Imran's Poetry: 02/10/16

Feb 10, 2016

Meray chaand meri aik baat suno

tum bin mera dil veeran sunoo

Her subha ki ronaq tum se hai

Meri raat ke roshan chand suno

Tera sab se her andaz alag

teray hansanay se ho shaam dhanak

Teray bin her shubo shaam suno

Meray chaand meri ik baat suno

Aik wada kar lo tum mujh se

Tum ab na rotho ge mujh se

Ruk jaye na meri Saans suno

Meray chand meri aik baat suno

Badal Liya hai Mujhay us ne parahin ki tarah

Woh Admi tha hamesha se kush libaas bhout

Kabhi toota nahin meray dil se teri yaad ka talism faraz

Kabhi toota nahin meray dil se teri yaad ka talism faraz

Guftagoo jis se bhe ho khyal tera he rehta hai

Dharkano kay naseb-o-faraz ko sanwara tha aur bas

Kagaz pe dil ka boujh utara tha aur bas

Bas itna jante hoon keh awaz us ke the

itna pata hai keh us ne pukara tha aur bas

Duniya ki fikar kissay the zamaney ka khauf kiya

Hum ko faqat khyal tumhara tha aur bas

Chahaton ke jahan main kuch fiada ho na ho magar

Chahaton ke jehan main sirf khasara tha aur bas

Logon ne ussay meri mohabbat samjh liya sagar

Woh mujh ko jaan se piyara tha aur bas

Rah-e-wafa main sazaon ko kon dekhay ga

safar hai dhoop ka chayon ko kon dekhay ga

Hum apni zid pe aye to cheen lain ge tujhay

teray shehar ke aonchi dewaron ko kon dekhay ga

teri bazam ke hum woh chragh hain

Keh jab jalay to hawaon ko kon dekhay ga

Bichar to jayen magar phir khyal ata hai

Teri in dilkash adaon ko kon dekhay ga

Kuch is tarah se nazar andaaz ho gaye

Jaisay izafi harf thay teri zindagi ki kitab main

Kaash mujhay maloom ho jaye

teri soch ka mehvar

To main khud ko tarashoon

Teray andaz-e-nazar se

Teri wafa pe hai yaqeen mujh ko

Teri wafa pe hai yaqeen mujh ko

Magar phir bhe teri zubaan pe

sada apna naam dekhoon

Kar sakon agar to kuch aisa karoon

Tery dil main utar kar apna maqaam dekhon

Tum se bichar kar pehron sochta rehta hoon

Ab main kiyon aur kisi ki khatir zinda rahoon

Ae khamosh khalla ka6y maalik teri qasam

Bazam-e-jahan main tujh se ziyada tanha hoon

Jeeti jaagti duniya kay hangamon main

Youn lagta hai jaisay main ik saya hoon

Khoya hai woh jaisay haath ki lakeeron main

Aisay apnay haath ko takta rehta hoon

Reza reza toot chuka hoon andar se

Ghar se baahir gardan taan kar chalta hoon

Janay jis ka naam hai Amjad kon hai woh

Sach poocho to main ik jhoota chehra hoon

Aks-e-khushboo hoon , bikharnay se na rokay koi

Aur bikhar jaaon to mujh ko na samaitay koi

Kaamp uth'ti hoon main yeh soch kay tanhai main

Meray chahray pe tera naam na parh lay koi

Jis tarah khwaab meray ho gaye reza reza

IS tarah se na kabhi toot kay bikhray koi

MAin to uss din se haraasan hoon keh jab hukam milay

Khushk phoolon ko kitabon main na rakhye koi

Ab to is raah se woh shakhs guzarta bhi nahin

Ab kis umeed pe darwaze se jhankay koi

Koi aahat , koi awaz, koi chaap nahin

Dil ki galiyaan bari sunsaan hain aaye koi

Harf-e-taza nayi khushboo main likha chahta hai

Baab ik aur mohabbat ka khulla chahta hai

Ik lamhay ki tawajo nahin hasil us ki

Aur yeh dil keh ussay had se siwa chahta hai

Ik hijaab teh-e-iqraar hai maaneh warna

Gul ko maloom hai kiya dast-e-saba chahta hai

Rait hi rait hai is dil main musafir meray

Aur yeh sehraa tera naqsh-e-kaf-e-paa chahta hai

Yahi khamoshi kai rang main zahir ho gi

Aur kuch roz keh woh shokh khila chahta hai

Raat ko maan liya dil ne muqaddar lakin

Raat kay haath pe ab koi diya chahta hai

Parveen shakir

Ab kay rutt badli to khushboo ka safar dekhay ga kon

Zakham phoolon ki tarah mehkain gay par dekhye ga kon

Dekhna sab raqs-e-bismal main magan ho jayein gay

Jis taraf se teer aaye ga udhar dekhye ga kon

Zakham jitnay bhi thay sab mansoob qatil se huye

Teray haathon kay nishaan Ae chara gar dekhye ga kon

Woh hawas ho ya wafa ho baat mehroomi ki hai

Log to phal phool dekhein gay shajar dekhye ga kon

Hum chragh-e-subha hi tehray to phir kya sochna

Raat thi kis ka muqaddar aur sehar dekhye ga kon

Aa faseel-e-shaher se dekhein ghaneem-e-shaher ko

Shaher jalta ho to tujh ko baam par dekhye ga kon

Her koi apni hawa main mast phirta hai "Faraz"

Shaher-e-na'parsaan main teri chashme-e-tar dekhye ga kon

Hum aaj bhi hain , soch main doobay huye Mohsin

Khud se kabhi duniya se hain roothay huye Moshin

Denay kay liye us ko jo hum ne sambhalay thay

Woh phool kitabon main hain , sookhay huye Mohsin

Woh apni jafaon main kuch kami to karain aaj

Ik umar hui shaher woh choray huye Mohsin

Hum ne yeh kaha tha keh inhain pyaar hai hum se

hum aaj bharri bazam main jhootay huye Mohsin

Aagosh main in ki hamein rahat jo mili hai

Hum aaj kuch andar se hain tootay huye Mohsin

Tu badalta hai to be'sakhta meri aankhein

Apnay haathon ki lakeeron se ulajh jaati hain

Baad muddat ussay dekha logo

Woh zara bhi nahin badla logo

Khush na tha mujh se bichar kar woh bhi

Us kay chehray pe likha tha logo

US ki aankhein bhi kahay deti thein

Raat bhar woh bhi na soya logo

Ajnabi ban kar jo guzra hai abhi

Tha kisi waqat main apna logo

Dost to khair koi kis ka hai

US ne dushman bhi na samjha logo

Raat woh dard meray dil main utha

Subha tak chain na aaya logo

Khoi khoi aankhein Bikhray baal Shikan alood qaba

Ajnabi

Khoi khoi aankhein

Bikhray baal

Shikan alood qaba

Luta luta insaan

Saaye ki tarah se meray saath raha karta lakin

Kisi jaga mil jaye to

Ghabra kay murr jata hai

Aur phir door se jaa kar mujh ko taknay lagta hai

Kon hai yeh ?

