Imran's Poetry: 01/04/17

Jan 4, 2017

Na biyaan hui un se na zahir hui hum se

Na biyaan hui un se .!!!

Na zahir hui hum se . !!!

Bas...

Suljhi hui aankhon main

Uljhi rahi mohabbat

Rooh tak nelaam ho jati hai bazar-e-ishq main

Itna Asaan nahin hota kisi ko apna bana lena

Uqaabi rooh jab baidaar hoti hai jawano main

Nazar aati hai un ko apni manzil aasmano main

Husan-e-yousaf ko daikh kar wahan katti thi kai ungliyan

Khud chand katt gaya yahan ungli (s.a.w) ko daikh kar

Hum ne khud main tum ko paroya hai ik tasbeeh ki tarah

Yaad rakhna agar hum tootay to bikhar tum bhi jaao gay

Jo teray naseeb kay shaher se kisi aur shaher ko chal diya

Ussay rokna , ussay tokna , ussay kosna bhi fazool hai

Yeh nizam-e-hijar-o-wisaal hai , yehi aashqui ka kamaal hai

Woh mila to dil se qabool tha , woh bichar gaya to qabool hai

Ungliyan aaj bhi is soch main gum hain "Faraz"

Us ne kaisay naye haath ko thaama ho ga

Dilon main khouf tha na dehshaton ka pehra tha

Meray khayal main yeh dour hi sunehra tha

Jin ko mil jati hai to tujh ko bhula detay hain

Yaad hum jaison ne rakha hai mohabbat tujh ko

Hum se badal gaya woh nigahein to kya hua

Zinda hain kitnay log mohabbat kiye baghair

Yeh mujhay chain kiyon nahin parta

Aik hi shakhs tha jahan main kya

Khuda naseeb karay hind kay imamon ko

Woh sajda jis main hai Millat ki zindagi ka payaam

Bhuli baatein yaad na ayein

Aadmi

Bhuli baatein yaad na ayein

Kya kya koshish karta hai

Kon hai woh bas ussi soch kay

Saa'ye se bhi darta hai

Jaisay sookh kay toofano main

Dukh ka rela phirta hai

Saath apnay jam'ghatta laga kar

Aap akela phirta hai

Kuch apnay jaisay log milein

Sathiyon Ki Talash

Kuch apnay jaisay log milein

In rang ba'rangay shehron main

Koi apni jaisi lehar milay

In saampon jaisi lehron main

Koi tez , nasheela zehar milay

Itni qismon kay zehron main

Hum bhi na ghar se baahir niklein

In sooni do'pehron main

Baarish thi , dewaron par aur khothon par

Meena , Hawa ,Aur Ajnabi Shaher

Baarish thi , dewaron par aur khothon par

Aur gharon kay ghannay darakhton par

Tund hawa thi , chehron par , darwazon par

Aur khaali khaali raston par

Roshniyan thein , kahin kahin

Dar'gahon main ya oonchay sard makano main

Ho ga woh bhi wahin kahin

Veerano main ya mar mar kay Ewano main

Ik tasveer udaas

Woh Dono

Ik tasveer udaas

Ik saya khamosh

Apnay apnay khawab main

Bari tarah madhosh

Khoobsurat Khayal

Khoobsurat Khayal

Choro to choot jayein

Pakron to toot jayein

Saban kay bul'bulay se

Rangeen aainay se

Duniya se door us ki bharri mehfalon se door

Aik khayal

Duniya se door us ki bharri mehfalon se door

Bhatka hai dil hawa ki tarah manzalon se door

Uthi hai moj-e-dard koi dil kay aas paas

Phirti hai ik sada si kahin sahilon se door

Keh bhi de ab woh sab baatein

Wisaal ki Khawaish

Keh bhi de ab woh sab baatein

Jo dil main posheeda hain

Saray roop dikha de mujh ko

Jo ab tak na'deeda hain

Aik hi raat kay taaray hain

Hum dono un ko jaantay hain

Doori aur majboori kya hain

Us ko bhi pehchant'tay hain

Kiyon phir dono mil nahin saktay

Kiyon yeh bandhan toota hai

YA koi khot hai teray dil main

Ya mera koi gham jhoota hai

Teri yaadon kay raastay ki taraf

Ik qadam bhi nahin barhon ga main

Dil tarapta hai teray khatt parh kar

Ab teray khatt nahin parhon ga main

Ajab tha us ki dil'daari ka andaaz

Woh barson baad jab mujh se mila hai

Bhala main poochta us se to kaisay

Mata-e-jaan ! tumhara naam kya hai ?

