara si aik ghaflat par

Mohabbat jurm ho jaye

Yaad hai jaana tum ne pichli baar kaha tha

" Yaad hai jaana "

Yaad hai jaana 

Tum ne pichli baar kaha tha 

Mujh ko bhool kay khush rehna hai 

Tum ko to main bhool nahin paya 

Lakin jaana 

Chupkay chupkay dukh sehta hoon 

Ab main aksar khush rehta hoon 

Her lafz ko kaghaz pe utara nahin jata

Her lafz ko kaghaz pe utara nahin jata 

Her naam sar-e-aam pukara nahin jata 

Hoti hain mohabbat main kai raaz ki baatein 

Waisay hi to is khel main haara nahin jata 

Aankhon main lagaya nahin jata youn hi kajal 

Zulfon ko bila wajha sanwara nahin jata 

Her shakhs ko toofan bachanay nahin aatay 

Her naao kay hum'rah kinara nahin jata 

Tab tak nahin khultay kabhi israar-e-mohabbat 

Jab tak koi is raah main maara nahin jata

Mohabbat ka safar bhi kya safar hai

Mohabbat ka safar bhi kya safar hai 

Jo adhoora ho nahin sakta 

Mohabbat ka musafir chahay chakna choor ho thak kar

Kahin bhi raastay main ruk nahin sakta 

Aur is main wapsi ki gun'jaish nahin hai 

Mohabbat zindagi bhar ka safar hai 

............

Yeh motor'way ka aik aisa safar hai 

Jis main aata hi nahin "U Turn" koi 

Yeh hai behri jahazon ki musafat 

Behar-e-itlantic kay gehray paniyon main jis tarah 

Koi musafir raastay main apni marzi se

Kahin pe ruk nahin sakta 

Na wapis loat sakta hai

Jab hijar ki aag jalatay hain , kuch log bhout yaad aatay hain

Jab hijar ki aag jalatay hain , kuch log bhout yaad aatay hain 

Aankhon main raakh sajatay hain , kuch log bhout yaad aatay hain 

Mousam kay rang badaltay hi , lehra kar jhonkay aatay hain 

Shakhon se boor uratay hain , kuch log bhout yaad aatay hain 

Yadon ki garam hawaon se , aankhon ki kaliyan jalti hain 

Jab aansu dard bata'tay hain  , kuch log bhout yaad aatay hain 

Be'dard hawaein seh seh kar , suraj kay dhaltay sayon main 

Jab punchi loat kay aatay hain , kuch log bhout yaad aatay hain 

Jab log jahan kay qison main  dam bhar ka moqa miltay hi 

Lafzon kay teer chalatay hain , kuch log bhout yaad aatay hain 

Yeh ishq mohabbat kuch bhi nahin , fursat ki karastani hai 

Jab log mujhay samjhatay hain , kuch log bhout yaad aatay hain 

Jab kalay badal ghir ayein  aur barish zor ki hoti ho 

Darwaze shor machatay hain , kuch log bhout yaad aatay hain 

Jab aangan main khamoshi apnay hont pe ungli rakhti ho  

Sanatay jab dar aatay hain , kuch log bhout yaad aatay hain 

Jab sard hawa ka bistar ho aur yaad se us kay liptay hon 

Tab naghma sa lehratay hain , kuch log bhout yaad aatay hain 

Jab Oas kay qatray pholon par kuch moti se ban jatay hain 

Tab hum bhi ashk bahatay hain , kuch log bhout yaad aatay hain 

Hum yaad main bas gum rehtay hain , aur chand ko taktay rehtay hain 

Taron se baat chupatay hain , kuch log bhout yaad aatay hain

 

Jaanan achay lagtay ho

Jaanan achay lagtay ho 

Chaltay chaltay ruktay ho 

Ruktay ruktay hanstay ho 

Hanstay hanstay rotay ho 

Kin sochon main hotay ho ?

Jab saye se dartay ho !

Shamma ban kar jaltay ho 

Phone jab tum lartay ho 

Jab razi ho jatay ho 

Chain se jab so jatay ho 

Phir jab sapnay buntay ho 

Aur jab kaliyan chuntay ho 

Kaghaz par jab likhtay ho 

Jab tum shair dikhtay ho 

Chotay bachay lagtay ho 

Jaanan achay lagtay ho 

 

Dil wahan us ka lag gaya ho ga

Dil wahan us ka lag gaya ho ga 

Us ne mujh ko bhula diya ho ga 

Jab meray shaher se chala ho ga 

Jeetay jee woh to mar gaya ho ga 

Kon us ko samait'ta ho ga ?