Parveen shakir

Dasnay lagay hain khwaab magar kis se boliye

Main janti thi , paal rahi hon sampoliye

Bas yeh huwa keh us ne takaluf se baat ki

Aur hum ne rotay rotay dopatay bigho liye

Shakist-e-zindagi waisay bhi mout hi hai na

Tu sach bata ! yeh mulaqaat aakhri hai na

MAin khud bhi yaar tujhay bhoolnay kay haq main hoon

Magar jo beech main kam'bakhat shairy hai na

Yeh kor chasham ujalon se ishq kartay hain

Jo ghar jala kay bhi kehtay hain roshni hai na

Tu meray haal se anjaan kab hai Ae duniya

Jo baat keh nahin paya samjh rahi hai na

Tu meray haal se anjaan kab hai Ae duniya

Jo baat keh nahin paya samjh rahi hai na

Main jaan bujh kay aaya tha teegh aur teray beech

Miyan ! nibhani to parti hai dosti hai na

Jashan-e-baharan , raqs-e-butt'an aur thori dair

Aish-o-tarb ki keh'kishaan aur thori dair

Arbaab-e-ikhtiyaar kay sana khawan-e-khush kalaam

Kaif-o-suroor ka yeh samaa'n aur thori dair

Yeh tam'kanat , yeh zoham magar is kay ba'wajood

Aab-e-rawaan pe sibat nishaan aur thori dair

Hum chal rahay hain janb-e-manzil rawan da'wan

Gum'naam raaston main dhuwan aur thori dair

Seena supar hain baad-e-mukhalif kay ba'wajood

Qaim abhi hai rishta-e-jaan aur thori dair

Phaili hui hai chaar su ik be'hissi magar

Honay ko phir hai azam-e-jawan aur thori dair

Us ko juda huye bhi zamana bhout hua

Ab kya kahein yeh qissa purana bhout hua

Dhalti na thi kisi bhi jatan se shab-e-firaq

Ae marg-e-na'gahaan ! tera aana bhout hua

Hum khald se nikal to gaye hain par ae khuda !

