Garcha likhi hui thi shahadat imaam ki

Garcha likhi hui thi shahadat imaam ki 

Lakin meray Hussain (r.a) ne hujat tamam ki 

Zainab ki be'ridai ne sar mera dhak diya 

Aaghaz-e-subh-e-no hui woh shaam , shaam ki 

Ik khawab-e-khaas chasham-e-Mohammad (PBUH)main tha chuppa 

Tabeer noor-e-Aain Mohammad (PBUH) ne aam ki 

Bachon ki pyaas maalik-e-kosar pe shaaq thi 

Saqi ko warna may ki zaroorat na jaam ki 

Har sa naseeb baadshahon ko nahin naseeb 

Aaqa se mil rahi thi gawahi ghulam ki 

Dariya pe tishna lab hain yeh sehra main shaad kaam 

Duniya ajab hai un kay safar aur qiyaam ki 

De kar raza raza jo chehra-e-shabeer zard hai 

Thi iltaja-e-jung yeh kis laala faam ki

Yeh chand aur yeh abar-e-rawan guzarta rahay

Yeh chand aur yeh abar-e-rawan guzarta rahay 

Jamaal-e-shaam teh aasman guzarta rahay 

Bharra rahay teri khushbu se tera sehan-e-chaman 

Bas aik mousam-e-ambar fishan guzarta rahay 

Sama'atein teray lehjay se phool chunti rahein 

Dilon kay saaz pe to naghma khawan guzarta rahay 

Khuda karay teri aankhein hamesha hansti rahein 

Diyaar-e-waqat se tu shaad'maan guzarta rahay 

Main tujh ko daikh na paon to kuch malaal nahin 

Kahin bhi ho tu , sitara-e-nishan guzarta rahay 

Main maangti hoon teri zindagi qayamat tak 

Hawa ki tarah se tu jawidaan guzarta rahay 

Mera sitara kahin toot kar bikhar jaye 

Falak se tera khat keh'kishan guzarta rahay 

Main teri chaon main kuch dair baith loon aur phir 

Tamaam raasta be'sayeban guzarta rahay 

Yeh aag mujh ko hamesha kiye rahay roshan 

Meray wajood se to shola saman guzarta rahay 

Main tujh ko daikh sakon aakhri bisarat tak 

Nazar kay samnay bas ik saman guzarta rahay 

Hamara naam kahin to likha hua ho ga 

Mah-o-najoom se yeh khaak'daan guzarta rahay 

Main tera saath na de paon phir bhi tera safar 

Gulaab-o-khawab kay hi darmiyan guzarta rahay 

Main teray seenay pe sar rakh kay waqat bhool gayi 

Khayal-e-tezi umar-e-rawan guzarta rahay !

In dino meri apnay aap se bol chal band hai

In dino 

Meri apnay aap se bol chal band hai !

Meray andar aik baanjh ghussa 

Phunkaarta rehta hai 

Na mujhay dasta hai   

Na meray gird apni girift dheeli karta hai 

Nain'wa ki sar'zameen 

Aik baar phir surkh hai 

Faraat kay pani par

Abn-e-ziyaad kay taraf daron ka aik baar phir qabza hai 

Zameen aur aasman 

Aik baar sham'shahay ka lahu 

Wasool karnay se inkaari hain 

Aur meray chehray par ab mazeed lahu ki jaga nahin !

Fateh foj aur roshni aur aag kay farq ko nahin samjhti !

Sehra ki raat kaatnay kay liye inhein alaao ki zaroorat thi 

So unhon ne meray kutab khanay jala diye !

Lakin main ehtijaaj bhi nahin kar sakti 

Meray balon main surkh iskaarf bandha hai 

Aur meray glaas main coca cola hans raha hai 

Meray samnay doller ki haddi pari hui hai !

Aik hi haath main sab kuch simit aaya shayed

Aik hi haath main sab kuch simit aaya shayed 

Baad'shaht ka zamana palat aaya shayed

Dil ko duniya ki zaroorat hi nahin parnay di 

Teray lashkar se akelay nibat aaya shayed

Dafan kar aayi main jungle main khazana lakin 

Saamp sa phir koi dil se lipat aaya shayed

Is qadar bheer thi is baar bhi rastay main teray 

Koi chehra , kisi khirki se hat aaya shayed

Loatnay walay ko pehchan'nana mushkil thehra 

Aik chehra , kai chehron main batt aaya shayed

Kisi surat se abhi sar ko bacha rakha tha 

Jung be'sarfa main lakin woh waqat kat aaya shayed

 

Main apni pyas par khamosh thi

Main apni pyas par khamosh thi 

Aur raig-e-sehra ki tarah se zindagi ko dhoop ka tukra samjhti thi 

Kabhi sairaab honay ki tamana ne 

Badan main sar uthaya bhi 

To apnay dil se mazrat kar li 

Kaha us se 

Keh andar aag kaisi hi bharakti ho 

Mujhay baarish ki janib aankh utha kar dekhnay ka haq nahin hai 

Zuban par aablay partay rahein 

Lakin mujhay shabnam nahin chakhni 

Mujhay badalon kay haathon se koi tohfa nahin lena 

Nami ki aik hi surat hai meri zindagi main 

Aur woh aansu hai !

Magar jab se kisi lehjay kay num ne 

Meray dil ki rait ko aa kar chua hai 

Meray andar 

Mukamal bheeg janay ki tamana jaag uthi hai 

Lahu main ab meray bas aatish siyaal hai 

Aur jisam angaray ki tarah se dehakta hai 

Magar kya bakhat hai mera

Keh dariya choom kar mera kinara 

Chor deta hai 

Sarapa-e-tishnagi hoon 

Aur bharra piyala labon tak laa kay koi 

Kheench leta hai !

