Imran's Poetry: 03/21/15

Mar 21, 2015

Kuch khwaab thay meri aankhon main

Kuch khwaab thay meri aankhon main

Tujhay paa lenay ki chahat thi

Chand lafzon main hi kehta hoon

Mujhay tum se bhout mohabbat thi

Par tu kya janay chahat ko

Tujhay ho jaati to poochtay hum

Dil jab jab toot kay rota hai

Kiya dard tumhain bhi hota hai

YEh khwaab haqeeqat ho jaye

Kisi apnay jaisay sang'dil se

Tujhay kaash mohabbat ho jaye

Abhi tum nazuk phool ho , sambhalo apnay jazbon ko

Yeh titliyan , kachay phoolon ka bhout nuksaan karti hain

Toot kar bhi yeh kambakht dharakta rehta hai

Main ne is duniya main dil sa koi wafadaar nahin dekha

Zameen pe chal na saka aur aasmaan se bhi gaya

Katwa kay par woh parinda uraan se bhi gaya

Bhula diya to bhulanay ki intiha kar di

Ab main us shakhs ky weham-o-gumaan se bhi gaya

Kisi kay haath se nikla hua teer hoon main

Jo hadaf ko choo na saka aur kamaan se bhi gaya

Tabah kar gayi mujhy pakkay makaan ki khwaish

Main apnay gaaon kay kacchay makaan se bhi gaya

Paraai aag main kooda to kiya mila tujh ko Wasi

Ussay bacha na saka aur apni jaan se bhi gaya

Apnay matlab kay ilawa kon kisi ko poochta hai

Bina rooh kay to ghar walay bhi miyyat ko nahin rakhtay

Aankhein ro pari na koi peghaam aaya

Bhool gaya woh hamein na koi salam aaya

Meri tanhai mujh se boli

Ab bata ? ab meray siwa kon teray kaam aaya

Main mar jaaon to meray sirhanay na bithana us ko

Bhout tasali dena bhout pyaar se samjhana us ko

Ghoomnay ka bahana kar kay door fizaon main kahin le jana us ko

Woh be'wafa hai us waqat yeh ehsaas na dilaana us ko

Us kay samnay na karna baatein aisi keh meri yaad aa jaye

Meray tafreeh kay mashgalay suna suna kay hansana us ko

Woh roye gi bila'wajeh to meri rooh tarap uthaye gi

Tum aisa karna meri mout ka hi na batana us ko

Main ne ro kar kaha mujhay chor do ya tor do

Woh be'wafa hans kar bolay itnay na'yaab khilonay roz kaha miltay hain

Main mar jaaon to ussay khabar bhi na honay dena

Masroof sa shakhs hai woh kahin us ka waqat bar'baad na ho jaye

Na rang aankhon ka laal rakhna

Na veeran veeran sa haal rakhna

Jo chahaton main likhay thay hum ne

Woh lafz saray sambhaal rakhna

Machal machal kay adaa dikhana

Adaa kay andar kamaal rakhna

Tujhay dilon ki mili hakoomat

To shahon jaisa jalaal rakhna

Meri duaein hain saath teray

Bas apna thora khayal rakhna

Akelay chor jatay ho , yeh tum acha nahin kartay

Hamara dil jalatay ho yeh tum acha nahin kartay

Kaha bhi tha mohabbat hai mohabbat hi issay rakho

Tamasha jo baantay ho yeh tum acha nahin kartay

Utha'tay ho sar-e-mehfil falak tak tum hamein lakin

Utha kar jo giraatay ho yeh tum acha nahin kartay

Koi jo pooch lay tum se keh rishta kiya hai ab un se

To nazron ko jhukaatay ho yeh tum acha nahin kartay

Bikhar jayein andheron main sahara tum hi detay ho

Magar phir chor jatay ho yeh tum acha nahin kartay

Ussay kehna abhi tak mojood hain is dil pe teray qadmon kay nishan

Hum ne teray baad kisi ko is raah se guzarnay nahin diya

Mujhay koi jeenay ki hasrat nahin hai

Agar tum ko mujh se mohabbat nahin hai

