Da'iron main chaltay hain

Da'iron main chaltay hain 

Da'iron main chalnay se

Dairay to barhtay hain 

Faaslay nahin ghat'tay 

Aarzuein chalti hain 

Jis taraf ko jatay hain 

Manziliein tamana ki 

Sath sath chalti hain 

Gard urti rehti hai 

Dard barhta jata hai 

Raastay nahin ghat'tay 

Subha dam sitaron ki 

Tez jhil'milahat ko 

Roshni ki aamad ka 

Paish baab kehtay hain 

Ik kiran jo milti hai

Aaftab kehtay hain 

Da'ira badalnay ko inqalab kehtay hain

Meray khawabon ke jhrokay ko sajaney wali

Meray khawabon  ke jhrokay ko sajaney wali

Teray khawabon main kahin mera guzar hai keh nahin 

Pooch kar apni nigahon se bata de mujh ko 

Meri raaton kay muqaddar  main sehar hai keh nahin 

Chaar din ki yeh rafaqat bhi nahin 

Umar bhar kay liye azaar hui jati hai 

Zindagi youn to hamesha se parishan si thi 

Ab to her saan garaan baar si hui jati hai 

Meri ujri hui neendon kay shabistan main 

Tu kisi khawab kay paikar ki tarah aayi hai 

KAbhi apni kabhi ghair nazar aati hai 

KAbhi ikhlaas ki murat kabhi har'jaai 

Pyar par bas to nahin mera lakin phir bhi 

Tu bata de tujhay pyar karon ya na karon 

Tu ne khud apnay tabasum se jagaya hai jinhein 

Un tamanaon ka izhaar karon ya na karon 

Tu kisi aur kay daman ki kali hai lakin 

Meri raatein teri khushbu se basi rehti hain 

Tu kahin bhi ho , teray phool jaisay aariz ki qasam 

Teri palkein meri aankhon pe jhuki rehti hain 

Teray hathon ki haraarat , teri sanson ki mehak 

Tairati rehti hai ehsaas ki pinhaai main  

Dhoondti rehti hain takhiyul ki baanhein tujh ko 

Sard raaton ki sulagti hui tanhai main 

Tera iltaf-o-karam ik haqeeqat hai magar 

YEh haqeeqat bhi haqeeqat main fasana hi na ho 

Teri manoos nigahon ka yeh mohtaat payam 

Dil kay khoon karnay ka ik aur bahana hi na ho 

Kon janay meray imroz ka farda kya hai 

Qurbatein bakhat-e-parishan bhi ho jati hain 

Dil kay daman se lipti hui rangeen nazrein 

Dekhtay dekhtay anjaan bhi ho jati hain 

Meri darmanda jawani ki tanhaiyon kay 

Muzmahil khawab ki taqdeer bata de mujh ko 

Teray daman main gulistan bhi hain veeranay bhi 

Mera hasil ! meri taqdeer bata de mujh ko 

Ayat-e-hijar phoonk kar jaisay Soch raha hoon

Ayat-e-hijar phoonk kar jaisay 

Kar diya ishq ne hanoot mujhay , , !

Main ab sonay se darta hoon

Kaha tha na !

Mujhay tum is tarah sotay huye mat chor kar jana

Mujhay be'shak jaga dena 

Bata dena 

Mohabbat kay safar main saath meray chal nahin sakti 

Judai main , hijar main , saath meray jal nahin sakti 

Tumhein rasta badalna hai 

Meri had se nikalna hai 

Tumhein kis baat ka dar tha 

Tumhein janay nahin deta ?

Kahin pe qaid kar leta ?

Aray pagli !

Mohabbat ki tabiyat main 

Zabardasti nahin hoti 

Jissay rasta badalna ho , ussay rasta badalnay se 

Jissay had se nikalna ho , ussay had se nikalnay se 

Na koi rok paya hai 

Na koi rok paye ga 

Tumhein kis baat ka dar tha 

Mujhay be'shak jaga detay 

Main tum ko dekh hi leta 

Tumhein koi dua deta 

KAm az kam youn to na hota !

Meray saathi haqeeqat hai 

Tumharay baad khonay kay liye kuch bhi nahin baaqi 

Magar khonay se darta hoon 

Main ab sonay se darta hoon

Aflaas ne bachon ko bhi tehzeeb sikha di

Aflaas ne bachon ko bhi tehzeeb sikha di 

Sehmay huye rehtay hain .... shararatein nahin kartay !

