Imran's Poetry: 03/10/17

Mar 10, 2017

Mohabbat yaad rakhti hai

Mohabbat yaad rakhti hai

Wisaal-o-hijar main

Ya khawaab se mehroom aankhon main

Kisi ehad-e-rafaqat main

Keh tanhai kay jungle main

Khayal-e-khaal-o-khad ki roshni kay gehray baadil main

Chamakti dhoop main ya phir

Kisi be'abar saa'iye main

Kahin baarish main bheegay jism-o-jaan kay nasr paron main

Kahin honton pe shairon ki mehakti aabsharon main

Chraghon se saji shaamo main

Ya be'noor raaton main

Sehar ho ru'numa jaisay kahin baaton hi baaton main

Koi lipta hua ho jis tarah

Sandal ki khushbu main

Kahin par titliyon kay rang tasveerain banatay hon

Kahin par jugnu'on ki muthiyon main roshni khud ko chupati ho

Kahin kaisa hi manzir ho

Kahin kaisa hi mousam ho

Teray saray hawalon ko

Teri sari misalon ko

Mohabbat yaad rakhti hai

Dil ki manzil uss taraf hai ghar ka raasta iss taraf

Aik chehra uss taraf hai aik chehra iss taraf

Roshni kay ista'aaray uss kinaray reh gaye

Ab to shab main koi jugnoo hai na tara is taraf

Tum hawa in khirkiyon se sirf itna daikhna

Uss ne koi khatt kisi kay naam likha iss taraf

Yeh mohabbat bhi ajab taqseem kay mousam main hai

Sara jazba uss taraf hai sirf lehja iss taraf

Maa ne koi khouf aisa rakh diya dil main meray

Sach main kabhi bol hi paai na poora uss taraf

Ik halki si chubhan ehsaas ko ghairay rahi

Guftagoo main jab tumhara zikar aaya iss taraf

Sirf aankhein kaanch ki baqi badan pathar ka hai

Larkiyon ne kis tarah ka roop dhaara iss taraf

Ae hawa ! Ae meray dil kay shaher se aati hawa

Tujh ko kya peghaam de kar uss ne bheja iss taraf

Kis tarah kay log hain yeh kuch pata chalta nahin

Kon kitna uss taraf hai kon kitna iss taraf

Hisaar-e-lafz-o-biyaan main gum hoon

Abhi teri daastaan main gum hoon

Main daikh sakti hoon dooston ko

Magar saf-e-dushmanan main gum hoon

Badan ka apna azaab hai aur

Issi azab-e-ziyaan main gum hoon

Yeh log ghar keh rahay hain jis ko

Main aik aisay makaan main gum hoon

Kahan woh lazzat musafaton ki

Main manzalon kay nishaan main gum hoon

Khabar nahin moj-e-dasht-e-jaan ki

Hawa hoon aur baad"baan main gum hoon

Abhi kahan fursat-e-mohabbat

Abhi main kaar-e-jahan main gum hoon

Tumhein khabar hi nahin kaisay sar bachaya hai

Azaab jaan pe saha hai to ghar bachaya hai

Tamaam umar taluq se mun'harif bhi rahay

Tamaam umar issi ko magar bachaya hai

Badan ko baraf banati hui fiza main bhi

Yeh moh'jaza hai keh dast-e-hunar bachaya hai

Sehar hui to meray ghar ko raakh karta gaya

Woh ik chragh jissay raat bhar bachaya hai

Kuch aisi surat-e-halaat ho gayi dil ki

Junoon ko tark kiya aur darr bachaya hai

Yaqeen-e-shaher hunar be'yaqeen mousam main

Bhout khathan tha bachana magar bachaya hai

Lahu tak aankh se ab beh liya hai

Bhout tha jabar lakin seh liya hai

Azaab-e-hijar ab wapis palat jaa

Bhout din saath meray reh liya hai

Nami aankhon se jaati hi nahin hai

Sitam iss dil ne itna seh liya hai

Yeh dil koi thikhaana chahata hai

Bhout din raaston main reh liya hai

Tujhay kehna tha jo ehwaal dil ka

Dar-o-dewaar se hi keh liya hai

