Imran's Poetry: 06/27/14

Jun 27, 2014

Zakham muskuratay hain ab bhi teri aahat par

Dard bhool jatay hain ab bhi teri aahat par

Shabnami sitaron main phool khilne lagta hai

Chaand muskurata hai ab bhi teri aahat par

Umar kaat di lakin bachpan nahin jata

Hum dia jalatay hain ab bhi teri aahat par

Teri yaad ayi to neend jati rahi hai

Khwaab toot jatay hain ab bhi teri aahat par

Jo sitam kare aa kar sab qabool hai dil ko

Hum khushi manatay hain ab bhi teri aahat par

Teray hijjar main hum pe ek azaab taari hai

Chonk chonk jatay hain ab bhi teri aahat par

Yaadon ky samndar main ek lehar si aaj ayi hai

Yaadon ky samndar main

Ek lehar si aaj ayi hai

Machalti hai bhout aaj woh

Tarap tarap kar chitano se takrati hai

Hai kinara magar kinara nahin

Yeh baat na ab tak samjh pai hai

Hai khula asmaan charon taraf

Phir bhi bhout tanhai hai

Yaadon ky samndar main

Ek lehar si aaj ai hai

Machalti hai bhout aaj woh

Tarap tarap kar chitano se takrati hai

Churaye phirtay thay jo tujh se hi nazrain aksar

Un hi nazron ko , teri deed ko , tarastay dekha

Woh jo kehtay thay , tera aks nahin un aankhon main

Un hi aankhon ko , teri yaad main basatay dekha

Dil ky darwaze jin ky her dastak pe waa hotay thay

Un hi ky dil ko , sirf teray liye , ab dharaktay dekha

Dabi dabi si chingaari se bhi , jo naalan thay

Phir ishq ka shola , un ky bharaktay dekha

Tu bahaar ban ky titli gulaboon ki raah'guzaar main reh

Misal moj-e-saba , khaima-e-bahaar main reh

Agar pasand hon sehra ki chandani raatain

Tu meray dost dil ki raah'guzar main reh

Na cheen mujh se rafaqat ki dil'nasheen kushboo

Meray habeeb meray pyaar ky hisaar main reh

Na in shareer nighaon ki maan tu ae dil

Hamara dil hai hamaray hi ikhtiyaar main reh

Dar band abhi se na kar , dia na bhuja

Kuch aur dair zara us ky intizaar main reh

Woh dekh jheel main rehta hai jis tarah mehtaab

Tu meri jaan, meri chasham-e-ashk'baar main reh

Is zamaney se na hum koi gila rakhain gy

Dil lagayein gy to shart-e-wafa rakhain gy

Na dikhyein gy kabhi dil pe laga zakham unhain

Dard uthay ga magar dil ko daba rakhain gy

Sab hata dain gy teri raah ki rukawat hamdam

Ghar ky dareechay ko her waqat khula rakhain gy

Un ki her baat ko bhoolay se na bhoolain gy kabhi

Un ki yaadon ko bhi seenay se laga rakhain gy

Toot bhi jaye gi umeed jo teray aanay ki
Ek diya phir bhi hawaon main jala rakhain gy

