Bakh'shish hua yakeen , gumaan be'libaas hai

Bakh'shish hua yakeen , gumaan be'libaas hai 

Hai aag jama-e-zaib , dhuwan be'libaas hai 

Hai yeh fiza hazar libason ka ik libaas

Jo be'libaas hai woh kahan be'libaas hai 

Malboos taar tar-e-nafs hai ziyan-e-sood 

Sood-e-ziyan yeh hai keh ziyan be'libaas hai 

Meh'mal nasheen-e-rang ! Koi posteen-e-rang 

Raig rawan hoon raig-e-rawan be'libaas hai 

Ab para para poshish-e-guftaar bhi nahin 

Hain saans be'rafu soziyan be'libaas hai 

Sad jama-e-posh jis ka hai jism bar'hana bhi 

Khilwat sara'iye jaan main woh jaan be'libaas hai 

Hai bood aur nabood main poshish na pai'rahan 

Yaaran-e-makeen kya keh makaan be'libaas hai 

Tu khud hi daikh rang-e-badan apna josh-e-rang 

To apnay libaas main jaan be'libaas hai 

Gham ki bar'hangi ko kahan se jurray libaas 

Main lab seesay huye hon , faghan be'libaas hai 

Koi gumaan bhi nahin darmiyan , gumaan hai yahi

Koi gumaan bhi nahin darmiyan , gumaan hai yahi 

Isi gumaan ko bacha loon keh darmiyan hai yahi 

Yeh aadmi kay hain anfaas jis kay zehar farosh 

Ussay bithao keh mera mizaaj wahan hai yahi 

Kabhi kabhi jo na ayo nazar to seh lain gay 

Nazar se door na hona keh imtihaan hai yahi 

Main aasman ka ajab kuch lihaaz rakhta hoon 

Jo is zameen ko seh lay woh aasman hai yahi 

Yeh aik lamha jo dariyaft kar liya main ne 

Wisal-e-jaan hai yahi aur firaaq-e-jaan hai yahi 

Tum un main se ho jo yahan fateh'mand thehray hain 

Suno keh wajah gham-e-dil-e-shakistagaan hai yahi 

Kon se shouq kisi hawas ka nahin

Kon se shouq kisi hawas ka nahin 

Dil meri jaan teray bas ka nahin 

Raah tum karwaan ki lo keh mujhay 

Shouq kuch naghma-e-jars ka nahin 

Haan mera woh mo'amla hai keh ab 

Kaam yaaran-e-nukta ras ka nahin 

Hum kahan se chalay hain aur kahan 

Koi andaza-e-paish ka nahin 

Ho gayi is gilay main umar tamaam 

Paas sholay ko khaar-o-khash ka nahin 

Mujh ko khud se juda na honay do 

Baat yeh hai main apnay bas ka nahin 

Kya laraai bhala keh hum main se

Koi bhi sainkron bars ka nahin 

Dil tamana se dar gaya jaanam

Dil tamana se dar gaya jaanam 

Sara nasha utar gaya jaanam 

Ik palak beech rishta-e-jaan se

Her zamana guzar gaya jaanam 

Tha ghazab faisalay ka ik lamha 

Kon phir apnay ghar gaya jaanam 

Janay kaisi hawa chali ik baar 

Dil ka daftar bikhar gaya jaanam 

Apni khawab-o-khayal duniya ko 

Kon bar'baad kar gaya jaanam 

Thi sitam hijar ki maseehai 

Aakhrish zakham bhar gaya jaanam 

Ab bhala kya raha hai kehnay ko 

Yehni main be'asar gaya jaanam 

Na raha dil na daastan dil ki 

Ab to sab kuch basar gaya jaanam 

Zaahir tha apnay tor se jeena 

Koi ik tha jo mar gaya jaanam

Gumaan ki ik parishan manzari hai

Gumaan ki ik parishan manzari hai 

Bas ik deewar hai aur be'dari hai 

Agarcha zehar hai duniya ki her baat 

Main pee jaon isi main behtari hai 

Tu aye baad-e-khizaan us gul se kehna 

Keh shaakh umeed ki ab tak harri hai 

Gali main us nigar-e-na'shano ki 

Faghan karna hamari nokari hai 

Koi leh'kay khayaban-e-saba main 

Yahan to aag seenay main bharri hai  

Haal khush tazkara nigaaron ka

Haal khush tazkara nigaaron ka 

Tha tu ik shaher khaak'saaron ka 

Pehlay rehtay thay koocha-e-dil main 

Ab pata kya hai dil fagaron ka 

Ku-e-jaana ki naaka bandi main 

Bistra ab kahan hai yaaron ka 

Chalta jaata hai saans ka lashkar 

Kon pur'saan hai yaad'gaaron ka 

Apnay andar ghist raha hoon main 

Mujh se kya zikar raah'guzaron ka 

Un se jo shaher main hain be'daa'wa

Aaish mat pooch daway'daron ka 

Kaisa yeh moh'raka hai bar'pa jo 

Na piyadon ka na sawaron ka 

Main to khair apni jaan hi se gaya

Kya hua janay jaan'nisaron ka 

Kuch nahin ab siwa-e-khaakstr

Aik jalsa tha shola khawaron ka 

Woh khayal-e-mohaal kis ka tha

Woh khayal-e-mohaal kis ka tha 

Aaina be'misaal kis ka tha 

Safri apnay aap se tha main 

Hijar kis ka , wisaal kis ka tha 

Main to khud main kahin na tha mojood 

Meray lab par sawal kis ka tha 

Thi meri zaat ik khayal-e-Aashoob

Janay main hum'khayal kis ka tha 

Jab keh main her nafs tha be'ehwaal 

Woh jo tha mera haal kis ka tha 

Do'pehar ! baad-e-tund ! koocha-e-yaar !

