Imran's Poetry: 04/21/16

Apr 21, 2016

Apnay honay ka pata deti hai zindagi youn bhi saza deti hai

Apnay honay ka pata deti hai

Zindagi youn bhi saza deti hai

Dil sulagnay ka pata chalta hai

Yaad jab raakh gira deti hai

Yeh hunar maa kay siwa kis ka hai

Bhookay bachon ko sula deti hai

Youn uraao na mohabbat ka mazaq

Yeh to banday ko khuda deti hai

Main sula deta hoon zakhmon ko magar

Ik naya dard hawa deti hai

Zinda rehna hai to shikwa kaisa

Mout her dukh ko mita deti hai

Poet : Khalid Imran Mazhar

Is gham ko to ab dil main samona hi paray ga

Aankhein jo bhar aayi hain to rona hi paray ga

Woh shakhs muradon se jissay paya tha hum ne

Mehsoos yeh hota hai keh khona hi paray ga

Ab jee ko jalatay huye ik umar hui hai

Ab hum ko teri tarah ka hona hi paray ga

Yeh hijar ka mousam kahin be'kaar na jaye

Baqi jo bacha hai ussay khona hi paray ga

Is kasht-e-malamat main meri jaan zara dekh

Yeh tukhm-e-mohabbat hai keh bona hi paray ga

Husan-e-fitrat ne mujh pe jadu kiya , dil wahin reh gaya

Phool ' kohsaar , jungle , sitaray , hawa , dil wahin reh gaya

Tum mujhay saath lay aaye acha kiya , par tumhein kya pata

Meray mohsin meray yaar-e-dard aashna , dil wahin reh gaya

Youn hua jaisay bijli si chamki wahan aur kya ho biyaan

Aankh khultay hi dekha keh sab theek tha , dil wahin reh gaya

Main khudaon ki basti main mabhoos tha , zehan maflooj tha

Jis jaga koi insaan mujh ko mila , dil wahin reh gaya

Kharman-e-jaan yeh jab barq-e-wehshat giri tab kissay hosh tha

Jism ko khair main ne sambhala diya , dil wahin reh gaya

Us ne Khalid mujhay aaj apna kaha , kaisay mumkin hua

Ghar to main aa gaya sochta sochta , dil wahin reh gaya

Apnay mahool se bichri hui tum lagti ho

Paas baithi ho par uljhi hui tum lagti ho

Beech apnay hai koi pichlay janam ka rishta

Jaagtay sotay main dekhi hui tum lagti ho

Yeh lab-o-lehja yeh aankhein nahin is duniya ki

Mujh ko mareekh se aayi hui tum lagti ho

Chandani raat main phaili hui khushbu ki tarah

Mujh ko her simt se aati hui tum lagti ho

Aik be'naam udasi ki jhalak chehray par

Shayed is shaher se roothi hui tum lagti ho

To jaana ab judai ki gharri nazdeek aati hai

" Judai ki gharri "

To jaana

Ab judai ki gharri nazdeek aati hai

Chalo aankhon pe bosa do

Keh ab bichray to shayed phir kabhi milnay na payein hum

Zamana darmiyan youn aa gaya hai

Keh ab doori yaqeeni ho gayi hai

Hum apnay aap main gum barhtay jatay thay

Bila sochay bila samjhay

Magar ab kay

Zamana darmiyan youn aa gaya hai

Keh khawabon ki koi tabeer mumkin hi nahin hai

Aur kuch is main hamari aur tumhari niyaton ka dosh bhi hai

To jaana

ab judai ki gharri nazdeek aati hai

Chalo aankhon par bosa do

Keh ab bichray to shayed phir kabhi milnay na payein hum

Ussay to kho hi chukay phir khayal kya us ka

Yeh fikar kaisi keh ab ho ga haal kya us ka

Woh aik shakhs jissay khud hi chor baithaythay

Ghulaye deta hai dil ko malaal kya us ka

Tumhari aankhon main chhalkein nadamatein kaisay ?

