Imran's Poetry: 04/09/16

Apr 9, 2016

Main soch sakta nahin tha kisi haseen kay saath

Woh loat aaye ga aur is qadar yaqeen kay saath

Ujar kay jayein to saye kai sakoonat kay

Makan chor diya kartay hain makeen kay saath

To jao shaher main laakon ganwar phirtay hain

Agar pasand nahin rehna mujh zaheen kay saath

Yeh aag pani hawa mujh ko zaya kar dain gay

Isi liye to main wabasta hoon zameen kay saath

Bas ab tamaam hadein sabar ki tamaam huein

Bhout guzara kiya main ne tujh la'ain kay saath

Main wa'izon ki kisi baat ka asar kya loon

Fareb kartay hain jo aap apnay deen kay saath

Yeh kaisay rafaqat main aa gaya hoon main

Lipat rahay hain kai saamp Aasteen kay saath

Meri dastaras main thi zindagi main ne teri raah pe daal di

Meri dastaras main thi zindagi

Main ne teri raah pe daal di

Mujhay her haseen-o-jameel apr

Teray khaal-o-khad ka tha sha'iba

Tujhay dhoond laye ga aik din

Mujhay Aitamaad tha dard par

Teri justagoo to hai justagoo

Meray hoslay ka sawal hai

Yahi aik dua hai keh ae Khuda

Mujhay apnay gham main shareek kar

Shab kay teh'ra samandar ne khola hai dar , din nikalta nahin

Doobta ja raha hai nagar ka nagar , din nikalta nahin

Yeh bhi mumkin hai us ko abhi tak kisi ne bataya na ho

Koi suraj ko de aaye jaa kay khabar din nikalta nahin

Ro rahi hai sehar aankh us taraf raat ki qaid main

Aur parishaan gum sum se kharay hain shajar , din nikalta nahin

Buz'dili kay sabab itni mehangi pari raat se dushmani

Bas gaya hai andheron se ik aik ghar , din nikalta nahin

Kon wehshat kay maathay pe chandi laganay ki jurrat karaye

Kon dil se nikalay muqaddar ka dar , din nikalta nahin

Aik khalqat kharri hai teh sang-e-ehsaas sood-o-ziyan

Waa ki'aye aik muddat se aankhon kay dar , din nikalta nahin

Koi aisa hol thi aankh khulnay pe zindagi

Keh cheekh utha abhi khawab hai abhi khawab hai

Woh to maamta kay mizaaj ki koi raat thi

Mera dard choom kay us ne goad main bhar liya

Agar aik taang utha bhi loon main zameen se

To yeh ikhtiyaar key ik fareb ki shakal hai

Mujhay khud hi di hui khaslaton kay tufail kiyon

Woh saza kay tor pe pees de ga qaboor main

Sochtay rehnay ki aadat ho gayi

Chonktay rehnay ki aadat ho gayi

Hijar ki raaton kay sang aankhon ko bhi

Jaagtay rehnay ki aadat ho gayi

Janay kya dar hai keh apnay aap se

Bhaagtay rehnay ki aadat ho gayi

Woh nahin lotay ga phir kiyon rah'guzar

Dekhtay rehnay ki aadat ho gayi

Woh meray andar chupa hai aur ussay

Boltay rehnay ki aadat ho gayi

Dard na janay ni maye

Is kay apnay geet ne maye

Guriya se ab dil ni behlay

Chand gaya hai jeet ne maye

Waqat ne beet hi jana tha aur

Waqat gaya beet ni maye

Karta phiray hain dil duniya main

Mann'mani mann meet ni maye

Bichar gayi koyel baghon se

Bichar gaya sangeet ni maye

Baqi saray rishtay jhootay

Sachi teri pareet ni maye

Khobsurat pholon aur rang ba'rangi titliyon ki qasam

Tum meri rooh aur meray badan kay darmiyan

Youn ho

Jaisay zameen aur aasman kay darmiyan

Tim'timatay huye sitaray

Jaisay be'ganaar aur waseh-o-areez

