Chandi ka yeh taar meray siyah baalon main

Chandi ka yeh taar 

Meray siyah baalon main 

Gharri gharri bijli ki tarah chamakta hai 

Sotay jaagtay main is lishkaray ki zad main rehti hoon !

Aik lamha ti jaisay dil hi tehar gaya tha !

Aaina 

Umar main pehli dafa 

Sach bolta nahin laga tha 

Shak ka faida beenai ko diya tha main ne

Lakin kitnay arsay ?

(Faisala kitna talta)

Kitnay aainay chup rehtay 

Aur kitni aankhin mera dil rakh saktein thein 

Jaan gayi hoon 

Waqat 

Meri bar'nai par 

Pehla shab-e-khoon daal chuka hai 

Kaisy kaisay chehray nazar main ghoom rahya hain 

Fart-e-mohabbat se gul'naar

Josh-e-aqeedat se sar'shaar 

Mujh ko dekhnay , mujh ko choonay , mujh ko panay ki hasray main 

Koocha-ba-koocha khwaar 

Sar-ta-pa-dildaar 

Aaj hama tan chasham woh log 

Mujh ko kaisay dekhain gay 

Dekh sakain gay?

Maalik ! Ambwah-e-talab main

Kiya koi aisi aankh bhi ho gi 

Jis ki chamak 

Bujh janay kay bajaye 

Chaandi kay is taar ko choo kar 

Sonay jaisi ho jaye ?

Parveen Shakir 

Gulab jaisi woh narm-o-nazuk haseen larki

" Aik nazam jaisi larki kay naam "

Gulab jaisi woh narm-o-nazuk  haseen larki 

Hamaray sapno main roz aaye 

Sunehray jazbon kay 

Sainkaron woh diye jalaye

Hamaray khawabon ki her disha par

Woh apni zulfon ki bheeni khushbu bakhair jaye 

Woh tapti sochon kay thar pe

Sawan kay badalon si barasti jaye 

Magar kabhi samnay na aaye 

Woh narm-o-nazuk gulab jaisi haseen larki 

Hamaray jazbon 

Ki tishnagi ko barhati jaye 

Usi ki chahat 

Usi ki khawaish 

Hamari hasti mita'ti jaye

Aik hai aisi larki jis se tum ne hans kar baat na ki

" Us ka dil to acha dil tha "

Aik hai aisi larki jis se tum ne hans kar baat na ki 

Kabhi na dekha us ki aankhon main kaisay moti 

Kabhi na socha , tum se aisi batein woh kiyon kehti hai 

Kabhi na samjha , miltay ho to ghabrai kiyon rehti hai 

Kiyon us kay rukhsar ki rangat sarson jaisi zard hui 

Tum se milnay se pehlay woh aisi tanha kabhi na thi 

Mil kar aankh bahanay se , woh kab tak aansu rokay gi 

Us kay honton ki larzish bhi tum ne kabhi nahin dekhi 

Kiyon aisi sun'saan sarak par ussay akela chor diya 

Us ka dil to acha dil tha jis ko tum ne tor diya 

Woh kuch na'dam woh kuch hairan , rasta dhoonda karti thi 

Dhalti dhoop main apna be'kal saya dekh kay hansti thi 

Aksar suraj doob gaya aur raah main us ko shaam hui

Apni mohabaton ki khudai na diya kar

Apni mohabaton ki khudai na diya kar 

Her be'talab kay haath kamai diya na kar 

Deti hai jab zara si bhi aahat aziyatein 

Aisi khamoshiyon main sunai diya na kar 

Pehlay hi haadsat kay imkaan kam nahin 

Youn mujh ko raaston main sujhai diya na kar

Nazrein to pathron ko bhi kar jayein chaak chaak 

Saj dhaj kay bastiyon main dikhai diya na kar 

In mousamon main panchi palat'tay nahin sada 

Dil ko udasiyon main rihaai diya na kar 

Aata nahin badalna jo andaz-e-dushmani 

Chehray badal badal kay dikhai diya na kar 

Farhat koi to farq ho aam aur khaas main 

Her aik aashna ko risai diya na kar 

 

