Imran's Poetry: 05/02/15

May 2, 2015

Raat kay pichlay pehar ronay kay aadi roye

Aap aaye bhi magar ronay kay aadi roye

Un kay aa janay se kuch tham se gaye thay aansoo

Un kay jaatay hi magar ronay kay aadi roye

Haye pabandi-e-adaab teri mehfil ki

Keh sar-e-rag'guzar ronay kay aadi roye

Aik taqreeb-e-tabasam thi baharan lakin

Phir bhi aankhein huein tar ronay kay aadi roye

Dard mandon ko kahin bhi to qaraar aa na saka

Koi sehra ho keh ghar ronay kay aadi roye

Ae Faraz aisay main barsaat kattay gi kiyon kar

Gar youn hi shaam-o-sehar ronay kay aadi roye

Kis ko gumaan hai ab keh meray saath tum bhi thay

Haye woh roz-o-shab keh meray saath tum bhi thay

Yadish ba'khair ehad-e-guzishta ki sohbatein

Ik dour tha ajab keh meray saath tum bhi thay

Be'mehri hayat ki shiddat kay ba'wajood

Dil mut'maein tha jab keh meray saath tum bhi thay

Main aur taqabil-e-gham-e-doran ka hosla

Kuch ban gaya sabab keh meray saath tum bhi thay

Ik khawaab ho gayi hai rah-o-rasm-e-dosti

Ik weham sa hai ab keh meray sath tum bhi thay

Woh bazam-e-dost yaad to ho gi tumhein Faraz

Woh mehfil-e-tarb keh meray saath tum bhi thay

Agar kisi se marasim barhanay lagtay hain

Teray firaaq kay dukh yaad aanay lagtay hain

Hamein sitam ka gila kya , keh yeh jahan walay

Kabhi kabhi tera dil bhi dukhanay lagtay hain

Safeenay chor kay saahil chalay to hain lakin

Yeh dekhna hai keh ab kis thikanay lagtay hain

Palak jhapaktay hi duniya ujaar deti hai

Woh bastiyan jinhein bastay zamanay lagtay hain

Faraz miltay hain gham bhi naseeb walon ko

Her ik kay haath kahan yeh khazanay lagtay hain

O meray masroof khuda apni duniya dekh zara

O meray masroof khuda
Apni duniya dekh zara

Itni khalqat kay hotay

Shehron main hai snaata

Jhompri walon ki taqdeer

Bujha bujha sa ik diya

Khaak uraatay hain din raat

Meelon phail gaye sehraa

Zaagh-o-zaghan ki cheekhon se

Soona jungle goonj utha

Suraj sar par aa poncha

Garmi hai ya roz-e-jaza

Pyasi dharti jalti hai

Sookh gaye behtay dariya

Faslein jal kar raakh huein

NAgri nagri kaal para

O meray masroof khuda

Apni duniya dekh zara

Hum faqeeron se dosti kar lo

Gur sikha dain gay tumhein baadshahi ka

Yeh aur baat hai keh tameer nahin ho sakta

Warna her dil main aik taaj.mehal hota hai

Khawabon main khayal kho rahay hon jaisay

Khawabon main khayal kho rahay hon jaisay
Nashay main zamanay so rahay hon jaisay

Seenay se dhalak gaya hai kis ka aanchal
Khurasheed talooh ho rahay hon jaisay

Gawara bhi sahi jo dukh teray hain

Gawara bhi sahi jo dukh teray hain
Magar hum ko kai gham doosray hain

Ajab ehal-e-chaman kay din phiray hain
Baharon kay bagoolon main ghirray hain

Watan main wazah'daari ne na chora
Paraye shaher hum dar dar phiray hain

Samaye phir na duniya ki nazar main
Na janay kis bulandi se giray hain

Ghaneemat hai jo hans kar baat kar lein
Hamein mat chairiye hum sar phiray hain

Jo duniya kay huye woh sakhat roye
Khush woh log jo ab tak teray hain

Faraz aaj itafaqan mil gaye thay
YEh saahib bhi to deewane teray hain

Yeh phaili hui raat dhalay ya na dhalay

Yeh phaili hui raat dhalay ya na dhalay
YEh yorish-e-halaat talay ya na talay

Roshan kar chragh-e-deer-o-kaaba
Phir shamma-e-kharabaat jalay ya na jalay

Yeh dour may-o-jaam chalay ya na chalay

Yeh dour may-o-jaam chalay ya na chalay
Nashay se bhi phir kaam chalay ya na chalay

