Shab-e-hijraan se baat kar li hai

Apni tanhaiyon se poocha hai

Shab-e-hijraan se baat kar li hai 

Meray andar ki sehmi khamoshi 

Meray baahir ka hansta chehra bhi 

Raat kay san'sanaatay lamhay bhi 

Din ka dasta hua ujaala bhi 

Zabt ka toota yeh bandhan bhi 

Sabar ka choot'ta yeh daaman bhi 

Us ki yaadain bhi kuch ishaaron main bhi

Mujh ko majboor kar rahi hain sab 

Ayo us kay paas chaltay hain 

US se kehtay hain  keh kuch dawa kar day 

Apni fitrat ko chor kar ik pal 

koi wada to woh wafa kar dain 

In ki baaton se kuch nahin ho ga 

Aakhri faisal to dil ka hai 

Dil yeh kehta hai us se milnay se 

Apni tanhaiyaan hi achi hain 

Ab akelay main lag gaya hai dil 

Us se milnay hamain nahin jana 

Us ki baatain udaas kar dain gi 

Meri aankhain

Woh aansoo hamaray 

Aakhri aansoo thay 

Jo hamain galay mil kar 

Bahaye tanha jaanay waqat un aansoo'on 

se kis tour paish aye

Magar meri fraib-e-waqt ki behki hui aankhon ne

Us kay baad bhi aansoo bahaye hain 

Meray dil ne bhout se dukh rachaye hain 

Magar youn hai keh maah-o-saal ki si raaigaani main 

Meri aankhain 

Galay miltay huye rishton ki furqat kay woh aansoo

Shayed 

Phir na ro payein

Mohabbat ki hawaalay se

Fiza main phir se koi roshna ka aks jaaga hai 

Mera hum'raqs jaaga hai 

Jo meray dil kay rukh'saaron ko choo kay 

Khushboo'on kay geet gaata hai 

To youn mehsoos hota hai

Keh jaisay jugno'on ne titliyon se Perahan badlay 

Keh jissay faakhtaaon ne udaasi kay chalan badlay 

Keh phir fart-e-junoon main zindagi ki saans tham jaye

Mohabbat ki hawaalay se

Azaab-e-sham main gham jaye

Wafa hai zaat aurat ki

Woh aksar mujh se kehti thi 

Wafa hai zaat aurat ki 

Magar jo mard hotay hain 

Bhout be'dard hotay hain 

Kisi bhanwar ki surat gul ki khushboo loot letay hain 

Suno tum ko qasam meri 

Riwaayat tor dena tum 

Na tanha chor dena tum 

Na yeh dil tor kay jana 

Magar phir youn hua hum'dam

Mujhay anjaan rastay pe chor kar us ne 

Mera dil tor kar us ne mohabbat chor di us ne 

Wafa hai zaat aurat ki 

riwaayat tor di us ne 

Hua juda to baat kiya hai

Main guri rutton ko yaad kar kay 

Woh khud se teri hi baat kar kay 

Main shaam-e-manzar ko dekhta hoon 

Dino ko apnay khraab kar kay 

Hua juda to baat kiya hai 

Main sochta hoon yeh yaad kiya hai 

Bhujha raha hoon main pyaas apni 

Aankhon ko apni sraab kar kay 

Tumhain tha jaana to main samjha 

Keh dekho kitna main na'samjh tha 

Jo mil na paye jawaab mujh ko 

Gaye ho tum woh sawaal ban kay 

Tumhain hi her pal sochnay se 

hui hai mujh ko mahaarat haasil

Teri yaadain mili hain mujh ko 

Haseen sa ek inaam ban kar 

Koi aisa harf na mil saka

Mujhay roz-o-shab ki kitaab main

Koi aisa harf na mil saka

Jissay misl-e-gul ka khitaab doon

Jissay chandani ki si taab doon

Jissay dhoond kar , jissay khoj kar

Rukh-e-asmaan pe saja bhi doon

Meray khoon-e-dil ki nigarishain

Meri rooh tak kay fishaar bhi 

Yahan ilm-o-fun ki dukaan par 

Baray sastay daamon se bik gaye

Mujhay tor kar mijhay phor kar 

Meray doston ne jala diya 

Raah-e-zindagi kay ghubaar main 

Meri raakh tak ko urra diya 

Mujhay phir bhi koi gila nahin 

Jo mila nahin , so mila nahin 

Yeh aaghaz-e-judai hai keh andaaz-e-mohabbat hai

Tumhain jo be'sabab mujh se khafa honay ki aadat hai 

Yeh aaghaz-e-judai hai keh andaaz-e-mohabbat hai 

Wafa kay rang main dekho jafa achi nahin hoti 

Kisi se pyaar main itni ana achi nahin hoti 

Faqat kehnay ki baatain hain 

Nibhaata kon hai kis ko ?