Woh ghubaar-e-malaal kis ka tha  

Dil se hai bhout guraiz paa tu

Dil se hai bhout guraiz paa tu 

Tu kon hai aur hai bhi kya tu 

Kiyon mujh main ganwaa raha hai khud ko 

Mujhay aisay yahan hazar haa tu 

Hai teri judai aur main hoon 

Miltay hi kahin bichar gaya tu 

Poochay jo tujhay koi zara bhi 

Jab main na rahon to daikhna tu 

Ik saans hi bas liya hai main ne 

To saans na tha , so kya hua tu 

Hai kon jo tera dhiyaan rakhay 

Baahir meray bas kahin na jaa tu 

Main sahon karb-e-zindagi kab tak

Main sahon karb-e-zindagi kab tak 

Rahay aakhir teri kami kab tak 

Kya main aangan main chor doon sona 

Jee jalaye gi chandani kab tak 

Ab faqat yaad reh gayi hai teri 

Ab faqat teri yaad bhi kab tak 

Main bhala apnay hosh main kab tha 

Mujh ko duniya pukarti kab tak 

Khaima-gah-e-shumaal main ..... aakhir 

Us ki khushbu rachi basi kab tak 

Ab to bas aap se gila hai yeh hi 

Yaad ayein gay aap hi kab tak 

Marnay walo zara batao to 

Rahay gi yeh chala chali kab tak 

Jis ki tooti thi saans aakhir-e-shab 

Dafan woh aarzu hui kab tak 

Dozakh-e-zaat ba'wajood teray 

Shab-e-furqat nahin jali kab tak 

Apnay choray huye mohallon par 

Raha doraan-e-jaan kani kab tak 

Nahin maloom meray aanay par 

Us kay koochay main lu chali kab tak 

Khoon thookay gi zindagi kab tak

Khoon thookay gi zindagi kab tak 

Yaad aaye gi ab teri kab tak 

Jaanay walon se poochna yeh saba 

Rahay Aabaad dil ki gali kab tak 

Ho kabhi to sharab-e-wasal naseeb 

Pee'iye jaon main khoon hi kab tak 

Dil ne jo umar bhar kamai hai 

Woh dukhan dil se jaye gi kab tak 

Jis main tha soz-e-aarzu us ka 

Shab-e-gham woh hawa chali kab tak 

Bani aadam ki zindagi hai azaab 

Yeh khuda ko rulaye gi kab tak 

Haadsa zindagi hai aadam ki 

Saath de gi bhala khushi kab tak 

Hai jahanum jo yaad ab us ki 

Woh beh'shat-e-wajood thi kab tak 

Woh saba us kay bin jo aayi thi 

Woh ussay poochti rahi kab tak 

Haal-e-sehan-e-wajood thehray ga 

Tera hungaam-e-rukhsati kab tak 

Main na thehron na jaan tu thehray

Main na thehron na jaan tu thehray 

Kon lamhon kay ru ba'ru thehray 

Na guzarnay pe zindagi guzri 

Na theharnay pe chaar su thehray 

Hai meri bazam-e-be'dili bhi ajeeb 

Dil pur'khoon jahan sabu thehray 

Main yahan mudaton main aaya hoon 

Aik hungama ku-ba-ku thehray 

Mehfil-e-rukhsat hamesha hai 

Ayo ik hashar-e-ha'oo thehray 

Ik tawajo ajab hai simaton main 

Keh na bolon to guftagu thehray 

Kaj adaa thi bhout umeed magar 

