Ik ajeeb ro thi khayal main meray aa gayi

Ik ajeeb ro thi khayal main meray aa gayi 

Kisi aur qarn se haal main meray aa gayi 

Yeh teri nigah sitara saaz ka hai asar 

Yeh jo roshni khad-o-khaal main meray aa gayi 

Meri umar nahin dukh main farq para hai yeh 

Yeh kami si jo mah-o-saal main meray aa gayi 

Woh jawab de kay bhi dair tak raha sochta 

Koi baat aisi sawal main meray aa gayi 

Teray saath urnay ka soch kar hi main khil gayi 

Koi lehar si par-o-baal main meray aa gayi 

Kabhi zindagi main munafqat nahin kar saki 

Yeh kami bhi fard-o-baal main meray aa gayi 

Kabhi peechay nazam kay bhaagna mujhay par gaya 

Kabhi khud yeh titri jaal main meray aa gayi

Khushbu main basa hua yeh lamha

Khushbu main basa hua yeh lamha 

Dastak meray dil pe de raha hai 

Aur dhoond raha hai meray andar 

Ik shaakh-e-bahar rang jis main 

Iqraar kay phool khil rahay hain !

Main kaisay karon yeh dar ka'shada  

Is par to woh qufal par chuka hai 

Jis kay liye saray isam be'kaar 

Yeh meray sitaray ki tarah hai 

Tareek , udaas . ghair abaad !

Ae meray Khuda , meray badan main 

Himmat nahin ab shakistagi ki 

Sheeshay ki tarah hai us ka dil bhi 

Ik thais se tootnay ka dar hai 

Maalik hai tu Aab-o-baad-o-gul ka 

Qadir hai hamari qismaton par

Itni si dua hai meri tujh se hai 

Ya us kay iraday ko badal de !

Ya meray sitary ko badal de !

Bhout khush shakal hai yeh gahr Talismi hai fiza is ki

Aik Sound proof nazam

Bhout khush shakal hai yeh gahr 

Talismi hai fiza is ki 

Dareechon ka hai rukh dariya ki janib 

Aur darwaze bhi aksar baagh kay pehlu main khultay hain 

Aroos-e-no kay khawabon ki tarah naqsheen hai her kamra 

Aur is kay wast main Alma'novi sham'mein sehar tak jhil'milati hain 

Bhout Aarasta mehmaan khanay main 

Talaai Qaab main rakhay huye Asmaar taza , sabz-o-Anabi 

Munqish jaam seem'mein main sharab kohar'bai 

Aur kaf dehleez se lay kar 

Makeeno kay nigarein hujla gaah-e-khawab 

Aur dewan khanay tak 

Bichhay ghaleecha-e-sheeraz-o-roma 

Aap kay qadmon ki aahat is tarah se jazab kartay hain 

Keh jaisay khana-e-zaad taaj 

Mohalon main chuppay razon ko apnay gang seeno main ,

Makeen sar'goshiyon main baat kartay hain 

Sada-e-shaam ka zakhmi prinda 

Sheesha-e-dar se barabar sar takraata hai 

Lakin baziyabi ki koi surat nahin banti 

Dareechon par kabhi Baarish ki nanhi si hatheli ki jhalak 

Mujh dikhai de bhi jati hai 

Magar dastak nahin aati

Jahan main hoon 

Wahan awaz ko rasta nahin milta !

Yahan se aik shab kay faaslay par 

Dour-e-azadi ki moorat kay jalo main 

Shah'rah-e-sharq awal par

Talismi rang , jadu'wai fiza 

Ik aur basti hai 

Jahan duniya-e-som kay 

Kisi koochay se aatay bain ko 

Parwana rah'dari-e-uzma nahin milta 

Jahan hum hain 

Wahan awaz ko rasta nahin milta ! 

Gila kaisa , Aseer sham-e-tanhai se yeh aakhir gila kaisa

Gila kaisa 

Aseer sham-e-tanhai se yeh aakhir gila kaisa 

Tujhay to ilm tha zanjeer ka meri 

Jo pairon main bhi hai Aur rooh par bhi 

Main apnay bakhat ki qaidi hoon 

Meri zindagi main 

Narm awazon kay jugnoo kam chamaktay hain 

Faseel-e-shaher gham par khush sada tahir 

kahan aa kar thehrtay hain 

Teri awaz ka resham main kaisay kaat sakti thi 

Meray bas main agar hota 

To sari umar 

Is resham se apnay khawab bunti 

Aur is rim jhim kay andar bheegti rehti 

Tujhay to meray dukh maloom thay Jaana !

