Jitnay zakham bhi thay dil ki zameen par sajay
Aayi jab bahar ti sab gulaab ho gaye
May 29, 2014
Teri ik nigha pyaar ki
Teri ik nigah pyaar ki
Tera lams woh pyaar bhara
Mujhay kis jahaan main lay gaya
Main bikhar gaye hawa kay sang
Youn nikhar gaye pyaar kay rang
Meri saans saans mehak gayi
Baar ha raahon main , main behak gayi
Main jaan gayi , main maan gayi keh ab talak
Mujhay teri deed ki pyaas thi
Mujhay teray milan ki aas thi
Faqat ik nigah pyaar ki
Mujhay kainaat baksh gayi
Ab kay youn takmeel husan-e-meh'khana hui hai
Ab kay youn takmeel husan-e-meh'khana hui hai
Us zulf-e-ambreen ki ik boond nazrana hui hai
Rubab-e-hasti , abar-e-junoon mehka hai
Gosha-e-mushk-e-fasoon mehka hai
Saman-e-hazrat-e-hijar hua hai
Rindan-e-guzishta ka kahin khoon mehka hai
Khaak-e-ru'ami lab zara si tar hi to hui hai
Dil ki wadi main lahu kiyon mehka hai
pata pata teri umeed ka neh'laya gaya hai
Ku-ba-ku teri yaadon ka sakoon mehka hai
Chatt kay bada jo zara, su'ey shaher utra hai
daali daali pe naya deeda'war utra hai
Be'rang-o-be'kaif-o-be'dar utra hai
Shokhi naqsh-e-tehreer youn numayan hai
Jaisay falak se zameen ka sukhan'war utra hai
Dasht walay issay mousam ki khabar kehtay hain
Ya keh baarish kai ehal-e-fikar kehtay hain
Haan magar
Teri furqat main kisi raat jo hum roye hain
IS barasnay ko hum
Us barasnay ka asar kehtay hain
Khuda ka bhi imtihaan laney ki zid ajab thi
Khuda ka bhi imtihaan laney ki zid ajab thi
bichar ke us se dua ke lehjay ki zid ajab thi
hawa'ye shafaqat churi bhi walid se cheen lati
pe sabaz mousam ke aik baitay ki zid ajab thi
khilona aisa jo ghar ke boorhon ke kaam aye
nayi nazar ke ghreeb bachay ki zid ajab thi
youn koi shayed mizaaj hi pooch le hamara
musaraton main udaas rehnay ki zid ajab thi
main jis ki khatar nimaaz parhta raha hamesha
ussay duaon main bhool janey ki zid ajab thi
bas ik lamhay ki mout achi bhali thi aazr
magar tujhy qist qist marney ki zid ajab thi
Mujhay koi rang dia hota
Mujhay koi rang dia hota
Kitna be'bas kar detay ho
mujhay koi rang diya hota
main in ki be'rang aankhon main bharta
mujhay koi chahera dia hota
main in be'chaheron ko sonp deta
mujhay marham dia hota
main in ke zakhmon par lagata na thakta
mujhay maseehei di hoti
main apnay aap ko waqaf kar deta
mujhay beenaei di hoti
main shaher bhar main taqseem kar ata
mujhay hosla dia hota
main tasali denay ke qabal to hota
mujhay mohabbat di hai
aur...
aur kamzor kar dia hai
Kis ko khabar thi
Kis ko khabar thi
kis ko gumaan tha ik nuqtay ki aagosh itni kashada ho gi
jis main ant siray tak rang bhari pehnaei
ghul mil ke reh jaye gi
kis ko khabar thi anjanay pan ki gard libada ho gi
jis ke sadiyon ki sar basta da'naei
apni chup dikhlaye gi
kis ko yaqeen tha door ke lams ki taseer itni
ziada ho gi
jis se sangeen paikar main jamad-e-ra'naei
rooh ki nidrat paye gi
aisi anhoni bataon main sach ki kirnain taank chuki hoon
main in jagti aankhon ke ghambeer talisam main
jhaankh chuki hoon
Hamaray darmiyaan aisa koi rishta nahin tha
Hamaray darmiyaan aisa koi rishta nahin tha
Hamaray darmiyaan aisa koi rishta nahin tha
teray shano pe koi chup nahin thi
meray zimay koi aangan nahin tha
koi wada teri zanjeer pa ban'nanay nahin paya
kisi iqrar ne meri kalaei ko nahin thama
hawa ne dasht ki manindtu azad tha
rastay teri marzi ke tabeh tahy
mujhay bhi apni tanhai par dekha jaye to
poora tasaraf tha magar janb aaj tu ne
rasta badla to kuch aisa laga mujh ko
keh jaisay tu ne mujh se be'wafaei ki
Maqrooz ke bigray huye halaat ki manind
Maqrooz ke bigray huye halaat ki manind
majboor ke honthon pe sawalaat ki manind
dil ka teri chahat main ajab haal hua hai
sailaab se bar'baad makanaat ki manind
main in main bhatkay huye jugno ki tarah hoon
is shaks ki aankhain hain kisi raat ki manind
dil roz sajata hoon main dulhan ki tarah
gham roz chalay atay hain baraat ki manind
ab yeh bhi nahin yaad kiya naam tha us ka
jis shaks ko manga tha manajaat ki manind
kis darja muqada hai teray qarb ki khwaish
masoon se bachay ke khayalaat ki manind
us shaks se milna mera mumkin hi nahin
main pyaas ka sehra woh barsaat ki manind
Zindagi tum ko milay
Zindagi tum ko milay
Suno..