Hum ne bhaiji "Jon" aik heela jo thehray 

Aik chaak-e-bar'hangi hai wajood 

Pai'rahan ho to be'rafu thehray 

Main jo hoon , kya nahin hoon main khud bhi 

Khud se baat aaj do badu thehray 

Baagh-e-jaan se mila na koi samar 

"Jon" hum to namu namu thehray 

Yaad ussay intahai kartay hain

Yaad ussay intahai kartay hain

So hum us ki buraai kartay hain 

Pasand aata hai dil se Yousaf ko 

Woh jo Yousaf kay bhai kartay hain 

Hai badan khawab-e-wasal ka dang'gal

Ayo zor azmai kartay hain 

Us ko aur ghair ko khabar hi nahin 

Hum lagai bujhai kartay hain 

Hum ajab hain keh us ki baanhon main 

Shikwa-e-wasal main bhi hum dono

Halat-e-wasal main bhi hum dono 

Lamha lamha judai kartay hain 

Aap jo meri jaan hain , main dil hoon 

Mujh se kaisi judai kartay hain 

Ba'wafa aik doosray se miyan 

Her nafs be'wafai kartay hain 

Jo hain sarhad kay paar se aaye 

Woh bhout khud satai kartay hain 

Pal qayamat kay sood khawar hain "Jon" 

Yeh abad ki kamai kartay hain 

Thehron na gali main teri wehshat ne kaha tha

Thehron na gali main teri wehshat ne kaha tha 

Main had se guzar jaon mohabbat ne kaha tha 

Darr tak teray laayi thi naseem-e-nafs angaiz 

Dam bhar na rukon yeh teri nikhat ne kaha tha 

Ehsaan kisi saru kay saa'iye ka na loon main 

Mujh se hi teray fitna-e-qaamat ne kaha tha 

Maara hoon mashiyat ka nahin kuch meri marzi 

Yeh bhi teray qaamat ki qayamat ne kaha tha 

Dil-e-shaher se kar jaon safar main su-e-duniya 

Mujh se to yahi meri sahulat ne kaha tha 

Sar par ik sach much ki talwar aaye to

Sar par ik sach much ki talwar aaye to 

Koi qaatil bar'sar-e-kaar aaye to 

Sar khuru ho jayon main to yaar abhi 

Dil saleeqay se sar-e-daar aaye to 

Waqat se ab aur kya rishta karein 

Jaan-e-jaana hum tujhay haar aaye to 

Sab hain haami aasman kay aye zameen 

Koi tera bhi taraf daar aaye to 

Aye aza daro ! karo majlis bar'pa 

Admi , insaan ko maar aaye to 

Woh jo tha woh kabhi mila , kabhi mila hi nahin

Woh jo tha woh kabhi mila , kabhi mila hi nahin 

So giriban kabhi sila hi nahin 

Us se her dam mo'amla hai magar 

Darmiyan koi sil'sala hi nahin 

Be'milay hi bichar gaye hum to 

So gilay hain koi gila hi nahin 

Tu jo hai jaan , tu jo hai jaana 

Tu hamein aaj tak mila hi nahin 

Mast hoon main mehak se us gul ki 

Jo kisi baagh main khila hi nahin 

Haye  "Jon" us ka woh piyala-e-naaf 

Jaam aisa koi mila hi nahin 

Tu hai ik umar se faghaan paisha 

Abhi seena tera chhilla hi nahin ?     

