Haqeeqat aashna meray

Guzarish

Haqeeqat aashna meray 

Hamein jeewan kay raston par kahan tak sath chalna hai ?

Kahan woh morr hai jis ne hamein tanhai deni hai 

Kahan tak tum mujhay thamo gay jab girnay lagon ga main 

Kahan par is tarah ho ga keh tum mujh ko na thamo gay 

Tumhein awaz doon ga tum meri jaanib na daikho gay 

Main jeeta hoon ya marta hoon meray baray na socho gay 

Janam din par karo gay phone na hi card bhejo gay 

Suno sathi !!!

Hamein jeewan kay rastay par jahan tak sath chalna hai 

Wahan tak tum mujhay aadi karo na is tarah apna 

Keh jab woh morr aaye aur apni raah main jaon 

To apnay raastay ko ajnabi apnay liye paon 

Chalay bhi aayo

Chalay bhi aayo !!

Chalay bhi aayo 

Keh main to khud ko tumharay rangon main rang chuka hoon 

Tumharay saanchon main dhal chuka hoon 

Tumharay kehnay par aa kay dekho 

Main khud ko kitna badal chuka hoon !

Aur kuch nahin badla

Aur kuch nahin badla 

Aur kuch nahin badla 

Aaj baad muddat kay 

Main ne uss ko daikha hai 

Woh zara nahin badli !

Ab bhi apni aankhon main 

100 sawaal rakhti hai

Choti choti baaton par 

Ab bhi khull kay hansti hai 

Ab bhi us kay lehjay main 

Wohi khan'khana'hat hai 

Woh zara nahin badli !

Ab bhi us ki palkon kay 

Saa'iye geelay rehtay hain 

Ab bhi uss ki sochon main 

Mera naam rehta hai 

Ab bhi meri khatir woh 

Iss tarah hi pagal hai 

Woh zara nahin badli !

Aaj baad muddat kay 

Main ne uss ko daikha hai 

To mujhay bhi lagta hai 

Main bhi uss ki chahat main 

Iss tarah hi pagal hoon 

Baad iti muddat kay 

Aur kuch nahin badla !!

Juz hamaray raaston kay 

Aur kuch nahin badla !

Mujh ko maloom nahin hijar kay qatal lamhay

" Mujh ko maloom nahin hijar kay qatal lamhay "

Mujh ko maloom nahin hijar kay qatal lamhay 

Tu ne kis aag main jal jal kay guzaray hon gay 

Kabhi lafzon main thakan tu ne sameiti ho gi 

Kabhi kaghaz pe faqat ashk utaaray hon gay 

Yeh bhi mumkin hai keh guzra hua lamha lamha 

Jis ko main aaj bhi seenay se laga rakhta hoon 

Teray nazdeek faqat yaad ki parchaai ho 

Door ki jaisay teri us se shanasaai ho 

Jis tarah dhoop december ki dareechay se lagi 

Be'irada kahin aangan main utar aayi ho 

Jaisay mehfil main kisi shakhs ki tanhai ho 

Kabhi qiyaas , kabhi woh gumaan badlay ga

Kabhi qiyaas , kabhi woh gumaan badlay ga 

Main jaanta tha woh apna biyaan badlay ga 

Meri aankhon main bhi rehna tujhay qabool nahin 

Bata keh aur tu kitnay makaan badlay ga 

Bas aik aas pe jeeta hoon aaj tak "Mola"

Kabhi to rang tera aasman badlay ga 

Yeh mum'tahin , yeh nateeja badal nahin sakta 

Ae dil faqat yeh tera imtihaan badlay ga 

Abhi to raah main kitany hi mor aanay hain 

Bata keh aur tu kitnay biyaan badlay ga 

Shikaar is liye mohtaat tha bhout "Atif"

Woh jaanta tha shikari machaan badlay ga  

Abhi to raat baqi hai

Abhi to raat baqi hai 

Abhi taray chamaktay hain 

Abhi suraj nikalnay main 

Zara ta'kheer baqi hai 

Abhi teri kahi baatein !