Qabuliyat ka gila nahin hai

Keh lab pe koi dua nahin hai

Azaab-e-jaan ka sila na mango

Abhi tumhein tajurba nahin hai

Udaas chehray , sawal aankhein

Yeh mera shaher-e-wafa nahin hai

Yeh bastiyan jis ne raakh kar dein

Chragh tha woh , hawa nahin hai

Koi to lamha sakoon ka bhi

Yeh zindagi hai saza nahin hai

Bhout tareek sehraa ho gaya hai

Hawa ka shor gehra ho gaya hai

Kisi kay lams ka yeh moh'jaza hai

Badan sara sunehra ho gaya hai

Yeh dil dekho keh jis kay chaar jaanib

Teri yaadon ka pehra ho gaya hai

Wohi hai khaal-o-khad main roshni si

Ya til aankhon ka gehra ho gaya hai

Kabhi uss shakhs ko daikha hai tum ne

Mohabbat main sunehra ho gaya hai

Guraiz shab se sehar se kalaam rakhtay thay

Kabhi woh din thay keh zulfon main shaam rakhtay thay

Tumharay haath lagay hain to jo karo so karo

Wa'garna tum se to hum so ghulam rakhtay thay

Hamein bhi ghair liya ghar kay zoham ne to khulla

Kuch aur log bhi iss main qayaam rakhtay thay

Yeh aur baat hamein dosti na raas aayi

Hawa thi saath to khushbu maqaam rakhtay thay

Na'janay kon si rut main bichar gaye woh log

Jo apnay dil main bhout ehtraam rakhtay thay

Woh aa to jaata kabhi , hum to uss kay raston par

Diye jalaye huye shubh-o-shaam rakhtay thay

Main kin logon main hoon kya likh rahi hoon

Sukhan karnay se pehlay sochti hoon

Udaasi mush'tahir honay lagi hai

Bharray ghar main tamasha ho gayi hoon

Kabhi yeh khawaab mera raasta thay

Magar ab to azaan tak jaagti hoon

Bas ik harf-e-yaqeen ki aarzu main

Main kitnay lafz likhti jaa rahi hoon

Main apni umar ki qeemat pe teray

Her ik dukh ka azaala ho rahi hoon

Ghazab ka khouf hai tanhaiyon main

Ab apnay aap se darnay lagi hoon

Ab kis se kahein aur kon sunnay jo haal tumharay baad hua

Iss dil ki jheel si aankhon main ik khawaab bhout bar'baad hua

Yeh hijar hawa bhi dushman hai Uss naam kay saray rangon ki

Woh naam jo , meray honton par khushbu ki tarah Aabaad hua

Uss shaher main kitnay chehray thay , kuch yaad nahin sab bhool gaye

Ik shakhs kitabon jaisa tha woh shakhs zubani yaad hua

Woh apnay gaon ki galiyan thein dil jin main naachta gaata tha

Ab uss se faraq nahin parta na'shaad hua ya shaad hua

Be'naam sata'ish rehti thi in gehri sanwli aankhon main

Aisa to kabhi socha bhi na tha dil ab jitna be'daad hua

Ab apnay faisalay par khud ulajhnay kiyon lagi hoon

Zara si baat par itna bikharnay kiyon lagi hoon

Woh jis mousam ki ab tak muntazir aankhein thein meri

Ussi mousam se ab main itna darnay kiyon lagi hoon

Mujhay na'deeda raston par safar ka shouq bhi tha

Thakan paon se lipti hai to marnay kiyon lagi hoon

Mujhay yeh chaar dewari ki ronaq maar de gi

Main ik imkaan thi manzil ka mittnay kiyon lagi hoon

Main jis ko kam se kam mehsoos karna chahati thi

Ussi ki baat ko itna samjhnay kiyon lagi hoon

Jo meray dil ki galiyon se kabhi guzra nahin tha

Ab apnay haath se khatt uss ko likhnay kiyon lagi hoon

Badan ki raakh tak bhi raaston main na bachay gi

Barasti baarishon main youn sulagnay kiyon lagi hoon

Wohi suraj hai dukh ka phir yeh aisa kya hua hai