Toot kar chahana zaroori hai

Do Kinaray

Toot kar chahana zaroori hai

pyaar main intiha zaroori hai

hum to dariya ke do kinaray hain

darmiyaan fasla zaroori hai

yeh karri shart hai mohabbat ki

be'wafa se wafa zaroori hai

Bhout ta'kheer se lakin khula yeh bhaid mujh par

Bhout ta'kheer se lakin khula yeh bhaid mujh par

main ab tak mohabbat jaan kar

jis jazba-e-dard ko seenchti ayi 

woh bas tha aash'nai ka rishta

youn hi aadat thi her rastay par 

bas is ky sath chalney ki

wagarna tark-e-khwaish par 

thora sa dil to dukhta , zara si aankh nam hoti

Meri banjar si aankhon se koi dhokha na khaao

Meri banjar si aankhon se 

koi dhokha na khaao 

Keh tum kab dekh sakti ho 

Meray dil main chupay ghaao 

Ae meray kam sukhan saathi 

Tumhein shayed khabar ho gi 

Mohabbat main jo behtay hain 

Woh aansoo khushk hotay hain

Waqat se kon kahay yaar zara aahista chal

Waqat se kon kahay yaar zara aahista chal

Gar nahin wasal to yeh khawab-e-rafaqat hi zara dair rahay 

Waqfa-e-khawab kay paband hain 

Jab tak hum hain ,,,,,!

Yeh jo toota to bikhar jayein saray manzir 

Hast aur neest kay ma'bain agar 

Khawab ka pul na rahay 

Kuch na rahay ...

Waqat se kon kahay 

Yaar zara aahista chal

Tark-e-mohabbat ka izhaar kar kay

Tark-e-mohabbat ka izhaar kar kay 

Tamaam duniya kay ranj-o-alam 

Meri jholi main daal kar 

Bhout pyar se 

Sawal kiya gaya 

Meray dost 

Yeh tumhari aankhon ko kya hua hai

Hawa kay aks main takhleeq kar rahi hoon tujhay

Hawa kay aks main takhleeq kar rahi hoon tujhay 

Mujhay khabar hai mera khawab toot jaye ga

Khwaab sajaney wali aankhain

Khwaab sajaney wali aankhain 

pal bhar main banjar ho jayein

rasta talty takty thak kar

umeedain pathar ho jayein

lab pe tehri ho khamoshi

aur seenay main hashar barpa ho

lafzon ki mala ka dhaaga

beech se jaisay toot gaya ho

bhooli basri sari yadain

main bhi jaisay yaad bana loon 

bhool ke apnay dukhray saray

honton pe muskaan saja loon 

tum dhoondo phir mujh main mujh ko

aur main khud main gum ho jayon

aisa bhi to ho sakta hai 

main bhi ik din tum ho jayon 

kaisa sar'shaar kar gaya koi

Aalam-e-raqs main hain rooh-o-badan 

kaisa sar'shaar kar gaya koi

Youn koi chor diya karta hai apna kar ky

Youn koi chor diya karta hai apna kar ky

tum ne to maar diya hai mujhay tanha kar ky

aik nazar daal kabhi  meray maseeha mujh par

tera kiya jaye ga bemaar ko acha kar ky

Ae mohabbat ky mrahail se guzarney wale

tu ne ansoo kabhi dekha hai sitara kar ky

main bhout jald tumhain bhanwar main yaad ayon ga
itna kush baash na reh mujh se kinara kar ky