Baat hi kab kisi ki maani hai

Apni hatt poori kar kay choro gi

Yeh kalaai yeh jisam aur yeh kamar

Tum surahi zaroor toro gi

Tishna-e-naaz ne be'haal kiya hai tum ko

Apnay hi zor main kam'zor hui jaati ho

Main koi aag nahin , aach nahin , dhoop nahin

Kiyon paseenay main sharaboor hui jaati ho

Ik gumaan-e-be'gumaan hai zindagi

Daastan ki daastan hai zindagi

Dam ba dam hai ik firaaq-e-jawidaan

ik jabeen-e-be'aastaan hai zindagi

Keh'kishan bar keh'kishan hai ik guraiz

Bood-e-be'sood-o-ziyaan hai zindagi

Hai meri tehra nigahi ik talash

Tum kahan ho aur kahan hai zindagi

Kuch nahin tha kya haqeeqat kya khayal

Aik afsanay thay mumkin aur mohaal

Ik "Abas" main khoon-e-dil thooka gaya

Koi bhi halat nahin thi aur haal

Ab mujhay azaad kar do chor do

Jaan-o-dil kay saray rishtay tor do

Jab koi manzil nahin meri to phir

Rukh kisi jaanib bhi mera mor do

Tum ne mujh ko likha hai , meray khatt jala deejiye

Tum Mujhay Batao To . . . .

Tum ne mujh ko likha hai , meray khatt jala deejiye

Mujh ko fikar rehti hai aap unhein ganwaa deejiye

Aap ka koi saathi daikh lay to kya ho ga

Daikhiye main kehti hoon yeh bhout bura ho ga

~!.........!~

Mujh ko aisay khatt likh kar apni soch main shayed

Juram kar gayi ho tum

Aur khayal aanay par us se dar gayi ho tum

Juram kay tasawur main gar yeh khatt likhay tum ne

Phir to juram hi kiye tum ne

Ae meri foz'neena

Dil ki jaan zareena !

Rang rang rangeena !

Baat jo hai woh kya hai

Tum mujhay batao to .....

Main tumhain nahin samjha

Tum samjh main aayo to

Juram kiyon kiye tum ne

Khatt hi kiyon likhay tum ne

Tum aur tumhara naam

Angaaray

Tum?

Tumhara naam ?

Lakin main ne yeh naam aaj pehli baar tum se hi suna

Hai

Kon Ho tom ?

Kon thi tum ?