Yeh kis lehjay main tu rukhsat hua hai !

Mujhay maloom tha yeh din bhi dukh ki kookh se phoota hai

Hawa jaam-e-sehat tajveez karti hai 

Mujhay maloom tha 

Yeh din bhi dukh ki kookh se phoota hai 

Meri maatami chadar 

Nahin tabdeel ho gi aaj kay din bhi 

Jo raakh urti thi khawabon ki badan main 

Youn hi aashafta rahay gi 

Aur udasi ki yeh hi surat rahay gi 

Main apnay sog main maatan kinaan

Youn sar'ba'zano  raat tak baithi rahon gi 

Aur meray khawabon ka parsa aaj bhi koi nahin de ga 

Magar yeh kon hai 

Jo youn mujhay baahir bulata hai 

Bari narmi se kehta hai 

Keh apnay hujra-e-gham se nikal kar baagh main ayo 

Zara baahir to dekho 

Door tak sabza bicha hai 

Aur harri shakhon pe naranji shagoofay muskuratay hain 

Mula'im sabz patton par pari shabnam 

Sunehri dhoop main , heeray ki surat jag'magati hai 

Darakhton main chuppi nadi 

Bhout dheemay sur'ron main gun'gunati hai 

Chamaktay zard phoolon se laddi 

Nanhi pahari kay aqab main 

Nuq'rai chashma khushi se khil'khilata hai 

Prind khush gulu 

Shaakh-e-shagufta par cheh'kata hai 

Ghannay jungle main baarish ka ghubar sabz 

Satha sheesha-e-dil par

Mula'im ungliyon se marhaba kay lafz likhta hai 

Koi aata hai 

Aa kar chadar-e-gham ko bari Aahistagi se 

Meray shano se hat'ta kar 

7 rangon ka dupata khol kar mujh ko orh'hata hai 

Main khul kar saans leti hoon 

Meray andar 

Koi pairon main ghungru baandhta hai 

Raqs ka aaghaz karta hai 

Meray kaano kay awezon ko yeh kis ne chua 

Jis se lu'wein phir se gulabi ho gayi hain 

Koi sar'goshiyon main phir se mera naam leta hai 

Fiza ki nagh'magi awaz deti hai 

Hawa jaam-e-sehat tajveez karti hai

Yeh kaisa Khal'la hai jo khawabon kay rastay meri rooh main aa gaya hai

Yeh kaisa Khal'la hai 

Yeh kaisa Khal'la hai 

Jo khawabon kay rastay meri rooh main aa gaya hai 

Main jis phool ban main 

Harri ghaas par titliyan chun rahi thi 

Woh garsh'giya meray qadmon se kaisay juda ho gaya 

Main jis aasman kay  

Sitaron main apna sitara alag kar rahi thi 

Woh taron bharri chatt(roof) meray sar se kiyon hat gayi 

Zameen par hoon aur main na zer-e-falak 

Na dharka hai dil ko na koi kasak 

Teray saath hoon aur na teray baghair 

Jiye jaa rahi hoon main apnay baghair

Waqat-e-rukhsat aa gaya , dil phir bhi ghabraya nahin

Waqat-e-rukhsat aa gaya , dil phir bhi ghabraya nahin 

Us ko hum kya kho'ein gay jis ko kabhi paya nahin 

Zindagi jitni bhi hai ab mustaqil sehra main hai 

Aur is sehra main tera door tak saya nahin 

Meri qismat main faqat dard teh-e-sagar hi hai 

Awal shab jaam meri simat woh laya nahin 

Teri aankhon ka bhi kuch halka gulabi rang tha 

Zehan ne meray bhi ab kay dil ko samjhaya nahin 

Kaan bhi khaali hain meray aur dono haath bhi 

Ab kay fasal-e-gul ne mujh ko phool pehnaya nahin 

Chup rehta hai woh aur aankhein bolti rehti hain

Chup rehta hai woh aur aankhein bolti rehti hain 

Aur kya kya bhaid nazar kay kholti rehti hain 

Woh haath meray andar kya mousam dhoondta hai 

Aur ungliyan kaisay khawab ta'tolti rehti hain 

Ik waqat tha jab yeh hi chand tha aur sanata tha 

Aur ab yeh hi shamein moti rolti rehti hain 

Yaad aati hain us ki pyar bhari batein shab bhar 

Aur saray badan main amrat gholti rehti hain

Jashan se 8 pehar dil main hai

Jashan se 8 pehar dil main hai 

Kitni yadon ka shaher dil main hai 

Tujh se milnay ki khushi kay saath 

Aik udasi ki lehar dil main hai 

Hai azal se rukh-e-falak neela 

Kis qayamat ka zehar dil main hai 

Dhoop nikli hui hai barf kay baad 

