Jafa ki aag tham jaye fakhir kabhi tootay Mohsin

Jafa ki aag tham jaye fakhir kabhi tootay Mohsin 

Chalay aana meray ho kar main mazi phir bhula doon ga 

Mansoob thay jo log meri zindagi kay saath

Mansoob thay jo log meri zindagi kay saath 

 Aksar wohi milay hain bari be'rukhi kay saath 

Youn to main hans para hoon tumharay liye magar 

Kitnay sitaray toot paray ik hansi kay saath 

Fursat milay to apna giribaan bhi daikh le 

Ae dost youn na khel meri be'basi kay saath 

Majburiyon ki baat chali hai to may kahan 

Hum ne piya hai zehar bhi aksar khushi kay saath 

Ik sajda-e-khaloos ki qeemat fiza-e-khuld?

Ya'rab na kar mazaq meri zindagi kay saath 

Mohsin karam ki lay bhi ho jis main khaloos bhi

Mujh ko ghazab ka payar hai uss dushmani kay saath 

Baha rahi thi woh sailaab main ja'haiz apna

Baha rahi thi woh sailaab main ja'haiz apna 

Badan ki doobti kashti sambhalnay kay liye 

Mata-e-shaam-e-safar bastiyon main chor aaye

Mata-e-shaam-e-safar bastiyon main chor aaye 

Bujhay chragh hum apnay gharon main chor aaye 

Bichar kar tujh se chalay hum to ab kay youn hua 

Keh teri yaad kahin raaston main chor aaye 

Hum apni dar-badri kay musha'hiday  aksar !!

Naseehaton ki tarah kam'sino main chor aaye 

Khiraaj-e-sil-e-bala iss se barh kar kya ho keh log 

Khullay makaan bharri baarishon main chor aaye 

Hamaray baad bhi ronaq rahay gi maqtal main 

Hum ehal-e-dil ko baray hoslon main chor aaye 

Urrein gay kya woh prinday jo apnay rizq samait 

Safar ka shouq bhi tootay par'ron main chor aaye 

Sada sukhi rahein chehray woh hum jinhein "Mohsin"

Bujhay gharon ki khulli khirkiyon main chor aaye

Zara si khaak sada baal-o-par main rakhtay hain

Zara si khaak sada baal-o-par main rakhtay hain 

Hum apnay saath zameen ko safar main rakhtay hain 

Udasiyan bhi basatay hain apnay seenay main 

Nishan-e-wusat-e-sehra bhi ghar main rakhtay hain 

Bhout udaas na ho shaam-e-be'chragh keh hum 

Sehar ki roshniyan chasham-e-tar main rakhtay hain 

Hamaray sach ki gawahi pe ungliyan na utha 

Yeh hi to aaib hum apnay hunar main rakhtay hain 

Kabhi jo ehad-e-wafa meri jaan teray meray darmiyan tootay

Kabhi jo ehad-e-wafa meri jaan teray meray darmiyan tootay 

Main chahata hoon keh uss se pehlay zameen pe yeh aasman tootay 

Teri judai main hoslon ki shakist dil pe azaab thehri 

Keh jaisay munh'zor zal'zalon ki dhamak se koi chitaan tootay 

Ussay yaqeen tha keh uss ko marna hai phir bhi khawaish thi uss kau dil main 

Keh teer chalnay se paish'tar hi dast-e-dushmana main kamaan tootay 

Woh sang hai to girray bhi dil par woh aaina hai to chubh hi jaye 

Kahin to mera yaqeen bikhray , kahin to mera gumaan tootay 

Ujaar pan ki udaas rutt main ghazal to Mohsin ne chairr di hai 

Kissay khabar hai keh kis kay masoom dil pe ab kay yeh taan tootay  

Insaan ko zaib hi nahin deta junoon-e-mout

Be'wajah Dushmani 

Insaan ko zaib hi nahin deta junoon-e-mout 

Insaniyat to laaiq-e-sad ehtraam hai 

Tehzeeb kay khilaaf hai be'wajah dushmani 

Bhai ka khoon bhai pe youn bhi haraam hai 

Youn hi lakeer kurachtay hain apni qismat ki

Khawab 

Youn hi lakeer kurachtay hain apni qismat ki 

Wa'garna un ki hatheli main darj hi kya hai ?

Kuch iss liye bhi woh aankhon ko band rakhtay hain 

Keh khawab daikhtay rehnay main harj hi kya hai ?