Main pathar thi to aakhir ab pighalnay kiyon lagi hoon

Yeh dil bhulaata nahin hai mohabbatein uss ki

Parri hui thein mujhay kitni aadatein uss ki

Yeh mera sara safar uss ki khushbu'on main kat'ta

Mujhay to raah dikhaati thein chahatein uss ki

Ghirri hui hoon main chehron ki bheer main lakin

Kahin nazar nahin aatein shaba'hatein uss ki

Main door honay lagi hoon to aisa lagta hai

Keh chaa'on jaisi thein mujh pe rafaqatein uss ki

Yeh kis gali main yeh kis shaher main nikal aaye

Kahan pe reh gayein logo sadaqatein uss ki

Main baarishon main juda ho gayi hoon uss se magar

Yeh mera dil , meri saansein amanatein uss ki

Ishq karo to yeh bhi socho arz-e-sawal se pehlay

Hijar ki poori raat aati hai subh-e-wisaal se pehlay

Dil ka kya hai dil ne kitnay manzir daikhay lakin

Aankhein pagal ho jaati hain ik khayal se pehlay

Kis ne rait urrai shab main aankhein khol kay rakhein

Koi aik misaal to do na uss ki misaal se pehlay

Kaar-e-mohabbat aik safar hai uss main aa jata hai

Aik zawaal-e-Aasaar sa rasta baab-e-kamall se pehlay

Ishq main resham jaisay wadon aur khawabon ka rasta

Jitna mumkin ho teh kar lain gard-e-malaal se pehlay

Tumhari yaad ki duniya main din se raat karon

Kisi ki baat chalay main tumhari baat karon

Andeshon kay shaher main rehna par jaye ga

Bil'aakhir her dukh ko sehna parr jaye ga

Waqat ki gardish main aaye to jaan liya hai

Jhooti baat ko sacchi kehna parr jaye ga

Uss ki yaad kay manzir main ab raat gaye tak

Aansu ban kar aankh se behna par jaye ga

Jis lehjay ki khushbu her pal saath rahi ho

Ussay bhi ab be'gana kehna parr jaye ga

Yeh naam mumkin nahin rahya ga , maqaam mumkin nahin rahay ga

Gharoor lehjay main aa gaya to kalaam mumkin nahin rahay ga

Yeh barf mousam jo shaher-e-jaan main kuch aur lamhay thehar gaya to

Lahu ka dil ki kisi gali main qayaam mumkin nahin rahay ga

Tum apni saanson se meri saansein alag to karnay lagay ho lakin

Jo kaam Aasaan samjh rahay ho woh kaam mumkin nahin rahay ga

Wafa ka kaghaz to bheeg jaye ga bad'gumani ki baarishon main

Khat'ton ki baatein to khawab hon gi payaam mumkin nahin rahay ga

Yeh hum mohabbat main la'taluq se ho rahay hain to daikh lena

Dua'ein to khair kon de ga salaam mumkin nahin rahay ga

Khamoshi se haari main

Jaan tujh pe wari main

Tai'ragi kay mousam main

Roshni ..... pukaari main

Ishq main bikharnay tak

Hosla na haari main

Dhoondnay wafa nikli

Qismaton ki maari main

Uss taraf zamana tha

Iss taraf thi sari main

Zindagi ki be'sim'mati

Daikh tujh se haari main

Aainda kabhi uss se mohabbat nahin ki jaye

Ki jaye to phir uss ki shikayat nahin ki jaye

Iss ma'raka-e-ishq main Ae ehal-e-mohabbat

Aasaan hai adawat pe adawat nahin ki jaye

Yeh dil keh ussi zood faramosh pe mayel

Aur zehan ba'zad uss se mohabbat nahin ki jaye

Hum ehal-e-sukhan hain to riwayat kay mutabaq

Masloob kiya jaye riya'at nahin ki jaye

Yeh log tamasha hain to phir in se junoon main

Koi bhi biyaan dil ki hikayat nahin ki jaye

Mujhay mout de keh hayat de

Meray be'hunar mera saath de

Meri piyaas sadiyon ki piyaas hai

Meray kar'bala ko faraat de