Manohar kya waron tujh par

Manohar 

Kya waron tujh par 

Meri jeewan thaali main to 

Sheesh nahin koi 

Bas naina rehtay hain 

Jalay huye sapno ka tatt

Maathay teray kya tilak lagaon 

Raakh bhi meri maang 

Oak main teri kya jal daroon 

Main sam'puran pyas 

Kuch shabdon kay moti hain 

Par kya is chandar mukh aagay 

Teri janam girha main mohan 

Kon sa phool main taankon 

Mann bagiya sooni hai 

Aur paraye phoolon par hai 

Kya mera adhee'kaar   

Bas aik aatma rehti hai 

Jo daan karon tujh par !

Manohar 

Kya waron tujh par ?

Chalo is khawab ko hum tark kar dain

Chalo is khawab ko hum tark kar dain 

Aur aankhon pe saja dain 

Keh her tasveer main halka gulabi rang chahnay se nahin aata 

Bhout se naqsh , naqaash azal aisay banata hai 

Keh jis ka hashiya gehra siyah 

Aur naqsh halka sur,mai rehta hai 

Aur jis par kis bhi zawiye se chand utray 

Yeh kabhi roshan nahin hotay 

Khuda kuch kaam aadhi raat ko karta hai 

Jab is kay piyalay main 

Siyahi kay siwa kuch bhi nahin hota 

Yeh khaaka bhi 

Kisi aisi hi sama'at main bana ho ga 

Hamari aankh main jo khawab utra tha 

Bhout khush rang lagta tha 

Magar is kay damaknay main 

Kai aankhein lahu hotein 

Kitabon aur phoolon se sajay jis ghar kay aangan main 

Hum apnay aap ko khiltay huye mehsoos kartay thay 

Wahan ik aur ghar buniyad se youn sar utha'ta tha 

Keh hum andar se hil jatay 

Magar chup chaap rehtay thay 

Yeh chup deemak ki surat hum ko ik din chaat jati 

Tumharay dukh se main waqif hoon 

Aur apnay muqaddar ki lakeeron ki bhi mehram hoon 

Hamaray bas main rangon ka chunao hai 

Na khat ka 

So is tasveer ko tehleel kar dain 

Hum apnay canvis tabdeel kar lain !

 

Khuli aankhon yeh kaisa khawab meray samnay hai

Cinderella (unisited)

Khuli aankhon yeh kaisa khawab meray samnay hai

Diye aangan se lay kar aasman tak 

Gulab-e-taza ki khushbu chaman se sehan-e-jaan tak 

Baloreen jaam 

Aur is main damakti surkh may 

Aur is kay nashay se farozan un ka chehra 

Sitaron se bana mera libada 

Sarapa-e-iztraab ik shahzada 

Fars pe sham'ein jalata aik wada 

Dilon kay vilon par 

Walz kartay do badan 

Auras kay shano par rakhay sar

Zindagi se

Neem sar'goshi main ik hi baat dohraati hui 

Khushbu-e-lab 

Aur is ka jadu 

Gajr bajtay hi aadhi raat ka 

Yeh khawab yak dam toot jata hai 

Sitaron se bana malboos mera 

Phir khas-o-kha'shaak ho jata hai 

Mera rath achanak toot jata hai 

Meri sheeshay ki juti raqs-e-geh main choot jati hai 

Magar agli sehar 

Meri taraf 

Shahi mehal se 

Koi qasid 

Doosray paon ki furqat main nahin aata !

Aakhon ne kaisay khawab tarashay hain in dino

Aakhon ne kaisay khawab tarashay hain in dino 

Dil par ajeeb rang utar'tay hain in dino 

Rakh apnay paas apnay mah-o-mehar ae falak 

Hum khud kisi ki aankh kay taaray hain in dino 

Dast-e-sehar ne maang nikali hai baar'ha 

Aur shab ne aa kay baal sanwaray hain in dino 

Is ishq ne hamein hi nahin moh'tadal kiya 

Us ki bhi khush mizaji kay char'chay hain in dino 

Ik khush'gawar neend pe haq ban gaya mera 

Woh rat'jagay us aankh ne kaatay hain in dino 

Woh qehat-e-husan hai keh sabhi khush jamal log 

Lagta hai koh'kaaf pe rehtay hain in dino

Taar-e-maz'gaan nahin mil raha tha

Taar-e-maz'gaan nahin mil raha tha 

Zakham kis yaad ka sil raha tha 

Barf main roshni ghul rahi thi 

Woh meray khawab main raha tha 

Kuch ajab roshni baagh main thi 

Phool kis rang ka khil raha tha 

Samnay tha woh aur dono chup thay 

Ab na hum thay na woh dil raha tha 

Rang-o-roghan ki baatein mehal main 

Shaher buniyad se hil raha tha 

 

Lo chraghon ki kal shab izafi rahi

Lo chraghon ki kal shab izafi rahi 

Roshni teray chehray ki kaafi rahi 

Apnay anjaam tak aa gayi zindagi 

Yeh kahani magar ikhtalafi rahi 

Hai zamana khafa to baja hai keh main 

Us ki marzi kay bilkul munafi rahi 

Aisay mohtaat , aisay kam'amez se 

Ik nazar bhi tawajo ki kafi rahi 

Subha kya faisala hakim-e-no karay 

Jashan ki raat tak to mo'afi rahi