Imran's Poetry: 05/23/16

May 23, 2016

Woh thak'ka hua meri baanhon main zara so gaya tha to kya hua

Abhi main ne dekha hai chand bhi kisi shaakh-e-gul pe jhuk'ka hua

Meray saath sada raha woh meri nazar se chup'pa hua

Yeh ajeeb hijar-o-wisal hai , na kabhi mila , na juda hua

Koi phool dhoop ki patiyon main harray ribon se bandha hu a

Woh ghazal ka lehja naya naya , na kaha hua , na suna hua

Jissay lay gayi hai abhi hawa woh warq tha dil ki kitab ka

Kahin aansu'on se mitta hua , kahin aansu'on se likha hua

Kai meel rait ko kaat kar koi moj phool khila gayi

Koi pairr pyas se mar raha hai nadi kay paas kharra hua

Mujhay haadson ne saja saja kay bhout haseen bana diya

Mera dil bhi jaisay dulhan ka haath ho mehandiyon se racha hua

Wohi shaher hai wohi raastay , wohi ghar hai aur wohi lawn bhi

Magar is dareechay se poochna , woh darakht-e-anaar ka kya hua

Meray saath jugnoo hai aur jugnoo ki is safar main bisaat kya

Yeh chragh koi chragh hai na jala hua na bujha hua

Wohi khat keh jis pe jaga jaga do mehaktay honton kay chand thay

Kisi bhooli bisri si taaq par teh gard ho ga daba hua

Aansu'on se dhulli hui khushi ki tarah

Rishtay hotay hain shairy ki tarah

Door ho kar bhi hoon usi ki tarah

Chand se door chandni ki tarah

Khoobsurat , Udaas , Khouf'zada

Woh bhi hai 20 sadi ki tarah

Jab kabhi badalon main ghirta hai

Chand lagta hai aadmi ki tarah

Hum Khuda ban kay ayein gay warna

Hum se mil jao aadmi ki tarah

Sab nazar ka faraib hota hai

Koi hota nahin kisi ki tarah

Jaanta hoon keh aik din mujh ko

Woh badal de ga dairy ki tarah

Aarzu hai keh koi shair kahon

Khoob'surat teri gali ki tarah

Fursat kahan khatoot parhon aaj pyar se

Ab khairiyat bataya karo yaar taar se

Wali kay taaj-o-takhat ka aik daway'daar to

Dakhil tha haspatal main pani ki maar se

Naita ki shaan dekh ussay vote youn milay

Murday nikal kay aa gaye apnay mazaar se

Rally nikalnay ka irada jahan kiya

Mujh ko zukaam ho gaya halki phuwaar se

Main rail roknay kay liye teray saath hoon

Fursat agar mujhay mili sardi bukhaar se

Main dar raha hoon mujh ko Ghalib kahein gay log

Yeh ghar chala karay ga hamesha udhaar se

Meray baray hawaon se woh kab poochay ga

Khaak jab khaak main mil jaye gi tab poochay ga

Ghar basanay main yeh khatra hai keh ghar ka maalik

Raat main dair se aanay ka sabab poochay ga

Apna gham sab ko batana hai tamasha karna

Haal-e-dil us ko sunaein gay woh jab poochay ga

Jab bicharna bhi to hanstay huye jana warna

Her koi rooth kay janay ka sabab poochay ga

Hum lafzon kay jahan daam lagay baich diya

Shair poochay ga hamein ab na adab poochay ga

Mera kya kahin bhi chala jaon ga

Magar raasta to bana jaon ga

Hawaon ko is ka sharf kiyon milay

Main apna diya khud bujha jaon ga

Kahin bhi rahoon , main kisi se milon

Hamesha tumhara kaha jaon ga

Lahoos agar husan-e-takhleeq hai

Koi chehra main bhi bana jaon ga

Baghal geer honay kay andaz se

Pata dushmano ka bata jaon ga

Jab us ki nawazish hoti hai , yeh mo'jaza tab ho jata hai

Alfaaz mehaknay lagtay hain , kaghaz bhi adab ho jata hai

Us ki thokar main hoti hai , sari duniya ki sha'inshahi

Darbar-e-madeena main jab bhi , dewana talab ho jata hai

Yeh aag , yeh matti , yeh pani , yeh aanchal ki gul'rez hawa

Phir kuch nahin rehta apna jab paisa bhi rab ho jata hai

Baarish kay baad paharon par qaleen bich'ha deta hai Khuda

Yeh dil ka ujra ray'gistan bhi shaher-e-tarb ho jata hai

Ik shair ghazal ka duniya ki tanqeed se bala'tar jano

So matlab is main hotay hain , jo be'matlab ho jata hai

