Imran's Poetry: 03/11/17

Mar 11, 2017

Hum ne soch rakha hai tum se kuch nahin kehna

Tum se kuch nahin kehna

Hum ne soch rakha hai

Chahye dil ki her khawaish

Zindagi ki aankhon se ashk ban kay

Beh jaye

Chahye ab makeeno par

Ghar ki sari dewarein chatt samait gir jayein

Aur be'muqaddar hum

Iss badan kay malbay main

Khud hi kiyon na dab jayein

Tum se kuch nahin kehna

Kaisi neend thi apni , kaisay khawaab thay apnay

Aur ab gulabon par

Neend wali aankhon par

Narm khu se khawabon par

Kiyon azaab tootay hain

Tum se kuch nahin kehna

Ghar gaye hain raaton main

Be'libaas baaton main

Iss tarah ki raaton main

Kab chragh jaltay hain

Kab azaab tal'tay hain

Ab to in azabon se bach kay bhi nikalnay ka raasta nahin jaana !

Jis tarah tumhein sacch kay la'zawal lamhon se waasta nahin jaana !

Hum ne soch rakha hai tum se kuch nahin kehna

Umar rai'gaan kar di tab yeh baat maani hai

Mout aur mohabbat ki aik hi kahani hai

Khel jo bhi tha jaana ab hisaab kya karna

Jeet jis kisi ki ho hum ne haar maani hai

Wasal par bhi na'dam thay hijar par bhi sharminda

Woh bhi rai'gaani thi , yeh bhi raigaani hai

Yeh mera hunar teri khushbu'on se wabasta

Meray saray lafzon par teri hukam'raani hai

Janay kon shehzada kab chura kay lay jaye

Woh jo apnay aangan main khushbu'on ki raani hai

Woh harf harf meri rooh main utar'ta gaya

Jo baat karta gaya aur udaas karta gaya

Mohabbat kam nahin ho gi

Mohabbat kam nahin ho gi

Meri aankhein salamat hain

Mera dil meray seenay main dharakta hai

Mujhay mehsoos hota hai

Mohabbat kam nahin ho gi

Mohabbat aik wada hai

Jo sacchai ki un'daikhi kisi saa'at main hota hai

Kisi rahat main hota hai

Yeh wada shairy ban kar meray jazbon main dhalta hai

Mujhay mehsoos hota hai

Mohabbat kam nahin ho gi

Mohabbat aik mousam hai

Keh jis main khawab uggtay hain

To khawabon ki harri shakhein

Gulabon ko bulaati hain

Unhein khushbu banati hain

Yeh khushbu jab hamari khirkiyon par dastak'ein de kar

Guzarti hai

Mujhay mehsoos hota hai

Mohabbat kam nahin ho gi

Palat kar phir kabhi uss ne pukara hi nahin hai

Woh jis ki yaad se dil ko kinara hi nahin hai

Mohabbat khel aisa to nahin hum loat jayein

Keh iss main jeet bhi ho gi khasara hi nahin hai

Kabhi woh jugnu'on ko muthiyon main qaid karna

Magar ab to hamein yeh sab gawara hi nahin hai

Ab uss kay khaal-o-khad ka zikar kya kartay kisi se

Keh hum par aaj tak woh aashkaara hi nahin hai

Yeh khawaish thi keh hum kuch door tak saath chaltay

Sitaron ka magar koi ishara hi nahin hai

Bhout se zakham khaye dil ne aakhir teh kiya hai

Tumharay shaher main apna guzara hi nahin hai

Lutf sogwari main , Gham ki aabiyaari main

Lutf sogwari main

Gham ki aabiyaari main

Hum milay mohabbat ki

Pehli barf baari main

Ghar se kon niklay ga

Itni sang baari main

Ik sakoon shaamil hai

Dil ki be'qaraari main

Umar sari guzri hai

Kitni sog'wari main

Ik faraib lagta hai

Uss ki ink'saari main

Kul Asaasa tha ik diya logo

Aur ab woh bhi bujh gaya logo

Hum ne chup chaap haar maani thi

