Yaad kar kay mujhay num ho gayi hon gi palkein

Yaad kar kay mujhay num ho gayi hon gi palkein 

Aankh main par gaya kuch keh kar yeh taala ho ga 

Woh samandar hai to phir rooh ko shadaab karay

Woh samandar hai to phir rooh ko shadaab karay 

Tishnagi mujhay kiyon deta hai sarabon ki tarah 

Zindagi main yeh hunar bhi Aazmana chahiye

Zindagi main yeh hunar bhi Aazmana chahiye 

Jung kisi apnay se ho to haar jana chahiye 

Kuch to teray mousam hi mujhay raas kam aaye

Kuch to teray mousam hi mujhay raas kam aaye 

Aur kuch meri matti main baghawat bhout thi  

Ab tak junoon hi apna asaasa raha magar

Ab tak junoon hi apna asaasa raha magar 

Tujh se milay to saahib-e-adraak ho gaye 

Issi koochay main kai uss kay sha'nasa bhi to hain

Issi koochay main kai uss kay sha'nasa bhi to hain 

Woh kisi aur se milnay kay bahanay aaye 

Roi hoon aaj khul kay , bari muddaton kay baad

Roi hoon aaj khul kay , bari muddaton kay baad

Baadil jo aasman pe chaye thay , chatt gaye 

Shaher-e-wafa main dhoop ka sathi koi nahin 

Suraj sar'on pe aaye to saa'iye bhi ghatt gaye 

Qaid main guzar gayi jo umar baray kaam ki thi

Qaid main guzar gayi jo umar baray kaam ki thi 

Par main kya karti keh zanjeer teray naam ki thi 

Haan yeh mousam to woh hai

Sar'shari

Haan yeh mousam to woh hai 

Keh jis main nazar chup rahay 

Aur badan baat karta rahay 

Uss kay haathon kay shabnam payalon main 

Chehra mera 

Phool ki tarah hal'koray leta rahay 

Pankhrri pankhrri 

Uss kay boson ki baarish main 

Peham nikharti rahay 

Zindagi iss junoon khez baarish kay shano par sar ko rakhay 

Raqs karti rahay !

