Main pal do pal ka shair hoon

Main pal do pal ka shair hoon 

Pal do pal meri kahani hai 

Pal do pal meri hasti hai 

Pal do pal meri jawani hai 

Mujh se pehlay kitnay shair 

Aye aur aa kar chalay gaye 

Kuch aahein bhar kar loat gaye 

Kuch naghmay gaa kar chalay gaye

Woh bhi ik pal ka qissa thay 

Main bhi ik pal ka qissa hoon 

Kal tum se juda ho jaon ga 

Jo aaj tumhara hissa hoon 

Main pal do pal ka shair hoon 

Kal aur ayein gay naghmon ki 

Khilti kaliyan chun'nanay walay 

Mujh se behtar kehnay walay 

Tum se behtar sun'nanay walay 

kal mujh ko koi yaad karay 

Kiyon mujh ko koi yaad karay 

Masroof zamana meray liye 

Kiyon waqat apna barbaad karay 

Main pal do pal ka shair hoon 

Pal do pal meri kahani hai

Aasman ik saya jaisay khali hathon par

Aasman ik saya jaisay khali hathon par 

Aur zameen ik maar khaak ka qeemti dhaton par 

Sood-o-ziyan kay andeshay bhi is ki bazam main thay 

Warna yaqeen aur hum kar letay us ki baton par 

Poora bagh damak utha tha gehri roshni main 

Rang-e-barq safar main tha bheegi barsaton par 

Sanata jungle ki tarah hai in dewaron ka 

Dushman ka dhoka hota hai shaher ki raaton par 

Jisam ka khoon simat aaya tha dar'ri nigahon main 

Zar ki zardi khundi hui thi peelay maathon par 

Mujhay Munir afsos hua hai kar kay yaad ussay 

Kabhi kabhi dukh bhi hota hai guzri baton par 

Lazim nahin us ko bhi mera khayal ho

Lazim nahin us ko bhi mera khayal ho 

Jo mera haal hai wohi us ka bhi haal ho 

Kuch aur dil'gudaaz hon is shaher-e-sang main 

Kuch aur pur'malaal , hawa-e-malaal ho 

Batein to hon kuch to dilon ki khabar milay 

Aapis main apnay kuch to jawab-o-sawal ho

Rehtay hain aaj jis main , jissay daikhtay hain hum 

Mumkin hai yeh guzishta ka khawab-o-khayal ho 

Sab shor shaher-e-khaak ka hai qarb-e-aab se 

Pani na ho to shaher ka jeena mohaal ho 

Madoom hoti jati hui shay hai yeh jahan 

Her cheez is ki jaisay fanaa ki misaal ho 

Koi khabar khushi ki kahin se milay Munir 

In roz-o-shab main aisa bhi ik din kamaal ho

Ugga sabza dewar par aahista aahista

Ugga sabza dewar par aahista aahista 

Hawa khali sadaon se nagar aahista aahista 

Ghirra badal khamoshi se khizan asaar baghon par 

Hillay thandi hawaon main shajar aahista aahista 

Bhout hi sust tha tha manzir lahu kay rang lanay ka 

Nishan aakhir hua yeh surkh tera aahista aahista 

Chamak zar ki ussay aakhir makan-e-khaak main laai 

Banaya naag ne jismon main ghar aahista aahista 

Meray baahir fasee'lein thein ghubar khaak-o-baran ki 

Mili mujh ko teray gham ki khabar aahista aahista 

Munir is mulak par Asaib ka saya hai ya kya hai 

Keh harkat tez tar hai aur safar aahista aahista

Makan main qaid sada ki dehshat

Makan main qaid sada ki dehshat 

Makan se bahir khala ki dehshat 

Hawa hai khouf-e-Khuda se khaali 

Hai is nagar main bala ki dehshat 

Ghira hua hoon main is main her taraf se 