Registano main

Note kay latki hui chatton ne

Roshan'daan paro dalay hain

Intizaar no'keli silakhon ki tarah

Dil main utarta ja raha hai

Aur dil na'umeedi ki gehrai aur tareekh khaiyon main

Kunwen main girtay huye pathar ki tarah

Selaab

Talay

Aur pathar

Bhout ziyada hain

Aur in kay muqablay main

Main aur tum aur woh bhi aik doosray kay baghair

Bhout kam

Bhout hi kam

Meray dil kay shaam saweray ho ik baar kaho tum meray ho

Meray dil kay shaam saweray ho

Ik baar kaho tum meray ho

Mujhay tum bin kuch na dikhaai de

Kiyon itnay ghoor andheray ho

Main punchi pyar kay daison ki

Tum meray rain baseray ho

Main maal-o-manaal mohabbat ka

Tum daku chor luteray ho

Kuch bolo ya azad karo

Kiyon khamoshi se gheray ho

Be'sabab hain teri baatein Ae dil

Kuch bhi sunti nahin raatein Ae dil

Kis tarah khud ko bacha paao gay

Un'ginat dukh ki hain ghaatein Ae dil

Dard kay zumray main hi aati hain

Teri jeetein hain ya maatein Ae dil

Tum ko ashkon ki qatarein bhi lagein

Chand taron ki baratein Ae dil

Hum rehtay hain isi sehra main

Roz hon gi mulaqatein Ae dil

Jazba-o-shouq ki rawani main ghalti ho gayi jawani main

Jazba-o-shouq ki rawani main

Ghalti ho gayi jawani main

Zindgani to jaisay doob gayi

Hijar aur gham ki be'karani main

Janay kya keh gaya hai ashkon ko

Aag si lag gayi hai pani main

Aik din dil hawaas kho baitha

Aik choti si na'gahani main

Tajziya hi nahin kiya us ka

Umar beeti hai khush gumani main

Us ki aadat se mujh ko lagta hai

Koi lazzat hai bad'gumani main

Ik kash'shish si ajeeb hoti hai

Ishq ki saltanat ki rani main

Woh mujhay dekh kar bhout khush hua

Dukh kay suraj ki sayebani main

Ik mohabbat hai aur judaai hai

Umar ki mukh'tasir kahani main

Mujh se naraz na ho

Mujh se naraz na ho

Mujh se naraz na ho

Tujh se be'chaini ko takranay ki niyat to nahin

Tujh se ghabraiye huye din kay taaruf main meri marzi

Nahin hai shamil

Teri veeran khayali main mera haath nahin

Main to kam'laai hui shaakh ki manind hoon bhout afsurda

Main to zarhon ki tarah chup hoon bhout

Aik hi talway talay

Aik hi baaz baar , kai martaba aa jata hai dil

Aur main chup hoon bhout

Mujh se naraz na ho

Teri narazgi se darti hai hawa

Aur mujhay ghussay se aa lagti hai

Aur meri saanson ki tarteeb badal deti hai

Teri narazgi se hota hai safar khouf'zada

Aur meri raahein badal deta hai

Aur meray paon jama deta hai angaron par

Main kai roz se kuch baton se jalta hoon bhout

Haye jo toot kar kartay hain mohabbat woh log

Haye jo dil main basatay nahin nafrat woh log

Main kai roz mar jata hoon

Teri narazgi mujhay maarti hai

Main kai roz se jeeta hoon bhout

Tera pachtawa mujhay zinda kaisay rakhta hai

Mujh se naraz na ho

Teri narazgi se shamein bhi uraati hain khaak

Mujh pe hansti hai bhout raatein bhi

Aur mujhay dair talak takti hain barsatein bhi

Mujh se naraz na ho

Main ne milna bhi hai , bhout hai tum se

Aur karni hain bhout baatein bhi

Mujh se naraz na ho

Raat ka samandar hai raat bhi mohabbat ki

"Mohabbat ki adhoori Nazam"

