Imran's Poetry: 04/27/16

Apr 27, 2016

Kar kay wafa palat kay wafa maangnay laga

Kya zarf tha gharri main sila maangnay laga

Yeh qehat-e-husan tha nihayat thi husan ki

Her shakhs us haseen ka pata maangnay laga

Us ki hatheliyon pe khilay phool dekh kar

Her meh'jabeen ka haath hina maangnay laga

Jab se ussay aziz hui meri zindagi

Main apni zindagi ki dua maangnay laga

Seenay se aah , aankh se aansu talab kiye

Gham ka shajar bhi Aab-o-hawa maangnay laga

Humdardiyan woh baad saza us ne kein Adeem

Jo be'khata tha woh bhi saza maangnay laga

Halaat is qadar thay digar'goon zameen kay

Aa kar zameen pe bheek na'khuda maangnay laga

Jab biyan karo gay tum hum biyan main niklein gay

Hum hi dastaan ban kar dastan main niklein gay

Ishq ho mohabbat ho payar ho keh chahat ho

Hum to her samandar kay darmiyan main niklein gay

Raat ka andhera hi raat main nahin hota

Chand aur sitaray bhi Aasman main niklein gay

Dekh tu kabhi shab ka karwan sitaron ka

Noor kay kai meh'mal keh'kishan main niklein gay

Boliyan zamanay ki mukhtalif to hoti hain

Lafz pyar kay lakin her zuban main niklein gay

Kaat kar badan sara qaash qaash main jhankein

Aap kay hayolay hi qalb-o-jan main niklein gay

Khaak ka samandar bhi kya ajab samandar hai

Is jahan main doobein gay us jahan main niklein gay

Qissa-e-sukhan goi jab Adeem aaye ga

Hum bhi waqiya ban kar dastan main niklein gay

Sirf sabz pattay hi pairr par nahin hotay

Kuch na kuch prinday bhi Aashiyan main niklein gay

Dariya se kohsaar se pehlay ki baat hai

Insan her Aitabar se pehlay ki baat hai

Nafrat se aur pyar se pehlay ki baat hai

Yeh tujh par Aitabar se pehlay ki baat hai

Jumbish thi aankh main bhi badan main bhi rooh thi

Yeh baat intizaar se pehlay ki baat hai

Dil meray ikhtiyar main hota to tha magar

Yeh teray ikhtiyar se pehlay ki baat hai

Jab dil pe neel ban kay wohi thein na khawaishein

Yeh tujh sitam shaa'ar se pehlay ki baat hai

Kuch saar'ban thay aur jars ki sada bhi thi

Yeh baad-e-reh'guzar se pehlay ki baat hai

Ik karwan aur ik tha meh'mal bhi darmiyan

Yeh raah kay ghubaar se pehlay ki baat hai

Woh Aah-e-dil shigaaf Adeem aur woh tarap

Yeh dard kay khumaar se pehlay ki baat hai

Ik dard tha kisi ki nishani diya hua

Lakin yeh teray pyar se pehlay ki baat hai

Ik aashiyan tha is main prinday bhi thay Adeem

Yeh mousam-e-bahar se pehlay ki baat hai

Tum jee kay dekh lo keh yahan mar kay dekh lo

Ik be'hissi hai kuch bhi yahan kar kay dekh lo

Kaisay hain log in ki tumhein kya misal doon

Ja kar mujasamay kahin pathar kay dekh lo

Sara jahan tum ko daraye ga raat din

Ik baar tum kisi se zara dar kay dekh lo

Humdardiyon ka bhaid abhi jaan jao gay

Choti si ik aah zara bhar kay dekh lo

Us ka haseen saath kahan aur main kahan

Yeh khel bhi Adeem muqaddar kay dekh lo

Deedar ki Adeem kahan intihaa koi

Bas aaj kay liye ussay jee bhar kay dekh lo

Hairan hoon saray shaher ka kirdaar dekh kar

Sab jhuk gaye hain shah ka darbaar dekh kar