Jab hum kahin na hon gay tab shaher bhar main hon gay

Jab hum kahin na hon gay tab shaher bhar main hon gay 

Ponchay gi jo na us tak hum us khabar main hon gay 

Thak kar girein gay jis dam banhon main teri aa kar 

Us dam bhi kon janay hum kis safar main hon gay 

Aye jaan-e-ehad-o-paymaan , hum ghar basa'ein gay haan 

Tu apnay ghar main ho ga , hum apnay ghar main hon gay 

Main lay kay dil kay rishtay ghar se nikal chuka hoon 

Deewar-o-dar kay rishtay , deewar-o-dar main hon gay

Tujh aks kay siwa bhi Aye husan waqat-e-rukhsat 

Kuch aur aks bhi to is chashm-e-tar main hon gay

Aisay saraab thay woh aisay thay kuch keh ab bhi 

Main aankh band kar loon tab bhi nazar main hon gay 

Us kay naqoosh-e-paa ko raahon main dhoondna kya 

Jo us kay zer-e-paa thay woh meray sar main hon gay 

Woh baish-tar hain jin ko kal ka khayal kam hai 

Tu ruk sakay to hum bhi in baish-tar main hon gay 

Aangan se woh jo pichlay dalaan tak basay thay 

Janay woh meray saa'iye ab kis khandar main hon gay 

Woh kya kuch na karnay walay thay

Woh kya kuch na karnay walay thay 

Bas koi dam main marnay walay thay 

Thay gilay aur gard'baad ki shaam 

Aur hum sab bikharnay walay thay 

Woh jo aata to us ki khushbu main 

Aaj hum rang bharnay walay thay 

Sirf afsoso hai yeh tanz nahin 

Tum na sanwray , sanwarnay walay thay 

Youn to marna hai aik baar magar 

Hum kai baar marnay walay thay  

Tiflaan-e-koocha gard kay pathar bhi kuch nahin

Tiflaan-e-koocha gard kay pathar bhi kuch nahin

Soda bhi aik weham hai aur sar bhi kuch nahin 

Main aur khud ko tujh se chupa'on ga yehni main 

Lay daikh lay miyan meray andar bhi kuch nahin 

Bas ik ghubaar weham hai yak koocha gard ka 

Dewaar-e-bood kuch nahin aur dar bhi kuch nahin 

Yeh shaher daar-o-mohtasib-o-molvi hi kya 

Peer-e-mughaan-o-rind-o-qalandar bhi kuch nahin 

Shaikh haram luqma ki parwa hai kiyon tumhein 

Masjid bhi us ki kuch nahin mimber bhi kuch nahin 

Maqdoor apna kuch bhi nahin is diyaar main 

Shayed woh jabar hai keh muqaddar bhi kuch nahin 

Jaani main teray naaf piyalay pe hoon fida 

Yeh aur baat hai tera paikar bhi kuch nahin 

Yeh shab ka raqs-o-rang to kya sun meri kohan 

Subh-e-shataab kosh ka daftar bhi kuch nahin 

Bas ik ghubaar-e-tor gumaan ka hai teh ba teh 

Yehni nazar bhi kuch nahin manzir bhi kuch nahin 

Hai ab to aik haal-e-sakoon-e-hameshgi 

Parwaz ka to zikar hi kya par bhi kuch nahin 

Kitna darona hai yeh shaher-e-nabood-o-bood

Aisa darona keh yahan dar bhi kuch nahin 

Pehlu main hai jo meray kahin aur hai woh shakhs 

Yehni wafa-e-ehad ka bistar bhi kuch nahin 

Nisbat main un ki jo hai aziyat woh hai magar 

Shah rag bhi koi shay nahin aur sar bhi kuch nahin 

Yaran ! tumhein jo mujh se gila hai to kis liye 

Mujh ko Aaitraaz Khuda par bhi kuch nahin 

Guzray gi "Jon" shaher main rishton kay kis tarah 

Dil main bhi kuch nahin hai zuban par kuch nahin  

Kaam ki baat main ne ki hi nahin

Kaam ki baat main ne ki hi nahin 

Yeh mera tor-e-zindagi hi nahin 

Aye umeed aye umeed-e-no maidaan 

Mujh se miyat teri uthi hi nahin 

Main jo tha us gali ka mast kharam 

Us gali main meri chali hi nahin 

Yeh suna hai keh meray kooch kay baad 

Us ki khushbu kahin basi hi nahin

Thi jo aik faakhta udaas udaas 

Subha woh shaakh se urri hi nahin 

Mujh main ab mera jee nahin lagta 

Aur sitam yeh keh mera jee hi nahin 

Woh jo rehti thi dil mohallay main 

Phir woh larki mujhay mili hi nahin 

Jaaiye aur khaak uraaiye aap 

Ab woh ghar kya keh woh gali hi nahin 