Itnay se waqiaye ka fasana bhout hua

Ab hum hain aur saray zamanay ki dushmani

Us se zara sa rabt barhana bhout hua

Ab kiyon na zindagi pe mohabbat ko waar dain

Is Aashique main jaan se jana bhout hua

Ab tak to dil ka dil se ta'aruf na ho saka

Mana keh us se milna milaana bhout hua

Lo phir teray labon pe usi bewafa ka zikar

Ahmed Faraz ! tujh se kaha na bhout hua

Woh Faisla na karti to kya karti

Main hawaon sa pagal , woh chragh si larki

Woh acha hai to behtar , bura hai to bhi qabool

Mizaaj-e-ishq main Aaib-e-yaar nahin dekhey jatay

Kahin chatt thi , dar-o-dewar thay , kahin mila mujh ko ghar ka pata dair se

Diya to bhout zindagi ne mujhay , magar jo diya , diya dair se

Hua na koi kaam mamool se , guzray shab-o-roz kuch is tarah

Kabhi chand chamka ghalt waqat par , kabhi ghar main suraj ugga dair se

Yeh sab itafa'qaat ka khail hai yahi hai judai yahi meel hai

Main murr murr kay dekha kya door tak , bani woh khamoshi sada dair se

Kahin ruk gaye raah main be'sabab kabhi waqat se pehlay ghar aayi shab

Huye band darwaze khul khul kay sab jahan bhi gaya main bhi gaya dair se

Sajja din bhi , roshan hui raat bhi , bharray jaam , lehraai barsaat bhi

Rahay saath kuch aisay halaat bhi , jo hona tha jaldi hua dair se

Bhat'takti rahi youn hi her bandagi , mili na kahin se koi roshni

Chuppa tha kahin bheer main Aadmi, hua mujh main roshan khuda dair se

Youn bhi nahin keh meray bulanay se aa gaya

Jab reh na saka to bahanay se aa gaya

Hum kar kay baat phans gaye apnay hi jaal main

Kya palat kay teer nishanay se aa gaya

Aata na tha kabhi hamein apna khayal kuch

Itna bhi us ko paas bithanay se aa gaya

Kya la'taluqi se hua faida hamein

Kya us kay haath baat barhanay se aa gaya

Kuch aur bhi sampoliye haq'daar thay zafar

Main apnay aap uth kay khazanay se aa gaya

Na jee bhar kay dekha na kuch baat ki

Bari Aarzoo thi mulaqaat ki

Shab-e-hijar tak ko yeh tash'weesh hai

Musafir ne janay kahan raat ki

Muqadar meri chasham par Aab ka

Barasti hui raat barsaat ki

Ujaalon ki pariyaan naha'nay lagein

Nadi gun'gunaati khayalaat ki

Main chup tha to chalti hawa ruk gayi

Zabaan sab samjhtay hain jazbaat ki

Kai saal se kuch khabar hi nahin

Kahan din guzara kahan raat ki

Meri halat hai keh ehsaas-e-tarb hai koi

Teray be'saakhta hans'nay ka sabab hai koi

Fitna gardish-e-doraan zara aahista guzar

Saya-e-zulf main Aaraam talab hai koi

Apnay ronay ka sabab to nahin maloom magar

Log kehtay hain keh taqreeb-e-tarb hai koi

Aaj tak un se raah-o-rasam chali jaati hai

Jin se pehlay kuch tawaqo thi na ab hai koi

Ya tujhay dekh kay bhar aaye khushi se aanoo

Ya meri aankhon main guzri hui shab hai koi

Janay kin logon ki basti main chalay aaye Faraz

Abdeeda hai koi khanda-e-bulb hai koi

Teray hotay huye mehfil main jalatay hain chragh