Doston se kaha karta tha woh bhi

Kiya yeh bhi jee sakta hai meray bin

Mazaq ban jaya karta tha jo doston main

Khud ko tanha samjhta tha woh mere bin

Issay had-e-deewangi kahoon ya pagal pan

Tasawar main woh baatein karta tha mere bin

Woh mousamon ko badalney se darta nahin tha lakin

Bahaar main murjhaya karta tha mere bin

Ab aas toot gayein us ky aanay ki

Lagat hai jeena seekh chuka hai mere bin

Gham ki baarish ne bhi teray naqash ko dhoya nahin

Tu ne mujh ko kho dia main ne tujhay khoya nahin

Saazon ky badlay , dua hum ne ki thi

Jafaon ky badlay , wafa hum ne ki thi

Sabhi kuch mita kar , sabhi kuch bhula kar

Shikayat bhi un se kahan hum ne ki hai

Mohabbat ky badlay mohabbat nahin hai

Ulfat ky peechay adawat chuppi hai

Woh aisa karain gy , woh aisa kahain gy

Un hi kay liye sab kuch ganwaya

Woh hum pe marain gy , woh hum pe mittein gy

Yeh chahat bhi un se kahan hum ne ki hai

Zamaney ki chaalon ko samjho zara tum

Mohabbat main khud ko sambhalo bhala tum

Tum hi ko chahein , tum hi ko srahain

Yeh qasmain bhi un se kahan hum ne lein thein

Jis ko lenay taajron ka dasta nikla

Bikney aya to tawaqo se bhi sasta nikla

Apney seenay main chupaye huwey teri yaadain

Hum par her shakhs awazain kasta nikla

Hum ne her baat bhout soch samjh kar ki hai

Bas ik lafaz-e-mohabbat tha jo barjasta nikla

Woh jis ne paaon talay kitney paaon masal daalay

Kal wohi shaks mohabbat ko tarasta nikla

Teri muskaan se mansoob rahi rahat meri

Mera her gham tere gham se paiwasta nikla

Hum pe ilzaam jo dhar jata hai

Is ka ehsaan hai , kar jata hai

Aap to baat faqat kartay hain

Teer sa dil main utar jata hai

Chandani sath hi chalti hai sada

Jis ufaq par bhi qamar jata hai

Chaid sa kar ky naya seenay main

Hadsa aa ky guzar jata hai

Dhoop taqseem jo karta hai

Aap tareeki main mar jata hai

Samjh jana keh woh main hoon

Hatheli samne rakhna

Keh sab aansoo girain us main

Jo ruk jaye ga honton par

Samjh jana keh woh main hoon

Kabhi jo chaand ko dekho

To tum muskura dena

Jo chal jaye hawa thandi

To aankhain band kar lena

Jo jhonka tez ho sab se

Samjh jana keh woh main hoon

Jo ziada yaad aaon main

To tum ro lena jee bhar ky

Agar hichki koi aye

Samjh jana keh main hoon

Agar tum bhoona chaho

Mujhay shayed bhula do tum

Magar jab saans lena tum

Samjh jana keh woh main hoon

Mohabbat hamsafar meri

Kathan hai zindagi kitni

Safar dushwaar kitna hai

Kabhi paaon nahin chaltay

Kabhi raasta nahin milta

Hamara sath de paaye

Koi aisa nahin milta

Agar main youn guzaron to

Yeh shab-o-roz nahin kat'ty

Magar ae meray maalik

Mujhay shikwa nahin tujh se

Main jaan pe khail sakta hoon

Main dukh jhail sakta hoon

Agar tu aaj hi kar de

Mohabbat hamsafar meri

Mohabbat rang badalti hai

Aur is ka koi bhi rang mustaqil

Pukhta nahin hota

Naveed-e-sehar ki koi

Daleel-e-be'kraan jaisay

Kisi mushkil safar main

Qaafla ik be'imaan jaisay

Kabhi hairaan se lehjay

Koi dil bad'gumaan jaisay

Jhulasti dhoop main saaye

Shajar-e-meharbaan jaisay

Kabhi na rukney wala zindagi ka karwaan jaisay

Koi rangeen si

Sangeen si

Ik daastaan jaisay

Mohabbat ibtida main baal kholay muskuraati hai

Kabhi nazam main

Her shair main

Her ista'aaray main

Ghataon ki tarah ghir ghir ky aati hai aur barasti hai

Kabhi sehra ki man'nind

Chand boondon ko tarasti hai

Kabhi ik bul'bulay ki tarah

Pal do pal ko hansati hai

Kabhi sadion talak

Dil ki nihaan khaano main basti hai

Kabhi khurd ky andeshay

Kabhi hans hans ky roti hai

KAbhi ro ro ky hansti hai

Mohabbat aadmi ki zindagi ka dhang badalti hai

Mohabbat khud rang badalti hai

Mohabbat rang badalti hai

