Dukh ki lehar ne chaira ho ga Yaad ne kan'kar phainka ho ga

Dukh ki lehar ne chaira ho ga 

Yaad ne kan'kar phainka ho ga 

Aaj to mera dil kehta hai 

Tu is waqat akela ho ga 

Meray choomay huye haathon se

Auron ko khat likhta ho ga 

Bheeg chalein ab raat ki palkein 

Tu ab thak kar soya ho ga 

Rail ki gehri seeti sun kar 

Raat ka jungle goonja ho ga 

Shaher kay khaali station par 

Koi musafir utra ho ga 

Aangan main phir chiriyan bolein 

Tu ab so kar utha ho ga 

Yaadon ki jalti shabnam se 

Phool sa mukhra dhoya ho ga 

Moti jaisi shakal bana kar 

Aainay ko takta ho ga 

Shaam hui ab tu bhi shayed 

Apnay ghar ko lota ho ga 

Neeli dhundli khamoshi main 

Taron ki dhun sunta ho ga 

Mera saathi shaam ka tara 

Tujh se aankh milata ho ga 

Shaam kay chaltay haath ne tujh ko 

Mera salam to bheja ho ga 

Pyasi kurlati koonjon ne 

Mera dukh to sunaya ho ga 

Main to aaj bhout roya hoon 

Tu bhi shayed roya ho ga 

"Nasir" tera meet purana 

Tujh ko yaad to aata ho ga 

Ronaqein thein jahan main kya kya kuch

Ronaqein thein jahan main kya kya kuch 

Log thay raftagaan main kya kya kuch 

Ab kay fasal-e-bahar se pehlay 

Rang thay gulistaan main kya kya kuch 

Kya kahon ab tumhein khizan walo 

Jal gaya Aashiyaan main kya kya kich 

Dil teray baad so gaya warna 

Shor tha is makaan main kya kya kuch 

Be'kraan tanhaiyon ka silsala reh jaye ga

Be'kraan tanhaiyon ka silsala reh jaye ga

Teray meray darmiyaan , bas ik khalaa reh jaye ga 

Aks beh jayen gaysaray dhoop kay sailaab main 

Aur koi paaniyon main jhaankta reh jaye ga 

Mujh ko meray hamsafar aisa safar dar'paish hai 

Raasta kat bhi gaya to faasla reh jaye ga 

Log so jayein gay khamoshi ki chahdar oorh kar 

Chaand soonay aangano main jaagta reh jaye ga 

Jo kabhi us ne parhein thein mujh se nasir maang kar 

Naam mera un kitaabon main likha reh jaye ga

O meray masroof khuda apni duniya dekh zara

O meray masroof khuda
Apni duniya dekh zara 

Itni khalqat kay hotay 

Shehron main hai snaata 

Jhompri walon ki taqdeer 

Bujha bujha sa ik diya 

Khaak uraatay hain din raat 

Meelon phail gaye sehraa

Zaagh-o-zaghan ki cheekhon se

Soona jungle goonj utha 

Suraj sar par aa poncha 

Garmi hai ya roz-e-jaza

Pyasi dharti jalti hai 

Sookh gaye behtay dariya 

Faslein jal kar raakh huein

NAgri nagri kaal para 

O meray masroof khuda 

Apni duniya dekh zara

Phir sawan rutt ki pawan chali tum yaad aaye

Phir sawan rutt ki pawan chali tum yaad aaye 

Phir patton ki pazaib baji tum yaad aaye 

Phir koonjein bolein ghus kay haray samnadar main 

Rutt ayi peelay phoolon ki tum yaad aaye 

Phir kaga bolay ghar kay soonay aangan main 

Phir amrat ras ki boond pari tum yaad aaye 

Pehlay to main cheekh kay roya aur phir hansnay laga 

Badal garja , bijli chamki , tum yaad aaye 

Din bhar to main duniya kay dhandon main khoya raha 

Jab dewaaron se dhoop dhali tum yaad aaye

Nasir youn us ki yaad chali haath thaam kay

Nasir youn us ki yaad chali haath thaam kay 

Melay main is jahan kay khonay nahin diya

Teri zulfon kay bikharnay ka sabab hai koi

Teri zulfon kay bikharnay ka sabab hai koi 

Aankh kehti hai teray dil main talab hai koi 

Aanch aati hai teray jism ki uriyaati se 

Pehrahin hai keh sulagti hui shab hai koi 

Hosh urranay lagein phir chand ki thandi kirnein 

Teri basti main hoon ya khwaab-e-tarb hai koi 

Geet banti hai teray shaher ki bhar'poor hawa 

Ajnabi main hi nahin tu bhi ajab hai koi 

Liye jaati hai kisi dhiyaan ki lehrain Nasir 

Door tak silsala-e-taak-e-taraf hai koi 

Juda huye hain bhout log aik tum bhi sahi

Juda huye hain bhout log aik tum bhi sahi 

Ab itni baat pe kya zindagi haraam karein

Aankhon main hain dukh bharay fasanay

Aankhon main hain dukh bharay fasanay 

Ronay kay phir aa gaye zamanay 

Phir dard ne aag raag chaira 

Loat aaye wohi samay puranay 

Phir chand ko lay gayein hawaein 

Phir bansuri chair di saba ne 

Raston main udaas khushbon kay 

Phoolon ne luta diya khazanay 

Ae dil na tarap keh qehar ho ga

Ae dil na tarap keh qehar ho ga 

Ruswa koi shaher shaher ho ga

Ishq jab zam'zama-e-paira ho ga

Ishq jab zam'zama-e-paira ho ga 

Husn khud mehav-e-tamasha ho ga 