Pandit , jolaha kehlaya , mann laakh is faqeeri main

Jis par sona chandi barsay , woh aali nasab ho jata hai

Falak se chand sitaron se jaam lena hai

Mujhay sehar se nayi aik shaam lena hai

Kissay khabar keh farishtay ghazal samjhtay hain

Khuda kay samnay kaafar ka naam lena hai

Mo'amla hai tera bad'tareen dushman se

Meray aziz mohabbat se kaam lena hai

Mehakti zulf se khushbu , chamakti aankh se dhoop

Shabon se jaam , sehar ka salam lena hai

Tumhari chaal ki aahistagi kay lehjay main

Sukhan se dil ko masalnay ka kaam lena hai

Nahin main Mir kay dar par kabhi nahin jata

Mujhay Khuda se ghazal ka kalam lena hai

Baray saleeqay se noton main us ko tulwa kar

Ameer-e-shaher se ab intaqaam lena hai

Ghazal ko maan ki tarah ba'waqar karta hoon

Main maam'ta kay katoron main doodh bharta hoon

Tu aaina hai tujhay dekh kar sanwarta hoon

Kahan kahan tera chehra talash karta hoon

Yeh dekh hijar tera kitna khoobsurat hai

Ajeeb mard hoon sola singhaar karta hoon

Badan samait kay lay jaye jaisay shaam ki dhoop

Tumharay shaher se main is tarah guzarta hoon

Tamam din ka safar kar kay roz shaam kay baad

Pahariyon se ghirri qabar main utarta hoon

Mujhay sakoon ghannay junglon main milta hai

Main raaston se nahin manzalon se darta hoon

Be'libasi jo her libas ki hai

Muflasi ehad-e-bad'hawaas ki hai

Mut'maein hain zara ameer-o-ghareeb

Her musibat middle claas ki hai

Aaina ban gaye dar-o-dewaar

Chandni yeh usi libaas ki hai

Sab ko saqi ne yeh jawab diya

Yeh khat'ta aap kay gilaas ki hai

Teri khushbu main dekh leta hoon

Yeh mehak teray aas paas ki hai

Duniya ne dil ko pyar ka tohfa diya nahin

Hum zindagi thay hum ko kisi ne jiya nahin

Suraj se , chand se bhi haseen aik roop hai

Aisay makan main jahan koi diya nahin

Duniya ki ab shikayatein kis munh se hum karein

Hum se wafa ka wada kisi ne kiya hai

Roti bhi chahiye m hamein pani bhi chahiye

Hum aam aadmi hain miyan Oliya nahin

Us ko bhi kuch khabar nahin aanchal kaha gira

Hum ne bhi apna chaak giriban siya nahin

Ik roz ghar pe chand sitaray bhi aye thay

Hum ne magar zameen ka soda kiya nahin

Mousam khizan ka hai meri baanhein udaas hain

Phoolon ko main ne goad main kab se liya nahin

Meray liye kisi ki mohabbat thi kainaat

Main zameen-o-aasman , kuch bhi liya nahin

Aisa lagta hai , zindagi tum ho

Ajnabi kahay , ajnabi tum ho

Log kehtay hain , ajnabi tum ho

Ajnabi meri zindagi tum ho

Dil kisi aur ka na ho paya

Aarzu meri aaj bhi tum ho

Mujhay apna shareek-e-gham kar lo

Youn akelay bhout dukhi tum ho

Doston se wafa ki umeedein

Kis zamanay kay aadmi tum ho

Main zameen par ghan'na andhera hoon

Aasmano ki chandni tum ho

Log aatay hain log jatay hain

Meri aankhon main aaj bhi tum ho

Ghazal kay dil main basay , nazam ki nazar main rahay

Diyar-e-loh-o-qalam main sada khabar main rahay

Hamaray haal pe chiriyon ne meharbani ki

Kattay phattay nahin jo phal kahan shajar main rahay

Tamam mulak andheray main doob jaye to kya

Woh chahtay hain keh suraj unhi kay ghar main rahay

Watan main phirtay rahay hum mahajron ki tarah

Ajab naseeb hain , her dour main safar main rahay

Tha shouq-e-giriya jinhein khul kay ro nahin paye

Kabhi Anees , kabhi Mir kay asar main rahay

Kis ehtiyat se yeh zindagi guzaar chalay

Kisi kay dil main rahay hum kisi kay ghar main rahay

Ghazal main be'adbi hai barhana guftaari

Tamaam parda shaistagi hunar main rahay

Apnay teer-o-kaman dekhon ga

Us ki oonchi uraan dekhon ga

Chand suraj hain chatiyan is ki

Main khula aasman dekhon ga