Jawab ban'nanay laga tha sawal kya us ka

Tumharay apnay iraday main koi jhol tha

Kaho keh milna tha aisa mohaal kya us ka

Woh nafraton kay bhanwar main bhi muskura kay mila

Ab us se barh kay bhala ho kamaal kya us ka

Ab is tarah bhi na yaadon ki kirchiyan chuniye

Na tha firaaq se behtar wisaal kya us ka

Yeh soch kay na milay phir ussay kabhi Khalid

Keh janay ho ga nadamat se haal kya us ka

Youn hi to deep nahin raah main jalaya tha

Chragh jaisa koi shakhs yaad aaya tha

Woh dost tha magar us ne kabhi na poocha haal

Yeh aur baat keh main ne bhi kab bataya tha

Na'janay kiyon meri halat pe log hanstay rahay

Kisi ka main ne yahan dil nahin dukhaya tha

Qasoor'waar samjhnay laga main khud ko bhout

Kuch is ta'paak se us ne galay lagaya tha

Khizan darakhton se kamray main aa chuki thi Hassan

Hawa ne mujh ko bhout baad main jagaya tha

Naya ik rabt paida kiyon karein hum

Bicharna hai to jhagra kiyon karein hum

Khamoshi se ada ho ' rasam-e-doori

Koi hungama barpa ' kiyon karein hum

Yeh kafi hai , keh hum dushman nahin hain

Wafa'dari ka dawa kiyon karein hum

Wafa , ikhlaas , qurbani , mohabbat

Ab in lafzon ka peecha , kiyon karein hum

Hamari hi tamana kiyon karo tum

Tumhari hi tamana kiyon karein hum

Kiya tha ehad , jab lamhon main hum ne

To sari umar 'efaa kiyon karein hum

Nahin duniya ko ' jab parwah hamari

To phir duniya ki parwah , kiyon karein hum

Yeh basti hai , musalmano ki basti

Yahan kaar-e-maseeha , kiyon karein hum

Tum ko dekha to yeh khayal aaya

Zindagi dhoop tum ghana saya

Aaj phir dil ne ik tamana ki

Aaj phir dil ko hum ne samjhaya

Tum chalay jao gay to sochein gay

Hum ne kya khoya hum na kya paya

Hum jissay gun'guna nahin saktay

Waqat ne aisa geet kiyon gaa'ya

Her simat latafat hi latafat si lagay hai

Tu hai to yeh duniya mujhay jannat si lagay hai

Her baar to is tarah dhalakta nahin aanchal

Kuch is main mujhay teri sharaarat si lagay hai

Kya tujh ko zaroorat kisi andaz-o-ada ki

Tu youn hi mujhay aik qayamat si lagay hai

Aankhein jo uthaye to mohabbat ka gumaan ho

Nazron ko jhukaye to shikayat si lagay hai

Yeh teray khad-o-kaal main mariyam ka taqadus

Aankhon ko jhukaon to ibadat si lagay hai

Ab kay azab dohra uthana para mujhay

Tujh se milay baghair hi jana para mujhay

Phir apni das'taras se bhi main door ho gayi

Apnay liye hi jaal bichana para mujhay

Thein tehra bakhtiyan hi muqadar main is qadar !

Yaadon ka shama'daan bhi bujhana para mujhay

Woh kya juda hua keh main khud se bichar gayi !

Awaz de kay khud ko bulana para mujhay

Jis main kahin tumhara bhi kuch zikar aa gaya

Woh shair, baar baar suna'na para mujhay

Need to urr hi jati hai

" Need to urr hi jati hai "

Khawabon main ' tujh se milnay ka !

Paigham , saba jab laati hai

Tab dastak bin !

In palkon ki dehleezon se

Sab neend meri ' urr jati hai

Aur tujh se milnay ki ik khawaish !

Sari raat jagati hai

Ab tu hi bata

Phir itni khushi main !

Neend bhala kab aati hai

Keh neend to urr hi jati hai

Kahin chand raahon main kho gaya kahin chandani bhi bhatak gayi

Main chragh woh bhi bujha hua meri raat kaisay chamak gayi

Kabhi ujla ujla sa naam hoon , kabhi khoya khoya kalaam hoon

Mujhay subha kirno se bhar gayi mujhay shaam phoolon se dhak gayi

Tujhay bhool janay ki koshishein kabhi kaam'yab na ho sakein

Teri yaad shaakh-e-gulaab hai jo hawa chali to lachak gayi

Kabhi hum milay bhi to kya milay wohi dooriyan wohi faaslay

Na kabhi hamaray qadam barhay , na kabhi tumhari jhijak gayi

Meri dastan ka urooj tha teri narm palkon ki chaaon main

Meray saath tha tujhay jaagna teri aankh kaisay jhapak gayi

Tujh ko chor kay aayi thi jab aankh main gham ka pani tha

Tujh ko chor kay aayi thi jab

Aankh main gham ka pani tha

Hont jo dekhay payasay thay

Haath jo dekhay ' khaali thay

Sara jag sawali tha

Dil main jhaanka " khaali tha "