Bhula do yeh ranjish ki baatein

Mujhay gham uthanay ki aadat nahin hai

Mujhay qurbaton ki saza na de

Meri chahaton ka gila na kar

Meri hasraton pe na muskura

Meri zindagi teray naam hai

Meri be'basi pe na khil'khila

Mera pyaar tha teray wastay

Main ne pyaar kar kay bura kiya

Mujhay kya pata main ne kya kiya

Meri jaan main ne kaha tujhay

Meray haal par mujhay chor de

Mera jurm hai to bata mujhay

Koi zakham hai to dikha mujhay

Meri jaan aisay khafa na ho

Main ne kab kaha mujhay pyaar de

Ek tamana si hai is dil-e-nadan ki kaash

Aaj Aansoo kay saath her khwaab bhi beh gaye

Duniya main to koi aur bhi ho ga teray jaisa

Par hum tujhay chahtay hain teray jaison ko nahin

Kaash meri zindagi se koi is tarah bhi waqif ho

Keh main baarish main bhi ro'on to woh meray aansoo pehchaan lay

Darust kar hi liya main ne kal raat nazriya apna

Keh dard na ho to mohabbat mazaaq lagti hai

Tumhain jo meray gham-e-dil se Aagahi ho jaye

Jigar main phool khilein , aankh shabnami ho jaye

Ajal bhi us ki bulandi ko choo nahin sakti

Woh zindagi jissay ehsaas-e-zindagi jo jaye

Yeh hi hai dil ki halakat, yehi hai ishq ki mout

Nigah-e-dost pe izhaar-e-be'kasi ho jaye

Zamana dosy hai kis kis ko yaad rakho gay

Khuda karay tumhain mujh se dushmani ho jaye

Siyah khana-e-dil main hai zulmaton ka hajoom

Chragh-e-shouq jalao keh roshni ho jaye

Ajal ki goud main qabil huwi hai umar tamaam

Ajab nahin keh meri mout zindagi ho jaye

Jaagein gay kisi roz to is khawab -e-tarab se

Hum phool hi chuntay rahay , baghicha-e-shab se

Phir aik safar aur wohi harf-e-rafaqat

Samjhay thay guzar aayein hain hum , teri talab se

Khush dil hai agar koi to , kiya us ka yahan kaam

Yeh baargaah-e-gham hai , qadam rakho adab se

Ab mousam-e-jaan se bhi yaqeen uthnay laga hai

Dekha hai tujhay rang badaltay huwey jab se

Yahan bhi wohi begana rawi apni khuda si

Mangi jo kabhi koi dua shehar kay Rab se

Chonki hoon to dekha keh woh ham'raaz nahin hai

Uljhan main hoon kis baat pe kis mor pe , kab se

Yeh darkhor-e-hangama to pehlay bhi kahaan thi

Hol aayi magar aaj to veeran-e-shab se

Kuch dost bhi ziada masroof huwey aur kuch

Hum door hain , afsurdagi-e-dil kay sabab se

Main be'qasoor hoon , qudrat ka faisala hai yeh

Lipat kay mujh se bas woh itna bata kar royi

Mujh pe ik qurb ka toofan ho gaya hai

Jab meray samnay meray khat jala kar royi

Meri nafrat aur adawat pighal gayi ik pal main

Woh be'wafa hai to kiyon mujhay rula kar royi

Sab shikwey meray ik pal main badal gaye

Jheel si aankhon main jab aansoo saja kar royi

Jee to halka hua magar

Ro kar lutf-e-gham ganwa bethay

Zar parasti hayaat ho jaye

Iss se behtar wafaat ho jaye

Phir main duniya main ghoom sakta hoon

Jism se gar nijaat ho jaye

Aik devi ki aankh aisay lagi

Jaisay mandir main raat ho jaye

Dil kisi khel main nahin lagta

Jab mohabbat main maat ho jaye

But'shikan kiya bigaar sakta hai

Dil agar som'naat ho jaye

Kitnay beemar-e-ishq bach jayein

Husn par gar , zakaat ho jaye

Mehavar-e-ishq se zara hatay

Muntashir kaainaat ho jaye