Ab raha main , yehni main

Main to kabhi tha hi nahin

Tha hi nahin main

Aur saray kaaghazon par sirf angaaray likhay hain

Sirf angaaray

Main lamhon ka gada'gar tha

Tamseel

Main lamhon ka gada'gar tha

Tumharay ja'widaan afroz lamhon ki pazee'rish ka gada'gar tha

Sar'a sar ik gada'gar

Ik be'kashkol-o-kaasa ik be'koocha ba'koocha

Be'sada-o-be'dua az khud guzishta ik gada'gar tha

Jo gumaan-e-pur sar-o-soda kay jaan parwar suraagh aarzoo agaheen main

Rafta aur Aainda kay khawabon ki gada'i pesha karta tha

Khayalon ko , nafs boodish khayalon ko , abd Aandesha karta tha

Yeh aik tamseel thi , be'samna tamseel

Aur jo kuch tha yeh hi tha , bas yeh hi kuch tha

Doosra Manzar

Phiras kay baad jaana na

Tumhari jawidana aarzoo kay baazwan-e-mar'mareen

Meray , Marray aagosh kay marg-e-sufaid-e-be'kaghaan main

Meri dil ju zindagi thay arjamandi thay

Main jin main harm-o-hur sundar rehta tha

Yeh meri dam ba dam ki zindagi ki sehna tabi thi

Meri her aarzoo pehlu sabza gon thi aur shahabi thi

Teesra Manzar

Phir us kay baad kay manzar main

Jo paish aaya hai woh kuch youn hai keh main tum main

Tumharay jaaan fiza aaghosh ki nazdeek tar khushbu main

Aur is kay girda gird main dam tor deta hoon

Phir us kay baad zinda ho kay uth'ta hoon

Qayamat ki hansi hansta hoon

Phir saktay main reh jata hoon

Aakhir ik nihayat khanda awar gariya karta hoon

Tumharay aur meray darmiyaan ik baat hona thi

Tumharay Aur Meray Darmiyaan

Tumharay aur meray darmiyaan ik baat hona thi

Balaa ka din nikalna tha balaa ki raat honi thi

Balaa ka din bhi nikla aur balaa ki raat bhi guzri

Azaab-e-zaat bhi guzra fana-e-zaat bhi guzri

Raas aa nahin saka koi paymaan alwida

Tu meri jaan-e-jaan so meri jaan alwida

Main teray saath bujh na saka had guzar gayi

Aye sham'ma ! main hoon tujh se pash-e-maan alwida

Main jaa raha hoon apnay biya'baan-e-haal main

Damaan alwida ! Giribaan alwida

Ik rood-e-na'shanaas main hai doobna mujhay

So Ae kinaar-e-rood , biya'baan alwida

Khud apni ik mata-e-zaboh-e-zaboon reh gaya hoon main

So alwida ! Ae meray samaan alwida

Sehna to ik saza thi miraad thi miraad-e-mohaal ki

Ab hum na mil sakein gay , miyan jaan alwida

Ae shaam gaah-e-sehan malaal hamesh'gi

Kya janay kya thi teri her ik aan , alwida

Kis kis ko hai ilaaqa yahan apnay ghair se

Inssan hoon main , tu bhi hai insaan alwida

Nisbat kisi bhi shay se kisi shay ko yahan nahin

Hai dil ka zarha zarha parishaan alwida

Rishta mera koi bhi "Alaf" , "Bay" se ab nahin

Amrooha alwida so Ae "Baan" alwida

Ab main nahin raha hoon kisi bhi gumaan ka

Ae meray kufar , Ae meray Emaan alwida

Aap apna ghubaar thay hum to

Yaad thay yaad'gaar thay hum to

Pardagi ! hum se kiyon rakha parda

Teray hi parda'daar thay hum to

Waqat ki dhoop main tumharay liye

Shajar saya'daar thay hum to

Urray jaatay hain dhool ki maanind

Aandhiyon par sawaar thay hum to

Hum ne kiyon khud pe Aaitabaar kiya

Sakhat be'aaitabaar thay hum to

Sharam hai apni baar baari ki

Be'sabab baar baar thay hum to

Kiyon hamein kar diya gaya majboor

Khud hi be'ikhtiyaar thay hum to

Tum ne kaisay bhula diya hum ko

Tum se hi mus'ta'aar thay hum to

Khush na aaya hamein jiye jaana

Lamhay lamhay pe baar thay hum to

Seh bhi letay hamaray tah'no ko