Apna watan hanoot laga laash ki tarah

Aaya hon jab se misar kay meenar dekh kar

Milta nahin kisi kay qadam se mera qadam

Chalta nahin hoon waqat ki raftaar dekh kar

Pathar machal rahay hain zameen par paray huye

Bayron-e-sehan shakh-e-samar baar dekh kar

Rang urr gaya hai raat kay chehray ka kiyon Adeem

Sehma hua hoon subha kay Aasaar dekh kar

Yeh chaon to badan ko jalanay lagi Adeem

Baitha tha main to saya-e-dewar dekh kar

Dard hotay hain kai dil main chupanay kay liye

Sab kay sab aansu nahin hotay bahanay kay liye

Umar tanha kaat di wada nibhanay kay liye

Ehad bandha tha kisi ne azmanay kay liye

Yeh qafs hai ghar ki ziabaish barhanay kay liye

Yeh prinday to nahin hain aashiyanay kay liye

Kuch diye dear pe rakhnay hain waqat-e-intizaar

Kuch diye laya hoon palkon par jalanay kay liye

Woh ba'zahir to mila tha aik lamhay ko Adeem

Umar sari chahiye us ko bhulanay kay liye

Log zer-e-khaak bhi to doob jatay hain adeem

Ik samandar hi nahin hai doob janay kay liye

Tu pas-e-khanda labi aahon ki awazein to sun

Yeh hansi to aayi hai aansu chupanay kay liye

Koi gham ho koi dukh ho dard koi ho Adeem

Muskurana par hi jata hai zamanay kay liye

Pehlay to dil wafa se bhi aagay nikal gaya

Phir dil is intiha se bhi aagay nikal gaya

Awaz de kar us ko bulaon main ksi tarah

Woh to had-e-sada se bhi aagay nikal gaya

Nikli hai rooh noor ki raftaar se bhi tez

Pal main koi khala se bhi aagay nikal gaya

Kiyon dar-ba'dar uraaye phiray khaak ko hawa

Ab to badan fanah se bhi aagay nikal gaya

Ik teer tha kamaan-e-takhiyul main dair se

Nikla to woh khuda se bhi aagay nikal gaya

Saansein Adeem aakhri lamhay main dhoondta

Main koocha-e-hawa se bhi aagay nikal gaya

Tu le kar aa gaya hai dawa kis liye Adeem

Beemar to dua se bhi aagay nikal gaya

Karwan badlo zara meh'mal badal kar dekh lo

Aik manzil to nahin manzil badal kar dekh lo

Kya hua mehfil tumhein pal main pata chal jaye ga

Aik lamhay kay liye mehfil badal kar dekh lo

Yeh mohabbat ka shajar hai yeh yahin lag jaye ga

Tum bajaye nakhal aab-o-gul badal kar dekh lo

Kiyon dabotay ja rahay ho kashtiyon pe kashtiyan

Door hai saahil to phir saahil badal kar dekh lo

Kon kitna chahta hai sab pata chal jaye ga

Tum hamaray saath apna dil badal kar dekh lo

Sirf do nuqton main hai duniya ki sari roshni

Warna jo aankhon main hai woh til badal kar dekh lo

Sang to jazbaat ko mehsoos kar sakta nahin

Woh jo seenay main dharri hai sil badal kar dekh lo

Itna nazuk aaina rakhna zaroori to nahin

Toot'ta rehta hai dil to dil badal kar dekh lo

Dooriyan dushwariyan sab samnay aa jayein gi

Hum se ik pal kay liye manzil badal kar dekh lo

Sari duniya aik jaisi to nahin hoti Adeem

Adal hai darkaar to aadil badal kar dekh lo

Reham aata jaye ga us ko sada tum par Adeem

Qatal hona hai to phir qatil badal kar dekh lo

Jab yeh ho keh likha hua taqdeer main kya hai

Phir adal main adal ki zanjeer main kya hai

Yadein hain teri ya teray tootay huye waday

