Main bahir ki tamazat se jhulas kar aayi to dekha

Aik khali do'pehar 

Main bahir ki tamazat se 

Jhulas kar aayi to dekha 

Meray ghar main bhi waisi dhoop meri muntazir thi 

Kisi awaz ne matha mera  chooma 

Na koi dil'ruba lehja 

Mujhay banhon main lay paya 

Hasool-e-rizq ki gehri mushaqat main 

Uthaye janay walay zakham par 

Koi sada marham fishan thi 

Aur na koi lafz is ka rafu'gar tha 

Main jis awaz se labrez rehti thi 

Usi kay aik jar'aye ko tarasti thi 

Meray hathon main ik tooti hui pooja ki thaali thi 

Meri shamon ki tarah aaj meri do'pehar bhi 

Tujh se khaali thi 

 

Ruki hui hai abhi tak bahar aankhon main

Ruki hui hai abhi tak bahar aankhon main 

Shab-e-wisal ka jaisay khumaar aankhon main 

Mitta sakay gi issay gard maah-o-saal kahan 

Khinchi hui hai jo tasveer-e-yaar aankhon main 

Bas aik shab ki musafat thi aur ab tak hai 

Mah-o-najoom ka sara ghubaar aankhon main 

Hazar saahib raksh saba mizaaj aaye 

Basa hua hai wohi shah'sawar aankhon main 

Woh aik tha par kiya us ko jab teh talwar 

To batt gaya wohi chehra hazar aankhon main 

Kiyon mujh pe hua hai meharban tu

Kiyon mujh pe hua hai meharban tu 

Ik zarha-e-khaak , aur kahan tu 

Main dhoop ki aadi ho chali thi 

Kiyon mujh pe bana hai sayeban tu 

Main teri zameen nisf shab hoon 

Taron se bhara mera aasman tu 

Aisay hi hamari soch yak'jaan 

Main nataq tera  , meri zuban tu 

Tayar hoon main safar ko lakin 

Kashti ka utha'ye baad'ban tu 

Kitna bhi ho mera sakhat lehja 

Deeba-o-hareer-o-par'niyan tu 

Ik aam ghareeb-e-shaher hoon main 

Kya sun kay karay ga daastan tu 

Pathar main gulaab dekhta hoon 

Kis darja hai mujh se khush'gumaan tu 

Ab thora sa waqat reh gaya hai 

Za'iya karon main , na raigaan tu 

 

Na bujh rahi hai na ab kay bharrak rahi hai hawa

Na bujh rahi hai na ab kay bharrak rahi hai hawa

Hamaray dil ki tarah se tapak rahi hai hawa

Rakhi hai her ik ghar kay sehan main miyat 

So waqfay waqfay se jaisay sisak rahi hai hawa

Rakhi thi shaher ki buniyaad kaisay logon ne 

Yeh kon log hain jin main bhatak rahi hai hawa

Sehar kuch aur tha aur ab yeh haal baagh ka hai 

Keh paon rakhtay huye bhi tha'thak rahi hai hawa

Yeh baaghban hain  keh gul chain nadeem ya siyaad

Keh in se haath milatay jhijak rahi hai hawa

Bareeda jani pe bhi shaher saans leta hai 

Bhout se logon kay dil main khatak rahi hai hawa

Sulag raha hai mera shaher , jal rahi hai hawa

Sulag raha hai mera shaher , jal rahi hai hawa

Yeh kaisi aag hai jis main pighal rahi hai hawa

Yeh kon bagh main khanjar ba'dast phirta hai 

Yeh kis kay khouf se chehra badal rahi hai hawa

Shareek ho gayi sazish main kis kay kehnay par 

Yeh kis kay qatal pe ab haath mal rahi hai hawa

Prinday sehmay huye hain darakhat khouf zada 

Yeh kis  iraday se ghar se nikal rahi hai hawa

Zulam kay hathon aziyat main hai jis tarah hayat

Zulam kay hathon aziyat main hai jis tarah hayat 

Aisa lagta hai keh ab hashar hai kuch dair ki baat 

Roz ik dost kay marnay ki khabar aati hai 

Roz ik qatal pe jis tarha keh mamoor hai raat 

Khaima-e-ghair se mangwaye huye yeh mukhbar

Run paray ga to gharri bhar ko na de payein gay saath 

Kis tarah jaan sakay Ta'irk-e-no amooz

Kon hai jaal kusha , kon lagaye huye ghaat 

Aasteeno main chupaye huye her ik khanjar

Aur guftaar ki babat main hain sab qand-o-nibaat