Kon yeh subha pehar dil main hai 

Khushk hoti nahin kisi bhi mousam main 

Gham ki ik aisi nehar dil main hai 

Heef hai aisi meze'bani par

Hasrat sair-e-dil main hai 

Thak gaya hai dil wehshi mera fariyad se bhi

Thak gaya hai dil wehshi mera fariyad se bhi 

Jee behalta nahin Ae dost teri yaad se bhi 

Ae hawa kya hai jo ab nazam chaman aur hawa 

Said se bhi hain marasam teray , siyaad se bhi 

Kiyon sar'rakti hui lagti hai zameen yahan her dam 

Kabhi poochein to sabab shaher ki buniyaad se bhi 

Barq thi ya keh sharar dil Aashafta tha 

Koi poochay to meray aashiyan bar'baad se bhi 

Barhti jati hai kash'shish wada-e-geh hasti ki 

Aur koi kheench raha hai adm Abaad se bhi 

 

Sula raha tha na baidaar kar saka tha mujhay

Sula raha tha na baidaar kar saka tha mujhay 

Woh jaisay khawab main mehsoos kar raha tha mujhay 

Yahi tha chand aur is ko gawah thehra kar 

Zara sa yaad to kar tu ne kya kaha tha mujhay 

Tamam raat meri khawab'gaah roshan thi 

Kisi ne khawab main ik phool de diya tha mujhay 

Woh din bhi aye keh khushbu se meri aankh khuli 

Aur aik rang haqeeqat main chu raha tha mujhay 

Main apni khaak pe kaisay na loat kar aati 

Bhout qareeb se koi pukarta tha mujhay 

Daron-e-khaima hi mera qayaam rehna tha 

To Mir-e-foj ne lashkar main kiyon liya tha mujhay 

Tumhara haath meray haath main hai

Magar is dil ki veerani 

Tumhara haath meray haath main hai 

Aur is ki khush asar hiddat 

Meray andar talismi rang phoolon ki 

nayi duniya khilanay main magan hai 

Tumharay lab pe meray naam ka tara chamakta hai 

Tu meri rooh aisay jag'maga uth'ti hai 

Jaisay aainay main chand utar aaye 

Meri palkon se aansu choom kar 

Tum ne unhein moti bananay ki jo zid ki hai 

Woh zid mujh ko bhout acha lagi hai 

Bhout khush hoon 

Keh meray sar pe chadar rakhnay wala haath 

Meray haath main phir aa gaya hai 

Yeh phool aur yeh sitaray aur yeh moti 

Mujh ko qismat se milay hain 

Aur itnay hain keh ginti main nahin aatay 

Magar is dil ki veerani ......!

Magar is dil ki veerani........!

Yeh baarish khoobsurat hai

Yeh baarish khoobsurat hai 

Ik arsay baad 

Meri rooh main 

Sairaab honay ki tamana jaag uthi hai 

Magar badal kay raastay main 

Bhout se pairr aatay hain 

Main pal bhar kay liye sh'daab hoon 

Aur apni baqi umar

Phir sehra main kaaton ?

Main apni pyas pe razi rahoon gi 

Meray aansu meray dil ki kafalat  kay liye kafi rahein gay 

Main ne chand dekha

Main ne chand dekha 

Main ne chand dekha 

Aur na koi teh'neet ka phool khirki se uthaya 

Mera malboos ab bhi mal'gaja hai 

Hina se haath khaali 

Aur churi se kalai 

Na meray paas thay tum 

Aur na meray shaher se guzray 

Main kya afshan lagati 

Maang main sindoor bharti 

Rang aur khushbu pehanti 

Chand ki janib nazar karti 

Keh meri lazat-r-deedar to tum ho !

Mera teh'waar to tum ho !

Pehlay bhi yeh dil hijar se be'haal hua hai

Pehlay bhi yeh dil hijar se be'haal hua hai 

Pehlay bhi bicharnay ki saza pai hai is ne 

Rukhsat ki aziyat main jo shiddat hai , sahi hai 

Aya hai bhout yaad kisi chasham ka jadu 

Khud se bhout aayi kisi malboos ki khushbu 

Kheencha hai bhout qalb ko guzray huye kal ne 

Din bhar kabhi doori ne zabun haal rakha hai 

Rukhsat ki gharri thehar gayi rooh main jaisay 

Is baar jo aaya hai magar , hijar ka mousam 

Is main dil-e-beemaar ki wehshat hi alag hai 

Matti se judai ki hikayat hi alag hai 

Kuch dair ki ta'kheer jo hoti hai watan se

Lagta hai keh ab jaan nikal jaye gi tan se !