Hamain bhout rulaya hai

Sochney main 

aur ghour karney main

bas itna sa fasala tehra 

jab bhi socha hai meri jaan tujh ko 

dharkano se qareeb paya hai

magar

zara sa gour karney se

hamain bhout rulaya hai

Koi lamha meray naam ka

 Koi lamha meray naam ka

Bhout si yadain lay kar 

jab eid ka chaand 

teray aangan main utray ga 

tab ae dost 

in bhooli bisri yadon main 

dhoond len akoi yaad meray naam ki 

koi aisa lamha jo hum ne 

kushi se guzara ho

Kitnay toofan utha'ey aankhon ne

Kitnay toofan utha'ey aankhon ne

Kashti yaadon ki doobti hi nahin

Hisaar-e-lafaz-o-biyaan main gum hoon

Hisaar-e-lafaz-o-biyaan main gum hoon 

Abhi teri dastaan main gum hoon 

Main dekh sakti hoon doston ko 

Magar saf-e-dushmana main gum hoon 

Badan ka apna azaab hai aur 

Isi azab-e-ziyan main gum hoon 

Yeh log ghar keh rahay hain jis ko 

Main aisay makaan main gum hoon 

Kahan woh lazzat musafaton ki 

Main manzilon kay nishan main gum hoon 

Khabar nahin moj-e-dasht-e-jaan ki 

Hawa hoon aur baad'ban main gum hoon 

Abhi kahan fursat-e-mohabbat 

Abhi main kaar-e-jahan main gum hoon

Jinhein main dhoondta tha aasmano main zameeno main

Jinhein main dhoondta tha aasmano main zameeno main 

Woh niklay meray zulmat khana-e-dil kay makeeno main 

Haqeeqat apni aankhon par nu'mayan hui jab apni 

Makan nikla hamaray khana-e-dil kay makeeno main 

Agar kaccha aashna hona mizaj jaba saai se

To sang aastaan kaaba ja milta jabeeno se

Kabhi apna bhi nazara kiya hai tu ne ae majnoo

Keh laila ki tarah khud bhi hai meh'mal nasheeno main 

Maheenay wasal ki ghariyon ki surat  urtay jatay hain 

Magar ghariyan judai ki guzarti hain maheeno main 

Mujhay rokay ga tu Ae na'khuda kya gharq honay se

Keh jin ko doobna ho doob jatay hain safeeno main 

Be'sabab to na thein teri yaadein

Be'sabab to na thein teri yaadein 

Teri yaadon se kya nahin seekha 

Zabt ka hosla barhaa lena 

Aanso'on ko kahin chupa lena 

Kaampti dolti sadaon ko 

Chup ki chadar main dhaamp rakhna 

Be'sabab bhi kabhi kabhi hansana 

Jab bhi ho baat koi talkhi ki 

Mozu-e-guftagoo badal dena 

Be'sabab to na thein teri yaadein 

Teri yaadon se kya nahin seekha

 

Ohnay sari hayati aazmaya ay

Ohnay sari hayati aazmaya ay

Aj menu yaar azmaa lain day 

Main jaan hawalay kar day san 

Is jaan da maalik aa lain day

Diye ki to bas itni si kahani hai

Diye ki to bas itni si kahani hai 

Keh is ka apna 

Koi makan nahin hota 

Magar inhein 

Jahan bhi dukh do 

Yeh apni choti si zaat se 

Roshni 

Bakhair deta hai 

main woh kis tarah se karon biyaan , jo kiyea gaye hain sitam yahan

Meri zaat zrah-e-be'nishaan

main woh kis tarah se karon biyaan , jo kiyea gaye hain sitam yahan

sunay kon meri yeh daastaan , koi ham'nasheen hai na raaz'daan

jo tha jhoot woh bana sach yahan , nahin kholi main ne magar zubaan

yeh akela pan , yeh udasiyaan , meri zindagi ki hain tar'jumaan 

kabhi soi subha main ghoomna , kabhi ujrri shamon ko dekhna

kabhi bheegi aankhon se jaagna , kabhi beetay lamhon ko sochna 

magar ik pal hai umeed ka , hai mujhay khuda ka jo asara

na hi main ne koi gila kiya , na hi main ne dein hain dohayein 

main batayon kiya mujhay kiya milay, mujhay sabar hi ka sila milay

kisi aada'hei karda milay , kisi dard hi ka sira milay

kisi gham ki dil main jaga milay , jo mera hai woh mujhay aa milay 

rahay shaad youn hi mera jahan , keh yaqeen main badlay mera gumaan

Meri zaat zrah-e-be'nishaan

Meri zaat zrah-e-be'nishaan

main woh kis tarah se karon biyaan , jo kiyea gaye hain sitam yahan

sunay kon meri yeh daastaan , koi ham'nasheen hai na raaz'daan

jo tha jhoot woh bana sach yahan , nahin kholi main ne magar zubaan

yeh akela pan , yeh udasiyaan , meri zindagi ki hain tar'jumaan 

kabhi soi subha main ghoomna , kabhi ujrri shamon ko dekhna

kabhi bheegi aankhon se jaagna , kabhi beetay lamhon ko sochna 

magar ik pal hai umeed ka , hai mujhay khuda ka jo asara

na hi main ne koi gila kiya , na hi main ne dein hain dohayein 

main batayon kiya mujhay kiya milay, mujhay sabar hi ka sila milay

kisi aada'hei karda milay , kisi dard hi ka sira milay

kisi gham ki dil main jaga milay , jo mera hai woh mujhay aa milay 

rahay shaad youn hi mera jahan , keh yaqeen main badlay mera gumaan 

 

