Rukhsat ki kasak rahi hai ab tak

Rukhsat ki kasak rahi hai ab tak 

Ik shaam sulag rahi hai ab tak 

Shab kis ne yahan qadam rakha tha 

Dehleez chamak rahi hai ab tak 

Maathay pe woh lab thay saniya bhar 

Aur rooh mehak rahi hai ab tak 

Dekha hai yeh kis nazar se us ne 

Tasveer damak rahi hai ab tak 

Jo baat kahi nahin thi us se 

Lehjay main khanak rahi hai ab tak 

Kab ka hua khaali saghar shaam 

May hai keh chalak rahi hai ab tak 

Bin aks yahi kaisi jag'magahat 

Sheeshay se jhalak rahi hai ab tak 

Woh chasham keh baagh aashna hai 

Jungle main bhattak rahi hai ab tak  

Dono kay labon tak aatay aatay 

Ik baat atak rahi hai ab tak 

Baarish ki hai chah shaakh ko aur 

Badal se jhijak rahi hai ab tak 

Shano pe nahin woh haath lakin 

Chadar si sarak rahi hai ab tak

Taron kay liye bhout karri thi

Taron kay liye bhout karri thi 

Yeh rukhsat-e-mah ki gharri thi 

Her dil pe hazar neel niklay 

Duniya kissay phool ki charri thi 

Wahan dhair tha pathron ka tayaar 

Yahan phool ki aik pankhrri thi 

Dariya meray samnay tha lakin 

Main pyas se jaan balb kharri thi 

Dekhon gi main aaj us ka chehra 

Kal khawab main roshni barri thi 

Tha jhoot ameer-o-takhat Araa

Sachai saleeb pe garri thi

Juz talab us se kya nahin milta

Juz talab us se kya nahin milta

Woh jo mujh se zara nahin milta

Jaan lena tha us se mil kay hamein

Bakhat se to siwa nahin milta

Zakham khilnay kay muntazir kab se

Aur lams-e-hawa nahin milta

Kis qadar bad'naseeb badal hain

Jin ko dast-e-dua nahin milta  

Mera maslak nahin qasaas magar 

Kya mujhay khoon baha nahin milta 

Bastiyan aakhri damon par hain 

Aur harf-e-shiffa nahin milta 

Aik Asaib kay makan main hoon 

Aur rad-e-balaa nahin milta 

Daikh kar dana jo aaye hain sar-e-shakh prind

Daikh kar dana jo aaye hain sar-e-shakh prind 

Rutt badalnay pe to youn bhi nahin rehnay walay 

Shaher-e-veerani main sehra-o-biyabaan se barha 

Ab to yahan ehal-e-junoon bhi nahin rehnay walay 

Khaak ho jayein gay qatil bhi yahan teegh ba'dast 

Aur ghal'teeda bakhon bhi nahin rehnay walay 

Waqat aisa hai keh ab hashar hai kuch dair ki baat 

Mut'maein ehal-e-sakoon bhi nahin rehnay walay 

Chara'gar hairan hai

Chara'gar hairan hai 

Tapp se tann jhulsa hua 

Nabz na'humwar , dil dooba hua 

Za'af se sar ik taraf 

Zakham saray taza ro 

Phir bhi chehra phool ki surat mera shadaab hai !

Us ko kya maloom 

Kis shabnam ne us par raat bhar 

Apnay lab rakhay rahay 

Us ko kya maloom  

Kis barish ne us ko sara din 

Apnay hathon par rakha 

Us ko kya maloom 

Ik sehra naseeb 

Ik tawajo ki nazar se kis qadar sairaab hai !

Zindagi ka husan sara 

Rooh ki sari namu 

Ishq ka ijaaz hai !

Khaar se lay kar

Rag-e-gul 

Aur rag-e-jaan se dil janan talak 

Na'miya  ki aik hi quwat baru-e-kaar hai 

Ishq aur us ka fasoon !

