Jab main ghar se nikal raha tha

Bangoo Taycoon

Jab main ghar se nikal raha tha

Chaltay chaltay

Meray seenay se hat'tay pal

Dheeray se ik sar'goshi main

Us ne kaha tha

Dekhein chahye kuch ho jaye 

Roz mujhay ring keejiye ga 

Phir jab us kay haath aur nazrein 

Dono meri tie par thein 

Kehnay lagi 

"Aap nahin hotay hain to main bilkul khaali ho jati hoon "

Chor nahin saktay yeh business

Aap mujhay kiyon tarpatay hain 

Acha dekhein youn kartay hain 

Ik din khat ik din phone

Main ne us ko bosa de kar 

Us se kaha tha Ab kay chahye kuch ho jaye 

Khat likhon ga phone karon ga 

Haye lakin khud sar fitrit 

Aue kuch kar-o-baar kay jhanjhat 

Na to us ko phone kiya tha 

Aur na koi khat likh paya 

Na koi message na hi card 

Ab jo ghar ko loat raha hoon 

Soch raha hoon 

Tanhai kay yeh do haftay 

Us par sadiyon jaisay hon gay 

Lakin yeh bhi jaanta hai dil 

Us ko be'had shikway hon gay 

Tarpi ho gi 

Chup kar takiye main raaton ko roi ho gi 

Khafa khafa si 

Lakin ghar main dakhal ho kar 

Jab main us kay maathay par ik bosa doon ga 

Un honton pe hont rakhon ga 

Aur kahon ga 

"Yaad mujhay tum ayein thein

Lamhay lamhay main so baar "

Bas itna hi kehna ho ga 

Aur woh pagli 

Apna sab kuch somp kay mujh ko 

Meray seenay lag jaye gi 

Phir jab us kay haath aur nazrein 

Dono meray seenay kay balon par hon gay 

(Woh seena jo un ashkon se bheega ho ga )

Sar'goshi main mujh se kahay gi 

Aap bhalay ab kuch bhi kar lain 

Hargiz ab na janay doon gi 

Sacchi aap to bhout buray hain 

Bhout burray hain 

"hain na bongo",,,,,,!

 

