Imran's Poetry: 04/26/16

Apr 26, 2016

Janay kitnay saal lagein gay tum ko bhool janay main

" Janay kitnay saal lagein gay "

Lafaz ko samjhnay main

Khawaish bhulanay main

Janay kitnay saal lagein gay tum ko bhool janay main

Sahil-e-samandar par pyasi man kharri hoon main

Aur bikharti jaa rahi hai rait meray haath se

Dil ko samjhanay main

Khud ko behlanay main

Janay kitnay saal lagein gay tum ko bhool janay main

Paniyon par rastay to pal main toot jatay hain

Par dil ki chahatein , chahatein hi rehti hain

Gehray zakham bharnay main

Mujh ko phir sambhalnay main

Janay kitnay saal lagein gay tum ko bhool janay main

Chahaton ki manzil jab door hoti jati hai

Faaslay mitanay main umar beet jati hai

Dard ki samaitnay main

Khawab ko mitanay main

Janay kitnay saal lagein gay tum ko bhool janay main

Us ko kya khabar Aansu'on ki larzish ki

" Toot'ta rishta "

Us ko kya khabar !

Aansu'on ki larzish ki

Chahaton ki bandish ki

Daastan adhoori hai

Us ki aankhon main mohabbat ka sitara ho ga

Aik din aaye ga woh shakhs hamara ho ga

Tum jahan meray liye seepiyan chunti ho gi

Woh kisi aur hi duniya ka kinara ho ga

Zindagi ! ab kay mera naam na shamil karna

Gar yeh teh hai keh yahi khel dobara ho ga

Jis kay honay se meri saans chala karti thi

Kis tarah us kay baghair apna guzara ho ga

Yeh achanak jo ujaala sa hua jaata hai

Dil ne chupkay se tera naam pukara ho ga

Ishq karna hai to din raat ussay sochna hai

aur kuch zehan main aaya to khasara ho ga

Yeh jo pani main chala aaya sunehri sa gharoor

Us ne dariya main kahin paon utara ho ga

Kon rota hai yahan raat kay sanaton main

Meray jaisa hi koi hijar ka mara ho ga

Mujh ko maloom hai joun hi main qadam rakhon ga

Zindagi tera koi aur kinara ho ga

Jo meri rooh main badal se garajtay hain Wasi

Us ne seenay main koi dard utaara ho ga

Kaam mushkil hai magar jeet hi loon ga us ko

Meray Mola ka Wasi joun hi ishara ho ga

Hosh walon ko khabar kya be'khudi kya cheez hai

Ishq keejiye phir samjhiye zindagi kya cheez hai

Un se nazrein kya milein roshan fizaein ho gayein

Aaj jana pyar ki jadu'gari kya cheez hai

Khulti zulfon se sikhaai mousamon ki shairy

Jhukti aankhon ne bataya may'kashi kya cheez hai

Hum labon se keh na paye un se haal-e-dil kabhi

Aur woh samjhay nahin khamoshi kya cheez hai

Apni batein kab dariya se kehti hai

Woh nadiya jo sehra sehra behti hai

Kya kuch dab jata hai us kay malbay main

Woh dewaar jo dil kay andar dehti hai

Raat se pehlay raat ki batein karta hai

Meray din ko kitni ujlat rehti hai

Reh jaye gar shaakh phoolon se khaali to

Her mousam kay tahnay tanha sehti hai

Ghazlein kehna main ne bhi ab chor diya

Aur woh bhi ab paar samandar rehti hai