Daeim abaad rahay gi duniya 

Hum na hon gay , koi hum sa ho ga 

Hum tujhay bhool kay khush baithay hain 

Hum sa be'dard koi kya ho ga 

Phir sulagnay laga sehra-e-khayal 

Abr ghir kay kahin barsa ho ga 

Phir kisi dhiyaan kay sad rahay par 

Dil-e-hairat zada tanha ho ga 

Shaam se soch raha hoon Nasir

Chaand kis shaher main utra ho ga 

Daa'em abaad rahay gi duniya

Daa'em abaad rahay gi duniya 

Hum na hon gay , koi hum sa ho ga

Ishq main jeet hui ya maat

Ishq main jeet hui ya maat

Aaj ki raat na chairr yeh baat

Youn aaya woh jaan-e-bahar

Jaisay jag main phailay baat

Rang khilay sehra ki dhoop

Zulf ghannay jungle ki raat

Kuch na suna aur kuch na kaha 

Dil main reh gayi dil ki baat 

Yaar ki nagri koson door

Kaisay kattay gi bhaari raat 

Basti walon se chup kar 

Ro letay hain pichli raat 

Snaaton main suntay hain 

Suni sunaai koi baat 

Phir jaaray ki rutt aayi 

Chotay din aur lambi raat 

Teray milnay ko be'kal ho gaye hain

Teray milnay ko be'kal ho gaye hain 

Magar yeh log pagal ho gaye hain 

Baharein lay kay aaye thay jahan tum 

Woh ghar sunsaan jung ho gaye hain 

Yahan tak barh gaye alaam-e-hasti 

Keh dil kay hoslay shall ho gaye hain 

Kahan tak taab laye na'tawaan dil 

Keh sadmay ab musal'sal ho gaye hain 

Nigah-e-yaad ko neend aa rahi hai 

Mazda par ashk bojhal ho gaye hain 

Unhain sadiyon na bhoolay ga zamana 

Yeh jo hadsay kull ho gaye hain 

Jinhein hum dekh kay jeetay thay Nasir 

Woh log aankhon se ojhal ho gaye hain

Yaad aata hai roz-o-shab koi

Yaad aata hai roz-o-shab koi 

Hum se rootha hai be'sabab koi 

Lab jo chaaon main darakhton ki 

Woh mulaqaat thi ajab koi 

Jab tujhay pehli baar dekha tha 

Woh bhi tha mousam-e-tarb koi

Kuch khabar le kay teri mehfil se 

Door baitha hai jaan-e-lab koi 

Na gham-e-zindagi na dard-e-firaaq

Dil main youn hi si hai talab koi

Yaad aati hain door ki baatein 

Pyar se dekhta hai jab koi 

Chot khai hai bar haa lakin 

Aaj to dard hai ajab koi 

Jin ko mittna tha mitt chukay nasir

In ko ruswa karay na ab koi 

Aaj to be'sabab udaas hai jee

Aaj to be'sabab udaas hai jee

Ishq hota to koi baat bhi thi

Dil dharaknay ka sabab yaad aaya

Dil dharaknay ka sabab yaad aaya 

Woh teri yaad thi ab yaad aaya 

Aaj mushkil tha sambhalna ae dost

Tu museebat main ajab yaad aaya 

Din guzara tha bari mushkil se 

Phir tera wada-e-shab yaad aaya 

Tera bhoola hua paimaan-e-wafa 

Mar rahay hain agar ab yaad aaya 

Haal-e-dil hum bhu sunaatay lakin 

Jab woh rukhsat hua tab yaad aaya 

Baith kay saya-e-gul main Nasir

Hum bhout roye woh jab yaad aaya 

Naye kapray badal kar jaaon kahan aur baal banaon kis kay liye

Naye kapray badal kar jaaon kahan aur baal banaon kis kay liye 

Woh shakhs to shaher hi chor gaya main baahir jaaon kis kay liye 

Jis dhoop ki dil main thandak thi woh dhoop usi kay saath gayi 

In jalti balti galiyon main ab khaak uraaon kis kay liye 

Woh shaher main tha to us kay liye auron se bhi milna parta tha 

Ab main aisay waisay logon kay naaz uthaon kis kay liye 

Ab shaher mainus ka badal hi nahin , koi waisa jaan-e-ghal hi nahin 

Ewaan-e-ghazal main lafzon kay guldaan sajaon kis kay liye 

Muddat se koi aaya na gaya sunsaan pari hai ghar ki fiza

In khaali kamron main "Nasir" ab shamma jalaon kis kay liye

Niyat shouq bhar na jaye kahin

Niyat shouq bhar na jaye kahin 

Tu bhi dil se utar na jaye kahin 

Aaj dekha hai tujh ko dair kay baad 

Aaj ka din guzar na jaye kahin 

Na mila kar udaas logon se 

Husn tera bikhar na jaye kahin 

Aarzoo hai keh tu yahan aaye 

Aur phir umar bhar na jaye kahin 

Jee jalaata hoon aur yeh sochta hoon 

Raigaan yeh hunar na jaye kahin 

Aao kuch dair ro hi lain "Nasir"

Phir yeh dariya utar na jaye kahin

 

Apni dhunn main rehta hoon

Apni dhunn main rehta hoon 

Main bhi teray jaisa hoon 

Aur pichli rutt kay saathi 

Ab kay baras main tanha hoon 

Teri gali main sara din 

Dukh kay kan'kar chunta hoon 

Mujh se aankh milaye kon 

Main tera aaina hoon 

Tu jeewan ki bharri gali 

Main jungle ka rasta hoon 

Aayi rutt mujhay roye gi 

Jaati rutt ka jhnoka hoon 

Apni lehar hai apna rog 

Dariya hoon aur pyasa hoon