Woh to ' be'tarah toot'ta ho ga 

Waqat rukhsat hamaray naam us se 

Koi paigham to diya ho ga 

Us ki aankhein chalak pari hon gi 

Us kay dil se dhuwan utha ho ga 

Kon baitha hai germany , us ka 

Kon us ko sambhalta ho ga 

Main jahan bhi rahon , usi ka hoon 

Woh jahan bhi rahay mera ho ga 

Chahnay walay laakh hain phir bhi 

Mujh ko "Raja" woh dhoondta ho ga 

Poet : Ahmad Raza Raja

Is dil ne teray baad mohabbat bhi nahin ki

Is dil ne teray baad mohabbat bhi nahin ki 

Had yeh keh dharaknay ki jasarat bhi nahin ki 

Tabeer ka aizaaz hua hai issay haasil 

Jis ne meray khawabon main sharakat bhi nahin ki 

Ulfat to bari baat hai hum se to sar-e-shaher 

Logon ne kabhi dhang se nafrat bhi nahin ki 

Aadab-e-safar ab woh sikhatay hain jinhon ne 

Do chaar qadam teh yeh musafat bhi nahin ki 

Kya apni safai main biyaan detay keh hum ne 

Na'karda gunahi ki wazahat bhi nahin ki 

Is ghar kay sabhi log mujhay chornay aaye 

Dehleez talak us ne yeh zehmat bhi nahin ki 

Us ne bhi ghulamon ki safon main hamein rakha 

Is dil pe kabhi jis ne hakomat bhi nahin ki 

Ishq kaisa keh bharosa bhi nahin tha shayed

Ishq kaisa keh bharosa bhi nahin tha shayed 

Us se mera koi rishta bhi nahin tha shayed

Khalqat-e-shaher main jis haar kay char'chay hain bhout 

Main woh bazi kabhi khela bhi nahin tha shayed 

Zeest karnay kay sab andaz ussay az'bar thay 

Mujh ko marnay ka saleeqa bhi nahin tha shayed

Khaak uratay huye bazaron main dekha sab ne 

Main kabhi ghar se nikalta bhi nahin tha shayed

Us ki aankhon main bisharat thi naye khawabon ki 

Main ussay dekh kar chonka bhi nahin tha shayed 

Aik badal meray jo naam se mansoob hua 

Meray sehraa main to barsa bhi nahin tha shayed 

Ae Khuda aaj ussay sab ka muqadar kar de

Ae Khuda aaj ussay sab ka muqadar kar de 

Woh mohabbat keh jo insaan ko pay'ambar kar de

Sanhay woh thay keh pathraa gayi aankhein meri 

Zakham yeh hain to meray dil ko bhi pathar kar de 

Sairf aansu hi agar dast-e-karam deta hai 

Meri ujri hui aankhon ko samandar kar de 

Mujh ko saqi se gila ho na tanak bakhshi ka  

Zehar bhi de to meray jaam ko bhar bhar kar de

Shouq andeshon se pagal hua jata hai Faraz

Kaash yeh khana kharabi mujhay be'dar kar de

Teri baton main zindagi ka ras

Teri baton main zindagi ka ras 

Teri awaz main hai rah'nai 

Phone pe bolti hui mehboob 

Tu abhi samnay nahin ayi 

Dil tujhay dekhnay ko kehta hai 

Dil teri deed ka taman'nai 

Ik taraf aashqi se hum majboor 

Ik taraf hum ko khouf-e-ruswai 

Sabar ka hosla nahin baqi 

Husan , be'kaar , jaan zaibai 

Hum ne mana , tu khoobsurat hai 

Dekh hum ko teri zaroorat hai

Na tha kuch to khuda tha , kuch na hota to khuda hota

Na tha kuch to khuda tha , kuch na hota to khuda hota 

Daboya mujh ko honay ne , na hota main to kya hoat ?

Hua jab gham se youn be'hiss to gham kya sar kay katnay ka 

Na hota gar juda tan se , to zano pe dhara hota 

Hui muddat keh "Ghalib" mar gaya par yaad aata hai 

Woh her ik baat par kehna keh youn hota to kya hota ?

Safar main apnay hissay ki musafat yaad rehti hai

Safar main apnay hissay ki musafat yaad rehti hai 

Kahin abaad honay par bhi hijrat yaad rehti hai 

Woh chahay dosti ho , dushmani ho ya mohabbat ho 

Yahan her haal main apni zaroorat yaad rehti hai 

Kisi sehraa ko pyasa chor diya jata hai kabhi dariya 

Kabhi pyasay ko dariya ki sakhawat yaad rehti hai 

Yeh sach hai pyar pehla hi basa rehta hai saanson main 

Yeh sach hai umar bhar pehli mohabbat yaad rehti hai

Teri uljhan ka hal yeh socha hai

Teri uljhan ka hal yeh socha hai 

Ab bichar jayein hum to acha hai 

Yeh mohabbat bhi aisa resham hai 

Haath dala hai jis ne uljha hai 

Baat-be'baat roothnay walay 

Waqat be'waqat tujh ko socha hai 

Hijar ki raat her sitaray par 

Hum ne tera hi naam likha hai 

Hum ne socha hai raat din tum ko 

Hum ne tera hi khawab dekha hai 

Aur sab kuch mila hai bin mangay 

Aik tum ko khuda se maanga hai 

Poet : Arshad Malik