Ishq koh-e-garaan hai lagta hai

Ishq koh-e-garaan hai lagta hai 

Yeh haqeeqat gumaan hai lagta hai 

Wasal lamhon main soch uggti hai 

Hijar bhi darmiyan hai lagta hai 

Mil gaye hum do chahnay walay 

Yeh koi daastan hai lagta hai 

Aisi taza nishaniyan hain teri 

Tu abhi tak yahan hai lagta hai 

Aag andar kahin pe sulgay to 

Chaar janib dhuwan hai lagta hai 

Tu jo bhooli nahin mujhay ab tak 

Koi mujh sa wahan hai lagta hai 

Aa gayi hai gharri bicharnay ki 

Aisa socha kahan hai lagta hai 

Jhil'milanay lagi hain jo aankhein 

Kuch to dil main nihaan hai lagta hai 

Sab se kehta hai haal is dil ka 

Mera chehra zuban hai lagta hai

Haath hathon main jab tumhara tha

Haath hathon main jab tumhara tha 

Khawab woh zindagi se pyara tha 

Main ne dekhay thay khawab main aansoo 

Yeh bhi shayed koi ishara tha 

Jo abhi aasman se toota hai 

Woh meray bakhat ka sitara tha 

Tum mujhay ghair hi samjh letay 

Mujh ko yeh bhi sitam gawara tha 

Ik qadam bhi barha nahin koi 

Main ne kis aas se pukara tha 

Dar raha tha jo bheer se "Atif"

Us ko tanhaiyon ne mara tha 

jan-e-jaan kuch kaho khamoshi ki zuban suntay suntay meray kaan thaknay lagay

Mohabbat ki aik nazam 

Jan-e-jaan kuch kaho 

Khamoshi ki zuban suntay suntay meray kaan thaknay lagay 

Jaanta hoon mohabbat main izhaar kab kho'kalay har-o-mahni ka mohtaaj hai 

Maanta hoon mohabbat woh ehsaas hai 

Jis main khamoshiyan baat karnay lagein 

Nit naye khawab aankhon main sajnay lagein 

Rooh sun'nanay lagay dharkano ki zuban 

Phir bhi ab jan-e-jaan 

Khamoshi ki zuban suntay suntay meray kaan thaknay lagay 

Kuch kaho 

Shar'mageen muskurahat main lipti hui hijar ki daastan 

Was'wason main ghirra , aanso'on se likha dharkano ka biyaan 

Apnay jazbon ko lafzon ki poshaak do 

Toota phoota sahi , uljha uljha sahi 

Koi izhaar do 

Kiyon keh ab jan-e-jaan 

Khamoshi ki zuban suntay suntay meray kaan thaknay lagay 

Bicharnay aur judai main zara sa farq hota hai

Bicharnay aur judai main zara sa farq hota hai 

Juda ho kar kisi se phir kabhi koi nahin milta 

Bichar jayein to milnay ka imkaan rehta hai 

Juda ho kar kisi ki yaad dil main reh nahin sakti 

Bichar jayein to dil main to ik diya jalta hi rehta hai 

Jida ho kar kisi ka pyar dil main reh nahin sakta 

Bichar jayein to dil main bas usi ka pyar rehta hai 

To phir ae hum'sukhan meray , tu mera faisala sun lay 

Mujhay tum se bicharna hai , juda tum se nahin hona

Woh shakhs mujh ko jeet kay haara hai aur bas

Woh shakhs mujh ko jeet kay haara hai aur bas

Itna hi zindagi ka khasara hai aur bas

Kaisay kahon keh us ka irada badal gaya 

Sach to yahi hai us ne pukara hai aur bas

Duniya ko is main dard ki shiddat kahan milay 

Aankhon se toot'ta hua tara hai aur bas

Lafzon main dard-e-hijar ko mehsoos kar kay dekh  

Kehnay ko main ne waqat guzara hai aur bas

Ab un main koi khawab sajanay nahin mujhay 

Aankhon ko intizaar tumhara hai aur bas

Main ne kaha keh khawab main dekhi hain baarishein 

Us ne kaha keh aik ishara hai aur bas

Meray humdam , meray sathi tumhein to yaad hi ho ga

Tumhein kiyon itni jaldi thi ?