Log kya sada hain suraj ko dikhatay hain chragh

Apni mehroomi kay ehsaas se sharminda hain

Khud nahin rakhtay to Auron kay bujhatay hain chragh

Bastiyan door hui jaati hain rafta rafta

Dam-ba-dam aankhon se chuptay chalay jatay hain chragh

Kya khabar un ko keh daman bhi bharrak uth'tay hain

Jo zamanay ki hawaon se bachatay hain chragh

Go siyah bakhat hain hum log par roshan hai zameer

Khud andheray main hain duniya ko dikhatay hain chragh

Bastiyan chand sitaron ki basanay walo

Kurah-e-arz pe bujhtay chalay jatay hain chragh

Aisay be'dard huye hum bhi keh ab gulshan par

Barq girti hai to zindaan main jalatay hain chragh

Aisi tareekiyan aankhon main basi hain keh Faraz

Raat to raat hai hum din ko jalatay hain chragh

Ghair se tera Aash'na hona

Goya acha hua bura hona

Khud nagoon saar , humsafar baizaar

Ik sitam hai shakista paa hona

Kitni jaan'kah hai zameer ki mout

Kitna Aasaan hai be'wafa hona

Nasha-e-lazzat-e-gunnah kay baad

Sakhat mushkil hai parasaa hona

Aadmi ko khuda na dikhlaye

Aadmi ka kabhi khuda hona

Dil ki baaton pe kon jaye Faraz

Aisay dushman ka dost kya hona

Thak jayein gay raah'geer chaltay chaltay

Dhal jayein gay mahol main dhaltay dhaltay

Tareeki-e-shab main na kami aaye gi

Bujh jayein gay yeh chragh jaltay jaltay

Kuch na kisi se bolain gay

Tanhai main ro lain gay

Hum be'raah'rawon ka kya

Saath kisi kay ho lain gay

Khud to huye ruswa lakin

Teray bhaid na kholain gay

Jeewan zehar bhara sagar

Kab tak amrat gholain gay

Hijar ki shab sonay walay

Hashar ki aankhein kholain gay

Phir koi Aandhi uthay gi

Punchi jab par tolain gay

Neend to kya aaye gi Faraz

Mout aayi to so lain gay

Udaas aur ziyada kahin na ho jayein

Faraz` Anjuman-e-dost se chalo jayein

Na ajnabi na musafir na shaher walay hain

Koi pukaro keh hum bhi kisi kay ho jayein

Jo sadmay hum pe guzarnay hain woh to guzrain gay

Magar yeh aap ko gham kiyon hai , aap to jayein

Ulajtay hain teray sodaiyon se ehal-e-khird

Yeh sada loh bhi pagal kahin na ho jayein

Zamana apni parshaniyon main khoya hai

Chalo keh manzil-e-jaana'n ko dosto jayein

Shab-e-firaaq to kat'ti nazar nahin aati

Khayal-e-yaar main aao Faraz so jayein

Her zakham ko seenay pe saja letay hain

Her dard ko hum dil main basa letay hain

Tum phoolon pe sotay ho to dukhta hai badan

Hum kaanton ko aankhon se laga letay hain

Jab bhi dil khol kay roye hon gay

Log Aaraam se soye hon gay

Baaz-ouqaat ba'majboori-e-dil

Hum to kya aap bhi roye hon gay

Subha tak dast-e-saba ne kya kiya

Phool kaanton main paroye hon gay

Woh safeenay jinhein toofan na milay

Na'khuda'on ne daboye hon gay

Raat bhar hanstay huye taaron ne

In kay aariz bhi bhigoye hon gay

Kya ajab hai woh milay bhi hon Faraz

Hum kisi dhiyaan main khoye hon gay

Tu keh ik wadi-e-gul'rang ki shahzadi hai