Haye woh shouq jo nahin tha kabhi 

Haye woh zindagi jo thi hi nahin 

Sab chalay jao , mujh main taab nahin

Sab chalay jao , mujh main taab nahin 

Naam ko bhi ab iztraab nahin 

Khoon kar doon teray shabaab ka main 

Mujh sa qatil tera shabaab nahin 

Ik kitab-e-wajood hai to sahi 

Shayed is main dua ka baab nahin 

Tu jo parhta hai Bu'ali ki kitab 

Kya yeh aalam koi kitab nahin 

Apni manzil nahin koi fariyaad 

Raksh bhi apna bad rakaab nahin 

Hum kitabi sada kay hain lakin 

Hasab-e-mansha koi kitab nahin 

Bhool jana nahin gunnah ussay 

Yaad karna ussay sawab nahin 

Parh liya us ki yaad ka nuskha 

Us main shohrat ka koi baat nahin 

Ab kisi se mera hisaab nahin

Ab kisi se mera hisaab nahin 

Meri aankhon main koi jawab nahin 

Khoon kay ghoont pee raha hoon main 

Yeh mera khoon hai sharaab nahin 

Main sarabi hoon meri aas na cheen 

Tu meri aas hai saraab nahin 

Noch phainkay labon se main ne sawal

Taqat-e-showkhi-e-jawaab nahin 

Ab to punjab bahi nahin punjab 

Aur khud jiya ab do aab nahin 

Gham abad ka nahin hai aan ka hai 

Aur us ka koi hisaab nahin 

Bu'dash ik ro hai aik ro yehni 

Is ki fitrat main inqalaab nahin 

Kya yeh aafat nahin azaab nahin

Kya yeh aafat nahin azaab nahin 

Dil ki haalat bhout kharaab nahin 

Bood pal pal ki be'hisaabi hai 

Keh mohaasab nahin hisaab nahin 

Khoob gaao bajao aur piyo 

In dino shaher main janaab nahin 

Sab bhatak'tay hain apni galiyon main 

Taba khud koi bariyaab nahin 

Tu hi mera sawal azal se hai 

Aur sajan tera jawaab nahin 

Hifz hai " shams-e-baaz'gha " mujh ko 

Par muyassar woh mah'taab nahin 

Tujh ko dil-e-dard ka nahin ehsaas 

So meri pandliyon ko daab nahin 

Nahin jurta khayal ko bhi khayal 

Khawaab main bhi to koi khawaab nahin 

Satar-e-mu us ki zer-e-naaf ki haye 

Jis ki chaqu zano ko taab nahin  

Ajab ik tor hai jo hum sitam ijaad rakhein

Ajab ik tor hai jo hum sitam ijaad rakhein 

Keh na us shakhs ko bhulein na ussay yaad rakhein 

Ehad us ko chana-e-dil se hai so us koochay main 

Hai koi apni jaga hum jissay bar'baad rakhein 

Kya kahein kitnay hi niktay hain jo bartay na gaye 

Khush badan ishq karein aur hamein ustaad rakhein 

Be'satoon aik nawahi main hai shaher-e-dil ki 

Tesha inaam karein aur koi farhaad rakhein 

Aashiyana koi apna nahin par shouq yeh hai 

Ik qafs layein kahin se koi siyaad rakhein 

Hum ko infaas ki apnay hai imaarat karni 

Is imaarat ki labon par teray buniyaad rakhein 

Teri qeemat ghat'tai jaa rahi hai

Teri qeemat ghat'tai jaa rahi hai 

Mujhay furqat sikhai jaa rahi hai 

Yeh hai tameer-e-duniya ka zamana 

Havaili dil ki dhaai jaa rahi hai 

Woh shay jo sirf hindustan ki thi 

Woh pakistan laai jaa rahi hai 

Kahan ka deen , kaisa deen , kya deen 

Keh kya garr barr machaai jaa rahi hai 

Sha'oor-e-aadmi ki sar'zameen tak 

Khuda ki ab do'haai jaa rahi hai 

Bhout si suratein manzir main laa kar 

Tamana aazmaai jaa rahi hai 

Mujhay ab hosh aata jaa raha hai 

Khuda teri khudaai jaa rahi hai 

Nahin maloom kya sazish hai dil ki 

Keh khud hi maat khaai jaa rahi hai 

Hai veerani ki dhoop aur aik aangan 

Aur us par lu chaalai jaa rahi hai  

Apnay liye to bas edhi tha (Abdul Sattar Edhi)

Apnay liye to bas edhi tha (Abdul Sattar Edhi)

Deed tha shayed

Zakhmon pe phaya rakhta tha

Tees uthay ya ghaao pukaray

Dard samait kay lay jata tha

Nahin nahin koi paremi tha

Adam zaad se preet lagaye

Her pal yaar ki chahat main gum

Mann main pyar ka deep jalaye

Apnay nagar ka raja tha kya !