sard tareek raton main siyaah sawan ki barish main

sard tareek raton main siyaah sawan ki barish main 

dard jab muskuratay hain to aankhain khoob roti hain

Na tujhay chor saktay hain , teray ho bhi nahin saktay

Na tujhay chor saktay hain , teray ho bhi nahin saktay

yeh kaisi be'basi hai aaj hum ro bhi nahin saktay

yeh kaisa dard hai , pal pal hum hain tarpaye rakhta hai

tumhari yaad ati hai to phir so bhi nahin saktay

chupa saktay hain aur na dikha saktay hain logon ko

kuch aisay daagh hain dil par jo hum dho bhi nahin saktay

kaha to tha chor dain gy yeh nagar phir ruk gay lakin

tumhain paa to nahin saktay magar kho bhi nahin saktay

hamara aik hona bhi nahin mumkin raha ab to

jayein kaisay keh tum se door hum reh bhi nahin saktay

Manzir kay ird gird bhi aur aar paar dhund

Manzir kay ird gird bhi aur aar paar dhund 

Ayi kahan se aankh main yeh be'shumaar dhund

Kaisay na us ka sara safar raigaan rahay 

Jis karwan-e-shouq ki hai raah guzaar dhund

Hai yeh jo maah-o-saal ka mela laga hua 

Karti hai is main chup kay mera intizaar dhund

Aankhein woh bazam jsi ka nishan doltay chragh 

Dil woh chaman keh jis ka hai rang-e-bahar dhund

Kamray main meray gham kay siwa aur kuch nahin 

Khirki se jhaankti hai kissay baar baar dhund

Firdos-e-gosh tehra hai ko mabham sa koi shor 

Nizargi ka shaher main hai Aaitabar dhund

Natak main jaisay bikhray hon kirdar jaa ba jaa

Amjad fiza-e-jaal main hai youn be'qaraar dhund

Hum to aseer-e-khwaab thay tabeer jo bhi thi

Hum to aseer-e-khwaab thay tabeer jo bhi thi 

dewaar pe likhi hui tehreer  jo bhi thi

aya aur ik nigha main barbaad kar gaya 

hum ehl-e-intizaar ki jageer jo bhi thi

qadrain jo apna maan thein , neelaam ho gayein

malbay ky mol bik gayi tameer jo bhi thi

talib hain teray reham ky adal ky nahin 

jaisa bhi apna juram tha , taqseer jo bhi thi

hathon pe koi zakham na pairon pe koi nishaan

sochon main thi parri , zanjeer jo bhi thi

Amjad hamari baat woh sunta to aik baar 

aankhon se us ko choomtay tahzeer jo bhi thi

Shaam dhalay jab suraj doobny lagta hai

Shaam dhalay 

Shaam dhalay jab suraj doobny lagta hai 

door ufaq par 

is ky gham main 

boorhay ambar ki aankhon se

aanso ban kar 

khoon tapakney lagta hai

to youn lagta hai

jaisay main bhi suraj ky sang 

gham ki lambi kaali raat main doob raha hoon

Mujhay bhi tum se pyaar honey laga

Mujhay bhi tum se pyaar honey laga

rafta rafta izhaar honey laga 

tu mera raaz daar honey laga

phool ky haar motiya gajray 

kushboo ban kar bahaar honey laga

raat bhar chooriyan khn'nakti rahein