Main teray hont kay jis til ko bhout choomta tha

Main teray hont kay jis til ko bhout choomta tha 

Ab woh khawabon main chamakta hai sitaray ki tarah

Aaj youn mousam ne di jashan-e-mohabbat ki khabar

Aaj youn mousam ne di jashan-e-mohabbat ki khabar 

Phoot kar ronay lagay hain main mohabbat aur tum 

Hum ne joun hi kar liya mehsoos manzil hai qareeb 

Raastay khonay lagay hain main mohabbat aur tum 

Chand ki kirno ne hum ko is tarah bosa diya 

Devta honay lagay hain main mohabbat aur tum 

Dhar gaya ilzaam jab se apni hurmat par koi 

Barishein dhonay lagay hain main mohabbat aur tum 

Aaj phir mehrumiyon ki dastanein  orh kar 

Khaak main sonay lagay hain main mohabbat aur tum 

Kho gaye andaz bhi , awaz bhi , alfaaz bhi 

Khamoshi dhonay lagay hain main mohabbat aur tum

Bhanwar ki goad main jaisay kinara saath rehta hai

Bhanwar ki goad main jaisay kinara saath rehta hai 

Kuch aisay hi tumhara aur hamara saath rehta hai 

Mohabbat ho keh nafrat ho usi se mashwara ho ga 

Meri her kaifiyat main istikhaara saath rehta hai 

Safar main ain mumkin hai main khud ko chor don lakin 

Duaein karnay walon ka sahara saath rehta hai 

Meray mola ne mujh ko chahaton ki saltanat day di 

Magar pehli mohabbat ka khasara saath rehta hai 

Agar "Syed" meray lab par mohabbat hi mohabbat hai 

To phir yeh kis liye nafrat ka dhara saath rehta hai

Adhoori batein hi zindagi hain

Khayal rakhna 

Adhoori batein hi zindagi hain 

Woh guzri batein hi zindagi hain 

Agarcha dil ki udaas ujjri hui rutton main 

Bikhar gayi hain 

Kai zamano se sari batein 

Woh guzri batein 

Sulagti shamon kay jaltay bujhtay alaaohi main 

Pighal gayi hain 

Adhoori batein ,,,,,,

Zaroori batein ,,,,,,,

Yeh khushk hoti hui ragon ki siyah qabron main neem murda 

Dasi hui khawaishon kay hum'raah 

Gundhi hui hain 

Yeh aankh ki putliyon main thak kay 

Khatak'ti palkon pe so gayi hain 

Tamaam batein darust jana 

Tamam khadshay baja hain lakin 

Her aik imkaan-e-zindagi main 

Ragon main aur rooh ki zameen main 

in hi ki yadein bhatak rahi hain 

In hi kay dam se zaeef jazbon , tha'thartay lafzon 

Bujhi taman'on main ramq hai 

Adhoori batein hi zindagi hain 

Woh guzri batein hi zindagi hain 

Khayal rakhna ,,,!

Adhoori batein bhula na dena 

Zaroori batein ,,,,

Woh guzri batein bhula na dena 

Khayal rakhna ,,,,,!

Khayal rakhna ,,,,,!

Qalam ho teegh ho sheesha keh dhaal mat cheeno

Qalam ho teegh ho sheesha keh dhaal mat cheeno 

Kabhi kisi se kisi ka kamal mat cheeno 

Khushi isi main agar hai to her khushi le lo 

Yeh dukh yeh dard yeh huzan-o-malaal mat cheeno 

Isi khalish kay sabab phir mujhay ubharna hai 

Khuda kay wastay ehad-e-zawal mat cheeno 

Main chor sakta nahin saath istaqamat ka 

Meri azan se josh-e-bilal mat cheeno 

Abhi kitab na cheeno tum in kay haathon se 

Hamaray bachon ka husan-o-jamal mat cheeno 

Hamari aankh main yadon kay zakham rehnay do 

Hamaray haath se phoolon ki daal mat cheeno 

Abhi bujhao na candel na cake kato abhi 

Kuch aur dair mera pichla saal mat cheeno 

Us kay hathon se jo khushbu-e-hina aati hai

Us kay hathon se jo khushbu-e-hina aati hai 

Aisa lagta hai keh jannat se hawa aati hai 

Choomnay daar ko kis saj dhaj se chala hai koi

Aaj kis naaz se maqtal main qaza aati hai 

Na kabhi koi karay tujh se teray jaisa salook 

Haath uthtay hi yahi lab pe dua aati hai 

Teray gham ko yeh barhana nahin rehnay deti 

Meri aankhon pe jo ashkon ki rida aati hai 

Us kay chehray ki tamazat bhi hai shamil is main 

Aaj tapti hui sawan ki ghatta aati hai 

Ghoomnay jab bhi teray shaher main jati hai wafa 

Bain karti hui wapis woh sada aati hai 

Hai wohi baat her ik lab pe bhout aam yahan 

Hum se jo kehtay huye un ko haya aati hai

Sochtay hain tujhay wuzu kar kay

Sochtay hain tujhay wuzu kar kay 

Youn tera ehtraam kartay hain

Yeh kamyabiyan izzat yeh naam tum se hai

Maan kay naam 

Yeh kamyabiyan izzat yeh naam tum se hai 

Khuda ne jo bhi diya hai maqaam tum se hai 

Tumharay dam se hain meray lahu main khiltay gulab 

Meray wajood ka sara nizaam tum se hai 

Kahan bisat-e-jahan aur main kam'sin-o-nadan 

Yeh meri jeet ka sab ehtimaam tum se hai 

Jahan jahan hai meri dushmani sabab main hoon 

Jahan jahan hai mera ehtraam tum se hai