Tum ne to shor kar diya logo

Saath reh kar bhi kitna na'dim tha

Kab talak jhoot bolta logo

Woh bhi khamosh tha judai par

Hum ne bhi zabt kar liya logo

Zindagi ka safar tumharay baghair

Aakhir kaar kat gaya logo

Hum ne ik roz loat aana tha

Koi to raah dikhaata logo

Toh'matein to lagti hain Roshni ki khawaish main

Toh'matein to lagti hain

Toh'matein to lagti hain

Roshni ki khawaish main

Ghar se baahir aanay ki kuch saza to milti hai

Log log hotay hain

Un ko kya khabar jaana !

Aap kay iraadon ki khoobsurat aankhon main

Basnay walay khawabon kay rang kaisay hotay hain

Dil ki goad aangan main palnay wali baaton kay

Zakham kaisay hotay hain

Kitnay gehray hotay hain

Kab yeh soch saktay hain

Aisi be'gunnah aankhein

Ghar kay konay khudron main chupp kay kitna roti hain

Phir bhi yeh kahani se

Apni kaj biyani se

Is qadar rawani se daastaan sunatay hain

Aur yaqeen ki aankhein

Sacch kay gham'zada dil se lag kay ronay lagti hain

Toh'matein to lagti hain

Roshni ki khawaish main

Toh'maton kay lagnay se

Dil se dost ko jaana

Ab nid'haal kya karna

Toh'maton se kya darna

Hamaray bas main agar apnay faisalay hotay

To hum kabhi kay gharon ko palat gaye hotay

Qareeb reh kay sulagnay se kitna behtar tha

Kisi maqaam pe hum tum bichar gaye hotay

Kabhi to rait ko hum muthiyon main bhar letay

Kabhi hawaon se apnay muqaalmay hotay

Hamaray naam pe koi chragh to jalta

Kisi zubaan pe hamaray bhi tazkaray hotay

Hum apna koi alag raasta bana letay

Hamaray dil ne agar hoslay na haaray hotay

Yeh umar bhar ka safar aur yeh rai'gaani teri

Kahan gayi Ae meray dil woh khush gumaani teri

Yahan pe kon andheron main saath chalta hai

Tu ab bhi saath meray hai yeh meharbani teri

Tujhay khabar nahin hum daikh kar bhout roye

Nayi kitaab main tasveer ik purani teri

Abhi se aablay parnay lagay hain paaon main

Abhi to door hai manzil-e-safar kahani teri

Bhulaaye baithay hain aur apnay haal main khush hain

Tu aa kay daikh kabhi hum ne baat maani teri

Mujh ko ruswa sar-e-mehfil tu na karwaya karay

Kaash aansu meri aankhon main hi reh jaya karay

Ae hawa main ne to bas uss ka pata poocha tha

Ab kahani tu na her baat ki ban jaya karay

Bas bhout daikh liye khawaab sohanay din kay

Ab woh baaton ki rafaqat se na behlaya karay

Ik museebat to nahin tooti so ab iss dil se

Jis qayamat ne guzarna hai guzar jaya karay

Dil ne ab soch liya hai keh zaalim duniya

Jo bhi karna hai karay mujh ko na uljhaya karay

Jis kay khawabon ko main aankhon main saja kar rakhon

Uss ki khushbu kabhi mujh ko bhi mehkaya karay

Safar aasaan lagta tha

Khawaab

Safar aasaan lagta tha

Dil-e-bar'baad tujh ko yeh safar Aasaan lagta tha

Idher tu sochta tha udher

Aankhon se koi khawab chehra aan lagta tha

Magar khawabon main rehna

Khawab jaisi be'haqeeqat khushbu-e-sehra main rehna hai

Kinaron se jo ho mehroom

Uss dariya main rehna hai

Dil-e-bar'baad hum ne to kaha tha

Yeh safar aasaan lagta hai

Magar aankhein badan se cheen leta hai

Mohabbat main kahin kam ho gaya hai

Mera tujh par yaqeen kam ho gaya hai