Aankh parhna jissay bhi aa jaye

Mahir-e-nafsiyaat ho jaye

Aks-e-laila se , Qais baat to kar

Ain mumkin hai , baat ho jaye

Shamil tha yeh sitam bhi kisi nisaab main

Titli mili hanoot purani kitaab main

Dekhon ga kis tarah se kisi ko azaad main

Sab kay gunnah daal de meray hisaab main

Phir be'wafa ko behr-e-mohabbat samjh liya

Phir dil ki naao doob gayi hai saraab main

Pehlay gulaab us main dikhai diya mujhay

Ab woh mujhya dikai diya hai gulaab main

Woh rang-e-Aarasheen , woh dehakta hua shabaab

Chehray ne jaisay aag laga di naqaab main

Baarish ne apnay aks kahin dekhna na ho

Kiyon aainay ubharnay lagay hain habaab main

Gardish ki teziyon ne ussay noor kar diya

Matti chamak rahi hai yehi aftaab main

Us sang'dil ko main ne pukaara to tha "Adeem"

Apni sada hi loat kar aayi jawaab main

Bhala kya parh liya apnay haathon ki lakeeron main

Keh us ki bakhshish kay itnay charchay hain faqeeron main

Koi suraj se seekhay , adal kya hai , haq rasi kya hai

Keh yaksaan dhoop batti hai , sagheeron main , kabeeron main

Abhi ghairon kay dukh pe bheegna phooli nahin aankhein

Abhi kuch roshni baaqi hai logon ki zameeron main

Na woh hota , na main aik shakhs ko dil se laga rakhta

MAin dushman ko bhi ginta hoon , mohabbat kay safeeron main

Sabeelein jis ne apnay khoon ki her su lagi hon

Main sirf aisay ghani ka naam likhta hoon ameeron main

Badan azaad hai , andar meray zanjeer bajti hai

Keh main mukhtaar ho kar bhi gina jaaon aseeron main

Karay ga qadar zamana hamari bhi ek din

Bas wafa ki buri aadat choot janay do

Teri yaad hai keh jaisay kisi ghreeb ki ghurbat

Barhti hi chali jaa rahi hai

Ishq ne teri aankhon ki bee'nai cheen li

Muddat se aarzoo thi deedar-e-yaar ki

Ishq ne teray sab bal nikal diye

Muddat se aarzo thi seedha karay koi

Samnay aa kay na baitho youn Khudaara

Sabar to sabar hai her baar nahin hota

Tu to meri jaan hai phir kiyon

Teri hi yaad meri jaan le rahi hai

Khushboo gayi na dil se na yaadon se be'rukhi

Zaalim kay saray naqsh baray paai'daar thay

Main khud karon pehal , ya udhar se ho ibtida

Barson guzar gaye isi intizaar main

Woh mujhay aziz thi , main bhi ussay pasand

Phir janay kiya hua keh mohabbat nahin rahi

Lipti rahi wajood se khushboo tamam raat

Aata raha hai yaad mujhay tu tamam raat

Us ne baray khaloos se mangi thi roshni

Girtay rahay makaan pe jugno tamam raat

Rota raha woh aap hi apnay naseeb par

Apnay galay main daal kay baazu tamam raat

Fursat na thi tabeeb ko apnay hi kaam se

Peetay rahay mareez bhi Aansoo tamam raat

Mili saza jo mujhay kisi khata pe na thi

Mujh pe jurm jo sabit hua woh wafa ka tha

Faaslay itnay barhay hijar main Aazaar kay saath

Ab to woh baat bhi kartay nahin gham-khwaar kay saath

Ab to hum ghar se nikaltay hain to rakh detay hain

Taaq pe izaat-e-sadaqat bhi dastaar kay saath

Ik to tum khwaab liye phirtay ho galiyon galiyon

US pe takraar bhi kartay ho kharidaar kay saath

Hum ko us shaher main jeenay ka soda hai jahan

Log mai'maar ko chun detay hain dewaar kay saath

Khouf itna hai teray shaher ki galiyon main "Faraz"