Meray humdam , meray sathi 

Tumhein to yaad hi ho ga 

Woh din kya khaas tha jab tum meray jeewan main aayi thein

Meri be'rang duniya ko tumhari muskurahat ne hazaron rang bakshay thay 

Ussay kaisay sajaya tha tumhein to yaad hi ho ga 

Tumhein main ne bataya tha 

Keh main khawabon main rehta hoon 

magar tum ik haqeeqat ho 

Mohabbat hi mohabbat ho 

Phir us kay baad jeewan kay sabhi mousam , sabhi manzir tumhari aankh se dekhay 

Tumharay saath jo guzray wohi apl zindagi thehray 

Tumhein to yaad hi ho ga , mujhay kab yaad rehta tha 

Mujhay kya kaam karnay hain 

Mujhay kis kis se milna hai 

Kahan jana zaroori hai 

Khafa koi hai kiyon mujh se

Kissay jaa kar mana'na hai 

Mujhay kab yaad rehta tha 

Mera ma'mool to tum thein 

Tumhi sab yaad rakhti thein 

Main apnay dil ki sab baatein faqat tum se hi karta tha 

Tumhari bhi yeh aadat thi 

Tumhein to yaad hi ho ga main aksar tum se kehta tha 

Abhi is zindagi kay saath kitnay rog liptay hai 

Mujhay tum se mohabbat ki zara fursat nahin milti 

Zara woh waqat aanay do , zara fursat milay mujh ko 

Bitha kar samnay tum ko tumhein jee bhar kay dekhon ga 

Bataon ga mujhay tum se mohabbat si mohabbat hai

Mujhay is dam mili fursat 

Keh jab yeh baat sun'nanay ko nahin tum samnay meray 

Meri jaan tum wahan par ho jahan se loat kar wapis kabhi koi nahin aata 

Tumhein kiyon itni jaldi thi ?

Mera iqraar sun leti , mera izhaar sun leti 

Keh ab fursat hi fursat hai 

Keh ab ma'mool main meray faqat tum se mohabbat hai 

Magar yeh bhi haqeeqat hai 

Keh main ta'kheer se poncha , tumhein janay ki jaldi thj

 

Badal gayi hai zindagi ab , sabhi nazaray badal agye hain

Badal gayi hai zindagi ab , sabhi nazaray badal agye hain 

Kahin pe mojein badal gayi hain , kahin kinaray badal gaye hain 

Badal gaya hai ab us ka lehja , ab us ki aankhein badal gayi hain 

Woh chand chehra hai ab bhi waisa , meray sitaray badal gaye hain  

Mila hoon tum se to youn laga hai keh jaisay dono hi ajnabi hain 

Kabhi jo mujh ko aziz-e-jaan thay , woh tor saray badal gaye hain 

Kahin pe badla hai kehnay wala , kahin pe sun'nanay wala badal gaya hai 

Kahin pe aankhein badal gayi hain , kahin nazaray badal gaye hain 

Is liye bhi main sar jhuka kar , tumhari nagri se chal para hoon 

Tha naaz jin par kabhi mujhay bhi , woh sab saharay badal gaye hain

Mujhay ik nazam likhni hai kahin se lafz mil jayein

Mujhay ik nazam likhni hai

Mujhay ik nazam likhni hai
Kahin se lafz mil jayein
Main be'bas hoon
Koi tashbeeh na koi ista'ara theek lagta hai
Kahan se lafz woh laon jo dil ka haal keh payein
Mujhay kitni mohabbat hai
Mujhay kitni aqeedat hai
Mujhay kitni zaroorat hai
Main bat'laa doon inhein sab kuch kahin se lafz mil jayein
Mujhay maan ki dua se jo hawa-e-khald aati hai
Issay main kaisay likhon ga ?
Meray abu ki shafqat jo mujhay jeena sikhati hai
Ussay main kaisay likhon ga ?
Main be'bas hoon
Kahan se lafz woh laaon jo dil ka haal keh payein
Main aisay lafz dhoondon ga
Jinhein likhon to kaghaz par diye se jag'maga uthein
Jinhein sochon to zehan-o-dil ka her gosha mehak jaye
Jinhein honton pe laaon to dua kay phool khil jayein
Kahin se lafz mil jayein
Dhanak orhay huye kuch lafz mujh ko dhoondnay hon gay
Keh jin se nazam likhni hai
Unhein sab kuch batana hai
Mujhay kitni mohabbat hai
Mujhay kitni aqeedat hai
Mujhay kitni zaroorat hai