Hai aainay main hawa ki dehshat 

Zameen pe her simat had-e-aakhir 

Falak pe la'intiha ki dehshat 

Shajar kay saye main mout daikho 

Samar main us kay fanaa ki dehshat 

Badan hai hoshiyar dil kay dar se

Nazar main awaz-e-pa ki dehshat 

Kharri hai rastay ki manzalon par 

Manazar dair-e-pa ki dehshat 

Sarab sa ik guzar raha hai 

Wohi hai phir chasham-e-wa ki dehshat 

Munir khoon main utar rahi hai 

Qarar-e-be'mad'dua ki dehshat 

Khush hai jaisay ab rihaa ho kar puranay baar se

Khush hai jaisay ab rihaa ho kar puranay baar se

Arz teera ho chali thi kasrat-e-ashjaar se

Shaher main dewangi dedaar mah-e-no se hai 

Manzaron pe rang sa hai shaam kay Asaar se

Hai misal-e-sang , dil is nargis-e-be'maar ka 

Hai bukhaar aankhon main us kay husan kay Azaar se

Woh sada meri khala-e-koh-o-dasht -o-behar main 

Khouf-o-qaid sada ka , harf ki takraar se

Ik mehraab aasman kay darmiyan baam-o-dar 

Ik diye ki lo nu'mayan rozan-e-dewar se

Ho gaye us se juda bas soch kar kuch jee main hum 

Baat kya hum ne nikali khamoshi-e-yaar se

Tabish khurasheed meray jisam main hai Ae Munir 

Chasham shab-e-hairaan hai meray par to siyaar se

Ayi hai ab yaad kya raat ik beetay saal ki

Ayi hai ab yaad kya raat ik beetay saal ki 

Yeh hi hawa thi baagh main , yahi sada ghariyal ki 

Mehak ajab si ho gayi paray paray sandooq main 

Rangat pheeki par gayi resham kay rumaal ki 

Shaher main dar tha mout ka , chand ki chothi raat ko

Eenton kay is khu main dehshat thi bhon'chal ki 

Shaam jhuki thi behar par , pagal ho kar rang se

Ya tasveer khawab main , meray kis khayal ki 

Umar kay saath ajab sa ban jata hai aadmi 

Halat daikh kar dukh hua , aaj us pari jamal ki

Daikh kar mujh ko ghour se . phir woh chup se ho gaye 

Dil main khalish hai aaj tak , us un'kahay sawal ki 

Thakan se raah main chalna mohaal bhi hai mujhay

Thakan se raah main chalna mohaal bhi hai mujhay 

Kamal par bhi tha main hi , la'zawal bhi hai mujhay 

Sarrak pe chaltay huye ruk kay daikhta hoon main 

Yahin kahin hai to yeh ehtamal bhi hai mujhay 

Yeh meray gird tamasha hai aankh khulnay tak 

Main khawab main to hoon lakin khayal bhi hai mujhay 

Usi kay lutf se marnay se khouf aata hai 

Usi kay darnay se yeh jeena mohaal aata hai 

Sawad-e-sham safar hai jala jala sa Munir

Khushi kay sath ajab sa malaal bhi hai mujhay 

Shan-e-hunar , kalam-e-sukhan'war bhi kuch nahin

Shan-e-hunar , kalam-e-sukhan'war bhi kuch nahin 

Ajz faqeer-o-kabar to nagar bhi kuch nahin 

Buniyad kuch nahin hai kisi shay ki is jaga 

Is shaher main baha-e-sikandar bhi kuch nahin 

Rishta riwayaton se bhi baqi nahin raha 

Aainda kay safar kay ufaq par bhi kuch nahin 

Shaam firaq-e-yaar wohi , dasht-o-dar wohi 

Diya-e-gham kay paar ka manzir bhi kuch nahin 

La'hasali hi shaher ki taqdeer hai Munir

Bahir bhi ghar se kuch nahin , andar bhi kuch nahin

Sehar kay waqat yeh kya main ne khawab sa daikha