Chaap suntay hain to lag jaatay hain dewaar kay saath

Junoon ko zabt sikha loon to phir chalay jana

Main apna aap sambhaal loon phir chalay jana

Usi tarah hai abhi tishnagi in aankhon main

Main in ki pyaas bujha loon to phir chalay jana

Dil ko yeh weham keh tum loat kar na aayo gay

Yeh weham dil se nikaalon to phir chalay jana

Biyaz-e-dil pe jo utri hai surat-e-ilhaam

Woh ghazal tum ko suna loon to phir chalay jana

Nisaar hotay hain shamma pe kaisay parwanay

Yeh jashan tum ko dikha loon to phir chalay jana

Umeed kay sehraa main jo barson se kharra hai

Halaat ki be'reham hawaon se larra hai

Ruswai se bhaagay to yeh mehsoos hua hai

Tanhai ki manzil ka safar kitan karra hai

Heeray ki kani ho to , tabasum bhi bhout hai

Lo samnay ik kaanch ka minaar kharra hai

Youn zehan pe barsa hai teri yaad ka badil

Jaisay keh koh-e-Alam toot parra hai

Guzray huye lamhay kabhi wapis nahin aatay

Kiyon surat-e-dewaar andheray main kharra hai

Ik wajah-e-mubhim hoon ba'zahir main ufaq par

Kehtay hain mera naam , meray qad se bara hai

Ek main hi akela nahin is dast-e-khalish main

JAlta hua suraj bhi meray sar pe kharra hai

Na qadri-e-jazbaat kay is ehad main

Aa jaaye raas pathar bhi barra hai

Funkaar hai to haath pe suraj saja kay laa

Bujhta hua diya na muqabil hawa kay laa

Dariya ka intiqaam dabo de na ghar tera

Saahil se roz roz na kankar utha kay laa

Thori se aur moj main aa Ae hawa-e-gul

Thori si us kay jism ki khushboo chura kay laa

Samaan wafa ka baandh magar soch soch kar

Is ibtidaa main youn na sakhat intihaa kay laa

Gar dekhna hai ehal-e-mashiyat ka hosla

MAidaan se ghar main ek miyat utha kay laa

Mohsin ab us ka naam hai sab ki zubaan par

Kis ne kaha tha us ko ghazal main saja kay laa

Bisat-e-umar par mujh ko khasara ho raha tha

Main suraj reh chuka tha , ab sitara ho raha tha

Ba'zahir khaak uraanay ki baatein ho rahi thein

Haqeeqat main meri jaanib ishaara ho raha tha

Guzray jaa rahay thay meri aankhon se manzir

Aur is tarteeb se mera nazaara ho raha tha

Hum raaz khaal-o-khad ne teri aankhein dekh li thein

So aainay main pathar Aashkaara ho raha tha

Bulandi ki sadaein door hoti jaa rahi thein

Naseebon se mujhay aisa ishaara ho raha tha

Bhari mehfil main tujhay dekhtay rahay kisi ko shak bhi na hua

Tera jatay huye mur mur kay dekhna mujhay bad'naam kar gaya

Ek yeh khouf keh koi zakham na dekh lay dil kay

Aur ek yeh hasrat keh kaash ! koi dekhnay wala hota

Aakhri saans tak mujh se wabasta rahein gi teri yaadein

Shayed keh teray kahyalon main kal tak mera naam bhi na ho

Tujhay roz dekhon qareeb se

Meray shouq bhi hain ajeeb se

Mujhay maangna hai tujhi ko bas

Apnay Rab aur us kay Habeeb se

Meri aankh main bhi hai Aajzi

Meray khwaab bhi hain ghreeb se

Meray sab dukhon ki dawa ho tum

Milay kya sakoon phir tabeeb se

Main bhout khush hoon jorr kay

Naseeb apna teray naseeb se

Woh kitnay chain se soya hai aaj mujhay bhula kay

Jo kehta tha teray baazo'on kay bina neend nahin aati mujhay

Suna hai mil kay chalnay se muqaddar jaag jaatay hain

Yehi baat azmaanay ko chalo ik saath chaltay hain

Paaon rakhnay par cheekh uth'tay hain

Khushk patton main bhi kitni anaa hoti hai

Kitni chahat se hum ne us ki chah ki thi

Mohabbat ussay khud se bhi ziyada ki thi

Yeh afsoos kay ghalat thay hum

Hum ne ik be'wafa se wafa ki thi

Jis ne kiya samaan hamari mout ka

Hum ne her saans kay saath us ki zindagi ki dua ki thi

Jis ne kaantay bichaye hamari raahon main

Hum ne uss kay liye her khushi fanaa ki thi

Woh nahin chahta hamein to na chahay

Hum ne to us se mohabbat be'panah ki thi

Hai numayaan teray jazbaat ki sadaaqat "Mohsin"