Daikh raikh janta ki karna

Her ghaao pe phaya dharna

Aas umeed dilon main bharna

Lagta hai keh dewana tha

Sab se pyar sabhi se chahat

Bair se aur nafrat se nafrat

Sab ki khatar chain aur rahat

Waid tha , raja tha , paremi tha

Tha darwaish , koi sufi tha

Kitnay roop thay woh jo bhi tha

Apnay liye to bas edhi tha

Khidmat hi meraas hai us ki

Hum'dardi hai us ka wirsa

Tarka us ka hai gham khawari

Aur hum saray us ka kumba

Ayo , hum waris ban jayein

Jitna bhi hi jis kay bas main

Utna to dukh dard mita'ein

Zakhmon par hum rakhein marham

Andheron main deep jalayein

Nayi khawaish rachai jaa rahi hai

Nayi khawaish rachai jaa rahi hai 

Teri furqat manaai jaa rahi hai 

Nibhaai thi na hum ne janay kis se 

Keh ab sab se nibhaai jaa rahi hai 

Hamaray dil mohallay ki gali se 

Hamari laash laai jaa rahi hai 

Kahan lazzat woh soz-e-justagoo ki 

Yahan her cheez paai jaa rahi hai 

Khosha-e-ehwaal apni zindagi ka 

Saleeqay se ganwaai jaa rahi hai 

Dareechon se tha apnay , bair hum ko 

So khud deemak lagaai jaa rahi hai 

Judai mousamon ki dhoop suniyo 

Meri kiyaari jalaai jaa rahi hai 

Meri jaan ab yeh surat hai keh mujh se 

Teri aadat churaai jaa rahi hai 

Main peh'ham haar kay yeh sochta hoon 

Woh kya shai hai jo haari jaa rahi hai 

Sar-e-sehra habaab baichay hain

Sar-e-sehra habaab baichay hain 

Lab-e-dariya saraab baichay hain 

Aur to kya tha baichnay kay liye 

Apni aankhon kay khawab baichay hain 

Khud sawal in labon se kar kay miyan 

Khud hi in kay jawab baichay hain 

Zulf koochon main shana kas ne teray 

Kitnay hi page-o-taab baichay hain 

Shaher main hum kharab haalon ne 

Haal apnay kharaab baichay hain 

Jaan-e-man teri be'niqabi ne 

Aaj kitnay niqaab baichay hain 

Meri fariyaad ne sakoot kay saath 

Apnay lab kay azab baichay hain 

Ku-e-jaana main aur kya maango

Ku-e-jaana main aur kya maango

Haalat-e-haal-e-yak sada maango 

Her nafs tum yakeen-e-mun'am se 

Rizq apnay gumaan ka maango 

Hai agar woh bhout hi dil nazdeek 

Us se doori ka silsala maango

Dar-e-matlab hai kya talab angeza

Kuch nahin wahan so kuch bhi maango 

Gosha-e-geer ghubaar-e-zaat hoon main 

Mujh main ho kar mera pata maango 

Us shikam-e-raqs gar kay sahil ho 

Naaf piyalay ki tum ataa maango 

Laakh jan'jaal managnay main hain 