Raat ka samandar hai

Raat bhi mohabbat ki

Baat ka ujaala hai

Baat bhi mohabbat ki

Ghaat ki zaroorat hai

Ghaat bhi mohabbat ki

Narm garm khamoshi

Sehaj sehaj sargoshi

Chor chor darwaze

Kon chup kay aaya hai

Aarzu ne jungle main

Raasta banaya hai

Cheenaptay huye aangan

ne darakht se mil kar

Kuch na kuch chupaya hai

Aasman ki khirki main

Sukh bhari shararat se

Chand muskuraya hai

Chandani nahai hai

Khushbo'on ne mousam main

Aag si lagaai hai

Ishq ne mohabbat ki

Aankh choomna chahai

Aur hawa kay halqay main

Shokh si nazakat se

Shaakh kamsaai hai

Raat ka samandar hai

Raat bhi mohabbat ki

Baat ka ujaala hai

Raat bhi mohabbat ki

Baat kay saweray main

Zindagi kay gheray main

Rooh tam'tamati hai

Wasal jhil'milaya hai

Dil ne band seenay main

Hashar sa uthaya hai

Kon chup kay aaya hai

Dil udaas rehta hai barishon kay mousam main

Dil udaas rehta hai

Barishon kay mousam main

Zindagi pighalti hai

Khwaishon kay mousam main

Waqat tehar jata hai

Muntazir nigahon main

Junglon kay khatray hain

Bastiyon ki raahon main

Ho sakay to loat kay aana

Pyar ki panahon main

Ishq ka ajaara hai

Dil ki shah'rahon par

Aakhir shab to abhi door thi

Kiyon toot gira

Woh sitara keh jissay sar pe chamakna tha abhi

Kaisay do'pehar pe dhal aayi achanak koi veeran si shaam

Hum to pehlay hi bhout zard thay dil kay panay

Kis ne tori khizan seenay main

Toot kar phel jati jati hai bari sar'at se

Aankh se rooh ki bee'nai talak

Jo nazar aata hai peela hai bhout

Dil kay sartaan se kul aalam-e-tanhai talak

Jo samjh aata hai neela hai bhout

Sog ka apna asar hota hai

Sog main lagta hai aaye hi nahin

Rog se lagta niklay hi nahin

Us sitaray ka chamakna khwaish thi

Kon is khaam 'khayali ki hawa main aata

Dard ki deeda daleri hai keh paishani pe aa chamka hai

Warna be'noor diyaron main

Chraghon ka koi kaam nahin

Bichray huye logon ki ik ik baat rula deti hai

Hum ko to her janay wali baat rula deti hai

Waisay to hum dil kay baray hi pakay hain her gham main

Woh to kabhi kabhi youn hi barsaat rula deti hai

Jaisay pathar kar deti hai baaz oqaat khushi bhi

Jaisay baaz oqaat koi baraat rula deti hai

Jinhon ne haar kabhi nahin dekhi hoti hai jeewan bhar

Aison ko to choti si ik maat rula deti hai

Ghamon se to kuch aur bhi barh jata hai zabt hamara

Haan albata khushiyon ki bohtaat rula deti hai

Mujh par sitam zareef zamanay kay saath saath

Muskaa raha tha hashar uthanay kay saath saath

Main mitt raha tha un ko mitanay kay saath saath

Ruktay thay haath teer chalanay kay saath saath

Dushman agarcha thay woh magar thay to aadmi

Dil ro raha tha theek nishanay kay saath saath

Thay ishq main ajeeb se rakhnay paray huye

Khud rooth'ta tha mujh ko mananay kay saath saath

Aisa laga keh gham kay siwa kuch nahin yahan

Aalam sisak raha tha dawanay kay saath saath

Is shaher main ajeeb tamasha hai zindagi

Hanstay hain log neer bahanay kay saath saath

Main sulag sulag kay hawa kay haath main raakh tha

Teri maang bhool kay meri raah main aa gayi

Saf-e-rehwan talab main hum bhi thay muztarib

Yeh alag keh teri nigah hum pe nahin pari

Main jahan jahan se hoon muntashir kisi zaat ka

Hain wahin wahin meray inkishaaf kay raastay

Main teray lihaaz se mut'maein hoon magar zara

Kabhi ghor kar meri be'qaraari pe ghor kar

Hamein is qadar to woh yaad aaya na tha kabhi

Shab-e-hijar itni udaas pehlay kabhi na thi

Labon pe geet to aankhon main khawab rakhtay thay

Kabhi kitabon main hum bhi gulaab rakhtay thay

Kabhi kisi ka jo hota tha intizaar hamein

Bara hi shaam-o-sehar ka hisaab rakhtay thay

Kab talak dil ko chupa rakhein gay

Dukh kay deemak ki nazar paar utar jati hai

Zindagi jaisay ghatta top andheray main basar hoti hai

Na'gahani kisi biphray huye wehshi ki tarah

Rooh ki dhool urra jati hai

Sukh ki be'sood tamana'on ki pa'daash main yak'tarfa saza

Aan girti hai kisi ghaib se na'deedgi adal kay palron pe safar karti hui

So rahay hotay hain thak haar kay punchi gham kay