Mohabbat ki aseeri se rihaai maangtay rehna

Bhout asaan nahin hota judai maangtay rehna

Zara sa ishq kar lena , zara si aankh bhar lena

Iwaz is kay magar sari khudai maangtay rehna

Kabhi mehroom honton par dua ka harf rakh dena

Kabhi wehshat main us ki na'risaai maangtay rehna

Wafaon kay tasalsul se mohabbat rooth jati hai

Kahani main zara si be'wafai maangtay rehna

Ajab hai wehshat-e-jaan bhi keh aadat ho gayi dil ki

Sakoot-e-sham-e-gham se hum'nawai maangtay rehna

Kabhi bachay ka nanhay haath par titli kay par rakhna

Kabhi phir us kay rangon se rihaai maangtay rehna

Kissay khabar thi keh dil ka yeh haal hona tha

Tumhein ganwaa kay hamein bhi malaal hona tha

Hamaray wastay rasta koi bacha kab hai

Wahin thay zakham wahin ind'maal hona tha

Main tera naam likhon khushbuein si jal uthein

Yeh mohjaza bhi meray khush jamaal hona tha

Yeh woh badan keh jissay tazgi muqaddar thi

Kissay khabar thi keh youn pai'maal hona tha

Kabhi gulaab se mehakein kabhi chragh jalein

Sukhan kay baab main yeh bhi kamaal hona tha

Kamaal-e-sada dili hai keh bad'gumani hai

Tumharay lab pe bhi koi sawal hona tha

Hawa-e-shaher ne rakha bhout udaas magar

Mera yaqeen-e-mohabbat ba'haal hona tha

Musalsal rokti hoon us ko shaher-e-dil main aanay se

Magar woh koh'kan rukta nahin dewaar dhanay se

Bhala kya dukh kay aangan main sulagti larkiyan janein

Kahin chuptay hain aansu aanchalon main munh chupanay se

Abhi to fasal taza hai hamaray harf-o-mahni ki

Abhi dartay nahin hum mousamon kay aanay janay se

Abhi to ishq main aankhein bichi hain , dil salamat hai

Zameenein banjh hoti hain kabhi faslein jalanay se

Tujhay tanha mohabbat ka yeh dariya paar karna hai

Nadamat ho gi us kay hoslon ko azmanay se

Hamein kis zarf kay kirdaar kay qissay sunata hai

Tujhay Ae shaher hum bhi jantay hain ik zamanay se

Tujhay bhi zabat-e-gham kay shouq ne pathar bana dala

Tujhay Ae dil bhout roka tha rasm-o-rah nibhanay se

Chasham-e-baidaar main aa saktay thay

Gul to gulzar main aa saktay thay

Biknay walon main nahin thay warna

Roz bazar main aa saktay thay

Hum bhi gar teri tarah kay hotay

Hum bhi darbaar main aa saktay thay

Kha gayi hai jo sukhan khamoshi

Kunj-e-izhaar main aa saktay thay

Teegh-e-aabru ki khata thi sari

Husan kay waar main aa saktay thay

Aaina-e-ehsaas ko maila nahin kartay

Her baat pe her shakhs se uljha nahin kartay

Paigham mila hai hamein khushbu ki zubani

Chalnay ka irada ho to thehra nahin kartay

Her dard-e-judai ki nu'maish nahin hoti

Her zakham-e-tamana ka tamasha nahin kartay

Haq baat sar-e-daar kahay apna qabeela

Ho mout muqabal bhi to socha nahin kartay

Hairat to kahin gum hai pas-e-chasham-e-tamasha

" Zaahie ka yeh parda hai keh parwah nahin kartay "

