Ab yeh baat mani hai

Ab yeh baat mani hai 

Wasal rai'gaani hai 

Us ki dard aankhon main 

Hijar ki kahani hai 

Jeet jis kisi ki ho 

Hum ne haar maani hai 

Churiyan bikharnay ki 

Rasam yeh purani hai 

Umar kay jazeeray par 

Gham ki hukam'rani hai 

Mil gaya to wehshat ki 

Daastan sunaani hai 

Hijraton kay sehraa ki 

Dil ne khaak chaani hai 

Munfarid sa koi pay'raya-e-fun chahti hai

Munfarid sa koi pay'raya-e-fun chahti hai

Zindagi ik naya tarz-e-sukhan chahti hai 

Rooh ki be'sar-o-samani se baahir aa kar 

Shairy apnay liye aik badan chahti hai 

Her taraf kitnay hi phoolon ki baharein hain yahan 

Par tabiyat wohi khushbu-e-watan chahati hai 

Saans lenay ko bas ik taza hawa ka jhonka 

Zindagi se woh kahan sar-o-saman chahti hai 

Door jaa kar dar-o-dewaar ki ronaq se kahin 

Aik khamosh sa ujjra hua ban chahti hai 

Kon bhanwar main malahon se ab takraar karay ga

Kon bhanwar main malahon se ab takraar karay ga 

Ab to qismat se hi koi dariya paar karay ga 

Sara shaher hi tareeki par youn khamosh raha to

Kon chragh jalanay kay paida Aa'saar karay ga 

Jab us ka kirdaar tumharay sach ki zad main aaya 

Likhnay wala shaher ki kaali , her dewaar karay ga 

Janay kon si dhun main teray shaher main aa niklay hain 

Dil tujh se milnay ki khawaish ab so baar karay ga 

Dil main tera qayaam tha lakin ab yeh kissay khabar thi 

Dukh bhi apnay  honay par itna israar karay ga 

Pooch lo phool se kya karti hai

Pooch lo phool se kya karti hai 

Kabhi khushbu bhi wafa karti hai 

Khaima-e-dil kay muqadar ka yahan 

Faisala tez hawa karti hai 

Be'rukhi teri , inayat teri 

Zakham deti hai dawa karti hai 

Teri aahat meri tanhai ka 

Raasta rok liya karti hai 

Roshni tera hawala thehray 

Meri her saans dua karti hai 

Meri tanhai se khamoshi teri 

Shair kehti hai , suna karti hai 

Yeh meri umar meray maah-o-saal de us ko

Yeh meri umar meray maah-o-saal de us ko 

Meray Khuda meray dukh se nikaal de us ko 

Woh chup kharra hai kai din se teri khaatir to

Kawaar khol de Izn-e-sawal de us ko 

Azaab-e-bad'nazri ka jissay sha'oor na ho 

Yeh meri aankhein , meray khad-o-khaal de us ko 

Yeh daikhna shab-e-hijran keh kis ki dastak hai

Wisaal-e-rutt hai agar woh to taal de us ko 

Woh jis ka harf-e-dua roshni hai meray liye

Main bujh bhi jaon to Mola ujaal de us ko 

Khawaish kay izhaar se darna seekh liya hai

Khawaish kay izhaar se darna seekh liya hai 

Dil ne kiyon samjhota karna seekh liya hai 

Band hoti kitabon main urrti hui titliyan daal dein

Band hoti kitabon main urrti hui titliyan daal dein 

Kis ne rasmon ki jalti hui aag main larkiyan daal dein 

Khouf kaisa hai yeh naam us ka kahin zer-lab bhi nahin 

Jis kay haathon main meray harray kaanch ki churiyan daal dein 

Hont piyasay rahay , hoslay thak gaye , umar sehraa hui 

Hum ne pani kay dhokay main phir rait par kashtiyan daal dein 

Mousam-e-hijar ki kaisi saa'at hai yeh dil bhi hairaan hai 

Meray kaano main kis ne teri yaad ki baaliyan daal dein 

Kon Rok sakta hai

Kon Rok sakta hai 

Laakh zabt-e-khawaish kay 

be'shumaar da'way hon 

Us ko bhool janay kay 

Be'panah iraday hon 

Aur us mohabbat ko tark kar kay jeenay ka 

Faisala suna'nay ko 

Kitnay lafz sochay hon 

Dil ko us ki aahat par 

Bar'mala dharaknay se kon rok sakta hai 

Phir wafa kay sehraa main 

Us kay narm lehjay aur sogwaar aankhon ki 

Khushbu'on ko choonay ki

Justagoo main rehnay se 

Rooh tak pighalnay se 