Sehar kay waqat yeh kya main ne khawab sa daikha

Safaid abar harray rang main ghirra daikha

Bas ik pal ka tamasha kinar-e-sehra par

Phir is kay baad ussay dasht main hawa daikha 

Qadeem qariyon main mojood tu khuda-e-qadeem

Jadeed shaheron main bhi tujh ko ro'numa daikha

Munir shaher-e-Mohammad main ja kay daikhein zara 

Bilad kufar main khud ko bhout ganwa daikha 

Dar'ray huwon ko magar Aitabar kis ka tha

Dar'ray huwon ko magar Aitabar kis ka tha 

Tamam umar hamein intizaar kis ka tha 

Urra ghubaar hawa se to rah khaali thi 

Woh kon shakhs tha us main ; ghubaar kis ka tha 

Liye phir jo mujhay dar'ba'dar zamanay main 

Khayal tujh ko dil-e-be'qaraar ! kis ka tha 

Rawash se hatt kay banay ik makan-e-no kay qareeb 

Woh khoon tha kis ka , woh phoolon ka haar kis ka tha 

Yeh jabar marg-e-musalsal hi zindagi hai Munir

Jahan main us pe kabhi ikhtayar kis ka tha

Aik main aur itnay lakhon silsalon kay samnay

Aik main aur itnay lakhon silsalon kay samnay 

Aik surat gang jaisay gumbadon kay samnay 

Mit'tay jatay naqsh dar-o-dam ki aamad-o-rafat se

Khiltay jatay be'sada lab aaino kay samnay 

Hai hawa-e-sair-o-aab aur ajnabi si sar'zameen 

Urr rahi hai khaak , kehna sahilon kay samnay 

Aag jalti hai gharon main koi tasveer hai 

Yaad'gaar jurm-e-aadam khakiyon kay samnay 

Dushmani rasm-e-jahan hai , dosti harf-e-ghalt

Aadmi tanha kharra hai zaalmon kay samnay

Char chup cheezein hain behar-o-bar falak aur kohsaar

Dil dehal jata hai in khaali jaghon kay samnay 

Batin-e-zar'daar par israar hai , jaisay Munir

Kaan-e-zar ki band haibat mishalon kay samnay 

Shaher , parbat , behar-o-bar ko chorta jata hoon main

Shaher , parbat , behar-o-bar ko chorta jata hoon main 

Ik tamasha ho raha hai daikhta jata hoon main 

Hosh urta jaa raha hai garmi-e-raftaar main 

Daikhta jata hoon main aur bhoolta jata hoon main 

Abar hai aflaak par aur ik sira seema-e-qamar

Aik dasht-e-raigaan main dorta jata hoon main 

Hoon makan main band , jaisay intihan main aadmi 

Sakhti dewar-o-dar hai jhailta jata hoon main 

Shouq hai jin kay peechay chal raha hoon main Munir

Ranj hain kuch meray , kheenchta jata hoon main 

Dar kay kisi se chuph jata hai jaisay saamp khazanay main

Dar kay kisi se chuph jata hai jaisay saamp khazanay main 

Zar kay zor se zinda hain , sab khaak kay is veeranay main 

Jaisay rasam ada karta hoon shaheron ki abadi main 

Subha ko ghar se door nikal kar sham ko wapis aanay main 

Neelay rang main doobay aankhein khuli parein thein sabzay par

Aks pari tha aasman ka shayed is paimanay main 

Dabi hui hai zer-e-zameen ik dehshat gang sadaon ki 

Bijli si kahin larzi hai kisi chuppay teh khanay ki 

Dil kuch aur bhi sard hua hai sham-e-shaher ki ronaq se 

Kitni zia be'sood gayi sheeshay kay lafz jalanay main 

Main to Munir aainay main khud daikh kar hairan hua 

Yeh chehra kuch aur tarah tha pehlay kisi zamanay main