"Aag ko gulzar kar sakta hai "

Mout ko inkaar kar sakta hai !

Galay se apnay lagaye mujh ko

Galay se apnay lagaye mujh ko 

Samait kar apnay bazu'on main 

Woh aik bachay ki tarah mujh ko thapak raha tha 

Aur apni khawab afreen sar'goshiyon main 

mujh se yeh keh raha tha 

Abhi na thakna !

Abhi na thakna !

Meray musafir !

Main jaanti hoon 

Abhi safar ibtida hua hai 

Abhi musafat ki hadd bhi likhi nahin gayi hai 

Abhi to jungle main raasta dhoondna paray ga 

Abhi to rastay main shaam ho gi 

Yeh shaam bhi be'chragh ho gi !

Abhi to sehra ki dhoop main nang'gay paon chalna paray ga mujh ko 

Shajar milay ga na sar pe badal ka sayeban koi taan de ga 

Teri jhalak ka abhi bhout intizar karna paray ga mujh ko 

Abhi to kacchay gharray pe dariya ko paar karna paray ga mujh ko 

Meray musafir !

Main jaanti hoon 

Safar ki sari sahu'baton ko main jaanti hoon 

Magar meri aankh main jo yeh raakh urr rahi hai 

Yeh gard jo meray khaal-o-khad par jammi hui hai 

Qaba-e-tan tak nahin ruki hai 

Shakistagi meri rooh main hai !

Thakan jo pichlay safar ki hai 

Meri hadiyon main utar chuki hai !

Dua karna , meray haq main dua karna

Dua karna 

Meray haq main dua karna 

Bichartay waqat us ne aik hi fiqra kaha tha 

Ussay kya ilm 

Meray harf se taseer kab ki uth chuki hai !

Dua ka phool 

Meray lab pe khiltay hi 

Achanak toot jata hai 

Main kis khushbu ko us kay haath par bandhon 

Mujhay khushbu se dar lagnay laga hai !

Jaan kya baat hai kis taz'ba'zab main ho

Jaan !

Kya baat hai 

Kis taz'ba'zab main ho 

Faisalay par ponchnay main kya baat maniya hui 

Aur agar faisalay par ponch hi gaye ho 

To phir is ka dukh to nahin 

Aur dukh hai to phir 

Loatnay ki gharri 

Haath main hai abhi 

Garcha ab shaam hai 

Aur jungle qareen 

Phir bhi tanhai ka waqat kat jaye ga 

Raastay main ab itni musafat nahin 

Umar ki raat kay 

Aakhri pehar main 

Main bhi hoon 

Tum bhi ho !

Teray lehjay main ab ki baar aisi shanti thi

Teray lehjay main ab ki baar 

Aisi shanti thi 

Jo ik gehray taz'ba'zab se nikal kar 

Zehan main aik faisalay kay baad aati hai 

Taz'ba'zab se nikalna is qadar asaan nahin jana 

Yeh woh jungle hai 

Jis main raastay ik doosray ko kaat detay hain 

Musafir ik qadam aagay barhata hai 

To so khadshaat daman thaam letay hain 

Koi rasta dikhanay ka kahan sochay 

Chraghon ka to kya kehna 

Yahan to jugnu'on pe shak guzarta hai 

So aisay ghup andheray main 

Yaqeen ki sham'ma kis ne aa kay teray dil main roshan ki 

Teray chehray pe ab ki baar 

Kaisi roshni thi !

Aaghaz-e-bahar se hi ab kay yeh kaisa gulab khil gaya hai

Aaghaz-e-bahar se hi ab kay 

Yeh kaisa gulab khil gaya hai 

Saray jungle main roshni hai 

Pattay pattay pe tazgi hai 

Her nok-e-giyah pe hai shabnam 

Ik naghmagi hai hawa kay tann main 

Ik raqs ki kafiyat badan main