Kuch na maango faqat dua maango 

Na hum rahay na woh khawabon ki zindagi hi rahi

Na hum rahay na woh khawabon ki zindagi hi rahi 

Guman guman si mehak khud ko dhoondti hi rahi 

Ajab tarah rukh-e-aain'dagi ka rang urra 

Diyaar-e-zaat main az khud gazishtagi hi rahi 

 Hareem-e-shouq ka aalam bata'ein kya tum ko 

Hareem-e-shouq main bas shouq ki kami hi rahi 

Pas-e-nigah-e-tagafal thi ik nigah keh thi 

Jo dil kay chehra-e-hasrat ki taazgi hi rahi 

Ajeeb aaina-e-par'taw-e-tamana tha 

Thi us main aik udasi  jo saji hi rahi 

Badal gaya sabhi kuch is diyaar-e-bu'dash main 

Gali thi jo teri jaan woh teri gali hi rahi 

Tamaam dil kay mohallay ujar chukay thay ,, magar 

Bhout dino to hansi hi rahi , khushi hi rahi 

Woh daastan tumhein ab bhi yaad hai keh nahin 

Jo khoon thooknay walon ki be'hissi hi rahi 

Suna'on main kissay afsana-e-khayal-e-malaal 

Teri kami hi rahi aur meri kami hi rahi 

Hawaas main to na thay phir bhi kya na kar aaye

Hawaas main to na thay phir bhi kya na kar aaye 

Keh daar par gaye hum aur phir utar aaye 

Ajeeb haal kay majnu thay jo ba'ishwa-o-naaz 

Ba'su-e-baad yeh mehmal main baith kar aaye 

Kabhi gaye thay miyan jo khabar ko sehra ki 

Woh aaye bhi to bagulon kay saath ghar aaye 

Koi junoon nahin si da'iyaan-e-sehra ko 

Keh jo azaab bhi aaye woh shaher par aaye 

Batao daam guru chahiye tumhein ab kya 

Prind'gaan-e-hawa khaak par utar aaye 

Ajab khaloos se rukhsat kiya gaya hum ko 

Khayal-e-khaam ka tawaan tha so bhar aaye 

Zikar bhi us se kya bhala mera

Zikar bhi us se kya bhala mera 

Us se rishta hi kya raha mera 

Aaj mujh ko bhout bura keh kar 

Aap ne naam to liya mera 

Aakhri baar tum se yeh kehna hai 

Yaad rakhna na tum kaha mera 

Ab to kuch bhi nahin hoon main waisay 

Kabhi woh bhi tha mubtala mera 

Woh bhi manzil talak ponch jata 

Us ne dhoonda nahin pata mera 

Tujh se mujh ko nijaat mil jaye 

Tu dua kar keh ho bhala mera 

Kya bataon bichar gaya ya raha 

Aik balqees se saba mera 

Juz gumaan aur tha hi kya mera

Juz gumaan aur tha hi kya mera

Faqat ik mera naam tha mera

Nikhat-e-pai'rahan se us gul ki

Sil'sala be'saba raha mera

Mujh ko khawaish hi dhoondnay ki na thi

Mujh main khoya raha khuda mera

Thook de khoon , jaan lay woh agar

Aalam-e-tark-e-mud'da  mera

Jab tujhay meri chah thi jaana !

