Sehra ki Tarah tapti hui barf

Sehra ki Tarah tapti hui barf 

Kya aag se hai bani hui barf !

Pather ki siyah ro sarak par 

Sheeshay ki tarah bicchi hui barf 

Hai sham ki sur'mai rida par 

Champa ki tarah tiki hui barf 

Andar se sar'raha aag hoon main 

Baahir se magar jami hui barf 

Hain chust qaba shajar hi , ya hai 

Hum'rah badan sili hui barf 

Lagta hai keh shab damak rahi hai 

Meh'taab hai aur khuli hui barf 

mujh par koi rait aa kay daalay 

Veeranay main hoon pari hui barf 

Halqom-e-sama'at main ugg aye hain ab kaantay

Yeh pyas sama'at ki 

Halqom-e-sama'at main 

Ugg aye hain ab kaantay 

Awaz ka ik qatra 

Lakin nahin mil pata 

Shabnam teray lehjay ki 

Kis ban main utar'ti hai 

Num teri hansi ka ab 

Kis tan ko bighota hai 

Main pyas se be'kal hoon 

Aur teray ta'kalum ka 

Ik ghoont nahin milta 

Is qeht-e-sada main dil 

Ab kay na khilay shayed 

Yeh pyas sama'at ki 

Jaan lay kay talay shayed 

Khuda karay keh naya saal teray daman main

Naye saal ki dua 

Khuda karay keh naya saal teray daman main 

Woh saray phool khila de 

Keh jin ki khushbu ne 

Teray khayal main sham'mein jalai rakhi thein !

Yeh tumhari hansi roshni se bharri

Tumhari Hansi 

Yeh tumhari hansi 

Roshni se bharri 

Chandni main dhali 

Rang se taza ro 

Ishq se mushk bu 

Jab bhi dil ne suni 

Raqs karnay laga 

Rooh main jaisay Qos-e-qazah khinch gayi 

Aaj bhi us hansi kay wohi rang thay 

Aaj bhi roshni ki wohi choot thi 

Aaj bhi us ki khushbu junoon khez thi 

Par koi baat thi jis se khaali thi yeh 

Aaj to meri surat , sawali thi yeh 

Jab shaam kay hathon main

Jab shaam kay hathon main 

Ik jaam nigarein ho 

Aur raat kay lehjay main 

Halka sa saroor aye 

Aur us ki bhout gehri 

aankhon main gulabi ho 

Us waqat yeh pyasa dil 

Jab baat karay us se 

Mad'hosh na ho kiyon kar 

Aankhon ki tarah jis ki 

Awaz main surkhi ho !

 

Tumharay janay kay baad main ne woh shaam aanchal main bandh li

Tumharay janay kay baad main ne 

Woh shaam aanchal main bandh li 

Aur us ki khushbu kay sath 

Baqi tamam shab is tarah basar ki 

Keh jaisay baarish kay bazu'on main 

Bahar ki awleen kompal 

Tumharay lehjay ki narm shabnam 

Mujhay bighoti rahi hai shab bhar 

Tumhari baton ka sabz mehkaar , apnay andar 

Mujhay samoti rahi hai shab bhar 

Tumharay hathon ka lams peh'ham 

Meray badan ko gulab karta raha hai shab bhar 

Zameen ko mahtaab karta raha hai shab bhar 

Jaisay ma'sham-e-jaan main samai hui hai raat

Jaisay ma'sham-e-jaan main samai hui hai raat 

Khushbu main aaj kis ki nahaai hui hai raat 

Sar'goshiyon main baat karein abar-o-baad-o-khaak 

Is waqat kainaat pe chaai hui hai raat 

Her rang jis main khawab ka ghulta chala gaya 

Kis rang se khuda ne banai hui hai raat 

Phoolon ne us ka jashan manaya zameen par 

Taaron ne aasman pe sajaai hui hai raat 

Woh chand chup chuka hai magar shaher-e-deed ne 

Ab tak usi tarah se basaai hui hai raat 

Subha jamal-e-yaar kay jadu ko daikh kay 

Hum ne nazar se apni chupai hui hai raat

Dil main aayi raat choti si ik baat

Dil main aayi raat 

Choti si ik baat 

Ab kay pur'wai 

Laai kya soghaat 

Phoolon bharra rasta 

Aur kisi ka sath 

Us ne thaam liya 

Choom kay mera haath 

Aangan main utri 

Taron ki baraat 

Jeewan main ayi 

Pooray chand ki raat 

Tan mann jal thal hai 

Yeh kaisi barsaat 

Us ki yaad main gum 

Main , khushbu aur raat 

Pai'rahan-e-gham siya hai kis ne

Pai'rahan-e-gham siya hai kis ne 

Khawabon ko kafan diya hai kis ne 

Jab ghar main rakhi hui ho miyat 

Phir jashan bar'pa kiya hai kis ne 

Auron pe jo log sayban thay 

Be'ghar unhein kar diya hai kis ne

Bhula nahin dil ataab us kay

Bhula nahin dil ataab us kay 

Ehsaan hain be'hisab us kay 

Aankhon ki hai aik hi tamana 

Dekha karein roz khawab us kay 

Aisa koi shair kab kaha hai 

Jo ho sakay intisaab us kay 

Apnay liye maang loon Khuda se

Hissay main jo hain azaab us kay 

Waisay to woh shokh hai balaa ka 

Andar hain bhout hijaab us kay 

Khushi ki baat hai ya dukh ka manzar dekh sakti hoon

Khushi ki baat hai ya dukh ka manzar dekh sakti hoon 

Teri awaz ka chehra main chu kar dekh sakti hoon 

Abhi teray labon pe zikar-e-fasal-e-gul nahin aaya 

Magar ik phool khiltay apnay andar dekh sakti hoon 

Mujhay teri mohabbat ne ajab ik roshni bakhshi 

Main is duniya ko ab pehlay se behtar dekh sakti hoon 

kinara dhoondnay ki chah tak mujh main nahin ho gi 

Main apnay gird ik aisa samandar dekh sakti hoon 

Khayal aata hai aadhi raat ko jab bhi tera dil main 

Utarta aik saheefa apnay ooper dekh sakti hoon 

Wisal-o-hijar ab yaksan hain , woh manzil hai ulfat main 

Main aankhein band kar kay tujh ko aksar dekh sakti hoon 

Abhi teray siwa duniya bhi hai mo'jood is dil main 

Main khud ko kis tarah teray barabar dekh sakti hoon