Meray rat'jagon kay hisaab main

Koi aik neend ki raat de

Koi aisa ism-e-azeem ho

Mujhay teray dukh se nijaat de

Yeh jo tai'ragi hai gharoor main

Koi roshni issay maat de

Meri shairy kay naseeb main

Koi aik harf-e-sabaat de

Jis tarah maan ki dua hoti hai

Shairy rad-e-bala hoti hai

Shaam-e-tanhai main

Shaam-e-tanhai main

Ab bhi shaair rahoon

Kis ki khatar rahoon

Kon hai jo meray lafz-o-mahni ki aankhon se behtay huye

Aansu'on main chuppay dard chunta phirray

Khawaab bunta phirray

Kon hai jo meray khoon hotay huye dil ki awaaz par

Apni awaz kay hont rakhta phirray

Kon aankhein meri daikh kar yeh kahay

"Kya hua jaan-e-jaan "

Kab se soyi nahin

Iss se pehlay to tum itna royi nahin

Ab bhala kis liye Khoobsurat si aankhein parishaan hain

Apni halat pe khud itni hairaan hain

Kon be'chain ho

Kon be'taab ho

Mousam-e-hijar ki shaam-e-tanhai main

Aablaa paai main

Kon ho hum'safar , gard hai rah'guzar

Koi rasta nahin , koi raahi nahin

Dar pe dastak ki koi gawahi nahin

Dil kay veeran-o-bar'baad safhaat par

Jis qadar lafz likhay thay be'kaar hain

Aik lambi judai kay Aasaar hain

Sochti hoon keh ab

In khayalon se , khawabon se baahir rahoon

Kiyon main shaair rahoon

Kis ki khatar rahoon

Bhout ta'kheer se lakin khulla yeh bhaid khud par bhi

Bhout ta'kheer se lakin

Khulla yeh bhaid khud par bhi

Keh main ab tak

Mohabbat jaan kar jis

Jazba-e-da'reena ko apnay lahu se seenchti aayi

Woh jis ki sa'at-e-sad meharban hi zindagi ki shart thehri thi

Faqat ik sha'iba hi tha mohabbat ka

Youn hi aadat thi her rastay pe uss kay saath chalnay ki

Wagarna tark-e-khawaish par

Yeh dil thora sa to dukhta

Zara si aankh num hoti

Chup na rehtay biyaan ho jatay

Tujh se gar bad'gumaan ho jatay

Zabat-e-gham ne bacha liya warna

Hum koi daastaan ho jatay

Tu ne daikha nahin palat kay hamein

Warna hum meharbaan ho jatay

Teray qissay main hum bhala khud se

Kis liye bad'gumaan ho jatay

Teray dil ki zameen hi na mili

Warna hum aasmaan ho jatay

Her jaanib veerani bhi ho sakti hai

Subha ki rangat dhaani bhi ho sakti hai

Jab kashti daali thi kis ne socha tha

Dariya main tughiyaani bhi ho sakti hai

Naye safar kay naye azaab aur naye gulaab

Surat-e-haal purani bhi ho sakti hai

Her pal jo dil ko deh'laye rakhti hai

Kuch bhi nahin hairaani bhi ho sakti hai

Safar-e-iraada kar to liya par raston main

Raat koi toofani bhi ho sakti hai

Uss ko meray naam se nisbat hai lakin

Baat yeh aani jaani bhi ho sakti hai

Dil tha keh khush khayal tujhay daikh kar hua

Yeh shaher be'misaal tujhay daikh kar hua

Apnay khilaag shaher kay andhay hajoom main

Dil ko bhout malaal tujhay daikh kar hua

Tool-e-shab-e-firaaq teri khair ho keh dil

Aamaada-e-wisaal tujhay daikh kar hua

Yeh hum hi jaantay hain judai kay morr par

Is dil ka jo bhi haal tujhay daikh kar hua

Aayi na thi kabhi meray lafzon main roshni

Aur mujh se yeh kamaal tujhay daikh kar hua

Bichray to jaisay zehan mo'atal sa ho gaya

Shaher-e-sukhan ba'haal tujhay daikh kar hua

Phir log aa gaye mera maazi kuraid'nay

Phir mujh se ik sawal tujhay daikh kar hua