Ghamon se is qadar hai dosti ab

Ghamon se is qadar hai dosti ab 

Khushi ki bhi nahin mujh ko khushi ab 

Khuda janay issay kya ho gaya hai 

Bhout hi bolti hai khamoshi ab 

Karon ga yaad jo fursat mili to 

Bari masroof hai yeh zindagi ab 

Qana'at seekh li hai meray dil ne 

Kami lagti nahin mujh ko kami ab 

Kabhi jin ki talab hi zindagi thi 

Zaroorat hi nahin us ki rahi ab 

Kabhi kehtay to kitni eham hoti 

Wohi ik baat jo tum ne kahi ab 

Jissay tareekiyan raas aa gayi hain 

Ussay kiyon dhoondti hai roshni ab 

Main kab ka bo chuka takiya main taray 

Dilaasa de rahi hai chandani ab 

Main shaam yaadon kay junglon main guzarta hoon keh kuch likhon ga

Main shaam yaadon kay junglon main guzarta hoon keh kuch likhon ga  

Yeh shaher sara hi so chuka hai main jaagta hoon keh kuch likhon ga  

Bahar rut kay woh khawab saray jo meri palkon pe aa sajay thay 

Woh khawab aankhon main jal chukay hain main jal raha hoon keh kuch likhon ga  

Main pichlay mousamon ki barishon ko phir apni aankhon main laa raha hoon 

Keh ab kay sawan ki rut main , main bhi yeh sochta hoon keh kuch likhon ga  

Ajeeb rut hai judaiyon ki , azab din hain azab raatein 

Main chand meh'mal se lafz likh kar yeh sochta hoon keh kuch likhon ga  

Main lafz palkon se chun raha hoon , main khawab kaghaz pe bun raha hoon 

Main teri aahat bhi sun raha hoon main jaanta hoon keh kuch likhon ga  

Woh saray rastay keh jin pe hum tum chalay thay chahat kay sang "Atif

Main ab jo un par kabhi gaya to yeh jaanta hoon keh kuch likhon ga 

 

Meray andar saans lena chor de

Meray andar saans lena chor de 

Ae udasi ! mera peecha chor de

Chand kya aangan main utra hai kabhi 

Sun meri jaan yeh tamana chor de

Tu kabho sookhay huye paton pe likh 

Sabz shakhon ka qaseeda chor de

Aik din rakha meray shanay pe sar 

"Aur yeh boli keh " duniya chor de 

Zindagi ab thak gaya hoon main bhout 

Ab khudara yeh tamasha chor de

Yeh mohabbat hai tijarat to nahin 

Kya kisi kay haath aaya chor de

Us ki ulfat main na itni door ja 

Wapsi ka ik rasta chor de

 

 

Kuch khushi kay saa'iy main aur kuch ghamon kay sath sath

Kuch khushi kay saa'iy main aur kuch ghamon kay sath sath 

Zindagi kat hi gayi hai uljhano kay sath sath 

Aaj tak us ki thakan se dukh raha hai yeh badan 

Ik safar main ne kiya tha khwaishon kay sath sath 

Kis tarah khaya hai dhoka kya bataon main tumhein 

Doston kay mashwaray thay , sazishon kay sath sath 

Kis tarah rakhey huye hain chand suraj ik jaga 

Nafratein bhi pal rahi hain chahaton kay sath sath 

Is dafa sawan main teri yaad kay badal rahay 

Is dafa main khoob roya barishon kay sath sath 

Woh jinhein main dost kehta tha baray hi maan se

Saf-ba-saf woh bhi kharay thay dushmano kay sath sath 

Kaash phir se loat ayein phir wohi bachpan kay din 

Bhaagna phoolon ki khatar titliyon kay sath sath 

Shaher main kuch log meray chahnay walay bhi hain 

Phool mujh ko lag rahay hain pathron kay sath sath 

 