Yeh meray haath ki garmi jissay chu kar

Yeh meray haath ki garmi 

Yeh meray haath ki garmi 

Jissay chu kar 

Tumhari aankh main hairat kay doray hain 

Keh is se qabal jab bhi tum ne mera haath thaama 

Baraf ka mousam hi paya tha 

Yeh mousam meray andar kitnay barson se faro'kash tha 

Bahar aati thi 

Aur meray dareechon par kabhi dastak na deti thi 

Gulabi barishein 

Meray liye mam'nu thein 

Aur subha ka taza hawa ka zaiqa 

Main bhool baithi thi 

Meray malboos se sab garm rangon ko shikayat thi 

Mujhay bas barf ki chadar peh'nanay ki ijazat thi 

Magar jaana ! 

Tumharay saath ne to rooh ka mousam badal dala 

Yahan ab rang ka tehwaar hai 

Khushbu ka mela hai 

Mera malboos ab gehra gulabi hai 

Meray khawabon ka chehra mah'tabi hai 

Meray hathon ki hid'dat Aaftabi hai 

Jissay chu kar ...... 

Sawad-e-zindgani main ik aisi shaam aati hai

Sawad-e-zindgani main 

Ik aisi shaam aati hai 

Keh jis kay sur'mai aanchal main 

Koi phool hota hai 

Na hathon main koi tara !

Jo aa kar bazu'on main thaam lay 

Phir bhi 

Rag-o-pay main koi aahat nahin hoti 

Kisi ki yaad aati hai 

Na koi bhool pata hai 

Na koi gham sulagta hai 

Na koi zakham silta hai 

Galay milta hai koi khawab 

Koi tamana haath malti hai 

Sawad-e-zindgani main 

Ik aisi shaam aati hai 

Jo khaali haath aati hai !

Khalqat nahin hai sath to phir bakhat bhi nahin

Khalqat nahin hai sath to phir bakhat bhi nahin 

Kuch din yahi rahay ga to yeh takhat bhi nahin 

Mayoos ho kay daikh rahay hain khal'la main ghar 

Itni to yeh zameen magar sakhat bhi nahin

Jab saaz ki lay badal gayi thi

Jab saaz ki lay badal gayi thi 

Woh raqs ki kon si gharri thi 

Ab yaad nahin keh zindagi main 

Main aakhri baar kab hansi thi 

Jab kuch bhi na tha yahan pe ma'qabal 

Duniya kis cheez se bani thi 

Mutthi main to rang thay hazaron 

Bas haath se rait beh rahi thi 

Hai aks , to aaina kahan hai 

Tamseel yeh kis jahan ki thi 

Hum kis ki zuban boltay hain 

Gar zehan main baat doosri thi 

Tanha hai agar azal se insan 

Yeh bazm-e-kalam kiyon saji thi 

Tha aag hi gar mera muqaddar 

Kiyon khaak main phir shifa rakhi thi 

Kiyon mor badal gayi kahani 

Pehlay se agar likhi hui thi 

 