gar...
zindagi tum ko milay
to us se keh dena
keh hum ne us ko thukra kar
faqat sanson ko jhaila hai
kabhi hum jee nahin paye
saza-e-umar kaati hai
riha bhi ho nahin paye
Ba'zahir kitna asaan hai
Ba'zahir kitna asaan hai
kisi se baat kar lena
kisi ki baat sun lena
inhi baton ke daghon se
rida ke khwaab bun lena
magar tujh ko khabar hai kiya
keh is kaar-e-khraabi main
mohabbat ka qasoor kiya hai
bhout si qeemti cheezain
yahan par toot jati hain
hamari khwaishain hum par
pas-e-lab muskurati hain
hamara khoon jalta hai
hamara dam nikalta hai
hamara dil mach'chalta hai
her ik sha ke hotay bhi
her ik manzar badal'ta hai
kisi se baat mat karna
kisi ki baat mat sun'nana
kisi ki baat mat sun'nana
Teri ik nigha pyaar ki
Teri ik nigha pyaar ki
tera lams woh pyaar bhara
mujhay kis jahan main le gaya
main bikhar gayi hawa ke sang
youn nikhar gaye piyaar ke rang
meri saans saans mehak gayi
baar ha rahon main , main behak gayi
main jaan gayi , main maan gayi keh ab talak
mujhay teri deed ki piyaas thi
mujhay teray milan ki aas thi
faqat ik nigha piyar ki
mujhay kainaat baksh gayi
Hamsafar koi bhi nahin ab to
Hamsafar koi bhi nahin ab to
chara gar koi bhi nahin ab to
yaar kitnay thay achay waqton main
haan ! magar koi bhi nahin ab to
main ne dil ko teray hawale kiya
mujh ko dar koi bhi nahin ab to
shaher main tera chahney wala
tha magar , koi bhi nahin ab to
dil ki sab narmiyaan tamaam huein
chasham-e-tar koi bhi nahin ab to
Ik mud'dat baad aaj aik dost purana mila
Ik mud'dat baad
Ik mud'dat baad
aaj aik dost purana mila
poochnay laga , kaho kaisay ho ?
Zindagi..
us ke bichar ney ke baad kaisi guzarti hai
main ne kaha
zindagi ka kiy apoochtay ho dost ?
woh to is ke sath hi guzar gayi
ab to bas
us ki kuch yadain bikhri pari hain
inhain chun raha hoon...
yeh jo do chaar sansain baqi hain
yeh gin raha hoon ...!