Nangay paon chalnay se

Kon rok sakta hai 

Aansu'on ki baarish main 

Chah'ye dil kay haathon main 

Hijar kay musafir kay 

Paon tak bhi chu aayo

Jis ko loat jana ho 

Us ko door janay se 

Raasta badalnay se 

Door jaa nikalnay se 

Kon rok sakta hai 

Hijar ki shab main qaid karay ya subh-e-wisaal main rakhay

Hijar ki shab main qaid karay ya subh-e-wisaal main rakhay 

Acha Mola ! teri marzi tu jis haal main rakhay 

Khel yeh kaisa khel rahi hai dil se teri mohabbat 

Ik pal ki sar'shaari de aur dino malaal main rakhay 

Main ne sari khushbu'ein aanchal se baandh kay rakhein 

Shayed un ka zakir tu apnay kisi sawal main rakhay 

Kisi se teray aanay ki sar'goshi ko suntay hi 

Main ne kitnay phool chunay aur apni shaal main rakhay 

Mushkil ban kay toot pari hai dil pe yeh tanhai 

Ab janay yeh kab tak us ko apnay jaal main rakhay 

Kuch bhi kar guzarnay main dair kitni lagti hai

Kuch bhi kar guzarnay main dair kitni lagti hai 

Baraf kay pighalnay main dair kitni lagti hai 

Us ne hans kay daikha to muskura diye hum bhi 

Zaat se nikalnay main dair kitni lagti hai 

Hijar ki tamazat se wasal kay alaao tak 

Larkiyon kay jalnay main dair kitni lagti hai 

Baat jaisi be'mahni baat aur kya ho gi 

Baat se mukarnay main dair kitni lagti hai 

Zoham kitna kartay ho ik chragh par apnay 

Aur hawa kay chalnay main dair kitni lagti hai 

Jab yaqeen ki baanhon par shak kay paon par jayein 

Churiyann bikharnay main dair kitni lagti hai 

Dushman-e-jaan kai qabeelay huye

Dushman-e-jaan kai qabeelay huye 

Phir bhi khushbu kay haath peelay huye 

Bad'gumani kay sard mousam main 

Meri guriya kay haath neelay huye 

Jab zameen ki zubaan chat'taknay lagi 

Tab kahin baarishon kay heelay huye 

Waqat ne khaak woh uraai hai 

Shaher Aabaad thay jo teelay huye 

Jab prindon ki saans ruknay lagi 

Tab hawa'on kay kuch waseelay huye 

Koi baarish thi bad'gumani ki 

Saray kaghaz hi dil kay geelay huye 

Aik Pash-e-maan si hasrat se mujhay sochta hai

Aik Pash-e-maan si hasrat se mujhay sochta hai 

Ab wohi shaher mohabbat se mujhay sochta hai 

Main to mehdood se lamhon main mili thi us se 

Phir bhi woh kitni wazahat se mujhay sochta hai 

Jis ne socha hi na tha hijar ka mumkin hona 

Dukh main doobi hui hairat se mujhay sochta hai 

Main to mar jaon agar sochnay lag jaon ussay 

Aur woh kitni sahoolat se mujhay sochta hai 

Garcha ab tark-e-marasam ko bhout dair hui 

Ab bhi woh meri ijzat se mujhay sochta hai 

Kitna khush feham hai woh shakhs keh her mousam main 

Ik naye rukh nayi surat se mujhay sochta hai 

Ba'Ehtiyaat-e-aqeedat ba'chasham-e-tar kehna

Ba'Ehtiyaat-e-aqeedat ba'chasham-e-tar kehna 

Saba Hazoor (s.a.w) se haal-e-dil-o-nazar kehna 

Hisaar-e-jabar main hoon aur yahan se bhi hijrat 

Main jaanti hoon keh mumkin nahin magar , kehna 

Main Khaak-e-shaher-e-Madeena pehan kay jab niklon 

To mujh se barh kay koi ho ga Mohtabar kehna 

Yeh arz karna keh Aaqa meri bhi sun leejiye 
Ba'juz tumharay nahin koi chara gar kehna 

Main apni palkon se likhti hoon Harf-e-Naam-e-Rasool(s.a.w)
Mujhay bhi aa gaya likhnay ka ab hunar kehna 

Yeh kehna ab to hamein taab-e-intizaar nahin 
Keh hum karein gay Madeenay ka kab safar kehna 

Zamanay walon se chup kay ronay kay din nahin hain

Zamanay walon se chup kay ronay kay din nahin hain 

Ussay yeh kehna udaas honay kay din nahin hain 

Main jaan sakti hoon wasal main asal bhaid kya hai 

Magar haqeeqat shanaas honay kay din nahin hain