Badli jo rutt gharoor kay gard-o-ghubaar ki

Udhaar 

Badli jo rutt gharoor kay gard-o-ghubaar ki 

Dastaar khull gayi teray jhootay waqar ki 

Hum ne kaha na tha keh na bad'mast ho kay chal 

Mehangi bhout paray gi yeh "izzat udhaar ki"

Soi hui qismat ko jagaana hi paray ga

Lahu

Soi hui qismat ko jagaana hi paray ga 

Zaalim ka her ik naqsh mitana hi paray ga

Ik umar se roshan hain jo muflis kay lahu se

Ab aisay chraghon ko bujhana hi paray ga 

Ik roz to kashmir ki kaliyan bhi khilein gi

Ik Roz

Ik roz to kashmir ki kaliyan bhi khilein gi 

Ik roz to dharkay ga yahan zouq-e-namu bhi 

Ik roz to mehkay gi mussarat se yeh wadi 

Ik roz to dehkay ga "Musalmaan" ka lahu bhi 

Yeh jehd-e-musal'sal jo lahu pee kay pali hai

Yeh jehd-e-musal'sal jo lahu pee kay pali hai 

Aqwaam ki tareekh main ghar kar kay rahay gi 

Azadi-e-kashmir kay sholon ki bulandi 

Ik roz "Hamala" ko bhi sar kar kay rahay gi 

Sitaray baant'ta hai woh , zia taqseem karta hai

Sitaray baant'ta hai woh , zia taqseem karta hai 

Suna hai habs kay mousam main hawa taqseem karta hai 

Ussi ki apni beti ki hatheli khushk rehti hai 

Jo boorha dhoop main aksar hina taqseem karta hai 

Koi rokay ussay jaa kar sara'sar hai yeh pagal pan 

Jo behron kay mohallay main sada taqseem karta hai 

Ussi se maang tu Mohsin baqi chor de sab ko 

Jo pathar main bhi keeray ko ghizaa taqseem karta hai 

Yeh kis ne hum se lahu ka khiraaj phir maanga

Yeh kis ne hum se lahu ka khiraaj phir maanga 

Abhi to soye thay maqtal ko sur'khuru kar kay 

Yeh shart-e-ulfat bhi ajeeb hai mohsin

Yeh shart-e-ulfat bhi ajeeb hai mohsin 

Main poora utar'ta hoon woh miyaar badal detay hain

Resham zulfon , neelam aankhon walay chehray achay lagtay hain

Resham zulfon , neelam aankhon walay chehray achay lagtay hain  

Main shair hoon mujh ko ujlay chehray achay lagtay hain  

Tum khud socho , aadhi raat ko thanday chand ki chaon main 

Tanha rahon par hum dono kitnay achay lagtay hain 

Aakhir aakhir sachay qoal bhi chubhtay hain dil walon ko 

Pehlay pehlay payar kay jhootay waday achay lagtay hain 

Jab se woh pardes gaya hai shaher ki ronaq rooth gayi 

Ab to apnay ghar kay band dareechay achay lagtay hain 

Kaali raat main jag'mag kartay taaray kon bujhata hai 

Us dulhan ko yeh moti yeh gehnay , achay lagtay hain 

Kal us roothay roothay yaar ko dekha to mehsoos hua 

Mohsin ujlay jisam pe mailay kapray achay lagtay hain 

Qissay meri ulfat kay jo marqoom hain saray

Qissay meri ulfat kay jo marqoom hain saray 

Aa dekh teray naam se mosoom hain saray 

Bas is liye her kaam adhura hi para hai 

Khadam bhi meri qoam kay makhdoom hain saray 

Ab kon meray paon ki zanjeer ko kholay 

Hakim meri basti kay bhi mehkoom hain saray 

Shayed yeh zarf hai jo khamosh hoon ab tak 

Warna to teray aaib bhi maloom hain saray 

Sab jurm meri zaat se mansoob hain "Mohsin"

Kya meray siwa shaher main Masoom hain saray

Her ik janib udasi hai abhi sochein to kya sochein

Her ik janib udasi hai 

Abhi sochein to kya sochein 

Her ik su hu ka aalam hai 

Abhi bolein to kya bolein 

Her ik insaan pathar hai 

Abhi dharkein  to kya dhakrein

Fiza par neend taari hai 

Abhi jaagein to kya jaagein 

Her ik maqtal ki sha'rag se lahu ki lehar jaari hai 

Abhi dekhein to kya dekhein 

Her ik insaan ka saaya abhi matti pe bhaari hai 

Abhi likhein to kya likhein 

Hum aaj bhi hain , soch main doobay huye Mohsin

Hum aaj bhi hain , soch main doobay huye Mohsin 

Khud se kabhi duniya se hain roothay huye Moshin

Denay kay liye us ko jo hum ne sambhalay thay

Woh phool kitabon main hain , sookhay huye Mohsin

Woh apni jafaon main kuch kami to karain aaj 

Ik umar hui shaher woh choray huye Mohsin 

Hum ne yeh kaha tha keh inhain pyaar hai hum se 

hum aaj bharri bazam main jhootay huye Mohsin 

Aagosh main in ki hamein rahat jo mili hai 

Hum aaj kuch andar se hain tootay huye Mohsin 

Main us ki qaid se azaad kahan hoon Mohsin

Main us ki qaid se azaad kahan hoon Mohsin 

Bana kay rakhta hai sochon main yar-ghamaal mujhay