Dekh be'kaar se insaan kay liye waqf na ho

Teray khawabon kay jazeeron main bari ronaq hai

Aik anjaan se toofan kay liye waqf na ho

Main to awara sa shaair hoon meri kiya wuqat

Aik do geet parishaan se gaa leta hoon

Gahay gahay kisi na'kaam sharabi ki tarah

Aik do zehar kay sagar bhi charhaa leta hoon

Jo saja'ai gayi firdos numaish kay liye

Woh kisi aur ki tameer hai meri to nahin

Yeh maka'naat , yeh jandir , yeh dukanein , yeh zameen

Meray ajdaad ki jageer hai meri to nahin

Tu ne dekha hi nahin mujh ko tujhay kya maloom

Waqat ne aaj kissay somp diya hai tujh ko

Kis kay daaman se baandha gaya palu tera

Kis se taqdeer ne wabasta kiya hai tujh ko

Dil jo kehta hai chalo kar dekho

Kisi be'dard kay ho kar dekho

Lazat-e-gham bhi ajab nasha hai

Dost ki yaad main ro kar dekho

Zindagi silsala-e-khawab-e-tarb

Saya-e-zulf main so kar dekho

Kitni taskeen hai ehsaas ki mout

Kabhi dewana to ho kar dekho

Kitna dil'kash hai jahan-e-guzran

Dil kay Aainay ko dho kar dekho

Maah-o-Anjam bhi thay Aabaad kabhi

In kharabon se bhi ho kar dekho

Resha-e-gul main bhi hai moj-e-khoon

Khaar ki nok chubho kar dekho

Oas ki boond bhi hai sheesh nagar

Aankh ashkon se bigho kar dekho

Zarhay zarhay main hai Aabaad jahan

Khud ko her shai main samoo kar dekho

Shab kay sanaaton main woh baat kahan

Din kay hangamon main kho kar dekho

Tum bagulon kay khuda'wand sahi

Aatish-e-gul to faroo kar dekho

Jo diye le kar nikaltay hain Faraz

Woh bhi khaa jatay hain thokar dekho

Is adaa se kabhi aa kar guzro

Dil kay sehraa ko basa kar guzro

Sang-e-khaara hai zamanay ki nazar

Dil kay Aainay bacha kar guzro

Roshni rehbar-e-rehzan bhi to hai

Raahiyo ! sham'ein bujha kar guzro

Kon janay keh yeh pathar hain keh log

Dasht-e-ghurbar main sadaa kar guzro

Koi kaanta ho keh shabnam ho keh phool

Sab ko Aankhon se laga kar guzro

Safar-e-shouq ho ya manzil-e-gham

Koi hungama utha kar guzro

Chartay suraj kay pujari na bano

Apnay Saaiye main samaa kar guzro

Waqat ne saath diya hai kis ka

Jee main jo aaye sadaa kar guzro

Pehlay dewano ki rasmein thein yahi

Khoon kaanton ko pilaa kar guzro

Aik pal tehro bagulon ki tarah

Aur phir khaak uraa kar guzro

YA to mojon kay shana'sa na bano

Ya kinaron ko baha kar guzro

Dil ajab shaher hai hungamon ka

Kabhi is simt bhi aa kar guzro

Tu san-e-waqat ki raftaar kay saath

Barq kay pankh laga kar guzro

Fikar-o-adraak kay dar'on main Faraz

Mishal-e-tibah jala kar guzro

Rota hoon to ehbaab bura maantay hain

Hansta hoon to mujrim mujhay gar'daantay hain

Her haal main Aitraaz karnay walay

Nadaan meray halaat kahan jaantay hain

Dil garmi-e-ehsaas se phukh jayein gay

Qadmon main teray zamanay jhuk jayein gay

Ae hussan faqat jumbish-e-Aabru ki hai dair

Duniya kay karobaar ruk jayein gay