Bas wohi waqat thi karra mera

Koi mujh tak ponch nahin paata 

Itna asaan hai pata mera 

Aa chuka woh paish murawat se 

Ab chalon kaam ho chuka mera 

Aaj main khud se ho agya ma'yoos 

Aaj ik yaar mar gaya mera 

Hijar ki aankhon se aankhein to milatay jaaiye

Hijar ki aankhon se aankhein to milatay jaaiye 

Hijar main karna hai kya yeh to bata'tay jaaiye 

Ban kay khushbu ki udasi rehna dil kay baagh main 

Door hotay jaaiye , nazdeek aatay jaaiye 

Jatay jatay aap itna kaam to keejiye mera 

Yaad ka sara sar-o-samaan jalatay jaaiye 

Reh gayi umeed to bar'baad ho jaon ga main 

Jaaiye to phir mujhay sach much bhulatay jaaiye 

Zindagi ki anjuman ka bas yahi dastoor hai 

Barh kat mil'iye aur mil kar door ho jaaiye 

Aakhri rishta to hum main ik khushi ik gham ka tha 

Muskuratay jaaiye aansu bahatay jaaiye 

Woh gali hai ik sharabi chasham-e-kaafir ki gali 

Us gali main jaaiye to larr'kharatay jaaiye 

Aap ko jab mujh se shikwa hi nahin koi to phir 

Aag hi dil main lagani hai lagatay jaaiye 

Kooch hai khawabon se tabeeron ki simaton main to phir 

Jaaiye par dam-ba-dam bar'baad jaatay jaaiye 

Aap ka mehmaan hoon main , aap meray mezbaan 

So mujhay zehar-e-murawat to pilatay jaaiye 

Hai sar-e-shab aur meray ghar main nahin koi chragh 

Aag to is ghar main jaana na lagatay jaaiye 

Tumhara hijar mana loon agar ijazat ho

Tumhara hijar mana loon agar ijazat ho 

Main dil kisi se laga loon agar ijazat ho 

Tumharay baad bhala kya hain wada-o-pai'maan 

Bas apna waqat ganwa loon agar ijazat ho 

Tumharay hijar ki shab haye car main jaana 

koi chragh jala loon agar ijazat ho 

Junoon wohi hai , wohi main , magar hai shaher naya 

Yahan bhi shor macha loon agar ijazat ho 

Kissay hai khawish-e-marham'gari  magar phir bhi 

Main apnay zakham dikha loon agar ijazat ho 

Tumhari yaad main jeenay ki aarzu abhi 

Kuch apna haal sambhalon agar ijazat ho  

Azab-e-hijar barha loon agar ijazat ho

Azab-e-hijar barha loon agar ijazat ho 

Ik aur zakham main khaa loon agar ijazat ho 

Tumharay aariz-o-lab ki judai kay din hain 

Main jaam munh se laga loon agar ijazat ho 

Tumhara husan , tumharay khayal ka chehra 

Shab'bahaton main chuppa loon agar ijazat ho 

Tum hi se hai meray her khawab-e-shouq ka rishta 

Ik aur khawab kama loon agar ijazat ho 

Thak'ka diya hai tumharay firaaq ne mujh ko 

Kahin main khud ko gira loon agar ijazat ho 

Bara-e-naam be'naam-e-shab-e-wisal yahan 

Shab-e-firaaq mana loon agar ijazat ho 

Kisi se koi khafa bhi nahin raha ab to

Kisi se koi khafa bhi nahin raha ab to 

Gila karo keh gila bhi nahin raha ab to 

Woh ka'hishein hain keh aish-e-junoon to kya yehni 

Gharoor-e-zehan-e-risa bhi nahin raha ab to 

Shakist-e-zaat ka iqraar aur kya ho ga 

Keh adaa-e-wafa bhi nahin raha ab to 

Chunnay huye hain labon pe teray hazar jawab 

Shikayaton ka maza bhi nahin raha ab to 

Hoon mubtala-e-yaqeen , meri mushkalein mat pooch 

Gumaan uqda kasha bhi nahin raha ab to 

Meray wajood ka ab kya sawal hai yehni 

Main apnay haq main bura bhi nahin raha ab to 

Yeh hi atiya subh-e-shab-e-wisaal hai kya 

Keh sehar-e-naz-o-adaa bhi nahin raha ab to 

Yaqeen kar jo teri aarzu main tha pehlay 

woh lutf teray siwa bhi nahin raha ab to 

Woh sukh wahan keh khuda ki hain bakh'shish'ein kya kya 

Yahan yeh dukh keh Khuda bhi nahin raha ab to  

Ae ku-e-yaar teray zamanay guzar gaye

Ae ku-e-yaar teray zamanay guzar gaye 

Jo apnay ghar se aaye thay woh apnay ghar gaye 

Ab kon zakham-o-zehar se rakhay ga sil'sala 

Jeenay ki ab hawas hai hamein hum to mar gaye 

Ab kya kahon keh sara mohal'la hai sharam'saar 

Main hoon azab main keh meray zakham bhar gaye 

Hum ne bhi zindagi ko tamasha bana diya 

Us se guzar gaye , kabhi khud se guzar gaye 

Tha run bhi zindagi ka ajab tarfa maajra 

Yehni uthay to paon magar "Jon" sar gaye