Jaan-e-mann jaan nisaar thay hum to

Khud ko doraan-e-haal main apnay

Be'tarah na'gawaar thay hum to

Tum ne hum ko bhi kar diya bar'baad

Na'dar-e-roz'gaar thay hum to

Hum ko yaaron ne yaad bhi na rakha

"Jon" yaaron kay yaar thay hum to

Honay ka dhokha hi tha

Jo kuch tha woh tha hi tha

Ab main shayed teh main hoon

Par woh kya dariya hi tha

Bood meri aisi bikhri

Bas main ne socha hi tha

Bhoolnay baitha tha main ussay

Chaand abhi nikla hi tha

Hum ko sanam ne khawaar kiya

Warna Khuda acha hi tha

Kaisa azl aur kaisa abd

Jis dam tha lamha hi tha

Kisi haal main nahin hoon , koi haal ab nahin hai

Jo gayi palak talak tha woh khayal ab nahin hai

Main sakoon paa sakoon ga yeh gumaan bhi kiyon kiya tha

Hai yeh hi malaal kya kam keh malaal ab nahin hai

Na rahay ab us kay dil main khalish-e-shakist-e-wada

Keh yahan koi hisaab-e-mah-o-saal ab nahin hai

Yeh diyaar-e-deed kya hai gaye dasht-e-dil se bhi hum

Keh khatan-e-zameen main bhi woh ghazaal ab nahin hai

Jo liye liye phiri hai tujhay roz ik nagar main

Meray dil teray nagar main woh misaal ab nahin hai

Lab-e-pur sawal lay kay hamein kooba kooba hai phirna

Ho koi jawaab bar-e-lab yeh sawal ab nahin hai

Mujh ko shab-e-wajood main tabish-e-khawab chahiye

Shouq-e-khayal taza hai yehni azaab chahiye

Aaj shakist-e-zaat ki shaam hai , mujh ko aaj shaam

Sirf sharaab chahiye , sirf sharaab chahiye

Kuch bhi nahin hai zehan main kuch bhi nahin so ab mujhay

Koi sawal chahiye koi jawab chahiye

Us se nibhay ga rishta sood-e-ziyan bhi kya bhala

Main hoon balaa ka bad hisaab , us ko hisaab chahiye

Aman-o-amaan-e-shaher dil khawabo-o-khayal hai abhi

Yehni keh shaher-e-dil ka haal aur kharaab chahiye

Jaan-e-gumaan hamein to tum sirf gumaan main rakho

Tishna labi ko her nafs koi saraab chahiye

Khull to gaya hai dil main aik maktab-e-hasrat-o-umeed

"Jon" ab us kay wastay koi nisaab chahiye

Dil jo hai aag laga doon is ko

Aur phir khud hi hawa doon is ko

Jo bhi hai us ko ganwa bhaitha hai

Main bhala kaisay ganwa doon us ko

Tujh gumaan par jo imaarat ki thi

Sochta hoon keh main dhaa doon is ko

Jisam main aag laga doon is kay

Aur phir khud hi bujha doon is ko

Hijar ki nazar to deni hai ussay

Sochta hoon keh bhula doon us ko

Jo nahin hai meray dil ki duniya

Kiyon na main "Jon" mitta doon is ko

Be'intahai shaiwa hamara sada se hai

Ik dam se bhoolna ussay phir ibtida se hai

Yeh shaam janay kitnay hi rishton ki shaam ho

Ik huzan dil main nikhat-e-moj-e-saba se hai

Dast-e-shajar ki tohfa risaani hai taba-e-dil

Us dam se jo bhi dil main meray woh hawa se hai

Jaisay koi chala bhi gaya ho aur aaye bhi

Ehsaas mujh ko kuch yeh hi hota fiza se hai

Dil ki sahulatein hain ajab , mushkalein ajab

Na'aashnai si ajab ik aashna se hai

Is main koi gila hi rawa hai na guftagoo

Jo bhi yahan kisi ka sukhan hai woh jaa se hai

Aaye woh kis hunar se labon par keh mujh main "Jon"

Ik khamoshi hai jo meray shor-e-nawa se hai

Aadmi waqat par gaya ho ga

Waqat pehlay guzar gaya ho ga

Woh hamari taraf na daikh kay bhi

Koi ehsaan dhar gaya ho ga

Khud se mayoos ho kay baitha hoon

Aaj her shakhs mar gaya ho ga

Shaam teray diyaar main aakhir

Koi to apnay ghar gaya ho ga

Marham hijar tha ajab akseer

Ab to her zakham bhar gaya ho ga