Hum itney anmol na thay
Hum itney anmol na thay
Aankhon main jo tehreer thein
honthon par woh bol na thay
hum thay teray piyaar ke aashiq
bas hathon main kash'kol na thay
hum ne is ko toot ke chaha
yeh us ka haq tha lakin
woh bhi hum ko toot ke chahay
hum itney anmol na thay
Main ne kabhi hathon par mehndi nahin lagai
Aaitbaar
Main ne kabhi hathon par
mehndi nahin lagai
aur na hi dil main kisi mard ki
mohabbat bas'saei
mujhay hath aur dil
dono saaf achay lagtay hain
aur youn bhi
mehandi ke rang
aur mard ki mohabbat ka
kiya aitbaar
Woh mujh se poochti hai , main us se poochta hoon
Mohabbat chup nahin rehti
Woh mujh se poochti hai , be saro samaan kab se ho
main us se poochta hoon , is qadar nadaan kab se ho
woh mujh se poochti hai , kon la'waris hai maqtil main
main kehta hoon , wohi jo qatal karnay kay liye aye hain
woh mijh se poochti hai , shaher ki halat ka kiya ho ga
main kehta hoon , koi din main bla'ein loat jaein gi
woh mujh se poochti hai , karbala kiya phir barpa ho ga
main kehta hoon , nahin , ab is qadar tanha nahin koi
woh boli , dard ke is paar bhi ik dard hota hai
main is ke baad kitni der tak kuch bhi nahin bola
Mujhay is zindgani se koi shikwa nahin lakin
Zara si be'sakooni hai
Mujhay is zindgani se koi shikwa nahin lakin
Zara si be'sakooni hai
najanay kyn meray dil main
ajab ik khauf rehta hai
mujhay mehsoos hota hai
keh meray dil ke darwaze pe
teri yaad ki dastak main woh shid'dat nahin baqi
bhout si khaas batain hain
jo mujh ko aam lagti hain
meray dil main inhain sun kar
koi toofan nahin uth'ta
teri aankhain , tera chehra
teri awaz ki rim jhim
sabhi kuch khwaab lagta hai
mujhay mehsoos hota hai
sunehri titliyaan jaisay
woh sab kush rang se sapnay
meray lafzon ke phoolon par
bhout din se nahin baithay
mujhay mehsoos hota hai
samay ki tez lehron ne
hamaray rait ke kacahay gharonday
tor dalay hain
mujhay un tez lehrojn se
sunehri titliyon jaisay
sabhi kush rang sapno se
koi shikwa nahin lakin
zara si be'sakooni hai
mujhay mehsoos hota hai
tumharay dil ke darwaze pe
meri yaad ki dastak
meri jaan ab nahin hoto !!
meri jaan ab nahin hota
keh meri yaad aye to
tumhari aankh bhar aye
dua'ein mangtay lamhay
mujhay tum bhool jati ho
magar phir bhi mujhay tum se
koi shikwa nahin lakin
Ajab se be'sukooni hai
ajab ik khauf hai dil main
main tum ko bhool jayon ga
Is zindagi ki bheer main
Is zindagi ki bheer main
koi ajnabi raah chaltay jo hum se poochay
keh aankhain hain surkh kyn
kyn aag bhari hai aankhon main
kyn aag bahri hai aankhon main
bikhri hain yeh nazrain kyn
to kiya bataein ussay
keh kyn kai raaton se so na paye hum
rona jo chaha in aankhon ne
to kyn ro na paye hum..........
Us se main aksar kehta tha
Us se main aksar kehta tha
jana! apni gari badlo
tum pe yeh choti sheerad bilkul suit nahin karti
dekho is ke pehy'ye dekho dekho dekho yeh daish bord dekho
kitna halka kitna sasta
waisay bhi tum sach poocho to yeh jo ungli main diamond hai
yeh bhi is se mehnga ho ga
is main aisi do, do karain aa sakiti hain
us se main aksar yeh kehta tha
yaar ! tum apni gari badlo
jaray anay wale hain
aur yeh heetar kaam nahin karta
yeh a/c bhi theek nahin hai tum ko lu bhi lag sakti hai
aur yeh dekho
itni achi composition aur bosida sound system
meri aqal se sab bahir hai
main to public transport pe aa jata hoon
bachpan se is ka aadi hon
lakin tum yeh kaisay ! kyn kar itni chori gari toba
meri aqal se sab bahir hai
us se main aksar kehta tha
yaar ! tum apni gari badlo
Ik din woh zich ho kar boli
janey kiya hai kuch arsay se
jab se tum jeevan main aye
choti gari , choti cheezain
2 kamron ke chotay ghar aur chota aangan
choti moti hansti duniya, choti galiyan
choti basti
nanhay munhay mehkay khwaab
aur kuch choti choti kushiyaan
mujh ko ab achi lagti hain
janay kiya hai lakin sab kuch
choti choti khwaish ban kar
mujh main raqas kiya karta hai
main nadaan tha yeh samjha woh meri gurbat main
asani se reh lay gi
phir kuch urtay lamhay aye
college ke 2 saal youn guzar gaye
jaisay saans guzar jati hai
2 salon main mousam badlay , faishon aur se aur hua to
sochon main tabdeeli ayi
hum chotay se baray huye aur
jeenay ko pehlay se barh kar mushkil paya
is ki her choti khwaish ka qad nikla aur
us ki nanhi sochon ne bhi karwat badli
ik din us ne apnay ghar ki sari choti choti cheezain
apnay mali ke chotay bachay ko de dein
choti galiyan , chotay aangan , choti basti
yeh sab to waisay bhi us ko ik ghar main hi mil sakta tha
us ne choti gari badli
tark kiye woh saray dost
sab rishtay aur sab sathi
jo chotay thay
aur un sab choton main main sab se ziada chota tha
us se main khud hi kehta tha
Yaar ! tum apni gari badlo
Hoon na pagli
Hoon na pagli
hoon napagli ?