mujhay bhi tum se pyaar honey laga

Hum log na thay aisay

Hain jaisay nazar aatay

Ae waqat gawah rehna 

hum log na thay aisay

yeh shaher na tha aisa

yeh rog na thay aisay

deewaar na thay rastay

zindaan na thi basti

azaar na thay rishtay

khiljaan na thi hasti

youn mout na thi sasti

yeh aaj jo surat hai

halaat na thay aisay

youn ghair na thay mousam

din raat na thay aisay

tafreeq na thi aisi 

sanjook na thay aisay 

Ae waqat gawah rehna

hum log na thay aisay

Raaston ki marzi hai

Raaston ki marzi hai

be'zameen logon ko

be'qaraar aankhon ko

bad'naseeb qadmon ko 

jis taraf bhi ly jayein

rston ki marzi hai

be'nishaan jazeron par

bad'gumaan shaheron main 

be'zabaan musafir ko

jis taraf bhi bhat'ka dain 

raston ki marzi hai
rok lain ya barhney dain

thaam lain ya girny dain

wasal ki lakeeron ko 

torr dain ya milny dain

raston ki marzi hai

ajnabi koi la kar 

hamsafar bana dalein

sath chalney walon ki

raakh bhi ura dain

ya musaftein sari

khaak main mila dain

raston ki marzi hai

Aankhon ky deep hi thay meray ikhtiyaar main

Aankhon ky deep hi thay meray ikhtiyaar main 

so woh jala diye teray intizaar main

main hoon keh mujh ko ab bhi khizaan hi naseeb hai

tu hai keh saans leta hai her dam bahaar main

tu hai keh ab bhi pyaar ko kehta hai ik mout 

main ne hamesha zindagi pai hai pyaar main

qoos-e-qaza yeh pyaar ki tooty na umar bhar

ta hashar hum qaid rahain is hisaar main

Bhout hi moh'tabar hoon main

Bhout hi moh'tabar hoon main 

Bhout manoos hain mujh se

Prinday us ki nagri kay 

Mujhay tanha nahin kartay 

Yeh jungnoo us ki basti kay 

Hawaein paas se jatay huye 

Us ka batati hain 

Keh khushbu raah main ruk kar 

Sirf us kay taqadus main 

Bari hi ehtraman jhuk kay chalti hai 

Baharein meray raaston main 

Kabhi tehra nahin kartein 

Khizan rut meray paon kay talay aa kar 

Bicha deti hai ik chadar 

Shakista zard paton ki 

Guzartay jaa rahay lamhay mujhay badla nahin kartay 

Meri aankhon se ab kay khawab bhi 

Uljha nahin kartay 

Chalay jatay hain khamoshi se ab 

Nazrein jhuka kay hum  

Kisi ko aankh bhar kay bhi kabhi dekha nahin kartay 

Ussay socha to kartay hain 

Ussay maanga nahin kartay 

Ussay maanga to kya ho ga 

Ussay chaha to hai lakin 

Ussay khoya kya ho ga 

Bhout hi sochta hoon main 

Sakoot-e-shab main tanhai mujhay aa kar bata'ti hai 

Tumhein us ki khwaish ne bara anmol kar dala 

Woh mil jata to kay hota 

Chalo janay bhi do 

Jo paas hai rikht-e-safar jano

Keh sadiyon chaltay chaltay bhi yahan se kuch na kam ho ga 

Yeh jazba aisa jazba hai 

Jo dhund'laa hi nahin sakta 

 