Juda hona hi tehra to gilay kaisay shikayat kiya

Juda hona hi tehra to

Gilay kaisay shikayat kiya

Juda ho jayein chupky se

Na tum bolo na main bolon

Hamaray bol parney se

Judai phail sakti hai

Hawaon main

Fizaon main

Judai zaat main bhar lain

Chalo hum is tarah kar lain

Kisi sunsaan raastay ko

Kisi bhi mor par dono

Juda ho jayein chupke se

Na tum bolo na main bolun

Hamaray bol parney se

Judai phail sakti hai

Mohabbat main deewangi zaroori hai

Mohabbat saray rishtay natay tor deti hai

Faqat ik dil se rishta jor lati hai

Mohabbat ki haddain hoti nahin

Haddon ko tor dena

Is ka shaiwa hai

Agar tumhain mujh se

Mohabbat hai to phir

Yeh rishtay naaton ki

Bandashein torna hon gi

Agar aisa nahin kar sakte to

Phir hum tum apni khwaish ky

Khiloney tor detay hain

Dilon ko mor letay hain

Mohabbat chor detay hain

Dukh hantay hain

Jab aankh main ansoo atay hain

Jab dil ki dharkan roti hai

Jab door kahin sanatay main

Ek chaap si koi hoti hai

Jan munh main ansoo girtay hain

Dukh hantay hain , dukh hanstay hain

JAb raat kay saye dhaltay hain

Aur panchi pankh andheray main

Ghar loat ky aya kartay hain

Phir hum jaisay deewane log

Parem ki aag main jaltay hain

Dukh hantay hain , dukh hanstay hain

JAb waqat ky koray kaaghaz par

Bas rang bharna reh jata hai

Aur sang chalna reh jata hai

Phir apne saat samandar paar

Door kahin ja bastay hain

Dukh hantay hain , dukh hanstay hain

Gir jaayn zameen par to sambhaly nahi jaaty

Bazaar mein dukh dard uchhaaly nahi jaaty

Aankhon say nikalty ho magar dhiyaan mein rehna

Tum jaisy kabhi dil say nikaaly nahi jaaty

Ab mujh say in aankhon ki hifazat nahi hoti

Ab mujh say tery khawb sambhaly nahi jaaty

Jungle k ye pouday hain inhein chhorr do mohsin

Gham aap jawan hoty hain, paaly nahi jaaty

Hum ehl-e-ishq hain mohabbat zaat rakhty hain

Essi mein din guzarta hai essi mein raat karty hain

Parinda aakhri ye keh gaya khushk jheelon se

Mujhy majboor hijrat pe mery halaat karty hain

Nikal aaye hain jaanib-e-sehraa to darr kaisa ?

Chalo kuch din rotay hain chalo barsaat karty hain

Sunna hai chand utra hai sunehri jheel pe yaaro

Chalo kuch dair milty hain chalo kuch baat karty hain

EK Jurm Huwa Hay Hm Se

Kisi rishte Se Wfa Kr Baithe

Kuch Apna Sa samj Kr usko

Sub Raz Bta Baithe

Phir Usi rishte Ki Rah Me

Dil-0-Jan Ganva Baithe

Is Jurm Ki Aesi Sza Mili Keh

Hm Un Se Juda Baithe

W0 Yad Boht Ate

J0 hm ko Dil Sy Bhula Baithy.

Door reh kar na karo bat qareeb aa jao

Yad reh jae gi ye rat qareeb aa jao

Aik mudat se tamana thi tumhain chuhne ki

Aj bus main nahin jazbat qareeb aa jao

Sard sholay se bharkte hain badan main sholay

Jan le le gi ye barsat qareeb aa jao

Es qadar hum se jijkane ki zarurat kya hai

Zindgi bhar ka hai ab sath qareeb aa jao

Humein ab kho k kehta hai, mujhe tum yaad atay ho

Kisi ka ho k kehta hai mujhe tum yaad atay ho

Samundar tha to zor-o -shor say lehren bahata tha

Ab qatra ho k kehta hai mujhe tum yad atay ho

Bayan karte jo haal-e-dil to youn he muskura deta

Ab wohi ro k kehta hai mujhe tum yaad atay ho

Na poch us ki bad'nasibi ka aalam tu dost

Keh sub kuch kho k kehta hai, mujhe tum yaad atay ho

Kaash us se milne ka koi sabab ban jaey

Phir kiya ho k jaisa woh pehle tha ab ban jaey

Rishta us se ho mera kuch is tarah ka

Main haath uthaon dua k liye woh lab ban jaey

Itna to yaqeen hai k woh ik din lout aaey ga

Is baat ka pata nahi woh mera kab ban jaey

Koi ja k usay mera yeh paighaam to de de

Hukma'raani kare dill per woh mera jab ban jaey

Mohabbat mein youn zabardasti achi nahi

Chalo jab us ka dill chaahe woh mera tab ban jaey