Sarapa-e-haqeeqat , mujasam fasana

Sarapa-e-haqeeqat , mujasam fasana

Mohabbat ka Aalam , junon ka zamana 

Woh pehlay pehal dono jaanib yeh Aalam 

Ada-e-be'taaluq , nazar mehar',mana

Nazar uth'tay uth'tay , nazar miltay miltay 

Dharaktay dilon ka woh nazuk zamana

Tabiyat shagufta magar khoi khoi 

Her andaz dil'kash magar wali'hana 

Woh shair-o-taranum ka pur'kaif mousam 

Woh ashk-o-tabasum ka rangeen zamana 

Ghroor-e-ta'jamul magar zakham khurda 

Shakist-e-mohabbat magar fati'haana  

Dastak kisi ki hai keh gumaan , dekhnay to de

Dastak kisi ki hai keh gumaan , dekhnay to de

Darwaza hum ko tez hawa kholnay to de 

Soda hai umar bhar ka , koi khail to nahin 

Ae chasham-e-yaar , mujh ko zara sochnay to de 

Shayed kisi lakeer main likha ho mera naam 

Ae dost apna haath mujhay dekhnay to de 

Yeh saat Aasmaan kabhi mukh'tasar to hon 

Yeh ghoomti zameen kahin theharnay to de 

Kaisay kisi ki yaad ka chehra bana'on main 

"Amjad" woh koi naqsh mujhay bhoolnay to de

Khawabon ki ik basti thi

Khawabon ki ik basti thi 

Aik larki us main rehti thi 

Apnay ghar kay Aangan main

Kuch sapnay boya karti thi 

Apnay kamray ki khirki main 

Bondon se khaila karti thi 

Sab kay samnay hansti thi 

Aur chup chup kar roya karti thi 

Chand ko kahin dair tak ghura karti thi 

Phir khud se baatein karti thi 

Dekhnay wali sab aankhon ko 

Kaanch ki guriya lagti thi 

Toot gayi to sab ne jana 

Woh pagli  ! pyar kisi se karti thi 

Bikharna kaar-e-hunar nahin hai

Bikharna kaar-e-hunar nahin hai 

Fagh'aan ka koi asar nahin hai 

Hain rat'jagon ki hazaar raatein 

Magar muqabil-e-sehar nahin hai 

Main Aaina hoon keh aks koi 

Mujhay khud apni khabar nahin hai 

Utaaray koozay ko chaak-e-jaan se

Kahin woh dast-e-hunar nahin hai 

Ajab safar hai ajab musaafat 

Makaan bhout hain par ghar nahin hai 

Us ki tasveer kya nazar aayi

Us ki tasveer kya nazar aayi 

Keh'kishaan aankh main utar aayi 

Main wahan khud ko yaad aaya hoon 

Woh jahan khud ko bhool kar aayi 

Janay kya keh diya hai main ne ussay 

Kuch dino main hi woh nikhar aayi 

Main prindon kay paas baitha tha 

Kal woh jis waqat meray ghar aayi 

Ajnabiyat ki tez baarish main 

Woh meray haath mukh'tasir aayi 

Aaj muddat kay baad us kay saath 

Khud ko dekha to aankh bhar aayi 

Sakhat be'simat zindagi thi "Hasan"

Us kay aanay se raah par aayi

December Tum na jaao na

December Tum na jaao na 

Abhi lamhay nahin bikhray 

Abhi mousam nahin bichray 

Meray kamray ki thandak main 

Abhi kuch dhoop baaqi hai 

Meri dairy kay kuch safhay 

Abhi kuch keh nahin paaye 

Meray aangan kay sab poday 

Abhi bhi gun'gunatay hain 

Meray be'jaan honton par 

Abhi muskaan baaqi hai 

Kisi kay loat aanay ka 

Abhi imkaan baaqi hai 

December baat ik sun lo !

Suno ! tum maan jaao na 

Keh jab tak woh nahin aata 

December tum na jaao na

Qariya qariya basti basti jashan manaya kartay thay

Qariya qariya basti basti jashan manaya kartay thay 

Tez hawa main pyar kay sachay deep jalaya kartay thay 

Shaakh shaakh main ab bhi teray payr ka dheema lehja hai 

Jin pairon kay saaye hum ko geet sunaya kartay thay 

Aaj ruton kay saath jo badla hum ko tanha chor gaya 

Kal tak to us pairr kay pattay hum pe saaya kartay thay 

Boorhay bargad ki shaakhon par jhooltay thay hum rozana 

Sapno kay kya sundar mehal banaya kartay thay 

Khoye khoye rehnay walo ! raaz-e-mohabbat faash hua 

Bheegi aankh ne keh daala jo raaz chupaya kartay thay 

Meri tarah woh pairr bhi ab tak tanha rehta hai 

Jis ki thandi chaayon main tum preet jataya kartay thay 

Shahbaz tum to itni jaldi saath hamara chor gaye 

Kal tak pyar ki kaisi kaisi qasmein khaya kartay thay