Jab sitaray hi nahin mil paye

Jab sitaray hi nahin mil paye 

Lay kay hum shams-o-qamar kya kartay 

Main uss ki das'taras main hoon , magar woh

Main uss ki das'taras main hoon , magar woh 

Mujhay meri raza se maangta hai 

Tumhara kehna hai

Tumhara kehna hai 

Tum mujhay be'panah shiddat se chahatay ho

Tumhari chahat 

Wisaal ki aakhri hadon tak 

Faqat meray naam ho gi 

Mujhay yaqeen hai mujhay yaqeen hai 

Magar qasam khanay walay larkay 

Tumhari aankhon main aik till hai 

Yeh haseen shaam apni

Yeh haseen shaam apni

Abhi jis main ghull rahi hai

Teray peh'rahan ki khushbu

Abhi jis main ghull rahay hain

Meray khawab kay shagoofay

Zara dair ka hai manzir

Zara dair main ufaq pe

Khillay ga koi sitara

Teri simat daikh kar woh

Karay ga koi ishara

Teray dil ko aaye ga phir

Kisi yaad ka bulawa

Koi qissa-e-judai

Koi kaar-e-na'mukamal

Koi khawab-e-na'shagufta

Koi baat kehnay wali

Kisi aur aadmi se

Hamein chahiye tha milna

Kisi ehad-e-meharban main

Kisi khawab kay yaqeen main

Kisi aur aasman main

Kisi aur sar'zameen main

Guzar gaye hain bhout din rafaqat-e-shab main

Guzar gaye hain bhout din rafaqat-e-shab main 

Ik umar ho gayi chehra woh chaand sa daikhay 

Teray siwa bhi kai rang khush nazar thay magar 

Jo tujh ko daikh chuka ho woh aur kya daikhay

Garcha likhi hui thi shahadat imaam ki

Garcha likhi hui thi shahadat imaam ki 

Lakin meray Hussain (r.a) ne hujat tamam ki 

Zainab ki be'ridai ne sar mera dhak diya 

Aaghaz-e-subh-e-no hui woh shaam , shaam ki 

Ik khawab-e-khaas chasham-e-Mohammad (PBUH)main tha chuppa 

Tabeer noor-e-Aain Mohammad (PBUH) ne aam ki 

Bachon ki pyaas maalik-e-kosar pe shaaq thi 

Saqi ko warna may ki zaroorat na jaam ki 

Har sa naseeb baadshahon ko nahin naseeb 

Aaqa se mil rahi thi gawahi ghulam ki 

Dariya pe tishna lab hain yeh sehra main shaad kaam 

Duniya ajab hai un kay safar aur qiyaam ki 

De kar raza raza jo chehra-e-shabeer zard hai 

Thi iltaja-e-jung yeh kis laala faam ki

Yeh chand aur yeh abar-e-rawan guzarta rahay

Yeh chand aur yeh abar-e-rawan guzarta rahay 

Jamaal-e-shaam teh aasman guzarta rahay 

Bharra rahay teri khushbu se tera sehan-e-chaman 

Bas aik mousam-e-ambar fishan guzarta rahay 

Sama'atein teray lehjay se phool chunti rahein 

Dilon kay saaz pe to naghma khawan guzarta rahay 

Khuda karay teri aankhein hamesha hansti rahein 

Diyaar-e-waqat se tu shaad'maan guzarta rahay 

Main tujh ko daikh na paon to kuch malaal nahin 

Kahin bhi ho tu , sitara-e-nishan guzarta rahay 

Main maangti hoon teri zindagi qayamat tak 

Hawa ki tarah se tu jawidaan guzarta rahay 

Mera sitara kahin toot kar bikhar jaye 

Falak se tera khat keh'kishan guzarta rahay 

Main teri chaon main kuch dair baith loon aur phir 

Tamaam raasta be'sayeban guzarta rahay 

Yeh aag mujh ko hamesha kiye rahay roshan 

Meray wajood se to shola saman guzarta rahay 

Main tujh ko daikh sakon aakhri bisarat tak 

Nazar kay samnay bas ik saman guzarta rahay 

Hamara naam kahin to likha hua ho ga 

Mah-o-najoom se yeh khaak'daan guzarta rahay 

Main tera saath na de paon phir bhi tera safar 

Gulaab-o-khawab kay hi darmiyan guzarta rahay 

Main teray seenay pe sar rakh kay waqat bhool gayi 

Khayal-e-tezi umar-e-rawan guzarta rahay !

In dino meri apnay aap se bol chal band hai

In dino 

Meri apnay aap se bol chal band hai !

Meray andar aik baanjh ghussa 

Phunkaarta rehta hai 

Na mujhay dasta hai   

Na meray gird apni girift dheeli karta hai 

Nain'wa ki sar'zameen 

Aik baar phir surkh hai 

Faraat kay pani par

Abn-e-ziyaad kay taraf daron ka aik baar phir qabza hai 

Zameen aur aasman 

Aik baar sham'shahay ka lahu 

Wasool karnay se inkaari hain 

Aur meray chehray par ab mazeed lahu ki jaga nahin !

Fateh foj aur roshni aur aag kay farq ko nahin samjhti !

Sehra ki raat kaatnay kay liye inhein alaao ki zaroorat thi 

So unhon ne meray kutab khanay jala diye !

Lakin main ehtijaaj bhi nahin kar sakti 

Meray balon main surkh iskaarf bandha hai 

Aur meray glaas main coca cola hans raha hai 

Meray samnay doller ki haddi pari hui hai !

Aik hi haath main sab kuch simit aaya shayed

Aik hi haath main sab kuch simit aaya shayed 

Baad'shaht ka zamana palat aaya shayed

Dil ko duniya ki zaroorat hi nahin parnay di 

Teray lashkar se akelay nibat aaya shayed

Dafan kar aayi main jungle main khazana lakin 

Saamp sa phir koi dil se lipat aaya shayed

Is qadar bheer thi is baar bhi rastay main teray 

Koi chehra , kisi khirki se hat aaya shayed

Loatnay walay ko pehchan'nana mushkil thehra 

Aik chehra , kai chehron main batt aaya shayed

Kisi surat se abhi sar ko bacha rakha tha 

Jung be'sarfa main lakin woh waqat kat aaya shayed

 

Main apni pyas par khamosh thi

Main apni pyas par khamosh thi 

Aur raig-e-sehra ki tarah se zindagi ko dhoop ka tukra samjhti thi 

Kabhi sairaab honay ki tamana ne 

Badan main sar uthaya bhi 

To apnay dil se mazrat kar li 

Kaha us se 

Keh andar aag kaisi hi bharakti ho 

Mujhay baarish ki janib aankh utha kar dekhnay ka haq nahin hai 

Zuban par aablay partay rahein 

Lakin mujhay shabnam nahin chakhni 

Mujhay badalon kay haathon se koi tohfa nahin lena 

Nami ki aik hi surat hai meri zindagi main 

Aur woh aansu hai !

Magar jab se kisi lehjay kay num ne 

Meray dil ki rait ko aa kar chua hai 

Meray andar 

Mukamal bheeg janay ki tamana jaag uthi hai 

Lahu main ab meray bas aatish siyaal hai 

Aur jisam angaray ki tarah se dehakta hai 

Magar kya bakhat hai mera

Keh dariya choom kar mera kinara 

Chor deta hai 

Sarapa-e-tishnagi hoon 

Aur bharra piyala labon tak laa kay koi 

Kheench leta hai !

Manohar kya waron tujh par

Manohar 

Kya waron tujh par 

Meri jeewan thaali main to 

Sheesh nahin koi 

Bas naina rehtay hain 

Jalay huye sapno ka tatt

Maathay teray kya tilak lagaon 

Raakh bhi meri maang 

Oak main teri kya jal daroon 

Main sam'puran pyas 

Kuch shabdon kay moti hain 

Par kya is chandar mukh aagay 

Teri janam girha main mohan 

Kon sa phool main taankon 

Mann bagiya sooni hai 

Aur paraye phoolon par hai 

Kya mera adhee'kaar   

Bas aik aatma rehti hai 

Jo daan karon tujh par !

Manohar 

Kya waron tujh par ?