Holi holi bhul jawan gay

Holi holi bhul jawan gay 

Ik doojay diyan shaklan vi

Holi holi sikh jawan gay 

Zinda rehan diyan aqlan vi

Ibtada-e-ishq hai rota hai kiya

Ibtada-e-ishq hai rota hai kiya

Ibtada-e-ishq hai rota hai kiya

aagy aagy dekhiya hota hai kiya 

qafly main subha se ik shor hai 

yehni ghafil hum chalay sota hai kiya

sabz hoti hi nahin yeh sar zameen 

tukham-e-khwaish dil main tu bota hai kiya

yeh nishaan-e-ishq hain hain jatay nahin

daagh chati ky abas dhota hai kiya 

ghairat-e-yousaf hai yeh waqay-e-aziz 

mir is ko raigaan khota hai kiya

Aik pash-e-mani rehti hai

Aik pash-e-mani rehti hai 

Uljhan aur garaani bhi 

Ayo phir se larr kar dekhein shayed 

Is se behtar koi aur sabab mil jaye hum ko 

Phir se alag ho janay ka

Kabhi Kabhi koi yaad

Kabhi Kabhi koi yaad

koi bhout purani yaad 

dil ky darwaze par

aisay dastak deti hai

shaam ko jaisay tara nikly

subha ko jaisay phool 

jaisay dheeray dheeray zameen par

roshniyon ka nazool

jaisay rooh ki piyaas bujhany 

utray ko rasool

jaisay roty roty achanak

hans de koi malool

kabhi kabhi koi yaad , koi bhout purani yaad 

dil ky darwaze par aisay dastak deti hai

December main apni aankhon ki nami se

December main apni aankhon ki nami se

mujhay yeh matti nam karni hai

ta keh ugg sakay is banjar zameen par 

woh fasl-e-gul jis ka izhaar

iqbaal ky lafzon main hai

Raqas main raat hai badan ki tarah

Raqas main raat hai badan ki tarah

Raqas main raat hai badan ki tarah

barishon ki hawa main , ban ki tarah

chaand bhi meri karwaton ka gawah

meri bistar ki her shikan ki tarah

chaak hai daaman qaba-e-bahar 

meray khawabon ky pehrahan ki tarah

zindagi , tujh se door reh kar main

kaat loon gi jila watan ki tarah

mujh ko tasleem, meray chaand keh main

teray hamraah hoon ghun ki tarah

baar ha tera intizaar kiya

apnay khwabon main ik dulhan ki tarah

Taraash kar meray baazu uraan chor gaya

Taraash kar meray baazu uraan chor gaya 

Hawa kay paas bar'hana makan chor gaya 

Rafaqaton ka meri , us ko dhiyaan kitna tha 

Zameen lay li magar aasman chor gaya 

Ajeeb shakhs tha , barish ka rang dekh kay bhi 

Khulay dareechay pe ik phool'daan chor gaya 

Jo badalon se bhi mujh ko chupaye rakhta tha 

Barhi hai dhoop to be'saa'ibaan chor gaya 

Nikal gaya kahin un'dekhaye paniyon ki taraf 

Zameen kay naam khula baad'baan chor gaya 

Uqaab ko thi gharz fakhita pakarnay se

Jo gir gayi to youn hi neem jaan chor gaya 

Na'janay kon sa asaib dil main basta hai 

Keh jo bhi tehra woh aakhir makan chor gaya 

Aqab main gehra samandar hai , samnay jungle

Kis intihaa pe mera meharban chor gaya

Tarash kar meray bazoo uraan chor gaya

Tarash kar meray bazoo uraan chor gaya

Tarash kar meray bazoo uraan chor gaya
hawa ke paas barhan amakaan chor gaya

rafaqaton ka meri , us ko dehaan kitn atha 

zameen  ly li magar asmaan chor gaya

ajeeb shakhs tha , barish ka rang dekh ky bhi 

khulay dareechay pe ik phool'daan chor gaya

jo badlon se bhi mujh ko chupaye rakhta tha 

barhi hai dhoop to be'saybaan chor gaya

nikal gaya kahin un'dekhay panion ki taraf

zameen ky naam khula baad'baan chor gaya

uqaab ko thi gharz fakhata pakarney se 

jo gir gyi youn hi neem'jaan chor gaya 

na'janey kon sa asaib dil main basta hai 

keh jo bhi tehra woh aakhir makaan chor gaya

aqab main gehra samandar , samney jungle

kis intiha pe mera mehrbaan chor gaya

Dhoop ka mousam

Main rang main dekhti thi , kushbu main sochti thi

mujhay gumaan tha 

keh zindagi ujli khwaishon ke chragh le kar

meray dareechon main roshni-e-naveed ban kar utar rahi hai

main kohar main chandani pehan kar 

banafshi badal ka hath thamay 

fiza main parwaaz kar rahi thi

samaton main sa'haab lehjon ki barishein thein

basaraton main gulaab chaheron ki roshni thi

hawa ki resham rafaqa'tein thein

hayat khawabon ka silsala thi

khulein jo aankhain to saray manzar dhanak ky us paar reh gaye tahy

na rang meray , na khwaab meray 

huye to bas kuch azaab meray

na chaand ratain , na phool batain 

na neel subhein , na jheel shamein 

na koi aahat , na koi dastak

haroof mafhoom kho chukay thay

alamatein banjh ho chuki thein

gulabi khawabon ky perahan raakh ho chukay tahy

haqeeqaton ki barhangi 

apni sari safakiyon ky hamraah

jism-o-jaan par utar rahi thi

woh mehrbaan , saya daar badal

azaab ki rut main chor kar mujh ko ja chuka tha

zameen ki tez dhoop aankhon main chubh rahi thi