Meri palkon pe baithi hain 

Abhi manzir judaai ka 

Meri aankhon main thehra hai

Abhi ik aas ka deepak 

Meri aankhon main jalta hai 

Abhi jo khud se kehni hai 

Woh mushkil baat baqi hai 

Abhi kuch dair rona hai 

Abhi to raat baqi hai 

Kitna bojhal sa lehja tha

"Kitna bojhal sa lehja tha "

Kitna bojhal sa lehja tha 

Jab tu ne mujh se poocha tha 

Pyar kay baray main kuch bolo 

Ishq ki sari ramzein kholo 

Pyar ibadat kiyon hota hai ?

Dard ki koi had hoti hai ?

Hijar qayamat kiyon hota hai ?

Kitna bojhal sa lehja tha !

Jab tu ne yeh sab poocha tha 

Aur main us bojhal lehjay main 

Khud ko jalta dekh raha tha 

 

 

Teray meray beech zamana parta hai

Teray meray beech zamana parta hai 

Dil ko kitni baar bata'na parta hai 

Thehar gayi hai baat muqadar par aa kar 

Khud ko yeh aksar samjhana parta hai 

Sochon ko kab koi qaid kar paya hai 

Lakin khud ko to samjhana parta hai 

Rasta ho dushwaar ya raahi anjanay 

Is jeewan ka saath nibhana parta hai 

Khamoshi kay dasnay ka dar ho jis dam 

Aisay main khud shor machana parta hai 

Paas meray to sirf tumhari yaadein hain 

Yaadon se dil ko behlaana parta hai

Ajab si yeh mohabbat hai ajab sa rabt hai hum main

Ajab si yeh mohabbat hai 

Ajab sa rabt hai hum main 

Na ik doojay ko dekha hai 

Na ik doojay ki awazon main ik doojay ko dhoonda hai 

Tumhein jo kuch kaha main ne , ussay tum sach samajhti ho 

Mujhay jo kuch kaha tum ne , ussay main sach samajhta hoon 

Isi ik 

Chat window 

main 

Hum ik doojay kay jeewan kay her ik mousam main rehtay hain 

Ajab sa rabt hai hum main 

Ajab si yeh mohabbat hai 

Jissay tasveer aur awaz se kuch bhi nahin lena

Jissay khawaish nahin koi 

Kisi ko ru-ba-ru dekhein 

Kisi awaz ko poojein 

Mohabbat ki shabahat ko 

Kisi anmol saa'at ko  

Kisi kay aks main dhoondein 

Ajab si yeh mohabbat hai 

Keh jis main lafz kehtay hain aur aankhein kuch nahin kehtein 

Yeh lafzon se behalti hai , yeh un main saans leti hai 

Yeh un be'jaan tasveeron main kitnay rang bharti hai 

Ajab sa rabt hai hum main 

Ajab si yeh mohabbat hai 

Keh jaisay awaz aur tasveer se kuch bhi nahin lena 

Keh jo lafzon ki khushbu se dilon ko gun'gunati hai 

Keh jo palkon pe chahat kay hazaron khawab likhti hai 

Tumharay aur meray darmiyaan jo saans leti hai 

Ajab si woh mohabbat hai

Mujhay jo aankh se ojhal dikhaai deta hai

Mujhay jo aankh se ojhal dikhaai deta hai 

Woh chup rahay bhi to mujh ko sunaai deta hai 

Tumharay paaon main rakh di hai shairy apni 

Kisi ko kon youn apni kamaai deta hai 

Keh jaisay sab se gunnah'gaar hai woh duniya main 

Woh baat baat pe itni safaai deta hai

Jab khizaan ne sab darakhton ko akela kar diya

Jab khizaan ne sab darakhton ko akela kar diya 

Aik panchi dukh main dooba tehniyaan ginta raha 

Rait pe likhay huye woh naam kab kay mitt gaye 

Magar saahil pe baitha seepiyan ginta raha 

Jab talash-e-rizq ne chalnay ki taqat cheen li 

Baith kar foot'path par woh gariyan ginta raha

Abhi tak to hum khud'faraybi ki dhund main

Abhi tak to hum khud'faraybi ki dhund main 

Youn haathon ko thaamay 

Judai kay khadshon ko dil se nikalay 

Chalay jaa rahay hain 

Magar dhund chattay gi 

To maloom ho ga 

Keh hum is safar main akelay nahin hain 

