Aa kisi shaam kisi yaad ki dehleez pe aa

Aa kisi shaam kisi yaad ki dehleez pe aa 

Umar guzri tujay dekhaye huye , behlaye huye

Yaad hai ?

Hum tujhay dil maantay thay 

Teray her nakhray ki farmaeish par 

Aik jeevan ki tamana'on ki beenai se hum dekhtay thaktay hi na thay 

Sochtay thay 

Aik chota sa naya ghar 

Mohabbat ki fizza

Hum dono 

Aur kisi baat pe takiyon se larai apni

Phir larai main kabhi hanstay huye ro parna 

Aur kabhi rotay huye hans parna 

Aur thak haar kay gir parnay ka masoom khush baksh khyal 

Yaad hai ?

Hum tujhay sukh jaantay thay 

Raat hans parti thi be'saakhta darshan se teray 

Din teri doori se ro parta tha 

Yaad hai ?

Hum tujhay jaan kehtay thay 

Teri khamoshi se hum mar jaate thay 

Teri awaaz se jee uth'tay thay 

Tujh ko choo lenay se ik zindagi aa jaati thi  shariyaano main 

Thaam lenay se koi shaher sa bas jata tha veerano main 

Yaad hai ?

Hum tujhay milnay kay liye 

Waqat se pehlay ponch jaatay thay 

Aur mulaqaat kay baad 

Hum bhout dair se ghar aatay to kehtay keh hamain kuch na kaho

Hum bhout door se aye hain 

Is qadar dooe se aye hain keh shayed hi koi aa paye

Yaad hai ?

Hum tujhay bhagwaan samjhtay thay , magar kufar se dar jatay thay 

Teray chin jaanay ka dar theek se rakhta tha muslmaan hamain 

 Aa kisi shaam kisi yaad ki dehleez pe aa 

Teray bhoolay huye rastay pe liye phirta tha emaan hamain 

Aur kehta tha keh pehchaan hamain 

Yaad hai ?

Hum tujhay emaan kaha kartay thay

Poet : Farhat Abaas Shah