Tujh se ab aur mohabbat nahin ki jaa sakti

Tujh se ab aur mohabbat nahin ki jaa sakti 

Khud ko itni bhi aziyat nahin di jaa sakti 

Jaantay hain keh yaqeen toot raha hai dil par 

Phir bhi ab tark yeh wehshat nahin ki jaa sakti 

Habs ka shaher hai aur is main kisi bhi surat 

Saans lenay ki sahulat nahin di jaa sakti 

Roshni kay liye darwaza khulla rakhna hai 

Shab se ab koi ijaazat nahin li jaa sakti 

Ishq ne hijar ka Aazaar to de rakha hai 

Is se barh kar to ri'ayat nahin di jaa sakti  

Yahi nahin koi toofan meri talaash main hai

Yahi nahin koi toofan meri talaash main hai

Keh mousam-e-gham-e-jaana meri talaash main hai 

Wisaal rutt hai magar dil ko aisa lagta hai 

Sitara-e-shab-e-hijraan meri talaash main hai 

Main faisalay ki gharri se guzar chuki hoon magar 

Kisi ka deeda-e-hairaan meri talaash main hai 

Yeh be'yaqeen si asoodgi bata'ti hai 

Keh ik qariya-e-veeran meri talaash main hai 

Main tairagi main mohabbat ki ik kahani hoon 

Koi chragh sa unwaan meri talaash main hai 

Yeh kaisa khawaab tha dharka sa lag gaya dil ko 

Keh ik shakhs-e-parishaan meri talaash main hai 

Itnay sacchay kiyon hotay hain

Itnay sacchay kiyon hotay hain 

Bacchay achay kiyon hotay hain