Be'wajha thehrtay nahin rastay main kahin par

Be'naam musafat ki tamana nahin kartay

Ik pal main wajood un ka zameen bos ho Mola

Jo pairr ghannay ho kay bhi saya nahin kartay

Milnay ka khayal us ko kabhi aaye bhi kaisay

Rukh-e-jaanib-e-sehra kabhi dariya nahin kartay

Mujhay is shaher-e-khu'ban ki fizaon se mohabbat hai

Mujhay tum se mohabbat hai

Mujhay is shaher-e-khu'ban ki fizaon se mohabbat hai

Jahan tum saans leti ho

Jinhein tum dekhti ho

Un fizaon se mohabbat hai

Jo tum ko chu kay aati hain

Tumhari ungliyon ki naram aahat se mohabbat hai

Keh jin se holay holay tum mera dar khat'ka'tati ho

Mujhay un raaston se bhi mohabbat hai jahan se tum guzarti ho

Kitabein jin ko parhti ho

Jo ghazlein gun'gunati ho

Jo baatein sochti ho

Doston main baith kar jo behas karti ho

Adhooray khat jinhein arsaal karna bhool jati ho

Ya jis andaz se meray liye cha'ey banati ho

Mujhay us se mohabbat hai

Mujhay tum se mohabbat hai

Nafrat to nafrat hai haqeer bana deti hai

Mohabbat bhi aashiq ko faqeer bana deti hai

Ishq woh samnadar hai keh sahil nahin jis ka

Mohabbat to sirf ik moj hai is ki

Mujh main sirf main hoon

Koi aur hota to hum hotay

Dukh ki lehar ne chaira ho ga Yaad ne kan'kar phainka ho ga

Dukh ki lehar ne chaira ho ga

Yaad ne kan'kar phainka ho ga

Aaj to mera dil kehta hai

Tu is waqat akela ho ga

Meray choomay huye haathon se

Auron ko khat likhta ho ga

Bheeg chalein ab raat ki palkein

Tu ab thak kar soya ho ga

Rail ki gehri seeti sun kar

Raat ka jungle goonja ho ga

Shaher kay khaali station par

Koi musafir utra ho ga

Aangan main phir chiriyan bolein

Tu ab so kar utha ho ga

Yaadon ki jalti shabnam se

Phool sa mukhra dhoya ho ga

Moti jaisi shakal bana kar

Aainay ko takta ho ga

Shaam hui ab tu bhi shayed

Apnay ghar ko lota ho ga

Neeli dhundli khamoshi main

Taron ki dhun sunta ho ga

Mera saathi shaam ka tara

Tujh se aankh milata ho ga

Shaam kay chaltay haath ne tujh ko

Mera salam to bheja ho ga

Pyasi kurlati koonjon ne

Mera dukh to sunaya ho ga

Main to aaj bhout roya hoon

Tu bhi shayed roya ho ga

"Nasir" tera meet purana

Tujh ko yaad to aata ho ga

Ae chand teri chandni youn jee ko jalaye

Jaisay meri aankhon main koi deep jalaye

Raaton ko bhi is aas pe khulay rakhon dareechay

Shayed keh woh rootha hua ghar dair se aaye

Aanay ki khushi teri mujhay itni nahin hoti

Janay ka magar ranj bari dair se jaye

Ik aansu bhi tera nahin jis ko tha gawara

Tanha kisi sawan main woh kis tarah nahaye

Kaisay tu bhulaye ga woh sadiyon ki rafaqat

Hum to teray janay ka woh lamha na bhula paye

"Haseeb" apnay milan pe faqat yeh hi dua hai

Hum jaisay milay hain Khuda sab ko youn milaye

Kabhi chor aankhon se dekh liya

" Aik khush baash larki "

Kabhi chor aankhon se dekh liya

Kabhi be'dhiyani ka zehar diya

KAbhi honton se sar'goshi ki

Kabhi chaal chali khamoshi ki

Jab janay lagay to rok liya

Jab barhnay lagay to tok diya

Aur jab bhi koi sawal kiya

Us ne hans kar taal diya

Likh likh kay tera naam mita'ta raha hoon main

Kuch is tarah se tujh ko bhulata raha hoon main

Dushman to meray paas se guzra nahin kabhi

Yeh zakham doston se hi khaata raha hoon main

Lutnay kay baad mujh ko yeh ehsaas ho gaya

Loota usi ne jis ko bachata raha hoon main

Jab mujh ko yeh pata tha woh mera nahin hai phir

Us ki gali main kis liye jata raha hoon main

Janay woh kis kay khawab ki tabeer ho gaya

Aankhon main jis kay khawab sajata raha hoon main

"Manan " main bhi kis qadar sada mizaaj hoon

Ik be'wafa ko apna banata raha hoon main

Lagta hai dabo kar kabhi maaray gi mujhay tu

In jheel si aankhon main utaaray gi mujhay tu

In achay dino main to bhout saath hain teray

Jab waqat paray ga to pukaray gi mujhay tu

Her chand tujhay meri wafa par bhi yaqeen hai

Mushkil se magar phir bhi guzaray gi mujhay tu

Toray gi sitam aisay keh jeeta bhi rahoon main

Ehmaq nahin keh jaan se maaray gi mujhay tu

Tu mujh se bhout toot kay karti thi mohabbat

Tha kis ko pata dil se utaaray gi mujhay tu

Manan bharosa tha mujhay zaat pe teri

Bigron ga agar main tu sanwaray gi mujhay tu

Yeh jo zindagi hai ajeeb si , yeh jo roz-o-shab hain udas se

" Meray hum'safar meray hum sukhan "