Phir wohi sa dard jaga hai ragon main meri

Aaj phir shaam dhalay

Phir wohi sa dard jaga hai ragon main meri
Phir wohi aah si nikli hai meray seenay se
Phir wohi khawab se tootay hain meri aankhon main
Phir wohi dard ki talkhi hai meri baaton main
Phir wohi ashk se thehray hain meri palkon apr
Phir wohi raat si jeewan main utar aayi hai
Phir wohi aakhri manzir hai meri aankhon main
Aaj phir shaam dhalay tum mujhay yaad aayi ho

Khawab sajanay wali aankhein pal bhar main banjar ho jayein

Aisa bhi ho sakta hai

Khawab sajanay wali aankhein
Pal bhar main banjar ho jayein
Rasta taktay taktay thak kar
Umeedein pathar ho jayein
Lab pe ugg aye khamoshi
Aur seenay main hashar barpa ho
Lafzon ki mala ka dhaga
Beech se jaisay toot gaya ho
Bhooli bisri sari batein
Main bhi shayed yaad bana loon
Bhool kay apnay dukhray saray
Honton pe muskan saja loon
Tum dhoondo phir mujh main mujh ko
Aur main khud main gum ho jaon
Aisa bhi to ho sakta hai
AMin bhi ik din tum ho jaon

Mera wada yeh hai tum se

Mera wada yeh hai tum se

Tumhein itna main chahon ga 

Keh duniya main kahin par bhi 

Mohabbat kay hawalay se

Kabhi jo baat niklay gi 

Hamara naam aaye ga

Mujhay khud se mukarna par gaya hai

Mujhay khud se mukarna par gaya hai 

Teray sanchay main dhalna par gaya hai 

Yeh aankhein is liye khoon rang hui hain 

Mujhay aansoo nigalna par gaya hai 

Ussay bhi chahiye mera sahara 

Usi khatir sambhalna par gaya hai 

Tumharay saath chalnay ki talab main 

Yeh kin raaston pe chalna par gaya hai 

Tumhein tabdeel karna chahata tha 

Magar khud ko badalna par gaya hai

Kal raat janay kya hua kuch dair pehlay neend se

Kuch dair pehlay neend se

Kal raat janay kya hua 

Kuch dair pehlay neend se

Kuch ashk milnay aa gaye 

Kuch khawab bhi tootay huye

Kuch log bhi bhoolay huye 

Kuch raasta bhatki hawaein 

Kuch gard main lipti hawaein 

Kuch be'tarah phaili hawaein 

Kuch khol main simti hawaein 

Be'rabt si sochein kai 

Bhuli hui baatein kai 

Ik shakhs ki yaadein kai 

Phir dair tak jaga raha 

Sochon main gum baitha raha 

Ungli se thanday farash par 

Ik naam bas likhta raha 

Kal raat bhi woh raat thi 

Kuch dair pehlay neend se

Main dair tak rota raha 

 

Teri aankhon si aankhein aaj ik chehray pe dekhi hain

Teri aankhon si aankhein 

Aaj ik chehray pe dekhi hain 

Wohi rangat , banawat 

Aur waisi be'rukhi un main 

Bichartay waqat jo main ne

Teri aankhon main dekhi thi 

Teri aankhon si aankhon ne 

Mujhay ik pal ko dekha tha 

Woh pal ik aam sa pal tha 

Magar is aam se pal main 

Puranay kitnay mousam , kitnay manzir main ne dekhay thay 

Meri jaan ! main samajhta tha

Teri aankhon si aankhein jab 

Meri aankhon ko dekhein gi 

To ik lamhay ko sochein gi 

Keh in aankhon ko pehlay bhi 

Kisi chehray pe dekha hai 

Magar un jheel aankhon main 

Shana'saai nahin jaagi