Hum ehal-e-kharabaat se youn bair na rakh
Saqi tera kal naam chalay ya na chalay

Tu meri zindagi hai magar jaan-e-man

Tu meri zindagi hai magar jaan-e-man
Ab woh ishq-o-mohabbat ki rasmein nahin

Meray dil main kai ghaao aisay bhi hain
Jin ka dar'man teri dastaras main nahin

Aik gham jis ki shiddat hama geer hai
Teray bas main nahin meray bas main nahin

Tera ehsaan hai tu ne meray liye

Tera ehsaan hai tu ne meray liye
Apni palkon se raahon kay kaantay chunay

Khud karri dhoop main reh kay meray liye
Tu ne zulfon kay shadaab saaye bunay

Meri khatar zamanay ko pagal kaha
Meri khatar zamanay kay tahnay sunnay

Meri afsurdagi se parishaan na ho

Meri afsurdagi se parishaan na ho
Tu meri talkhiyon ka sabab to nahin

Teri aankhein to meri hi dam-saaz hain
Thein kabhi ajnabi lakin ab to nahin

Tujh ko meri mussarat muqadam sahi
Tera gham mujh ko wajah-e-tarb to nahin

Kya rukhsat-e-yaar ki gharri thi

Kya rukhsat-e-yaar ki gharri thi
Hansti hui raat ro pari thi

Hum khud hi huye tabbah warna
Duniya ko hamari kya pari thi

Yeh zakham hain un dino ki yaadein
Jab aap se dosti pari thi

Jatay to kidhar ko teray wehshi
Zanjeer-e-junoon karri pari thi

Dar'yooza gir-e-hayat ban kar
Duniya teri raah main kharri thi

Gham thay keh Faraz aandhiyan thein
Dil tha keh Faraz pankhri thi

Urrtay panchi shikaar karnay walo

Urrtay panchi shikaar karnay walo
Gulzaar main geer-o-dar karnay walo

Kitni kaliyan masal kay rakh dein tum ne
Tazeen-e-gul-o-bahar karnay walo

Her shaakh chaman ki jal rahi hai

Her shaakh chaman ki jal rahi hai
Kya baad-e-muraad chal rahi hai

Hum hain keh faraib kha rahay hain
Duniya hai keh chaal chal rahi hai

Youn dil main hai teri yaad jaisay
Veeranay main aag jal rahai hai

Rukh phair liya hai jab se tu ne
Duniya ki nazar badal rahi hai

Dar paish hai aaj bhi woh surat
Jo surat-e-haal kal rahi hai

Itni bhi Faraz bad'dili kya
Sambhlo ! keh fiza badal rahi hai

Phoolon ki jabeen jhulas gayi hai yaaro

Phoolon ki jabeen jhulas gayi hai yaaro
Gulzaar main aag bas gayi hai yaaro

Guzray hain kahan se rang-o-bu kay toofan
Shabnam ko fiza taras gayi hai yaaro

Her aik dil ko talab her nazar sawaali hai

Her aik dil ko talab her nazar sawaali hai
Keh shaher-e-husan main jalwon ki qeh saali hai

Kahan hai dost keh Aashoob-e-dehar se main ne
Teray khayal ki asoodagi bachaa li hai

Bata raha hai fiza ka atoot sanaata
Ufaq se phir koi Aandhi utarnay wali hai

Larz rahay hain shagoofay chaman main khiltay huye
Hina-e-dast-e-saba main lahoo ki laali hai

Piyo sharaab keh naseh ne zehar bhi de kar
Hamari jurrat-e-rindaana Azma li hai

Aaj phir dana-e-gandum kay silsalay main Faraz
kisi Khuda ne meri khald baich daali hai

Ghunchay ki chatak sunaai de gi yaaro

Ghunchay ki chatak sunaai de gi yaaro
Saagar ki khanak sunaai de gi yaaro

Zindaan ka sakoot goonjh uthay ga jis se
Aisi dastak sunaai de gi yaaro

Dost jab thehray chaman kay dushman-e-jaan-e-bahar

Dost jab thehray chaman kay dushman-e-jaan-e-bahar
Zakham dikhlaein kissay phir seena-e-cha'kaan-e-bahar