Yeh ajab zid hai ja kay london main

Bhook hindustan dekhon ga

Apnay iqraar-e-jurm se pehlay

Dushmano ka biyan dekhon ga

Pathron ka thama samandar hoon

Main hawa ki chitan dekhon ga

Bari aag hai bari aanch hai teray may'kaday kay gulab main

Kai baliyan , kai chriyan yahan ghul rahi hain sharab main

Woh sarapa-e-husan-o-jamal hai woh teray sukhan ka kamal hai

Koi aik shair na keh saka kabhi is ghazal kay jawab main

Wohi likhnay parhnay ka shouq tha , wohi likhnay parhnay ka shouq hai

Tera naam likhna kitab par , tera naam parhna kitab main

Meray zard patton ki chadrein bhi hawaein cheen kay lay gayein

Main ajab gulaab ka phool hoon , jo barhana sar hai shabaab main

Yeh dua hai aisi ghazal kahon , kabhi paish jis se main kar sakon

Koi harf teray hazoor main , koi shair teri janab main

Ab dhoop bhool jao keh suraj yahan nahin

Aisi zameen mili hai , jahan aasman nahin

Kaghaz pe raat apni siyahi bichaa gayi

Koi lakeer teray meray darmiyan nahin

Raaz ab khula teri narazgi kay baad

Tu meharban nahin to koi meharban nahin

Haan roshni nahin hai magar is ki daad do

Her taaq main chragh hai lakin dhuwan nahin

Jaa mera shair likh de gulabon ki shaakh par

Phoolon kay aas paas agar titliyan nahin

Meera , Kabir , Chishti-o-na'nak kay naam ko

Jo dais bhool jaye woh hindutan nahin

Udas aasman hai , dil mera kitna akela hai

Prinda shaam kay pal par bhout khamosh baitha hai

Main jab so jaon in palkon pe apnay hont rakh dena

Yaqeen aa jaye ga , palkon talay bhi dil dharakta hai

Tumharay shaher kay saray diye to so gaye kab kay

Hawa se poochna , dehleez pe yeh kon jalta hai

Agar fursat milay pani ki tehreeron ko parh lena

Her ik dariya hazaron saal ka afsana likhta hai

Kabhi main apnay hathon ki lakeeron se nahin uljha

Mujhay maloom hai qismat ka likha bhi badalta hai

Phir is kay baad tanhai pa'rakhti hai musafir ko

Jahan tak roshni hai apna saya saath deta hai

Samandar paar kar kay jab main aaya dekhta kya hoon

Hamaray do gharon kay beech sanaton ka dariya hai

Makan se kya mujhay lena , makan tum ko mubarak ho

Magar yeh ghaas wala reshmi qaleen mera hai

Dilon ki gard ko hum log saaf kartay nahin

Ajab mizaj hai apna tawaaf kartay nahin

Yeh be'taluqi chatt lay kay baith jaye gi

Bhout dino se koi ikhtalaaf kartay nahin

Her aik lafz main das bees lafz hotay hain

Zaheen log kabhi baat saaf kartay nahin

Woh Mir waqat ho ya Ghalib zamana ho

Keh duplicate ka hum aitraaf kartay nahin

Sukhan jo Mir ka hai , Mir ko mubarak ho

Kisi kay maal pe hum haath saaf kartay nahin

Bashir Badr kay lehjay main ab woh kaat kahan

Ghazal se dil main woh gehra shigaaf kartay nahin

Main to aik kaghazi phool tha , sar-e-shaam khushbu se bhar gaya

Main kahan hoon mujh ko khabar nahin , mujhay kon chu kay guzar gaya

Woh udas larki , bahar layi paharon se zameen par

Meray dil main dard ka chand bhi youn hi zeena zeena utar aaya

Yeh gulab bhi mera aks hai , yeh sitara bhi mera naqsh hai

Main kabhi zameen main dafan hoon , kabhi aasman se guzar gaya

Main udas chand ka bagh hoon , main gaye dino ka suragh hoon

Meri shakh sakh jhulas gayi , mera phool phool bikhar gaya

Woh safaid phoolon si ik dua meray saath saath rahi sada

Yeh usi ka faiz hai baar'ha main bikhar bikhar kay sanwar gaya

Meray aansu'on ki kitab bhi , teri khushbu se mehak gayi

Mera shair hai tera aaina jahan shaam aayi sanwar gaya

Dil chhalak utha , aankh bhar aayi

Aaj tv pe woh khabar aayi

In masail main teri yaad bhi kya

Jaisay titli pahaar par aayi !