Bura kehti hai yeh duniya mujhay bhi

Bura kehti hai yeh duniya mujhay bhi 

Mohabbat hai teri tarah mujhay bhi 

Mujhay bhi dukh hai apni aagahi ka 

Zamanay ne nahin samjha mujhay bhi 

Jo haq par datt gaya to yaad aaya 

Husain Ibn-e-Ali (r.a) kitna mujhay bhi 

Bichar jana zaroori tha wagarna 

Bicharnay ka bhout dukh tha mujhay bhi 

Bhala main sach ko kaisay sach kahon ga 

Usi duniya main hai rehna mujhay bhi 

Jo sari umar na ik pal raha chup

Jo sari umar na ik pal raha chup 

Ussay aksar yahan dekha gaya chup 

Ajab hai sabar ka yeh sil'sala bhi 

Yahan main hoon wahan mera Khuda chup 

Tumhara naam hi laya zuban par 

Kisi ne cheekh kar mujh se kaha chup 

Yeh tum her baat jo sach boltay ho 

Suna di jaye gi ik din saza chup 

Yeh kaisa shor hai baahir gali main 

Na janay kiyon nahin hoti hawa chup 

Yeh kaisa mustaqil chup ka safar hai 

Musafir chup , fiza chup , raasta chup

Chand ne badal orh liya

Chand ne badal orh liya 

Ik shab taron kay jhurmat main 

Chand utar kar chatt par aaya 

Holay se phir mujh se bola 

Hairan hairan si aankhon se 

Ayo mujh ko barh kar chu lo 

Main ghabrai ......kuch sharmai 

Aur youn boli 

Aisa kiyon kar ho sakta hai 

Us ka jab israar barha to 

Main ne chaha

Aagay barh kar us ko chu loon 

Lakin tab tak 

Chand ne badal orh liya tha 

Laakh kaata hai teri yaad ko jarr se main ne

Laakh kaata hai teri yaad ko jarr se main ne 

Kya karon , phir yeh shajar mujh main nikal aata hai ?

Jab bhi socha hai mohabbat nahin karni , ab kay 

Phir mohabbat ka asar mujh main nikal aata hai 

Chaltay chaltay jo thakawat se main sastanay lagon 

Apni janib ka safar mujh main nikal aata hai

Shaam partay hi udasi ka yeh mousam Yawar 

Laakh rokon main magar mujh main nikal aata hai 

 

Tera sheerein lab-o-lehja , main kaisay bhool sakta hoon

Tera sheerein lab-o-lehja , main kaisay bhool sakta hoon 

Aur us pe chand sa chehra , main kaisay bhool sakta hoon 

Woh jis dam kho gaya tha main teri chahat kay melay main 

Bata mujh ko keh woh lamha , main kaisay bhool sakta hoon 

Woh jis main ki biyaan tum ne haqeeqat , zindgani ki 

Tera sada sa woh jumla , main kaisay bhool sakta hoon 

Kisi kay hijar main barson jahan ki khaak chaani hai 

Bhala us dasht ka rasta , main kaisay bhool sakta hoon 

Kisi talwar ki tarah woh jis ne dil ko cheera tha 

Woh teri aankh ka kajla  , main kaisay bhool sakta hoon 

Woh jo sairaab karta tha meray ehsaas ko Yawar 

Mohabbat ka woh sar'chashma , main kaisay bhool sakta hoon

Aaya hi tha nazar keh nazara mita diya

Aaya hi tha nazar keh nazara mita diya

Toofan ne ik pal main kinara mita diya

Aaye jo lehraa kay tujhay lay na jaye saath

Saahil pe likh kay naam tumhara mita diya

Main ne kaha keh naam hatheli pe hai abhi

Woh hans kay dard se hi pukara , mita diya

Nadi main aks chand ka aur us ka aks bhi

Yeh to hawa ne chal kay  nazara mita diya

Poocha keh zindagi ki haqeeqat hai kis qadar

Naqsh-e-qadam zameen pe ubhara mita diya

Ik zard si lakeer kheenchi aasman par

Qismat ne janay kis ka sitara mita diya

Woh jis ko zoham tha keh hamesha rahoon ga main

Kutba bhi us ka waqat ne sara mita diya

Khaaka wafa ka us ne banaya to tha magar

Jitna sanwar saka tha sanwara , mita diya

Main us ka husan dekh kay zinda raha Adeem

Us ne to sab ko jaan se maara , mita diya

Kitna haseen phir se nazara bana diya

Kitna haseen phir se nazara bana diya 

Jaisay Khuda ne us ko dobara bana diya 

Aya tha imtihaan main mazmoon husan par 

Parchay main sab ne chehra tumhara bana diya 

Kashti ko aasra koi thora sa to rahay 

Rangon se baad'baan pe kinara bana diya 

Yousaf kay husan ki zara tanees pooch li 

Kaghaz pe sab ne chehra tumhara bana diya 

Ehsaan lay saka na khud apna bhi main Adeem 

Khud ko bhi doosron ka sahara bana diya

Main soch raha hoon keh main hoon bhi keh nahin hoon

Main soch raha hoon keh main hoon bhi keh nahin hoon 

Tum zid pe arri ho keh kisi ka nahin ban'nana

Is zehar ko kiyon rag-o-pay main utaron 

Jis zehar ki taseer ko nasha nahin ban'nana

Is waqat to woh khud bhi manajaat main gum hai 

Is waqat to us ko bhi dilaasa nahin ban'nana 

Main raat ki eentein to bhout jor raha hoon 

Par mujh se teray din ka dareecha nahin ban'nana 

Is dard ki tehveel main rehtay huye hum ko 

Chup chaap bikharna hai tamasha nahin ban'nana 

Us ne mujhay rakhna hi nahin aankhon main Aamir 

Aur mujh se koi aur thikana nahin ban'nana 

Samjhotay kay patwaar sambhalo keh "Sohail" ab 

Us ko teray dariyaon ka kaasa nahin ban'nana

Poet : Aamir Sohail