" Mohabbat ho Oas " mohabbat agan ho

Mohabbat ki rooh ho , mohabbat badan ho

Yeh maathay ki bindiya

Yeh haathon ki mehandi

Yeh pairon ki payal

Mohabbat bana doon

Kahin se main laa kay yeh honton ki laali

Aur aankhon ka kajal

Mohabbat bana doon

Mohabbat ka dil ho , mohabbat ki saansein

Mohabbat ka din ho , mohabbat ki raatein

Mohabbat kay lab hon , mohabbat kay andaz

Mohabbat kay dhab hon

Mohabbat milay to

Mohabbat se keh doon

Mohabbat hai jaana

Mohabbat main rehtay hain aksar hi gum say

Mohabbat ko de do

Mohabbat se sab kuch

Main dono jahan ko mohabbat bana doon

Mohabbat ko laa kay mohabbat dikha doon

Main tum pe mohabat , mohabbat luta doon

Main tum ko mohabbat , mohabbat bana doon

Par itni mohabbat ko

Tum kya karo gay .......?"

Khayalon main basi hai jo mo'atar reshmi larki

Ussay dekho to ik gehra samandar hai woh shehzadi

Na janay kon hai jis ka muqadar hai woh shehzadi

Main kaisay yeh bataon kitni sundar hai woh shehzadi

Khayalon main basi hai jo mo'atar reshmi larki

Baharein , phool , kaliyan us kay daman se hain wabasta

Mo'atar shabnami jhonkay hain khidmat par kamar basta

Kisi maahir ne phoolon se banaya hai yeh guldasta

Khayalon main basi hai jo mo'atar reshmi larki

Yahi bas jee main aata hai keh us kay paas jaa ponchon

Gira kay sab hijabon ko ussay dekhon , ussay poojon

Chupa hai jo raaz dil main woh sab duniya ko batla doon

Khayalon main basi hai jo mo'atar reshmi larki

Shaam kay ujaalon main apnay narm haathon se

Shaam kay ujaalon main

Apnay narm haathon se

Koi baat achi si

Koi khawab sacha sa

Koi bolti khushbu

Koi sochta lamha

Jab bhi likhna chaho gay

Soch kay dareechon se

Yaad kay hawalon se

Mera naam chup chup kar

Tum ko yaad aaye ga

Haath kaamp jayein gay

Shaam thehar jaye gi

Mera to ranjishein sari mitanay ka irada tha

Galay us shakhs ko phir se laganay ka irada tha

Chalo acha hua us ne mujhay sahil se lotaya

Mera to kashtiyan warna jalanay ka irada tha

Macha deti hai phir halchal khayalon main teri yaadein

Wa'garna tujh ko is dil se bhulanay ka irada tha

Bari minat samajat se kahin jaa kar woh mana hai

Jissay do chaar lafzon main mananay ka irada tha

Woh bazaron main kal aisay bana sanwra sa phirta tha

Keh jaisay shaher ko pathar bananay ka irada tha

Ussay ab dekhna bhi to zara acha nahin lagta

Kabhi aankhon main jo chehra basanay ka irada tha

Agar veeran shakhon par parindon kay ghar na hotay

To ab sookhay darakhton ko katanay ka irada tha

Tumhein hi ik nahin Akhtar yaqeen mano abhi us ka

Zamanay bhar ko dewana bananay ka irada tha

Surkh jalta hua suraj na chamak'daar sitara dekhein

Hum to aisay hain keh aankhon ka ishara dekhein

Kal bharray shaher main yeh soch kay thokar khaai

Kon deta hai hamein aa kay sahara dekhein

Dekh mat pooch lakeeron kay ma'ani hum se

Hum to woh hain jo lakeerein na sitara dekhein

Bas yahi soch kay shehron se nikal aaye hain

Kaisay hota hai tumhein kho kay guzara dekhein

Ab to her mor pe hum'raaz badal jatay hain

Kis ko fursat hai kahan kon pukara dekhein

Yeh to ijaaz tasawur ka hai teray warna

Hum to aisay hain keh her mor sahara dekhein

Log is taak main barson se lagay hain Akhtar

Us ki khatar hamein kya kya hai gawara dekhein