Dara kay daraa jati hai

Kab talak dil ko chupa rakhein gay

Khoon main utri hui mout se kya ojhal hai

Shaakh se liptay huye saamp ki manind bhout dheeray se

Aashiyanay ki taraf barhti hai

Jhar jhari bhi nahin lenay deti

Bain izzat hi sahi miyat ki magar baad ki baaton se kabhi

Saibaan jurtay nahin tootay huye

Aasman zinda nahin ho jatay

Aasman martay hain aur waqat bigar jata hai

Aasman martay hain aur shaher ujar jata hai

Kon si subha jagaein gay sar-e-ehad-e-wafa

Kon si raat sula rakhein gay

Sabar ko koocha azad-o-biyabaan musafat ki tahi matti par

Kab talak aur bhala kis kis se khafa rakhein gay

Koi awaz lotay gi

Koi mehroom dilasa bhi nahin paltay ga

Kab talak dil ko chupa rakhein gay

Sog ka sog mana lenay se kya hota hai

Ussay mujh se mohabbat nahin thi

Ussay mujh se mohabbat nahin thi

Ussay mujh se mohabbat nahin thi

Phir bhi us ne hamesha tasleem kiya

Keh main us ka aanay wala waqat hoon

Lakin

Ussay yeh ilam nahin tha

Keh aanay wala waqat hamesha door hi dikhaai deta hai

Aur phir achanak hi guzar jata hai

Yeh bataye baghair

Keh woh guzar raha hai

Jab tera intizaar rehta hai Dil bhout be'qaraar rehta hai

Jab tera intizaar rehta hai

Dil bhout be'qaraar rehta hai

Rooh ko be'basi si rehti hai

Dard ba'ikhtiyaar rehta hai

Dil hai be'chainiyon ki mutthi main

Zehan par tu sawaar rehta hai

Ik tera dhiyaan aariyon ki tarah

Rooh kay aar paar rehta hai

Weham hai yeh mujhay keh teri taraf

Ik mera gham'gusaar rehta hai

Shab bhout be'qaraar rehta hai

din bhout so'gawaar rehta hai

Na poocho zindagi kitni karri hai

Samjh lo mout seenay main garri hai

Liye phirtay hain sab apnay janazay

Sabhi ko apni qabron ki parri hai

Shaam her roz kiyon aa jati hai

Shaam her roz kiyon aa jati hai

Udaas aur bhout ziyada udaas lamhay

Itnay bhout ziyada kiyon hain

Khamoshi aur bhout gehri khamoshi

Gehri kiyon rehti hai

Baaton se pehlay bhi aur baad bhi

Baaton kay darmiyan bhi

Aur kahin baaton kay peechay bhout andar bhi

Shaam her roz kiyon aa jati hai

Udaas aur khamosh

Aur sogwaar

Tum her roz kiyon aa jatay ho

Her roz aur bhout ziyada

Badal gaye meray mousam to yaar ab aaye

Ghamon ne chaat liya gham'gusaar ab aaye

Yeh waqat is tarah ronay ka to nahin lakin

Main kya karon keh meray so'gawaar ab aaye

Woh dhoop dhoop hi main ho gaya basar chup chaap

Shajar shajar pe meray barg-o-baar ab aaye

Woh jin pe dhoka sa jhela tha hum ne manzil ka

Woh qaaflay to sar-e-raah'guzar ab aaye

Na daliyon pe koi phool hai na honton par

Maza to jab hai keh baad-e-bahar ab aaye

Tum ne kaha bhout saray naamo main likha hua naam Mehboob nahin kehlaa sakta

Shayed is tarah tum samjh jaao

Tum ne kaha

Bhout saray naamo main likha hua naam

Mehboob nahin kehlaa sakta

Aur bhout sari tasveeron main lagi hui tasveer

Pasandeeda tareen

Sabit nahin hoti

Jab keh mera khayal yeh hai keh

Bhout saray naam nahin hon gay to aik naam sar-e-fehrast kis tarah aye ga

Aur sab se ziyada apna kaisay lagay ga

Aur agar kaafi sari tasveerain nahin hon gi

To in main se aik ko

Utha kar aankhon se laga lenay ki lazzat

Kaisay naseeb ho sakti hai

Main kuch keh nahin sakta

Keh main apni baat samjhanay main kahan tak kamyaab hua hoon

Tum youn karo

Keh kisi din kisi qad aainay kay samnay

Dair tak khamosh baithay khud ko jhanktay raho

Aur aankhon ko mal mal kay baar baar jhanko

Ya kisi gumbad main

Dair tak apna naam le kar zor zor se awazein do

Aur phir kabhi bhout saray logon kay darmiyan khud ko dekho

Aur bhout sari awazon main

Apni awaz suno

Shayed is tarah tum

Ziyada behtar tor par samjh sako

Jo main tumhein samjhana chahat hoon

Aankh se rooh ka gham zaahir hota hai

Us ka aik aik sitam zaahir hota hai

Be'khayali main tumhari hi taraf

Meray uthein gay qadam zaahir hai

Kuch chupa lenay se kya hai haasil

Un ka jitna hai karam zaahir hai

Dil kay bheegay huye mousam ki fiza

Az roye deeda num zaahir hai

Tum bhula do gay to phir tum ko bhi

Bhool hi jayein gay hum zaahir hai