Aik hi shakhs ka barson tujhay pagal rakhna

Dewaar par larza hai to dar kaamp raha hai

Bichray ho to ujjra ghar kaamp raha hai

Tum aankh ki putli main chupay sach ko bhi dekho

Mujrim to nahin hai magar woh kaamp raha hai

Veeran hai is darja teray baad mera dil

Iss shaher main aatay huye darr kaamp raha hai

Ik main keh judai ne mujhay kar diya sakhat

Ik tu hai keh sadmay se udhar kaamp raha hai

Aangan ko palat jaaon na main chor kay us ko

Sehraa main mera khawaab-e-safar kaamp raha hai

Ya to meri beenai par khouf musallat hai

Ya nehar kay pani main shajar bkaamp raha hai

Bujhnay nahin doon ga main kabhi hijar kay sadmay

Dil main teri yaadon ka sharar kaamp raha hai

Bhout bheegay teri yaadon main

Magar dil kay daagh nahin dhultay

Kisi ki yaad ko hum dil main basa kay roye

Kisi ki tasveer ko hum seenay se laga kay roye

Jo wada kiya th ahum ne kisi se

Hum us waday ko nibha kar roye

Jis shakhs ko hamari zaroorat bhi nahin thi

Hum us ko apni aarzoo bana kay roye

Ji sne hamein apnay qadmon talay bhi jaga na di

Hum ussay apni palkon pe bitha kay roye

Jo samjh na saka hamari dil'lagi ko

Hum us se dil laga kay roye

Un kay aanay ka hai imkaan Khuda khair karay

Dil pe guzray ga yeh toofan Khuda khair karay

Woh to hain oonchay mehlon kay rehnay walay

Aur mera ghar biya'baan Khuda khair karay

Un ka kehna hai keh mehfil main uthein gay naqaab

Mera kho jaye na Emaan Khuda khair karay

Woh yeh kehtay hain is baar judai ho gi

Main yeh kehta hoon meri jaan Khuda khair karay

Main ne maangi hai wafa aur wafa kay badlay

Uss ne maangi hai meri jaan Khuda khair karay

Main Eid main mehandi lagaon gi , mera sajan zaroor aaye ga

Ab soch kay rakha hai hai keh youn Eib manaon gi

Dard se dil , tanhaiyon se ghar sajaon gi

Log hain muntazir chaand kay mujhay intizaar tumhara hai

Logon ki eid chand se

Main tumhain dekh kar Eid manaon gi

Log mil kar galay muskuratay hain

Khil'khilaatay hain

Main tujhay baanhon main lay kar ashk bahaon gi

Sajan ab to aa jaao keh main bhi eid mana loon

Tum agar na aaye to main shaher hi chor jaaon gi

Main Eid main mehandi lagaon gi

Mera sajan zaroor aaye ga

Thokar lagi to muqaddar pe ja gira

Phir huwa youn aaina pathar pe ja gira

Ehsaas-e-farz jab bhi hua neend aa gayi

Chalna tha pul-e-siraat pe bister pe ja gira

Bazi mohabbaton ki jahalat ne jeet li

Woh ban gaya khateeb jo nunabar pe ja gira

Khushboo qasoor waar nahin ussay chor do

Main phool torta hua kaanton pe ja gira