Apni maan ki tarah udas udas

Beti shadi kay baad ghar aayi

Ab to main bhi nazar nahin aata

Ae Khuda kon si dagar aayi

Tum ne jo kuch kiya sharafat main

Woh nadamat bhi meray sar aayi

Us ne ehsaan woh kiye yaro

Aaj to hum bhi ro diye yaro

Jis tarah aik chragh aandhi main

Dushmano main youn hi jiye yaro

Muflasi main kisi kay ghar jaa kar

Kon apna lahu piye yaro

Jo kisi ko bata nahin saktay

Hum ne woh kaam bhi kiye yaro

Tum ko shayed khabar nahin ho gi

Zehar hum ne bhout piye yaro

Aasmano pe kon rota hai

Door tak jal gaye diye yaro

Jab koi kisi se bichar jaye

Kis tarah koi ab jiye yaro

Main yeh duniya mitana chahta hoon

Naya sab kuch bana'na chahta hoon

Main apni qabar main dollar bicha kay

Khuda kay paas jana chahta hoon

Wahan pani main ab bhi tail ho ga

Samandar main naha'na chahta hoon

Koi kab tak jiye pabandiyon main

Ussay main bhool jana chahta hoon

Meray andar koi zaalim chuppa hai

Main chiriya ghar bana'na chahta hoon

Koi shair nahin hai is sadi main

Main tum ko yeh bata'na chahta hoon

Ab yaad nahin aata mujhay kon hoon kya hoon

Duniya ki inayat hai keh sab bhool gaya hoon

Aankhon se nazar aati hai mujh ko teri aahat

Tu chahye jahan ho main tujhay dekh raha hoon

Kiyon mujh se laraztay do aalam kay andheray

Main chand , na suraj , na sitara , na diya hoon

Kashkol kay badlay main inhein taaj milay hain

Main haath main ik jaam liye jhoom raha hoon

Hum dono kay andar koi toofan chuppa hai

Dariya bhi hai thehra hua chup main bhi kharra hoon

Dariya meray honton ko tarasta hi rahay ga

Pani kay liye Asghar-e-masoom raha hoon

Charagh lay kay teray shaher se guzarna hai

Chragh lay kay teray shaher se guzarna hai

Yeh tajarba bhi hamein aik baar karna hai

Main woh pahaar hoon jo kat raha hai pani main

Yeh dil nahin hai meray aansu'on ka jharna hai

Meray aziz main utri nadi main kya utron

Mujhay charh'hay huye dariya ko paar karna hai

Bhout jadeed hoon lakin yeh mera wirsa hai

Isi qadeem gali se mujhay guzarna hai

Tumhein khabar nahin suraj bhi aks hai mera

Tamam din ka mujhay intizaam karna hai

Woh aik shakhs keh jis ko ghazal bhi kehtay hain

Usi kay naam se jeena , usi pe marna hai

Suraj bhi bandha ho ga dekh meray bazu main

Is chand ko bhi rakhna sonay kay tarazu main

Ab hum se sharafat ki umeed na kar dena

Pani nahin mil sakta tapti hui balu main

Tareek samandar kay seenay main gehar dhoondo