Yeh jo zindagi hai ajeeb si

Yeh jo roz-o-shab hain udas se

Yeh jo sa'atein hain ruki hui

Yeh jo dard meray naseeb kay

Teray bakhat main bhi likhay gaye

Yeh jo raabtay hain daray huye

Yeh jo dooriyan si hain darmiyan

Main agar tujhay jo sanwaar doon

Teray roz-o-shab main nikhaar doon

Mera haath thaam kay ehad do

Mujhay aisay dil main rakho gay tum

Meray saath saath raho gay tum

Meray humsafar meray hum'sukhan

Tujhay is qadar jo main pyar doon

Keh yeh zindgani hi haar doon

To batao na meray baad bhi

Yahi ehad apna nibhao gay

Ya keh mujh ko bhool hi jao gay

Resham zulfon , neelam aankhon walay chehray achay lagtay hain

Main shair hoon mujh ko ujlay chehray achay lagtay hain

Tum khud socho , aadhi raat ko thanday chand ki chaon main

Tanha rahon par hum dono kitnay achay lagtay hain

Aakhir aakhir sachay qoal bhi chubhtay hain dil walon ko

Pehlay pehlay payar kay jhootay waday achay lagtay hain

Jab se woh pardes gaya hai shaher ki ronaq rooth gayi

Ab to apnay ghar kay band dareechay achay lagtay hain

Kaali raat main jag'mag kartay taaray kon bujhata hai

Us dulhan ko yeh moti yeh gehnay , achay lagtay hain

Kal us roothay roothay yaar ko dekha to mehsoos hua

Mohsin ujlay jisam pe mailay kapray achay lagtay hain

Koi ik aadh sapna ho to phir acha bhi lagta hai

Hazaron khawab aankhon main saja kar kuch nahin milta

Ussay kehna keh palkon par na taankay khawab ki jhalar

Samnadar kay kinaray ghar bana kar kuch nahin milta

Shayed koi khawaish roti rehti hai

Meray andar baarish hoti rehti hai

Rukay rukay se qadam ruk kay baar baar chalay

Qaraar de kay teray dar se be'qaraar chalay

Uthaye phirtay thay ehsaan jisam ka jaan par

Chalay jahan se to yeh peh'rahan utaar chalay

Na janay kon si matti watan ki matti thi

Nazar main , dhool , jigar main liye ghubaar chalay

Sehar na aayi kai baar neend se jaagay

So raat raat ki yeh zindagi guzaar chalay

Mili hai shamma se yeh rasm-e-aashiqui hum ko

Gunnah haath pe lay kar gunnag gaar cahlay

Dil ka aangan raat andhera ,Jeewan gehri shaam

Shaam

Dil ka aangan raat andhera

Jeewan gehri shaam

Dukh kay mousam sukh aangan main

Utray aayi shaam

Rang , dhanak aur badal khushbu

Qissay khawab huye

Sukh jeewan ka loot kay lay gayi

Ghoor andheri shaam

Pichli raat ka ujla mousam

Rang bahaar kay din

Roshan subhein nikhri batein

Pyar khumaar kay din

Shabnam lehjay , resham batein

Sab ka aik hi naam

Tara si aankhon main bhar gayi

Dukh ka kajal shaam

Jhoota roop dikha kar apna

Aakhir kar gayi shaam

Roshan , jag'mag kartay din se

Dhoka kar gayi shaam

Raat siyahi se aalam ka

Soda kar gayi shaam

Shaam se aankh main nami si hai

Aaj phir raat ki kami si hai

Dafan kar do hamein keh saans aaye

Nabaz kuch dair se thami si hai

Kon pathraa gaya hai aankhon main

Barf palkon pe kiyon jami si hai

Waqat rehta nahin kahin tik kar

Aadat us ki bhi aadmi si hai

Aaiye raastay alag kar lain

Yeh zaroorat bhi bahami si hai