Sehraaon main liye phira "Iqbal" pani ki justagoo

Jab pyaas mar gayi to samandar pe ja gira

Ek shakhs ki chahat ka armaan raha aksar

Jo jaan kar bhi sab kuch anjaan raha aksar

Yeh pyaar mohabbat ka hai khel khuda janay kaisa

Keh jis ne wafa ki us ko nuksaan raha aksar

Aata hai woh neendon main rehta hai woh khwabon main

Ek yahi to us ka mujh pe ehsaan raha aksar

Jis din un ka deedar ho jaata hai

US din sona dushwaar ho jaata hai

Mangtay hain log , hum se teri mohabbat ka saboot

Meri mehandi ka laal rang teri chahat ki gawahi deta hai

Ghar aa kay bhout roye Maan baap akelay main

Matti kay khilonay bhi sastay na thay melay main

Sun Aray O-Be'wafa

Aaj se hum bhi tum jaisay

Waqat-e-rukhsat ponch raha tha meray aansoo apnay aanchal se

Us ko gham tha itna keh woh khud rona bhool gaya

Zamana hamein itna ghreeb kiyon samjhta hai

Un ko maloom nahin keh hum dard ki doulat se maala maal hain

Aaghaz-e-ishq to khoob tha , anjaam kya kahon

Pehlay to thi dil'lagi, ab dil ko ja lagi

Hum to nadaan hain , kya samjhein gay Asool-e-Mohabbat

Bas tujhay chaha tha tujhay chahtay hain aur tujhay hi chahein gay

Meray jan-o-dil meray hamsafar main udaas hoon koi baat kar

Teray lab hilein to kattay safat main udaas hoon koi baat kar

Koi bojh hai to utaar de , koi khouf hai to nikal de

Mera haath hai teray haath par main udaas hoon koi baat kar

Nahin yaad kitnay baras gaye , teri guftagoo ko taras gaye

Meri khirkiyan meray dewaar-o-dar , main udaas hoon koi baat kar

Tujhay chup hai kaisi lagi hui , abhi umar to hai pari hui

Abhi muskura , abhi gham na kar , main udaas hoon koi baat kar

Mohabbat main be'sabri kiyon ?

Teray hi hain tasali rakh

Misaal-e-Aatish hai yeh rog-e-mohabbat

Roshan to khoon karti hai magar jala jala kar

Pareshan raat saari hai sitaro tum to so jaao

Sakoot-e-marg taari hai sitaro tum to so jaao

Hanso aur hanstay hanstay doob jaao khayalon main

Hamein yeh raat bhaari hai sitaro tum to so jaao

Tumhain kya aaj bhi koi agar milnay nahin aaya

Yeh baazi hum ne haari hai sitaro tum to so jaao

Kahay jaatay ho ro ro kay hamara haal duniya se

Yeh kaisi raaz-daari hai sitaro tum to so jaao

Hamain to aaj ki raat shab po phatnay tak jaagna hai

Yeh hi qismat hamari hai , sitaro tum to so jaao

Hamein bhi neend aa jaye gi hum bhi so hi jayein gay

Abhi kuch be'qaraari hai sitaro tum to so jaao

Kuch us ko bhi aziz thay apnay sakht Usool

Kuch hum bhi ittifaq se zid kay mareez thay