Nasha-e-ehsaas-e-khush waqti ne andha kar diya
Barq bhi chamki to hum samjhay chraghan-e-bahar

Khoon rulwatay hain sab ko apnay apnay tajarbay
Woh pash-e-maan-e-khizaan hon ya pash-e-maan-e-bahar

Ab kay kuch aisi hi ban aayi keh hum mazoor hain
Warna kab phaira tha hum ne koi farmaan-e-bahar

Ae khosha ehad-e-khizan jab naghma pairaai to thi
Ab to surma dar guloo hain khush'nuwan-e-bahar

Gar youn hi baad-e-saba athkeliyaan karti phiri
Shola-e-gul se bharrak utthay ga daaman-e-bahar

Kab huye dil tang hum zindaan main bhi reh kar Faraz
Haan magar jab aa gayi hai yaad yaaran-e-bahar

Ik raah-e-taweel ik karri hai yaaro

Ik raah-e-taweel ik karri hai yaaro
Fataad ajeeb aa pari hai yaaro

Kis simat chalein kidher na jayein aakhir
Dorahay pe zindagi kharri hai yaaro

Kuch aisay hum ne kharabay basaaye shehron main

Kuch aisay hum ne kharabay basaaye shehron main
Jo dasht walay thay woh bhi uth aaye shehron main

Hamari sada dili dekhiye keh dhoondtay hain
Hum apnay dais ki baatein puranay shehron main

Kuch is tarah se her aik baam-o-dar ko dekhtay hain
Zamanay baad koi jaisay aaye shehron main

Suna hai jab bhi luti hai bahar-e-veerana
To chand aur chaman muskuraye shehron main

Qadam qadam pe huye talkh tajarbay phir bhi
hamein hayat kay gham kheench laye shehron main

Hawa na do keh yeh jungle ki aag hai yaaro
Ajab nahin hai agar phail jaye shehron main

Faraz hum woh ghazalan-e-dasht-o-sehra main
Aseer kar kay jinhein log laye shehron main

Jin kay dam se thein bastiyan abaad

Jin kay dam se thein bastiyan abaad
Aaj woh log hain kahan abaad

Jal rahay hain haray bharay Gulzaar
Gham hua hai kahan kahan abaad

Keh rahi hai shakistagi dil ki
Tha makeeno se yeh makaan abaad

Hum ne dekhi hai gosha-e-dil main
Aik duniya-e-be'karaan abaad

Chand manzir ujaarnay walo
Ho rahay hain kai jahan abaad

Ghar jala kar na rad-e-mohabbat main
Yeh to hota hai khan'maan abaad

Kitnay taray Faraz toot chukay
Hai abhi tak yeh khaak daan abaad

Barh jata hai dil ka rog gahay-ba-gahay

Barh jata hai dil ka rog gahay-ba-gahay
Kar letay hain apna sog gahay-ba-gahay

Jo yaad dila detay hain bhoolay sadmay
Mil jatay hain aisay log gahay-ba-gahay

Lafzon main fasanay dhoondtay hain hum log

Lafzon main fasanay dhoondtay hain hum log
Lamhon main zamanay dhoondtay hain hum log

Tu zehar hi de sharaab keh kar saaqi
Jeenay kay bahanay dhoondtay hain hum log

Teri baatein hi sunanay aaye

Teri baatein hi sunanay aaye
Dost bhi dil dukhanay hi aaye

Phool khiltay hain to hum sochtay hain
teray aanay kay zamanay aaye

Aisi kuch chup si lagi hai jaisay
Hum tujhay haal sunanay aaye

Ishq tanha hai sar-e-manzil-e-gham
Kon yeh bojh uthanay aaye

Ajnabi dost hamein dekh kay hum
Kuch tujhay yaad dilanay aaye

Dil dharakta hai safar kay hungaam
Kaash phir koi bulanay aaye

Ab to ronay se bhi dil dukhta hai
Shayed ab hosh thikanay aaye

Kya kahein phir koi basti ujri
Log kiyon jashan mananay aaye

So raho mout kay pehlu main Faraz
Neend kis waqat na janay aaye