main us se keh rahi thi
be'wafaon kay liye
roya nahin kartay
yeh kehtay sath
main khud ro pari....
hoon na pagli
Nazam uljhi hui hai seenay main
Nazam uljhi hui hai seenay main
sheair atkay huye hain honthon pe
lafaz kaghz pe baith'tay hi nahin
urtay phirtay hain titliyon ki tarah
kab se baitha hua hoon main janam
sada kaghaz pe likh ke naam tera
bas tera naam hi mukam'mal hai
is se behtar bhi nazam kiya ho gi
Yeh khu'baru log jin ki aankhain
Yeh khu'baru log jin ki aankhain
tumharay ujlay badan pe chipsaan
tumharay naqsh-e-qadam ki kushboo main
sibat aisay
bhanwar main jaisy hina ke patay
main sochta hoon
keh itni aankhon ke da'iray main
meri akeli
udaas aankhon ki
hasiyat kiya hai
meri wafa ka maqaam kiya hai
meri mohabbat ka naam kiya hai
Kabhi yeh socha hai
Kabhi yeh socha hai
kiya tum ne
kabhi yeh socha hai
tabeer jinhain mil jati hai
woh khwaab fana ho jatay hain
aur milti nahin tabeer jinhain
woh khwaab amr ho jatay hain
Yeh ashk teri aankh ke udaas shaam ki tarah
Udaas mat hua karo
Yeh ashk teri aankh ke
udaas shaam ki tarah
barha rahay hain dukh meray
adhooray jaam ki tarah
yeh khwaab to azaaab hain
jo aankh main sajaye hain
jo ranj-o-gham ke saye hain
yeh hum ne khud banaye hain
yeh dard dhul hi jaye ga
yeh waqat beey hi jaye ga
jo hum nahin to na sahi
koi to jeet jaye ga
jo tez kar de dharkanain
woh naam mat liya karo
jo ho sakay sanam to
hansi kushi jiya karo
udaas mat hua karo
udaas mat kiya karo
Ussay kehna yahan sab kuch
Sandesa
Ussay kehna
yahan sab kuch
tumharay bin adhoora hai
gay lamhon ki yadain hain
azaab-e-zindgani hai
firaaq-e-na'gahani hai
ussay kehna
keh loat aye
Na wada hai koi tum se , koi rishta nibhaney ka
Inkishaaf
Na wada hai koi tum se , koi rishta nibhaney ka
na koi aur hi dil main ta'hiya ya irada hai
kai din se magar dil main
ajab uljhan si rehti hai
na tum is dastaan ke sar'sari kirdaar ho koi
na qissa itna sada hai
ta'aluq jo main sajh tha kahin us se ziada hai
Poet : Amjad Islam Amjad
Ae ajnabi shaks bata tu mera kiya lagta hai ?
Ajnabi
Ae ajnabi shaks bata
tu mera kiya lagta hai ?
tera andaaz-e-biyaan
teri yeh shokiyan
mera her gham mera her dard
mita detay hain
meray in zakhmon par
marham si laga detay hain
Ae ajnabi shaks bata
yeh kaisa rishta hai keh
tujh se milney ki
meray dil ko aas rahay
tu mujh se door hai lakin
tera wajood meri
dharkano ke pass rahay
Ae ajnabi shaks bata
yeh kaisa jazba hai
keh tum se mohabbat hai
ulfat hai na koi chah
na paney ki hasrat hai
na khoney ka gila
na mohabbat hai
na ulfat
to yeh jazba kaisa
Tu mujh se kyn yeh chahay
Khadsha
Tu mujh se kyn yeh chahay
meri zaat ke aainay main
tera hi aks nazar aye
sochain teri , alfaaz mera
khaka tera , naqash meray
pasand teri ho mehar meri
tu manzar ho nazar meri
meri zaat ke aainay main
tera hi aks nazar aye
yahi mohabbat ki mairaaj hai
yeh mohabbat ka sheva ho ga
par sheeshay main badal para to
teray aks ka kiya ho ga ?
Bichar jayein to behtar hai
Bichar jayein to behtar hai
Woh mera ho bhi sakta hai
main us ko pa bhi sakta hoon
magar woh itna sada hai
mujhay apna bhi kehta hai
magar phir bhool kar sab kuch
woh kehta hai !
bichar jayein to behtar hai
Subscribe to:
Posts (Atom)