Jugnoo bhi chamaktay hain barsaat kay aansu main

Sab der-o-haram jhootay , dil'dar-o-sanam jhootay

Hum aa hi gaye aakhir duniya teray jadu main

Ik rait ka parda thein , Aahan ki yeh dewarein

Insaan nahin rehta , insan kay qabu main

Khawabeeda gulabon par yeh Oas bichi kaisay

Ehsaas chamakta hai asloob ki khushbu main

Hamaray paas to ayo , bara andhera hai

Kahin na chor kay jayo , bara andhera hai

Udas kar gaye be'sakhta lateefay bhi

Ab aansu'on se rulao , bara andhera hai

Koi sitara nahin pathron ki palkon par

Koi chragh jalao , bara andhera hai

Haqeeqaton main zamanay bhout guzar chukay

Koi kahani sunao , bara andhera hai

Kitabein kaisi utha laye may'kaday walay

Ghazal kay jaam uthao , bara andhera hai

Ghazal main jis ki hamesha chragh jaltay hain

Ussay kahin se bulao , bara andhera hai

Woh chandani ki bisharat hai harf-e-aakhir tak

Bashir Badr ko lao , bara andhera hai

Tu mujh se tez chalay ga to raasta doon ga

Dua kay phool teri raah main bicha doon ga

Abhi to zindagi hayel hai tujh se milnay main

Main aaj raat yeh dewar bhi gira doon ga

Agar kisi ne mujhay aik raat rok liya

To us ka naam pata bhi tujhay bata doon ga

Ab is kay baad koi be'wafa na pao gay

Main apnay aap ko itni bari saza doon ga

Bhout ajeeb si larki hai is ki khatar main

Parhay baghair haseeno kay khat jala doon ga

Ab mujhay may nahin , may'kada chahiye

Kuch nahin aur is kay siwa chahiye

Aik din tujh se milnay zaroor ayon ga

Zindagi mujh ko tera pata chahiye

Ghar ki dehleez pe chand soya na ho

Subha honay ko hai loat'na chahiye

Is zamanay ne logon ko samjha diya

Tum ko aankhein nahin Aaina chahiye

Yeh zameen aasman kuch naye to lagein

Mujh ko aisi nazar Ae Khuda chahiye

Tum se meri koi dushmani chahiye

Samnay se hatto , raasta chahiye

Khushbu ki tarah aaya woh tez hawaon main

Maanga tha jissay hum ne din raat duaon main

Tum chatt par nahin aaye , main ghar se nahin nikla

Yeh chand bhout bhatka sawan ki ghataon main

Is shaher main aik larki bil'kul hai ghazal jaisi

Bijli si ghataon main , khushbu si ada'on main

Mousam ka ishara hai khush rehnay do bachon ko

Masoom mohabbat hai , phoolon ki khata'on main

Hum chand sitaron ki raahon kay musafir hain

Hum raat chamaktay hain tareek khala'on main

Bhagwan hi bhejein gay chawal se bharri thaali

Mazloom prindon ki masoom sabhaon main

Dada baray bholay thay sab se yahi kehtay thay

Kuch zehar bhi hota hai , angrezi dawaon main