Chalo ab deikh letay hain 

Maanta kon hai kis ko 

To us kaaghaz ki kashti ko

Chalo phir dhoond letay hain usi masoom bachpan ko

Unhi masoon khushiyon ko 

Unhi rangeen lamhon ko 

Jahan gham ka pata na tha 

Jahan dukh ki samjh na thi 

Jahan bas muskurahat thi 

Bahaarain hi bahaarain thein

Chalo phir dhoond layein hum 

Usi masoom bachpan ko 

Keh jab sawan barasta tha 

To us kaaghaz ki kashti ko 

Bana'na aur daboo dena 

Bhout acha sa lagta tha 

Aur is duniya ka her chehra 

Bhout sacha sa lagta tha 

Chalo phir dhoond letay hain usi masoom bachpan ko

Us ne kaaghaz ki kai kashtiyaan paani me utaari

Dair tak baithay huye dono ne baarish dekhi

Woh dekhti thi mujhay bijli ki taaron pe latak'ti hui boondain 

Jo taaqub main thi ik doosray kay 

Aur ik doosray ko chhut'tay hi taaron se tapak jaati thi 

Mujh ko yeh fikar keh bijli ka current 

Chu gaya nangi kisi taar se to

Aag kay lag jaanay ka baais ho ga 

Us ne kaaghaz ki kai kashtiyaan paani me utaari

Aur yeh keh kay baha di keh samandar main milain gay 

Mujh ko yeh fikar , keh is baar bhi sailaab ka paani 

Khud keh utray ga kohsaar se jab 

Tor kay lay jaye ga yeh kachay kinaaray 

Ouk main bhar kay woh barsaat ka paani 

Adhbhari jheelon ko tarasti rahi

Woh bhout choti thi , kamsin thi 

Woh masoom bhout thi 

Aabsharon kay tranum pe

Kadam rakhti thi 

Aur goonjti thi 

Aur main umar ki fikar main gum 

Tajurba hamraah liye

Saath hi saath main 

Behta hua , chalta hua , behta gaya 

Bas ik wehshat ka saya hai

Meray dil kay nihaan khaano main kitnay lafz

Chaltay huye youn Bain kartay hain 

Keh meray her taraf cheekon ka 

Wehshat'naak shorish , phail jaata hai , stata hai 

Magar jab siskiyaan letay huye yeh lafaz main 

Kaaghaz ki aaghosh-e-meharbaan main 

Chupnnay kay liye , Tarteeb deti hoon 

Achanak yeh sabhi alfaaz youn chup saadh letay hain 

Keh goya boltay na hon 

Main khaali warq pe nazrain jamaye 

Qarb ki gehri andheri khamoshi ko 

APnay andar youn chupaati hoon 

Keh jaisay koi apnay zakham ko un se chupaata hai 

Jo ussay pyaar kartay hain 

MAgar is aik koshish se , na dil ka dard jaata hai 

Na koi hal nikalta hai 

Bas ik wehshat ka saya hai 

Jo her suu phail raha hai 

Jis tarah shaakh se tootay huye aik pattay ka rang

Dard kuch dair hi rehta hai bhout dair nahin 

Jis tarah shaakh se tootay huye aik pattay ka rang 

Maand parh jaata hai Kuch roz alag shaakh se reh kar 

Shaakh se toot kar yeh dard jeeiyea ga kab tak 

Khatam ho jaye gi jab is ki rasad 

Tim'tamaye ga zara dair ko bujhtay bujhtay 

Aur phir lambi si saans dhun ki lay kar 

Khatam ho jaye ga , yeh dard bhi bujh jaye ga 

Dard kuch dair hi rehta hai , bhout dair nahin

Had-e-nazar se aagay barh kar dekhna bhi juram hai

Zindagi kay jitnay darwazay hain mujh par band hain 

Dekhna

Had-e-nazar se aagay barh kar dekhna bhi juram hai 

Sochna 

Apnay aqeedon aur yaqeeno se nikal kar sochna bhi jurm hai 

Kiyon bhi kehna jurm hai

Kaisay , kehna bhi juram hai 

Saans lenay ki azadi myussar hai , magar 

Zindagi rehnay kay liye insaan ko , kuch aur bhi dar'kaar hai 

Aur is kuch , "aur" bhi ka tazkara bhi jurm hai 

Aye hunar mandaan-e-ewaan-e-eqaid

Zindagi kay naam par , bas ik inayat chahiye

Mujh ko in saray jraaim ki ijaazat chahiye