Tamana'on kay sab dar kholta hai, teri aankhon ka lehja bolta hai

Tamana'on kay sab dar kholta hai 

teri aankhon ka lehja bolta hai 

Chupanay ki koi surat nahin hai 

Koi oper se sab kuch dekhta hai 

Suna hai bheegti hain us ki palkein 

Woh jab bhi kuch Khuda se maangta hai 

Kahin se roshni laao Khudara  

Meray ghar main andhera bolta hai 

Meray charon taraf phaili hai khushbu

Yeh lagta hai woh mujh ko sochta hai 

Na janay kiyon mujhay lagta hai aisa 

Keh woh kuch mujh se kehna chahata hai

Kitni muddat baad tumhari yaad aayi hai

Celebration

Kitni muddat baad tumhari yaad aayi hai 

Youn lagta hai jaisay dil yeh ruk jaye ga 

Youn lagta hai jaisay aankhein 

Apnay saray aansoo ro kar

Bilkul banjar ho jayein gi 

Youn lagta hai jaisay pichlay mousam phir se loat aaye hain 

Janaa ! yeh dil khush rehnay kay 

Tor tareeqay bhool chuka hai

Us apr teri yaad ki dastak 

Youn lagta hai jaisay dil par

Aik qayamat guzar rahi ho 

Koi toofan aan khara ho 

Jaisay aik akeli naao 

Beech bhanwar kay aan phansi ho 

Youn lagta hai jaisay sapnay 

Aik haqeeqat ban baithay hon 

Itni muddat baad tumhari yaad aayi hai 

Soch raha hoon kya us ki tazeem karon main 

Palkon par ashkon kay deep jala leta hoon 

Dil kay ujray aangan ko mehkaa leta hoon 

Dil kehta hai phir khud ko taqseem karon main 

Itni muddat baad tumhari yaad aayi hai 

Youn lagta hai jaisay pichlay mousam phir se loat aaye hon

Yeh soch hai deewangi keh taptay suraj kay talay main ghar bana'on moom ka

Deewangi 

Yeh soch hai deewangi 

keh taptay suraj kay talay 

main ghar bana'on moom ka  

Kab milay ghair ki panahon se

Dard miltay hain Aashna'on se

Khushk patton ko naachtay dekha 

Geet sunta raha hawaon se

Maal-o-zar ki talab nahin hai mujhay 

Meri jholi bhar do dua'on se

Aur kitna chalo gay tum aakhir

Aablon ne kaha yeh paaon se

Jin ko aadat hai be'wafaai ki 

Aao jeetein unhein wafaon se

Aao un ko qareeb se dekhein 

Jal gaye hain jo log chaaon se

Ho maseeha ya phir dua "Atif"

Dard ghat'tay hain kab duaon se

Mujhay khabar hai keh tum main , mujh main jo dooriyan hain

Mujhay khabar hai 

Keh tum main , mujh main jo dooriyan hain 

Hamari qismat main woh likhi thein 

Main qismaton kay likhay huay ko 

Mit'taon kaisay?

Bichar kay tum se , jo aag seenay main jal rahi hai 

Batao us ki bujhaon kaisay ?

Keh tum to waqif ho is hunar se

Mujhay khabar hai 

Tumhari aankhon main palnay wala her aik sapna 

Tumhara kal hai ,

Woh kal keh jis ki her aik aahat 

Tum apni dharkan se sun rahi ho 

Magar tumhara jo aik kal tha 

Tumhein khabar hai woh kal kahan hai ?

Tum is ko maazi bana chuki ho 

Her aik rishta bhula chuki ho 

Her aik lamhay ka aks dil se mitta chuki ho 

Magar tumhara woh kal abhi bhi 

Meri nigahon main jal raha hai 

Hawa ka rukh to badal raha hai 

Magar ajab yeh mohabbatein hain  

Keh dil abhi tak !

Tumhari raahon pe chal raha hai 

Tumhari khatar machal raha hai 

Batao ! is ko bataon kaisay ?

Tumhari aankhon main palnay wala 

Koi bhi sapna mera nahin hai 

Main aik kal jo guzar chuka hoon 

Mujhay batao main kaisay dil se 

Tumharay naqsh-e-qadam mitaon 

Batao kaisay tumhein bhulaon 

Keh tum to waqif ho is hunar se 

Yehi hua na keh tum ne mujh ko bhula diya hai

"Yehi hua naa"