Main us se bhala kahan mili thi

Main us se bhala kahan mili thi 

Bas main khawab main khawab dekhti thi 

Saya tha koi kinar-e-dariya 

Aur shaam ki doobti gharri thi 

Kohray main chuppa hua tha jungle 

Chiriya kahin door bolti thi 

Lipti hui dhund ki rida main 

Ik zard gulaab ki kali thi 

Ik sabz ghubaar tha fiza main 

Baarish kahin saans lay rahi thi 

Badal koi chu gaya tha mujh ko 

Chehray pe ajeeb taazgi thi 

Aankhon main thehar gayi thi shabnam 

Aur rooh main narm roshni thi 

Kya cheez thi jo meray badan main 

Aahista aahista khil rahi thi 

Ik geet hawa kay hont par tha 

Aur us ki zuban ajnabi thi 

Us raat jabeen-e-maah par bhi 

Tehreer koi qadeem si thi 

Yeh ishq nahin tha is zameen ka 

Us main koi baat sar'madi thi 

Takhat hai aur kahani hai wohi

Takhat hai aur kahani hai wohi 

Aur sazish bhi purani hai wohi 

Qazi-e-shaher ne qibla badla 

Lakin khutbay main rawani hai wohi  

Khaima kash ab kay zara dekh kay ayo 

Jis pe pehra tha , yeh pani hai wohi 

Sulha ko fasak kiya dil main magar 

Ab bhi paigham-e-zubani hai wohi 

Aaj bhi chehra khurasheed hai zard 

Aaj bhi shaam sohani hai wohi 

Badlay jatay hain yahan roz tabeeb 

Aur zakhmon ki kahani hai wohi 

Hujla-e-gham youn hi aaraasta hai 

Dil ki po'shaak sohani hai wohi 

Shaher ka shaher yahan doob gaya 

Aur dariya ki rawani hai wohi 

Zuban pe tazkara-e-baam-o-dar nahin laata

Zuban pe tazkara-e-baam-o-dar nahin laata 

Watan se koi khabar nama bar nahin laata 

Gulaab ko na yaqeen ho ga jab tak siyaad 

Hawa kay tasht main ik masht par nahin laata 

Yeh raah-e-ishq hai maqtal se ho kay jati hai 

So is safar main koi dil main darr nahin lata 

Tamam bojh to rastay main jam'ma hota hai 

Wir'wad se koi rikhat-e-safar nahin laata 

Main jsi kay dhiyan main pehron udas rehti hoon 

Khayal-e-dil main mera lamha bhar nahin laata 

Sawad-e-shaam ! aseeron main kon shamil hai 

Bila sabab koi nezay pe sar nahin laata 

 

Chalnay ka hosla nahin , rukna mohaal kar diya

Chalnay ka hosla nahin , rukna mohaal kar diya 

Ishq kay is safar ne to mujh ko nidhaal kar diya 

Ae meri gul zameen tujhay chah thi ik kitab ki 

Ehal-e-kitab ne magar kya tera haal kar diya 

Miltay huye dilon kay beech aur tha faisala koi 

Us ne magar bichartay waqat aur sawal kar diya 

Ab kay hawa kay saath hai daman-e-yaar muntazir 

Banu'way shab kay haath main rakhna sambhal kar diya 

Mum'kina faisalon main aik , hijar ka faisala bhi tha 

Hum ne to aik baat ki , us ne kamal kar diya 

Meray labon par mehar thi , par sheesha ru ne to 

Shaher kay shaher ko mera waqif-e-haal kar diya 

Chehra-o-naam aik saath aaj na yaad aa sakay 

Waqat ne kis shabiya ko khawab-o-khayal kar diya 

Mudaton baad us ne aaj mujh se koi gila kiya 

Munsab-e-dil'bari yeh kya mujh ko ba'haal kar diya 

Bhout roya woh hum ko yaad kar kay

Bhout roya woh hum ko yaad kar kay 

Hamari zindagi bar'baad kar kay 

Palat kar phir yahin aa jayein gay hum 

Woh dekhay to hamein Aazad kar kay 

Rihaai ki koi surat nahin hai 

Magar haan minat siyaad kar kay 

Badan mera chua tha us ne lakin 

Gaya hai rooh ko abaad kar kay 

Her amar tool dena chahta hai 

Muqarar zulam ki miyaad kar kay 

Patt jhar se gila hai na shikayat hawa se hai

Patt jhar se gila hai na shikayat hawa se hai 

Phoolon ko kuch ajeeb mohabbat hawa se hai 

Sar'shari shagutagi gul ko kya khabar 

Mansoob ik aur hikayat hawa se hai 

Rakha hai aandhiyon ne hi hum ko kasheeda sar 

Hum woh chragh hain jinhein nisbat hawa se hai 

Is ghar main tairagi kay siwa kya rahay jahan 

Dil sham'ma par hain aur ira'daat hawa se hai 

Bas koi cheez hai keh sulagti hai dil kay paas 

Yeh aag woh nahin jissay sohbat hawa se hai 

Sar sar ko izn ho jo saba ko nahin hai baar 

Kanj qafas main zeest ki surat hawa se hai 

Gul chain ko hi kharaam saba se nahin hai khaar 

Ab kay to baagh'ban ko adawat hawa se hai 

Khushbu hi rang bharti hai tasveer-e-baagh main 

Bazam-e-khabar main gul ki siyadat hawa se hai 

Dast-e-shajar main rakhay keh aa kar bakhair de 

Aain-e-gul main khaas riya'at hawa se hai 

Ab kay bahar dekhiye kya gul khilaye gi 

Dil'daad'gaan-e-rang ko wehshat hawa se hai