Judai hamesha se thi saath apnay 

Zamanay se juda lagnay laga hai

Zamanay se juda lagnay laga hai 

Woh kitna ba'wafa lagnay laga hai 

Yeh kaisay dor main hum jee rahay hain 

Bashar bhi ab khuda lagnay laga hai 

Mujhay tareekiyon ne das liya hai 

Mujhay jugnoo diya lagnay laga hai 

Ajab si pyas thehri hai labon par 

Samandar bhi zara lagnay laga hai 

Dukhi logon kay aansoo ponjhta hai 

Woh kitna parsaa lagnay laga hai 

Youn apnay shaher main gum ho gaya hoon 

Keh her rasta naya lagnay laga hai 

Mohabbat ki tabiyat main agarcha gham nahin hota

Mohabbat ki tabiyat main agarcha gham nahin hota 

Magar khadsha judai ka ghamon se kam nahin hota 

Koi jugnoo, koi taara kahin se dhoond kar laao !

Gharon ko phoonk denay se andhera kam nahin hota 

Mohabbat karnay walay to hamesha saath rehtay hain 

Mohabbat main judai ka koi mousam nahin hota 

Mujhay tum chor kar khud bhi sari umar tarpay ho 

Koi aisi saza detay tumhein to gham nahin hota

Zameen walon se yeh keh kar falak se dhal gaya suraj 

Ujaala baant denay se ujaala kam nahin hota

Tum se milnay ka wada tha

Jeet 

Tum se milnay ka wada tha 

Jee karta tha 

Jaisay mujh ko tarpati ho 

Waisay hi tum ko tarpa'on 

Tum se aaj na milnay jaaon 

Lakin aaj bhi dekho jana !

Meri mohabbat , meri zid se 

Jeet gayi hai 

Abhi ik mor aaya hai abhi manzil nahin aayi

"Abhi ik mor aaya hai "

Abhi ik mor aaya hai 

Abhi manzil nahin aayi 

Abhi apnay diye se

Aur kitnay hi diye mujh ko jalanay hain 

Abhi to is safar main 

Aur kitnay mor aanay hain 

Abhi main taza dam hoon 

Abhi seenay main jalta woh diya 

Waisay hi roshan hai 

Abhi zulmat kaday main 

Apnay hissay ki sham'mein mujh ko jalani hain 

Keh youn bhi roshni taqseem karnay kay safar main 

Manzalon ki qaid kya ho gi 

Puranay sathiyon ko chornay ka 

Gham to hai dil main !

Keh jin kay saath chalnay se 

Safar ne apni sari mushkalein khud hi sameti thein 

Naye raston pe un ki yaad meri hamsafar ho gi

Puranay sathiyon ko chornay ka gham to hai dil main 

Magar mujh ko abhi to 

Roshni taqseem karni hai 

Abhi to mor aaya hai 

Abhi manzil nahin aayi

Aaj tak main nahin samjha teri duniya kya hai

Aaj tak main nahin samjha teri duniya kya hai 

Ae khuda tu hi bata de yeh tamasha kya hai 

Yeh suna hai lakeeron ki zubaan hoti hai 

Bol deti hain keh is haath main likha kya hai 

Aaj tak main nahin samjha teri be'chaini ko 

Ae meray dil ! yeh bata de teri mansha kya hai 

Bandagi aur ibadat main yeh dil jhukta hai !

Jis main yeh dil na jhukay , bol woh sajda kya hai 

Tu ne sab kuch hi mera cheen liya hai mujh se !

Zindagi ! aur bata tera taqaza kya hai

Khud ko tujh pe waar deta hoon

Khud ko tujh pe waar deta hoon 

Tera sadqa utaar deta hoon 

Jaisay kuch bhi nahin hai karnay ko 

Waqat aisay guzaar deta hoon 

Tum sitaron ko tor sakti ho 

Main tumhein Aaitabaar deta hoon 

Dukh musal'sal , in main khushiyon ko 

Chand lamhay udhaar deta hoon

Ajeeb si be'basi hai yeh

Be'basi

Ajeeb si be'basi hai yeh 

Tumhein keh bhi nahin sakta 

"Mujhay tum se mohabbat hai 

Kis qadar be'basi thi lehjay main

Be'basi

Kis qadar be'basi thi lehjay main 

Tu ne jab mujh se kaha tha ik din 

"Main tumhein sochti kiyon rehti hoon"