Yehi hua na 

keh tum ne mujh ko bhula diya hai 

Jo naqsh-e-ulfat , tumharay dil pe khud'da  hua tha 

Ussay khurach kay mitta diya hai 

Main dosti kay ajab mousamon main rehta hoon

Main dosti kay ajab mousamon main rehta hoon 

Kabhi dua'on , kabhi sazishon main rehta hoon 

Jo tum zara sa bhi badlay to jaan le lo gay 

Main kuch dino se ajab wahimon main rehta hoon 

Main jsi tarah se kabhi dushmano main rehta tha 

Usi tarah se abhi doston main rehta hoon 

Qadam qadam pe hain bikhray huye naqoosh meray 

Main teray shaher kay sab raaston main rehta hoon 

Kiya hai faisala jab se chragh ban'nanay ka 

Main Aitmaad se ab aandhiyon main rehta hoon 

Tumharay baad yeh din to guzar hi jata hai 

Main shab ko dair talak aanso'on main rehta hoon 

Lamhon ko sadiyon main dhaltay dekha

Main ne dekha 

Lamhon ko sadiyon main dhaltay dekha 

Suraj ko seenay main jaltay 

Dukh ko dil kay andar paltay 

Khud ko jaltay main ne dekha 

Jab se tujh se nata toota

Jis din tujh se baat nahin hoti

 Aik sms

Jis din tujh se baat nahin hoti 

Youn lagta hai din nahin charhta 

Youn lagta hai raat nahin hoti

Mohabbat ko bhulana chahiye tha

Mohabbat ko bhulana chahiye tha

Mujhay jee kar dikhana chahiye tha

Mujhay to saath us ka bhi bhout tha 

Ussay sara zamana chahiye tha

Prinda is liye be'kal tha itna 

Ussay bhi aashiyana chahiye tha

Tum us kay bin adhooray ho gaye ho 

Tumhein us ko batana chahiye tha

Bhour phirta raha tha dar'ba'dar main 

Mujhay bhi ik thikana chahiye tha

Chraghan ho raha tha shaher bhar main 

Hamein bhi dil jalana chahiye tha

Mohabbat ko bhulana chahiye tha

Mujhay jee kar dikhana chahiye tha

Suno itni guzarish hai

Suno! 

itni guzarish hai ,

Keh jab yeh naam tera , naam mera jur nahin sakta 

To apnay naam kay sang naam jora mat karo koi

 

Bicharnay walay tujhay khabar hai ?

Bicharnay walay 

Bicharnay walay tujhay khabar hai ?

Keh teray janay se mera jeewan 

Hazar khano main bat gaya hai 

Tujhay khabar hai bicharnay walay 

Keh meri khushiyan hi kho gayi hain 

Main kitna tnaha sa ho gaya hoon 

Wajood mera to is safar main 

Yeh dekh zakhmon se att gaya hai 

Main sochta hoon 

Magar yeh sochein 

Kiyon ik nuqtay pe jam gayi hain 

Kiyon lag raha hai 

Keh jaisay saansein hi tham gayi hain 

Mujhay bata de bicharnay walay 

Keh kaisay khud ko sambhalna hai 

Hijar kay rastay pe chaltay chaltay 

Yeh meray paon lahu lahu hain 

Yaqeen kar le main thak gaya hoon 

Bicharnay walay tujhay khabar hai 

Main kab ka khud se bichar chuka hoon 

 

 

Ussay kehna abhi tak dil dharakta hai

" Hawa kay haath aik paighaam "

Ussay kehna 

abhi tak dil dharakta hai 

Abhi tak saans chalti hai 

Abhi tak yeh meri aankhein 

Sohanay khawab bunti hain 

Meray honton ki jumbish main 

Tumhara naam rehta hai 

Abhi baarish ki boondon main 

Tumhara pyar baqi hai 

Ussay yeh bhi bata dena 

Abhi izhaar baqi hai 

Abhi yaadon kay kaanton se 

Mera daman ulajhta hai 

Tumhara pyar seenay main 

Kahin ab bhi dharakta hai 

Hawa ab bhi mawafiq hai 

Hamaray saath chalti hai 

Ussay kehna 

Judai ka abhi mousam nahin aaya 

Mohabbat ki kahani main

Kahin par gham nahin aaya 

Magar sab kuch badalnay main  

Bhala kya dair lagti hai 

Kisi ki yaad dhalnay main 

Bhala kya dair lagti hai 

Nayi subha nikalnay main  

Bhala kya dair lagti hai 

Ussay kehna 

Woh jaldi faisala kar lay 

Naye raston pe chalnay main 

Bhala kya dair lagti hai

 

 