Aur is kay ilawa meri jageer main kya hai

Zindani-e-rafta ki bhi aati hain sadaein

Is qaid main is qaid ki tameer main kya hai

Jo dekh chukay khawab woh tum dekh chukay ho

Ab khawab main ya khawab ki tabeer main kya hai

Ik umar se pal kay liye aankhein nahin jhapkein

Yeh sehar yeh jadu teri tasveer main kya hai

Ik lafaz idher , ik udhar aankh main aansu

Maloom nahin yeh teri tehreer main kya hai

Miyaar meri chah ka dekhay to zamana

Nuqsan teray husan ki tasheer main kya hai

Lafzon ka Adeem us pe asar kiyon nahin hota

Yeh aik kami si meri tehreer main kya hai

Bari mushkil thi nayi rah guzar se pehlay

Thak gaye log kai waqat-e-safar se pehlay

Waqat guzra teray milnay ka bari tezi se

KAt gaye sham-o-sehar , sham-o-sehar se pehlay

Paat jharnay ka koi dar na karri dhoop ka khouf

Teri chaon thi ajab , sar pe shajar se pehlay

Husan-e-takhleeq kisi husan se kuch kam to nahin

Phool pairron pe kabhi dekh samar se pehlay

Sajda-e-shukar kissay ja kay karay jazba-e-dil

Kis ne dekha tha mohabbat ki nazar se pehlay

Kya dafeenay hain mohabbat kay samandar main Adeem

Kashtiyan doobti jati hain bhanwar se pehlay

Faisala yeh to karo waqat-e-safar se pehlay

Ayo gay sham se pehlay keh sehar se pehlay

Husan taqseem kiya jaye kidher se pehlay

Her taraf se yeh sada aayi idher se pehlay

Teray qadmon kay nishan hain meri chahat pe faqat

Koi guzra na tha is raah guzar se pehlay

Mujh pe ilzam-e-wafa theek par Ae wajah-e-wafa

Kis ne dekha tha mohabbat ki nazar se pehlay

Husan mojood to tha apnay sarapay main Adeem

Husan maloom na tha husan-e-nazar se pehlay

Us ki surat bhi to ik subha ki surat hai Adeem

Dekh li hum ne sehar-e-waqat sehar se pehlay

Aaya hoon sang-o-khashat kay ambaar dekh kar

Khouf aa raha hai saya-e-dewaar dekh kar

Aankein khuli rahi hain meri intizaar main

Aaye na khawab deeda-e-baidaar dekh kar

Gham ki dukan khol kay baitha hua tha main

Aansu nikal paray hain kharidaar dekh kar

Kya ilm tha phisalnay lagein gay meray qadam

Main to chala tha raah ko hum'waar dekh kar

Her koi par'sai ki umda misaal tha

Dil khush hua hai aik gunah'gaar dekh kar

Yeh be'hissi bhi waqat-e-madad dekh li Adeem

Katraa gaya hai yaar ko bhi yaar dekh kar

Kaha , saray gharon main kon sa ghar sab se Aala hai

" Mukal'mati Salam "

Kaha , saray gharon main kon sa ghar sab se Aala hai

Jawab aaya keh ehal-e-bait ka dar sab se Aala hai

Kaha pakeezgi main koi parda jo misali ho

Kaha , bint-e-nabi kay sar ki chadar sab se Aala hai

Kaha , miraaj sar katnay ki koi jungon main dekhi

Jawab aaya jo sajday main katta sar sab se Aala hai

Kaha itni safein , ik simat , chand afraad ik janab

Kaha , tadaad main jo kam hai lashkar sab se Aala hai

Kaha ' qurbaniyon main sab se arfah hai adad koi

To ik pal main jawab aaya behtar sab se Aala hai

Kaha ik simat ik sajda , kaha ik simat ik lashkar

Kaha is jung ka yeh hi to manzar sab se Aala hai

Us ne hansi hansi main mohabbat ki baat ki

Main ne Adeem us ko mukarnay nahin diya