Mujhay aksar yeh kehti thi mohabbat kuch nahin hoti

Mohabbat kuch nahin hoti 

Mujhay aksar yeh kehti thi mohabbat kuch nahin hoti 

Hijar ka khouf be'matlab , wasal kay khawab be'mahni 

Koi surat nigahon main kahan din raat rehti hai 

Ussay kiyon khamoshi kehiye keh jis main baat rehti hai 

Yeh aansoo , be'zuban aansoo , bhala kiyon bol saktay hain 

Kahan dil main kisi ki yaad se toofan uth'tay hain 

Kahan palkon kay saa'iye main nami din raat rehti hai 

Kahan hoti hain woh aankhein  jahan barsaat rehti hai 

Mujhay aksar yeh kehti thi mohabbat kuch nahin hoti 

Magar jab aaj barson baad main ne us ko dekha hai 

Keh us ki jheel aankhon main hijar ka khouf rehta hai 

Wasal kay khawab rehtay hain wahan barsaat rehti hai 

Youn lagta hai kai raaton se woh soyi nahin shayed 

Youn lagta hai kisi ki yaad ab din raat rehti hai 

Aur us ki narm palkon kay haseen saa'iye bhi geelay hain 

Aur us ki khamoshi aisi keh jis main baat rehti hai 

Mujhay ab woh nahin kehti mohabbat kuch nahin hoti 

Keh ab shayed mohabbat ki woh sab ram'zain samajhti hai

 

Apna dil thaam kisi yaad ki dehleez pe aa

Apna dil thaam kisi yaad ki dehleez pe aa

"Aa kisi shaam kisi yaad ki dehleez pe aa"

Dekh aatay hain nazar tujh ko manazir kaisay 

Le mera naam kisi yaad ki dehleez pe aa

 Ab to her gaam zaroorat hai teri yaadon ki 

Ab to her gaam kisi yaad ki dehleez pe aa

Gham-e-duniya na kahin cheen lay tujh ko mujh se

Chor sab kaam kisi yaad ki dehleez pe aa

Aaj ki shaam mana'na hai teray gahm ko mujhay 

 Aaj ki shaam kisi yaad ki dehleez pe aa

Jo samjho pyar mohabbat ka itna afsana hota hai

Jo samjho pyar mohabbat ka itna afsana hota hai 

Kuch aankhein pagal hoti hain , kuch dil deewana hota hai

Yeh aansoo , shikway , aahein , sab be'mahni si zanjeerain hain

Yeh aansoo , shikway , aahein , sab be'mahni si zanjeerain hain 

Kab in kay baandhay rukta hai , woh jis ko jana hota hai 

Main tujh ko kaisay bhoolon ga ? Tu mujh ko kaisay bhoolay gi ?

Kiyon aankhein chokhat par rakh kar tum duniya bhool kay baithay ho 

Mohabbaton ka bharam kholtay hain sanatay

Mohabbaton ka bharam kholtay hain sanatay 

Hijar ki shab main bhout boltay hain sanatay 

Kisi kisi ko yeh itna nawaz detay hain 

 Kisi kisi ko bhout roltay hain sanatay 

Rakhay hain chand sitaron ne haath kaano par 

Suna tha main ne bhout boltay hain sanatay 

Tumharay bas main agar ho to jaan lo in ko 

Kisi pe khud ko kahan kholtay hain sanatay 

Suna hain main ne yeh tanhaiyon kay dushman hain 

Suna hai un main zehar gholtay hain sanatay 

 Yeh meri shairy un hi ki ik adaa samjho 

Keh meri soch kay dar kholtay hain sanatay

Ajnabiyat bhi aik rishta hai dard hi dard ko samajhta hai

Ajnabiyat bhi aik rishta hai 

Dard hi dard ko samajhta hai 

Main bhi tayaar hoon saza kay liye

Khawab main ne bhi aik dekha hai 

Main to jis raastay pe chalta hoon 

Woh teri simt jaa nikalta hai 

Tu bhi duniya kaafir dahi nikla 

Tu bhi mujh ko kahan samajhta hai 

Dekh aankhein chamak rahi hain meri 

Dekh aik shair mujh pe utra hai 

Aaj phir reh gaya hoon main tanha 

Aaj phir main ne tum ko socha hai 

Ae gham-e-yaar bakhash de mujh ko 

Kiyon mujhay tu udaas karta hai 

Itna veeran , is qadar khamosh 

Mera chehra hai yeh , keh sehraa hai